【真人真事】當年中七AL，我打左成年天堂二，但我無悔！: 81-測試武器
"忘殘年"、"暗影殺手"，呢兩個人係絕對好戰份子，本來買武器就係為同理想世界打過，結果自己盟居然因為咁而散左，仲打乜野？佢地都明白成個私服入面唯兩個打完唔洗負責既血盟就係紅樹葉同理想世界，見紅打得咁過癮，自己盟又搞成咁，當下就問我可唔可以加入。
我分別係密頻回答兩位：「當然歡迎，但你地唔洗問下美國風意見先？」
兩位都係聰明人，一句說話就明白我既意圖，快人快語，一口答應幫我拉埋美國風入會。有佢地兩個人幫手裡應外合，美國風呢條大魚已經咬實魚餌。
一輪拉扯角力，美國風都明風之谷已死，拉左佢地同盟內大概八九個人加入我地紅樹葉。其他死守係可夢風同盟無意過檔既人，就入晒去風之谷，美國風臨走前將佢既血盟連同雞肋狄恩城送左俾佢地，可夢風同盟正式解散。
就係咁，紅樹葉平白多左三把贊助武器。
由可夢風同盟參加紅樹葉既亞丁守城戰，到今日可夢風同盟正式解散，只不過過左短短一星期左右時間。呢件事帶俾server既震撼，不雅於當初靜心宣佈退出。當中既來龍去脈，就只有我地當事人清楚，就連理想世界都只能霧裡看花望唔透。
針對呢件事，江湖上流傳各種版本，有紅樹葉挑撥離間說、又有兩盟合併說、又有戰敗離服說，炒得最熱既，係被gm ban說。因為可愛家族一班人一早貼晒光頭係白頻show果把+1500弓上論壇，雖然好快就被del post，但睇到既人絕對唔少，再加上近日種種事，好自然被拉上關係。
呢件事既討論post長期佔論壇旁首，炒得好熱，乜野陰謀論都有，當中不乏估中真相既人。
愈炒落去，gm就愈危險，佢一定要回應，我亦樂見其成。
果然，不出數日，gm正式開腔，說明冇ban過可愛家族既任何人。然後，就係gm解迷時間，佢將光頭呢把武器，定名為「測試武器」。顧名思義，就係俾工作人員用黎測試各種設定用既武器，但係萬萬估唔到會「意外流出」，現已回收武器，又正式將該名工作人員既帳戶凍結云云，之後delete晒相關post。
好快，江湖唔知邊到黎既傳聞，話果個所謂工作人員就係戰神，因為見過佢秒怪既人不勝奇數，又咁岩果日之後就冇人見過佢online……
完美。
我真係冇諗過，gm居然可以咁樣解釋……呢個故事真係完美，原來戰神係因為呢個「原因」而冇再online。
我地紅樹葉作為妥協者，自然唔會將實情告諸天下，結果呢個「測証武器說」成為贊助武器既最終解釋。無論係樹之前既+1000弓，抑或更早前靜心平頭既變態傷害等等，全部都變成意外流出既測試武器。鑑於「工作人員」一直同理想世界、紅樹葉兩盟有交流，所有野都變得合情合理，我地兩盟忽然間變成靠關係上位。
但我地紅樹葉有更重要既事忙緊，大眾點諗？who cares？
三盟和約自理想世界向紅樹葉開戰後就被雙方默認為廢除，但係三盟和約既第三盟，壬生一族一直冇出過聲，呢一點比起其他事更重要。
到底壬生及理想既單雙日食王仲有冇效？呢條條約一直處於灰色狀態，三個盟每個人都意識到呢個問題，但從來未嘗試過解決。
紫幽一直保持中立，堅持執行和約，只係雙日食王；理想世界似乎亦有默契，一直留番雙日隻王俾佢地。但既然紅樹葉已同理想世界正式決裂，我地又有乜可能留番單日王俾理想世界？於是壬生每個雙日都食到王，單日卻由我地紅樹葉及理想世界互相爭奪。
理想世界人雖然比我地多，但係講搶王真係唔夠我地黎。因為王既重生時間係廿四小時左右，而壬生就係我地同盟，壬生每個雙日都食王，有時仲有我地係壬生入面既分身加入一齊食單日王。王係第二日既重生時間根本我地就暸如指掌，一夠鐘就係果到捕定，結果實際上係雙日壬生單日紅樹，理想幾乎被排除在外。
