【真人真事】當年中七AL，我打左成年天堂二，但我無悔！: 83-反禁區戰 (二)
「小明快打龍！！」
地龍掃清附近既近戰後，就立即衝向理想世界既弓手、巫師隊，呢一刻就係搶龍既好時機！
但係理想世界眾人個個見到地龍得番果半滴血，都唔理自己死活，由得地龍衝埋黎，連跑都唔跑，死命地攻擊，射得一箭就係一箭，放得一個魔法就係一個魔法，誓要搶到地龍。
呢個時候我地兩位打手已經復活，憑藉"貴族的祝福"呢個英雄技能*，暗影殺手、忘殘年死後身上既buff依然健在，就連暴君既變態技能狂信者、野牛圖騰效果都仲係到，兩人死左就好似冇死一樣！
(*貴族的祝福實際上係"貴族技能"，不過呢個服入面做得貴族既人基本上都係英雄，而貴族系統又從來冇解釋過，為簡略就當佢係英雄技能。)
相反，韓信雖然同樣有"貴族的祝福"，但係佢死前中左一大堆咀咒技，拜祝福所賜，韓信死後復活，就連呢堆負面魔法都同時繼承落黎，死左好似冇死一樣，跑步龜速，只能眼巴巴睇住二人衝前。
我立即向暗影殺手、忘殘年二人下令：「殺理想！！」
眼見地龍危在旦籍命懸一線，理想世界卻打死罷就背水一戰，為左唔俾佢地搶到，我地只能放棄搶龍全力殺理想。
一下完令，我就用最快手腳，控制跑開左既召喚師番黎，再點擊霸主絕望的哀悼既屍體進行交易，換左把+1000法杖比召喚師，立即連環施放技能"急救術"、"保護盾"、"急救術"、"強化攻擊"……唔係幫隊友加，係放俾地龍。
絕望的哀悼呢隻霸主既回血技能雖然強大，但霸主既回血技能只能夠對血盟成員生效。而召喚師縱使只有最低級既附助魔法，卻對任何人，包括怪物都用得。+1000法杖既魔力絕對不容忽視，即使用最低級既急救術依然可以帶出可觀既hp回復。更重要係，魔法施放果一瞬間，一道數個足球場大既巨型光柱就立即打落地龍身上，所有熟悉遊戲既人都知道呢一道光就係回復術既光。光柱帶出黎視覺效果，對呢班背水一戰既人黎講，心理影響遠遠大於實際既hp回復。
召喚師一輪低吟，連環巨型光柱瞬即從天打到地龍身上！
眾弓手巫師都手足無措，面對地龍咁大個目標，根本冇人會留意到我呢個小小既召喚師。當所有人仲諗緊點解地龍突然間學識左回血，一臉疑惑之際，暗影殺手突然現身，手起刀落，一刀就係一件巫師！！再望一望左邊，就係一個半獸人發晒狂咁暴衝過黎，到底繼續射地龍定係轉向射半獸人？一個疑惑，第二、三條屍體接連出現，被小刀埋身既巫師只有死路一條，何況係+500既小刀！
連放數個急救術，我又換番把法杖俾霸主。一復活，韓信就係我前方不遠處，我立即趕上前，趁韓信減魔防效果仍在，送佢一發"約束封印"將之定住，韓信從此係呢場搶龍戰上再冇任何作用！再跑前少少，連續三發血盟用回血技能"連鎖治癒"、"帕格立歐之心"、"帕格立歐奮戰"，幫暗影殺手及忘殘年兩位盟員回血之餘再加強自然回血量。
韓信係主戰場外面既復活區罰企，睇晒全程，所謂旁觀者清，佢心知我地戰略重點在於搶龍，不停發號：「唔好理佢兩個！快打龍，專心殺地龍，唔好俾人搶！」
但此時此刻，兩位打手係理想世界一堆遠戰群中左穿右插，行者同暴君，天生就係弓手巫師剋星，只要一俾佢地埋身就幾乎死左九成。再加上強大既攻擊力、吸血能力及回血能力，只要不停斬人，二人幾乎等於不死。呢班弓巫亂成一團，不時被地龍既火球及掃尾集體抽水，又不時被刀仔暴君亂插亂打，死既死傷既傷，打龍又唔係，打人又唔係，連走佬都黎唔切，仲邊得閒理韓信指揮？七國咁亂就係現場既最佳形容詞。
"生命封印"、"帕格立歐突擊"！
乘亂，我向地龍先鎖血再燒血。地龍既血量只剩1mm，呢一刻攻擊佢既大部份都係壬生一族既人，大勢已定。
