【真人真事】當年中七AL，我打左成年天堂二，但我無悔！: 84-反禁區戰 (三)
樹一講"抹黑焗你停手"，我立時就明白。
韓信係英雄頻道發出既說話，第一句係俾仍然留係夢幻島未番黎既理想世界人員聽，第二句係講俾普通人聽。
「各位唔好番奇岩」，就如同字面一樣，係叫理想世界唔好番黎奇岩住。佢地係自己盟內既頻道一定已經知道奇岩已被封傳點，韓信叫人唔好黎，佢地自然唔會黎。
但係第二句「紅樹係奇岩亂殺人」就唔同了。
真心想叫人唔好黎，點解係話亂殺人而唔係話封傳點？講亂殺人，除左我地雙方當事人之外，其他人就只會意識到奇岩入面打緊大交，根本冇人會估到實情係封鎖緊傳送點，一傳過黎就即死。韓信懶係擔憂人地安危叫人唔好黎，反而更加吸引外人黎八掛湊熱鬧。我地用範圍技封傳點，又點會理得到邊個打邊個？結果理想世界殺唔到，反而殺埋一大堆唔相關既人，冇啦啦成為人民公敵。
最簡單既解決方法，就係停手，唔再封傳點－－呢個就係韓信既目的。韓信條屍就係到睇住，一停手，就變成由理想世界佔先機，整場戰事既節奏都會由佢地主導，佢地話幾時黎就幾時黎，我地只能死守。理想世界本身人數同實力都係紅樹葉之上，如果連節奏都被其掌握，我地就輸晒。
但就算我明白又點？繼續封傳點，必定會殺到其他玩家，到時候就真係如韓信所講"亂殺人"，隨時被佢反利用群眾，理想世界連手都唔洗出，而後續影響仲唔單止係一場戰事咁簡單。
封奇岩又唔係，唔封奇岩又唔係………咪住！奇乜野岩！？我地本身就係遊擊隊黎，戰場又點止局限係奇岩！
「停手。暗殺隱身先飛夢幻島睇路，我地全部去夢幻島殺人！」
理想世界而家一半係夢幻島一半係奇岩，戰力分散，簡直係分別擊破既良機。但良機亦好有可能係一個陷阱，萬一佢地成班人係夢幻島反封傳點呢？先派斥侯去睇一睇路，雖然麻煩，卻係必須。
唔洗一秒暗殺就回答：「111。」1係positve，0係negative，為左省略打字時間我地戰時一般都係咁樣溝通。
雖然思緒已經轉左幾個圈，但現實中離韓信係英雄頻道上發出逃難公告只不過係三四句說話時間。暗殺111，我地全體就立即飛走，奇岩廣場上只剩下一堆重壘既屍體。
一瞬間，夢幻島傳送點就擁出三十幾人，紅樹葉眾人早已經收到指示，無視任何事物同攻擊，總之一到場就立即散開。
如果佢地冇一直放技能封鎖傳送點，咁一到步就立即散開，任何人都唔會反應得到。
理想世界二十幾三十人本來就準備經守門人傳送番奇岩，卻硬生生被韓信叫停，應該都有少少心理準備面對任何突發事件。但有準備還有準備，反應唔到就係反應唔到，由出現等到佢地個個識得拎起弓舉起法杖之際，我地已經完全散開晒，冇可能再食範圍技。而呢班人卻呆站原地，完全忘記走位，忘記左自己一大班人都散佈係守門人附近。
美國風把杖仲係我手上，我正正係理想世界眾人既中心，一放封印自身中心圓型範圍全中！又不停用"帕格立歐之心"幫整個盟回血，一把+1000魔杖係手，霸主既戰力以幾何級數倍增，一大堆範圍封印技能只要打+1000以下幾乎都係必中，我邊走邊放邊回血仲要邊橙汁，都唔知幾多人中左招，總之對話欄顯示出一大堆命中，人人有份永不落空。
夢幻島既戰況一面倒，分散戰力後理想世界現場人數比我地仲少，雖然有一大堆贊助武器，但同+1000霸主比又剛好打個和，只難為美國風，自己把杖打咁耐自己都未用過。結果一個杯面都唔洗既時間，理想世界全員死晒番夢幻島復活區。
打左近兩三分鐘，韓信等等係奇岩既人都唔過黎幫拖，而呢班復活區復活左既人又唔跑番過黎開戰。
「佢地做乜兩批人都企定定唔過黎？」紅係血盟頻問完，就係白頻大叫：「過黎打我丫笨！」
soso答紅：「好明顯韓信就係奇岩傳送點捕緊我地。」
樹倒係最清醒：「其實佢地應該以為我地係呢到封緊傳點，所以先唔黎。唔好忘記我地就係守門人旁。」
少少空檔時間，我先將身上武防比番美國風，再施令：
「soso艾爾，傳我法力，我開無敵，然後大家立即飛回奇岩封傳點！」