呢個結果，根本係理想世界自己拎黎。
試想一下如果佢地唔係派人長期守住奇岩亞丁，搞個乜鬼野紅樹葉禁區，我地又點會咁得閒去捕王？直到美國風等三把贊助加入，尤其是忘殘年呢隻暴力半獸人既加持下，打巴溫巴子呢d王更加係秒殺咁濟，莫講話鬥搶，理想世界根本連王都見唔到。
一直冇辦法搶嬴我地既理想世界，最後索性投降將單日直接讓俾紅樹葉，卻反而去搶走壬生一族既雙日王！
明明一直都係我地兩盟既事，佢地就偏偏要小事化大，走去搞埋壬生一族。就正如我以前預料一樣，我地兩盟相爭，無論咩原因都好，最終一定會拉埋紫幽落水，呢點係我唔想見到，但我無法控制既事。
壬生一族既盟員當然有投拆，紫幽要向盟員交待，焗住要同與佢姐妹相稱既靜心，亦即韓修修談判。
連續幾次，韓修修都係打哈哈輕輕帶過，今次紫幽一上黎卻明言：
「就算你地同紅樹葉開戰，但和約對我地兩個盟仍然有效係咪？既然如此請各盟員遵守和約，以免破壞大家關係。」
詭算紫幽講到咁明，韓修修卻依然故我，繼續打哈哈：
「唉，妹妹，你既身份咁尷尬，我做姐姐既都唔知用咩立場同你說話好。」
紫幽當然明白話裡意思，只拋低一句：
「姐姐，我只係按章說話，大家按本子辦事，大家都有好處，洗乜理會身份立場？」然後就閃人。
………………
「葉，我好辛苦……」
「我明，你已經做得好好，放鬆下。」
………………
我唔係好識安慰人，但我真心明白紫幽既感受。
紫幽本身唔係和平主義者，只不過佢手下既人係。一直以黎壬生一族都係人最多，錢又最多，但係佢地呢個血盟本身就係由紅樹葉既非戰派所組成，呢班人係壬生一族核心成員，亦係主流派，平日主要以打怪打王為樂，亦正因為如此壬生先咁有錢。壬生一直保持中立，唔算係紫幽個人意願，而係紫幽作為一個血盟主，對盟內成員所負既責任。
講到尾，紫幽其實係幫緊我執屎。
我忽然想起和約既主要目的，另一個灰色地帶，就問紫幽：
「理想世界有冇邀請你地一齊食龍？」
「冇，守城戰到依加都冇。」
和約另一個條款就係三盟一齊食龍，就算唔計紅樹葉，理想世界食龍係理應同壬生一齊食。憑佢地果一大批軍火，再加上韓信既防禦力，肯定具備單盟食龍既能力，有乜可能一直冇食過龍？只不過食左，冇叫壬生姐。換言之，理想世界根本就冇諗過要同壬生維持和約。
紫幽似乎睇穿我意圖：「葉，唔好搞咁多野，算啦不如。」
算？點可以就咁算：「你係咪想一直叫佢做姐姐咁假先？」
紫幽冇答我，但我知道答案。
係夢幻島監視地龍，對我黎講只不過係開多一個視窗既事，舉手之勞。我每日都用teleport企係夢幻島，一直到星期三夜晚，紫幽唔係到，理想世界再一次被我地搶王後，終於都見到佢地黎屠龍。
我係同盟頻道問：「理想世界打地龍喎，有冇叫你地？」
壬生一族既小綠即時反應：「下？打地龍咩？冇講過喎。」
大綠仿似唱雙簧一樣：「咁即係偷食龍啦！之前就偷王，而家又偷龍！次次都黎陰既！」
我都唱雙簧：「你地講好一齊打加麻，仲唔快d去夢幻島一齊食！」
講到打王，即使係非戰派都唔會手軟。搶王係直接威脅佢地既利益，理想世界同壬生一族既衝突，幾乎都係建立係搶王之上。所以，當下壬生一族有上線既成員都立即飛到夢幻島，一齊搶地龍。
仿如天公做美一樣，理想世界同日殺鬥搶龍，但兩盟盟主，紫幽、韓修修，就連亞格斯都冇online。
小明一到步，見到理想世界已經食緊龍，就向同盟頻講：「唔好同佢地嘈，我地一齊鬥食龍搶最尾一刀就算！」