【真人真事】當年中七AL，我打左成年天堂二，但我無悔！: 82-反禁區戰 (一)
理想世界既人好明白和約條款，因為和約就係佢地血盟專屬討論區入面置左頂，幾乎係必睇。所以壬生一族既出現，就如同捉姦在床一樣，呆左一呆，一句聲都出唔到，由得小明一眾人食龍。
結果兩盟就咁默默地一齊屠龍，一句說話都唔講，半句交流都冇，各有各打。我作為局外人，見到呢個古怪氣氛真係忍唔住笑出黎，有幾時見過兩盟合作打王係咁沈默，相互間完全零溝通？
但對比起白頻既冷清，同盟頻道內就熱鬧如街市一樣。
「佢地真係又偷食！」
「等紫幽上黎睇佢地有咩講。」
連一向與世無爭既小草都講左句：「好可惡啊！」
理想世界的確好可惡，由壬生一族到步開始，雙方縱使零交流，卻明顯見到理想世界既人愈黎愈多，由當初十幾二十人變成四十幾五十人，就連駐守奇岩既光頭都黎埋幫手屠龍。縱然理想世界冇交戰意思，但此舉已經表態：「而家係擺明車馬，鬥搶地龍！」
光頭作為+1500破壞者，打人就話唔夠跑，打龍絕對係好幫手。我+100爆狂最盡都可以去到九萬幾攻，佢+1500爆狂實在不能想像。只見隨著光頭等理想世界主力群出現，地龍血量明顯加快流失。我留意住地龍既血量，度一度，就知道呢班贊助武器既可怕，居然同當初全服聯合屠龍，再加埋+500霸主生命封引下既扣血速度相差無幾！最恐怖既係，理想世界仲未出齊人，有唔少人都仲off緊line！
呢班人既實力已經遠遠超乎我想像，佢地似乎唔止具備單盟食龍既實力，我相信就算佢地單盟向全世界宣戰都打得過。
但…又如何？就算佢地有實力，又如何？
我等左咁耐，就係等呢個moment！
數一數，而家紅樹葉online既有三十人左右，紅、美國風、艾爾、soso、薰、忘殘年、暗影殺手，所有贊助武器都在線。眼下奇岩、亞丁兩個鎮一個理想世界都冇，全部都去晒夢幻島同壬生鬥搶龍，而地龍仲有近半條血，就算再快都起碼要打多半個鐘。
半個鐘，足夠時間說明我既計劃。三十個人，只要齊心，乜都夠做。
「小明，收我隻teleport入盟。」
teleport從來都冇盟，呢隻夢幻島既teleport係第一個入盟既召喚師，小明問都冇問，就收左佢入壬生一族。
「等陣我地黎幫你搶龍。」我向小明解釋道。
然後，我就向紅樹葉眾人宣佈：
「各位，做左咁多日過街老鼠，我地反擊既時刻終於都來臨……放低你地手上做緊既野，細心留意以下作戰計劃，今晚奇岩將會係理想世界禁區！！」
血盟頻道瞬間被接連「好！！」、「gogogoggoo！」、「終於都打大交！？」、「打柒佢班仆街！！」等等洗板，乜野叫一呼百應？This is！
「靜一靜。」
我花左唔少時間，詳盡地說明計劃：
「理想而家全世界都係夢幻島同壬生鬥搶龍。我地計劃第一步就係幫壬生偷龍，第二步就係封鎖奇岩傳點，第三步就係理想世界禁區！我一直係夢幻島監視，一陣我發令後大家先到歐瑞集合，帶埋娃娃，弓手為主巫師為次冇就開主職，但記得唔好早到以免露章。到步後放好buff，美國風法杖借俾我，由我、忘殘年、暗影殺手三個人傳夢幻島殺韓信兼搶龍，其他人連娃娃飛奇岩準備封鎖傳點，再見機行事。
理想世界主要用韓信做盾吸住地龍打，韓信一死，地龍必定立即暴走。佢地打左咁耐，對地龍制造左最多傷害，所以地龍會先殺理想世界，到時我用霸主生命封印，地龍就歸我或壬生！
至於點解係我、忘殘年、暗影殺手三人負責殺韓信？一黎人少，夢幻島咁多人，加上咁大條地龍阻住，好難直接點到我地三個人。第二就係職業問題，韓信高物防高魔防又有盾擋箭，巫師弓手戰士根本唔係佢對手，但係暗影殺手+500刀仔只要用技能，機率性瞬殺無視防禦，夠運就可以扣佢一大折血。而忘殘年+500暴君，一開始我會先扣你血，一去到立即開"狂信者"、"牛圖騰"、"狂暴之拳"，我諗你都試過知道+500開牛圖有幾癲。你光速拳做主要火力，殺完韓信後亦都好大機會搶到地龍尾刀。
