【真人真事】當年中七AL，我打左成年天堂二，但我無悔！: 86-宣戰
艾爾：「屌佢班仆街，咁即係打完等如冇打！」
soso：「都唔係呀……我上次買野個分身俾佢地發現左，困死左係奇岩出唔到城，而家可以出番黎喇。」
紅：「你地要乜野我幫你地買喇，反正佢地耐我唔可。」
艾爾：「屌！我寧願係奇岩買貴d都唔過亞丁買！」
小愛：「奇岩買野都係一樣送錢佢地。」
艾爾：「屌！」
所謂士可殺不可辱，做左過街老鼠成個幾星期，難得打完一場勝仗都仲要做？冇人會肯。一d心水清既玩家留意到呢個事實，開始實行抽水大計，唔洗一日，佢地就發展出遊戲入面既隱藏職業－－水貨商。
係亞丁同npc買箭、藥水、回城卷、魔法石等等必需品番黎，再係奇岩交易區賣，食差價，就係水貨商既抽水搵錢門路。呢班人既銷售對象，除左紅樹葉之外，仲有好多不知就裡，果日冇online又冇人提佢地既人，一直都唔知亞丁奇岩中間有稅收差，傻傻地見奇岩賣得貴就搵附近既玩家買。仲有一d以奇岩為據點既玩家，為左貪方便又或者慳番守門人傳去亞丁既錢，總總原因，亦都直接同玩家買必需品。鑑於成本極低，漸漸地就連阿豬阿狗都走黎掛個分身擺檔，居然都帶起左幾日熱潮。
私服入面天子第一號水貨商，就係紅。
憑佢既霸氣，紅雖然係紅樹葉一員，卻視禁區如無物，直出直入，直接傳去亞丁，直奔去npc前買野，之後直接衝去守門人，傳番奇岩。理想世界既人單挑只會被紅秒殺，吹雞又唔夠快手，紅買野又唔定時，久而久之理想世界都由得佢自出自入。
而紅就咁樣，久唔久就幫盟內入貨，買完番黎就立即係奇岩原價散貨。大概因為紅既舉動太觸目，星期六朝早一開做，夜晚已經有人跟風，帶起水貨熱潮。
除左呢輪水貨熱潮，呢兩日最熱門既話題就係壬生一族同理想世界既關係。紫幽同韓修修既談判，係紫幽發火韓修修語塞下不了了之，結果星期六本應屬於壬生一族既雙日王，係我地仲打緊巴溫果陣，理想世界就去左偷食巴子同札肯。我知，因為我放左teleport係幾隻王附近，有咩風吹草動一睇就知。
「如果話談判未完成所以唔算數，咁佢地係談判後連偷兩王，可以算係表態喇掛？」我係同盟頻問
一直屬於和平派，由紅樹葉跟紫幽過檔壬生一族既"P仔"答：
「嗯，紫幽都話左唔會再忍讓，佢地仲繼續搶王，態度好明顯。」
壬生一族其他人都冇講乜野，紛紛表示認同，大概佢地都預左。
見到眾人反應，我立即打蛇隨棍上：「咁聽日亞丁攻城，你地參唔參加？」
紅呢個時候卻走黎答句爹，硬生生踢走我既問題：「聽日係我最後一場攻城戰。」
此話一出，所有人吃一大驚，全部都係同一個反應：「點解！？」
紅既答案係：「大學就黎考試，我都冇上過堂咁濟，唔想第一個sem就肥。」
盟內好多人都深表同情，似乎個個都感同身受，紛紛表示明白，仿佛個個都為左打機肥過考試咁。我心裡面一陣鬱悶，有邊個可以感同身受得過我？在場得我有資格講明白呢兩個字！
紫幽倒心水清，知道紅講既係大話，立即密我問：「紅把弓到期？」
我故作驚訝：「咁醒目既？又係你d女人直覺？」
佢得戚到打句英文答我：「of course.」
紅把弓，正確黎講，仲有三日就到期，但呢點一直以黎都係得我同樹知道，就連紅把弓+幾都只有紅樹葉盟內極少數人知道。一直以黎大家都只係知道紅好強，打得又擋得，猛到從來都唔放任何人在眼內，係贊助就肯定架喇，但係+幾？冇人知。連+幾都唔知，更莫論幾時到期。
