【真人真事】當年中七AL，我打左成年天堂二，但我無悔！: 85-經濟封鎖
「你地咁多人，唔係淆底下話？」紅同艾爾不斷係門外，對住緊閉既理想世界盟屋叫囂。
光頭係世界頻回應：「紅樹葉既狗唔好係到亂吠！」
艾爾生性火爆，邊忍得住？立即就一句喪家犬敗軍將回罵過去。平時呢類罵戰比盡都係得艾爾一個人會咁好氣回罵，但今次大家都打到興起之際，佢地就龜屋，一堆戰意無從發泄，於是連soso、風聲鶴唳，以及幾位新加入既成員等等都開始回罵理想世界，武鬥就咁變成文鬥。
嘴炮呢家野我一向都唔好，我問暗殺：「暗殺，入面咩情況？」
暗殺一早已經隱身穿牆入左去佢地盟屋入面監視住，回報軍情：
「報告將軍，敵軍依舊龜縮屋內，毫無動靜，無還擊意思！」
兩軍就咁隔住道門，一邊屋外一邊屋內，不停對罵。理想世界愈鬧就愈少人，而紅就帶同贊助部隊及嘴炮人士繼續捕係奇岩傳點。
「打完喇，想散就散吧。」我宣佈。
其實理想世界仲有好多反擊機會，用盟屋既弱雞++，再用盟屋傳走徒步跑番黎奇岩，憑藉人數及武器，依然有反制奇岩機會。但係嘴炮大戰一開始，就揭示左呢場戰事已經落幕。係天堂二入面，一場大戰既最終結局通常都係淪為嘴炮戰，因為愈高級level就難昇，每死一次跌10%~20%經驗值，呢個數字唔係講笑，就算呢到係私服，我地呢班八十幾級既玩家要練20%經驗都要花幾個鐘頭時間。
好似呢種實實在在，既唔係攻城又唔係盟戰，係殺完人會變紅而且會跌經驗既大戰，好少血盟可以「負擔」得起，更加唔會有血盟鐘意。所以當武鬥變成文鬥，大家有空閒睇番自己跌左既經驗值之後，都會清醒過黎，冇人會再有衝動想再開戰，哪怕反擊會有勝擊。尤其自從樹跌左把+1000弓，gm改左紅人都唔會跌裝之後，就連開戰唯一既著數都冇埋，基本上唔係血海深仇大家都唔會開拖。
嘴炮大戰，可以話係兩盟停戰既一個下台階，而結果通常都係一句：「同你講都晒氣，廢事採你，我去練功！」就玩完。當然，到底邊個先係真正既輸家邊個先係真正既贏家，所有人都心中有數。
趁住嘴跑大戰，我去左帶隊練功洗白*，紅同艾爾卻一直守住奇岩傳送點。起初都仲有唔識死既理想世界盟員飛過黎，但殺左幾次之後就冇人再黎，理想世界亦冇反擊冇還口。
（*洗白即係將紅名洗番變白名，主要係靠打怪。）
是晚，全服都默認，奇岩係理想世界禁區。
紫幽俾韓修修先上線，係奇岩一出現，一堆人就急住向佢匯報今日發生既搶地龍事件。
紫幽聽罷，密我：「葉，你真係好頑皮！」
我當然明白佢既意思，耍晒手做晒動作無賴地問：「咁點算？」
「唯有等韓修修上線睇佢有咩反應囉……」跟手就向旁邊既我發箭：「頑皮要受罰！」
紫幽用既係+1000弓，我用既係+25防，痛當然痛，我就一直由佢射…射到紅血，開狂，行過去，紫幽亦冇意思避，由得我斬兩刀就死左。
「又蝦我。」紫幽訓係地下說說笑，一道靈光閃現，又立即企番起身－－旁邊一個娃娃將佢復活，咁樣就唔會扣經驗。
「斬我地盟主，未死過！」一眾壬生盟員又向我追打……
我地一直係奇岩嘻笑怒罵，終於等到韓修修上線。我知佢上線，因為紫幽知；紫幽知佢上線，因為佢地兩個有互加好友。
上線過一陣，紫幽同我講：「韓修修要同我傾傾計。」
「我陪你？」
紫幽答：「我自己去得喇，等陣同你講。」然後就自己飛走左。
未幾，大綠就同我講，紫幽係佢地血盟頻道內問壬生一族各盟員既意見－－到底仲想唔想同理想世界合作，維持一齊食龍單雙日打王，抑或散伙，廢和約，唔再合作？
佢地盟內反應，大都係話唔再相信理想世界，單雙日食王講過好多次，最尾都只係變成搶王，地龍火龍佢地一樣可以偷食，兩盟合作一d意義都冇。