「奇岩眾人準備。」我向血盟頻道下令。
無驚無險下，地龍一聲哀號，被壬生一族所殺，所有經驗寶物盡歸小明等人。
光頭發晒老皮，係白頻大罵：「靠，亂亂亂亂亂，你地成班狗西剩係識趁亂偷襲補刀！」
我係人群中用指令搜尋光頭和尚既影子，原來係遠攻群中一員，又係拎住果把黃光弓，果然gm既公告只係做下樣，根本就冇回收佢把弓。
我地三個懶得回應，睬佢都有味，一完事就立即飛番奇岩，半句嘴都唔答，由得光頭自己生悶氣。
趁住呢個空檔，我係同盟頻問：「你地堆寶物仲打唔打算分俾理想？」
大家異口同聲：「等係唔分！」
「哈哈，咁就好，有冇輕甲？留一套輕甲俾我得唔得？」地龍一跌跌幾十件寶物，重要既地龍介指當然冇可能要，但我要一套共五件既輕甲絕對唔係咩過份要求。
更重要既係，幫人，點可以唔收報酬？一黎我要向自己盟參加作戰既人交待，我都要出糧俾佢地。二黎唔係我想唔想收既問題，而係大家都知道"無事獻殷勤非奸即盜"既道理，無償地幫人只會惹人懷疑自己別有用心，收番佢錢，介心反而降低。三黎，一收左呢套甲，呢場戰事就係交易，係壬生一族用市值幾十億既一套甲去請紅樹葉幫忙。
而呢場戰事既重頭戲，而家先開始。
光頭一鬧完，我地就閃走，一肚子悶氣當下就轉鬧壬生一族：「你地壬生一族又搶咩龍！？！」
大綠態度一向強硬，將說話完全彈回去：「廢話，一早講好食龍係公益福利，大家一齊食，而家你地偷龍在先，仲反話我地搶龍！你地同紅樹葉反面互搶王搶龍係你地兩盟既事，而家係咪想同我地盟都鬧翻埋？」
如果理想世界係光頭和尚完全話事既，大概呢一句就真係會直接鬧翻，省得我再花功夫。但可惜理想世界既老大係佢老婆唔係佢，光頭火大還火大，易怒還易怒，畢竟係成年人，都仲叫識少少相，當下立即收聲，口頭上吃左呢個虧，直接拉隊走人：「我地走！」
理想世界既主要據點係奇岩，無論城堡同盟屋都係奇岩，但呢一刻係奇岩等緊佢既，係我地紅樹葉既封城大軍！！
一眾娃娃早已經替戰士補好buff，退回奇岩教堂內匿埋，而紅、樹等英雄亦幫眾人施放"貴族的祝福"，等眾人死後都唔洗補buff。
一聲"我地走"，夢幻島上既理想世界逐漸消失，換黎既係奇岩鎮上傳送點開始出人……
「fire in the hole！！！」預先設定既巨集發令，巨集下一句係同盟頻道上既溫馨提示：「壬生一族各位唔好番奇岩，開戰中！」
奇岩傳送點上，首當其衝就係光頭，之後我根本就睇唔到有咩人，因為緊接就係一大堆箭雨、海水、火山、殞石……根本睇唔到有咩人係到！但唔理係乜野人，唔理係邊個，唔理係唔係理想世界，總之係呢一刻傳黎奇岩既人，總之呢一個moment出現係奇岩傳送點既任何玩家，等待佢地既就只有一個字、一個結局，死！！！！
無數亂箭魔法狂轟，地上堆滿一大堆重壘既屍體，手手腳腳身體全部都壘埋一齊，只能用"一pat野"形容。當中大部份人根本唔知發生咩事，對佢地黎講，就係係夢幻島用完npc傳送，畫面一黑……然後就丫一聲，死左，連半個反擊機會都冇，一傳就死。
事出如此突然，韓信居然反應到，立即用全宇宙都睇到既英雄頻道發言：「各位唔好番奇岩！紅樹係奇岩亂殺人！」
正服入面本身係冇世界頻道，所以英雄頻道好巴閉，係唯一一個全世界都睇到既頻道。我地私服雖然已經有世界頻道，但係英雄頻道一樣都係好巴閉，因為世界頻道你唔鐘意既話可以熄左去唔睇，但英雄頻道係我地私服入面係冇得熄，無論用緊咩頻道都會show出黎。除非你成個對話欄熄晒，否則英雄頻道係焗睇！
「英雄頻？呢招係咪叫"搶佔道德高地"？」紅問。
「呢招叫"抹黑焗你停手"呀。」樹答。