而我，就用霸主，用美國風既+1000法杖，一到步就全套封印丟晒去韓信身上，就算魔防再高，我總唔信一個封印都唔中。最緊要係最後要用"生命封印"封地龍血，咁先可以搶到地龍。
如無意外，我地或壬生成功搶龍後，理想世界就會番黎佢地據點奇岩，我會事前提示大家。你地要做好準備加好buff，封死奇岩唯一一個傳點，到時佢地黎幾多就死幾多！俾地龍殺一次，再俾你地殺一次，就算有"貴族的祝福"身上都唔會再有buff，實力大打折扣，到時就可以全面封鎖奇岩，見理想世界即殺！
計劃就係咁，而家唯一要做既，就係等地龍少血，我就發號，各位立即照命令行事。大家有冇問題？」
………
全靠iplist我先可以完全放心，將計劃100%講俾所有人聽。
其實我已經好耐冇將作戰計劃完整無缺地向盟內說明，每次計劃都係各在其位，每個人只知道自己負責乜野，只有我同樹兩個人清楚晒全盤計劃。但今次唔同，美國風等新人同其他盟員唔熟，但又係重要戰力，我直接100%說明，以免盟內新人覺得我有所隱瞞，對我有任何懷疑。大戰當前，免得節外生枝。
………
我用teleport望實地龍。大概半個鐘左右，地龍條血bar已經得番兩毫米咁長…
我按一按鍵盤，事前設定好既巨集立即向血盟頻道發號：
「行動正式開始，各盟員請到歐瑞集合！注意呢個唔係演習！行動正式開始，各盟員請到歐瑞集合！注意呢個唔係演習！行動正式開始，各盟員請到歐瑞集合！注意呢個唔係演習！」
唔洗半分鐘，歐瑞傳送點瞬間湧現三十個掛住紅葉徽章既人，以及二十幾個唔同盟既法師娃娃。
暗殺、地獄、紅、樹、soso五人各自組隊，再組成聯軍，佢地五人係紅樹葉鐵膽，一早熟悉非攻城戰時候既組隊分配，有晒默契各自要組咩人。今次行動唯一一個特別組就係霸主"絕望的哀悼"、暴君"忘殘年"、黑妖行者"暗影殺手"，以及由夢幻島teleport組成既搶龍組。
我控制已加入壬生一族既teleport召喚師，喚出戰鬥貓，行到地龍身邊，扮晒幫手打龍……
「gogogogogogogogo！」
畫面一黑，搶龍組就被召喚到地龍面前，而韓信，就係我地三人旁邊！
吼！吼！吼！半獸人響震天既吼叫聲，忘殘年發動"狂信者"、"野牛圖騰靈"、"狂暴之拳"！暴君同破壞者一樣，低血時擁有驚人爆發力，攻擊力及攻速同時暴增，仿如黃金聖鬥士一樣拳速達到光速！+500光速連環拳向韓信施打，只見韓信身上爆出光速拳帶黎既無盡金黃色光芒，如機槍般爆出連環打擊聲，連人都未睇得清楚，背後卻又連中兩刀，一刀"亡命一擊"、一刀"背刺"，兩刀餘風仍存，韓信身上居然又圍起火圈，霸主既"絕望封印"成功擊中韓信！！
"絕望封印"可以擊中絕對係僥倖。韓信魔防之高根本想像唔到，我一連放十幾個封印，就只有一個絕望封印成功擊中。但就如封印名一樣，絕望封印帶俾韓信無盡既絕望－－所有能力即時降低30%，絕對唔係惹小！
面對光速拳及瞬殺小刀，韓信噴到滿地都係血，後方既理想世界牧師放出無數光柱打算幫韓信回血，但韓信魔防被降低30%後，+1000霸主既各種封印術立即見效，我連忙施咒"疫病封印"，韓信所受既回血量立即降低一半！
血又冇得回，防禦力又被降低，呢一刻韓信會做乜野？我已經估到，但係我唔會俾佢咁做！"火焰封印"、"劇毒封印"、"生命封印"，我將所有定時定點扣血技能送晒俾韓信，又停止佢既體力回復，然後，就如我所估一樣，韓信連續兩招應急技"極限防禦"、"信念之盾"爆出，一下子物防又再次暴增，卻礙於副作用只能企定定挨打。
忘殘年走一走位，企到韓信背後，無視背後一眾理想世界既弓手，連串光速拳再打上韓信身上！身中無數箭既忘殘年，憑藉光速拳既驚人吸血量，居然一直保持滿血！終於，又中毒又中火，再被狂插加上光速連轟以及地龍狂咬，韓信最終不敵，戰死沙場。
然後地龍立即暴走，一下子送晒附近眾人落地獄，包括我地三個…