當然亦有人持反對意見：「萬一唔合作，理想世界打我地點算……」
亦有人反駁：「不過唔合作食王姐，又唔係乜野深仇大狠，唔會打交既。」
壬生盟內意見不一，最終都係紫幽話事。
最終，紫幽番到黎奇岩城後，第一句就同我講：「我氣上心頭，同靜心嘈完黎。」
「咁結果呢？」
「佢地俾我鬧到一粒聲都唔出，我咪自己番黎囉。如你所願啦，壬生理想大概散伙喇。」
我有少少尷尬，只好答紫幽：「um…咁我係咪應該獎勵一下你？」
紫幽倒冷淡：「哼，你窮鬼有咩可以獎勵我？」
窮鬼呢兩個字用得冇錯，因為我從來都唔會打怪賺錢，亞丁既收入又幾乎俾晒盟友，真係一貧如洗。相反紫幽成日帶團打王，而佢既海音城堡因為近高級獵場地獄邊界島，所以都有微量收入，加起上黎紫幽真係一個如假包換既小富婆。
但我平時得閒無野做，總唔係白廢時間。錢雖然冇乜，古靈精怪野，我有大把。
「你等陣。」說罷我就飛奔去倉庫，又飛奔番黎：「送你，藍玫瑰花。」
係交易欄一望到，紫幽都未按確定就立刻問：「攻瑰花！係邊到得番黎！？！」
「哼，唔講你聽。」
「多謝你喇小氣鬼。」
話鋒一轉，我問紫幽：「韓修修有冇提過同我地係奇岩開戰？」
紫幽詳細回答：「冇。佢只係同我講壬生理想搶王既事，仲要我道歉，………(下刪數百字)」
既然韓修修冇同紫幽提奇岩一戰，咁佢應該會黎搵我。
果然，當我仲模擬緊韓修修會講乜，我應該點回應，接住落黎佢又會點答既時候，韓修修密左我一句：
「提一提你，而家奇岩稅收係25%，亞丁稅收係0%。」
仆街！
我完全冇諗過韓修修會用調稅收黎回應奇岩一戰！奇岩係屬於理想世界，而亞丁就係日殺既，兩個經濟重區都係佢地手上，佢地的確可以咁樣玩野，呢點居然俾我完全忽略左！！毫無疑問，亞丁而家依然係紅樹葉禁區，而且佢地全部人都集中係亞丁，根本冇可能偷偷地去買野。結果我地霸左個奇岩鎮番黎，終於唔洗偷偷摸摸行街，卻等同俾錢理想世界洗！
隨即明白，點解佢地咁順攤，由得我地霸奇岩唔黎反擊，因為佢地完全可以透過經濟手段威脅我地，根本唔洗流血！
我故作興鬆：「想當初我地奇岩收15%稅都被人投拆，而家真係世界變。」
韓修修倒幾有閒情逸緻，繼續同我吹水：
「唔鐘意可以黎亞丁買野啊，亞丁店員既招呼好親切。」
我即刻係英雄頻道抗議：「理想世界將奇岩稅率調到25%，我地呢d小市民點生活呀！」
光頭卻回我一句：「如果唔係你地搞搞震，我地會調25%？擺到明係針對你，有種黎亞丁呀！」
韓修入又補多句：「亞丁長期免稅，歡迎各位到亞丁補給採購！」
今日既奇岩發生咁大件事，幾乎所有人都知道係私服內兩個大盟大戰，兩個大盟都唔好惹，有少少常識既人都知道講多錯多唔講唔錯既道理，為得罪是但一方，一句嘴都唔插，總之亞丁有平野，就去亞丁買野，其他事就事不關己。
只有極小數幾個傻仔，見到奇岩25%就鬧，見到光頭話我地搞搞震又鬧，基本上都唔知成個世界發生緊咩事。
世界頻道唔洗一分鐘又變番吹水樂園，冇人擔心奇岩既25%稅，個個都食住花生等睇謝咁款。
當初之所以要反紅樹葉禁區，要打呢場硬仗，就係因為唔想再過呢種去補足彈藥、去行街shopping都要開分身，仲要驚死俾人發現係分身之後走唔番出城，呢種過街老鼠一樣既日子。
辛辛苦苦打完，以為終於可以台起頭做人，但估唔到，理想世界調一調稅，就可以強逼我地一係進貢，一係繼續做過街老鼠。
我最恨既，係我自己，居然完全忘記左稅收呢點……
我實在忍唔住，對住個電腦螢幕鬧左一句：「仆街……」