事實上，雖然贊助武器既存在一早係同盟內通晒天，但除左幾個贊助玩家同核心成員之外，眾人對贊助武器其他資訊所知什少。因為大家都知道贊助武器係一個不能公開卻又半公開既秘密，大家都知道有呢把野，但大家更加明白唔可以公開討論呢把野－－所有贊助玩家都俾gm明示過要禁止討論。
所以，盟內既普通玩家對贊助武器其實冇乜概念，只知道好強，強到可以秒殺普通玩家，但實際上有幾強，相互之間邊個強d？冇乜人知。直到樹跌武器曝露左+1000、光頭自爆爆左把+1500，大家先知原來贊助武器之間都有分強弱。
而紅，係佢地心目中顯然屬於超強級別，個個深表完同情之後，第一個反應就係：「阿紅哥，你考試期間，就由我幫你保管把弓吧！」
紅卻開左張空頭支票：「如果攻破亞丁，你地就猜包箭dup，嬴果個我送左把弓俾佢，反正唔玩。」
話佢空頭又唔係真係空頭，因為，紅話送把「弓」，卻冇話係咩弓，木弓又係弓，王朝弓又係弓……
大家卻毫無留意，一係俾攻破亞丁吸引，表示參戰，一係俾唔玩既紅吸引，叫紅：「考完試咪番黎玩囉。」
紅冇回答，樹卻問我：「葉你宣左戰未？」
樹一問，我先醒起！
呢兩個星期實在發生太多事，又戰神，又可夢風，又禁區又打大交，我居然完全忘記左宣戰！
平時一打完城戰，過兩日我就會即刻宣戰。而要向亞丁城堡宣戰，就一定要搵亞丁廣場上既NPC，偏偏亞丁城堡同亞丁城鎮係連住，個NPC就係亞丁城鎮門口，而亞丁自打完城戰開始一直都係紅樹葉禁區，所以我一直都嫌煩冇去宣戰，結果拖拖下就拖到今日！
「我而家去宣。」
樹冷靜地分析：「仲有幾個鐘就DEADLINE。佢地知你未宣戰，今日肯定有人守住NPC，你一個人去等同送死。要宣戰，我地就全部人一齊，直接傳去亞丁，殺過去。」
紫幽已經識做，立即問：「聽日要參戰既報名，我踢你地再加紅樹葉。」
壬生一族同理想世界決裂，加上紅既利誘，帶動人數非同少可。咁樣一踢一收，紅樹葉居然唔夠位收齊咁多人，要開埋狼來了再收。
空閒間，我卻諗到更簡單既方法，見眾人仲忙緊踢人收人既轉會事宜，我廢事煩佢地，就命暗殺：「你隱身去睇下路，順便試下幫我宣戰。」
宣戰唔需要透過盟主，只要有盟主授權就可以，暗殺一向係盟內幹部，當然有權對外宣戰。隱身埋去，無論幾多人都一樣神不知鬼不覺，雖然係同NPC對話一刻就會現形，但宣戰只不過係按一個制，肯定快過理想世界殺佢。
結果，暗殺第一次任務失敗：「報告大將，敵軍有埋伏，仲定時放"閃光術"。我係旁邊行左一陣就俾佢用"閃光術"破左隱身，立即圍死左，宣唔到戰。」
……我又點估到佢地會咁萬無一失，居然係宣戰NPC旁邊定時放閃光術咁狗呢！
本來樹既意思係打算收齊人就奇襲，天降神兵，殺理想世界一個措手不及，點知居然俾佢地發現左暗殺，之後肯定有所防範。
我唯有向同盟頻道內眾人自首：「我諗我岩岩，好唔小心咁，打左草驚左蛇。」
樹立即問：「點打草驚蛇法？」
我就將派暗殺睇路既事情原原本本係同盟頻道說明。
樹對計劃被打亂倒冇乜反應，佢同我一樣係有plan b既人，立即就有對應方法：「佢地一定會派人封傳點，我地傳象牙塔跑過去。」
我卻有另外諗法：
「竟然已經打草驚蛇，倒不如直接傳過去。既然佢地封緊亞丁，而家呢到大大話話有七十幾八十人on緊line，同時傳去亞丁，百幾二百人一齊聚係亞丁傳點，肯定lag到拆天！到時根本唔洗理佢封點，直接壓過去。」
樹：「又lag到hang機點算？」
地獄都表示反對：「葉呢個計劃太高風險，我地只係想宣戰，樹既計劃比較安全。」