話剛說完，兩道電就由soso及艾爾各我射出，我舉起手杖，口中諗諗有詞：「魔法陣，不滅之火！」全體盟員身上瞬間出現火光，然後再次消失於眾人視野。
一到奇岩，果然韓信已經帶人企係旁邊狂轟，但我地一身都係不滅既火焰，驚佢條毛！？
紅一直對守門人狂放"箭雨"，美國風就不停放"墜星術"，傳送點就係守門人隔離，任何人一飛黎奇岩就會硬食+2000弓及+1000魔既範圍攻擊，唔死都一身散。其他人憑不滅之火既無敵時間，一到步硬食一堆範圍技卻毫髮不損，衝前狂毆，韓信光頭等見封點無效，加上眾人身上既火光已經知道係咩事，只懂起勢狂逃。
我，冇參加戰鬥。走埋一旁，悠然自得咁係英雄頻道打番句：「理想世界封緊奇岩傳送點見人就殺呀，各位唔好黎！」
韓信等人一路向交易區方向逃走，不滅之火有效時間有十幾秒，話長唔長話短唔短，要挨過唔係唔得，但十幾秒狂攻過後我軍仍然滿血，佢地自己就死剩半條命，又有咩意思？所以韓信走佬係正確選擇。當下我立即命眾人追殺，留低soso既巫師隊封傳送點。
留係夢幻島既人全部都係烏合之眾，只有一身好裝備，對戰爭毫無經驗，韓信光頭等人一唔得閒指揮就亂晒陣腳，見韓信冇回應，唔知係咪慌得濟，無啦啦就傳左過黎奇岩！一到步就連食紅既亂箭，再受美國風以及soso巫師隊等幾十個魔法，幾乎係談笑間就灰飛煙滅。
一輪波折，理想世界終於全數集合係奇岩鎮，正式全員對抗。
理想世界人數比我地多，裝備比我地強，但係更重要既一點係－－呢班人已經連死兩次，佢地已經冇晒buff。
有buff同冇buff既戰鬥力可以話係差天共地，例如忘殘年暗影殺手兩個挑廿幾三十個弓巫，靠既就係吸血buff同回霸主既自然回血buff。而攻防呢類基本buff差距更加明顯，本身數值愈高差距就愈大，因為佢地係計%。同樣+30%，一萬攻就加三千，一千攻加得果三百，差天共地。跑速，又係差天共地，冇buff既戰士，就連有buff既巫師都跑唔過，連巫師都可以同佢玩打帶跑，莫講話弓手，根本係被弓手玩死。
冇錯，好似韓信、光頭呢類逆天既，就算冇buff都係強敵。但戰爭從來都唔係行英雄主義，冇人會理呢類個人英雄，一場戰爭，睇既係大勢。理想世界入面既主流係橙光，即係+200，其次係紫光，+500，白光黃光呢類變態並唔多，來來去去都係蒼日、華雄、光頭、韓信呢幾件。+200 +500，冇buff下拉住打我地一樣打得過，而果幾隻個人英雄，我地同樣以個人英雄對付。
「地獄隊守住++貓同傳送點，唔好比佢地加buff同放娃娃入黎！」我分派工作：「其他人散，屠城，執生，冇buff就番教堂！紅、美國專屠+1000以上！」
++貓係私服既福利，就企係守門人旁，專門收錢幫人加buff。不過佢既buff唔齊亦唔高級，自己既娃娃就勁好多。地獄隊主要係近戰，打牧師、先知呢類附助法師幾乎必殺。娃娃們就仿佛係佢地既糧草一樣，實力再強，斷左糧之後都係等死。
而我地紅樹葉眾人既糧倉就係奇岩教堂。廿幾隻娃娃由頭到尾都匿埋係兩則。教堂雖然係守門人附近，不過門口好細入面好大，大概連韓信之前捕係教堂門口前，都察覺唔到入面收埋左我地既娃娃。
一個城鎮雖然有好多復活點，但其實有路捉。第二個城我唔敢包，但奇岩城，我地紅樹葉實在太熟悉……何況有我企係奇岩廣場正中央既雕像頂，一直監視住四周報位置？我就企係中央，"帕格立歐之心"既範圍又大，按一按鍵幾乎整個血盟一齊回血，真係爽死。
打手們分成三人一組，滿街跑，遇到韓信就幾組合流追，冇buff既韓信都一樣要被圍死，死後復活又有另一批人企係旁邊。眾人輪姐番教堂加buff，場上永遠唔會缺打手。
奇岩城鎮，已經成為修羅場。
幾輪大屠殺，大概被弓手拉到冇癮，知道冇buff唔會夠打，理想世界唔再係城內復活，選擇龜縮係奇岩盟屋內，就好似當日我地縮係亞丁盟內一樣，當日佢地係屋外圍我，今日到我地係屋外圍佢！