【真人真事】當年中七AL，我打左成年天堂二，但我無悔！: 80-高手
可夢風同盟一夜瓦解，對局外人黎講，係一件突發大新聞；對紅樹葉、壬生一族、理想世界呢班圈內人黎講，係一件意料之外卻又合情合理既事。
作為圈內人，大家都心知肚明。
私服既三國局面佢地一早就知，我同樹既勸誘更加同佢地離開無關係，我地只係勸佢唔好買武器。其實明眼人都知，佢地係因為贊助既存在而選擇離開。
我地紅樹葉三個人最初之所以會選擇呢個私服，除左因為佢仿官服，最主要係因為佢標榜不接受任何贊助。好少私服會打正旗號話自己唔接受任何贊助，而呢個就係本私服既賣點之一。我唔知有幾多人係因為呢個賣點而加入私服，但好明顯"可夢風同盟"大部份都係被此吸引。
記得果陣我知道"贊助"呢個秘密後，第一件事就係打算爆出黎，然後唔玩，轉另一個私服。點知樹強烈反對，因為咁我先選擇妥協守秘密，做就左今日既紅樹葉。但我心裡一直有條刺，因為呢個秘密徹底違反我既原則－－公平。直到我正式向盟內宣佈"贊助"既存在，而佢地毫無反應既時候，我先明白原來自己先係怪人……我先正式放棄爆大獲一走了知既念頭。
結果今日，可夢風同盟居然因為呢個秘密而瓦解，拉大隊換服玩，我真係好高興－－因為咁先係我所認為正常既反應，咁先係我預想贊助被公開後既影響，我驚覺原來呢個世界仲有人係覺得贊助制度係有問題，終於有人認同我既想法！！！
但係，呢班人，已經走晒。
留係到既，包括我，全部都係妥協者。
高興又立即變成失落。
可夢風同盟剩餘果廿幾個妥協者，分散係佢地三盟當中。但係可愛家族及夢幻無限兩盟既盟主都已經跟大隊走左，同盟內唯一一個有名有實既血盟，就係佔領狄恩，由+1000巫師"美國風"掌管既風之谷。
呢個係一個絕佳既機會，我同樹又點會放過如此良機？
得知同盟瓦解後，我地兩人幾乎立時有共識，勸導方針瞬間由"抵制贊助武器"變成"加盟紅樹葉"。
準確少少，其實我地既目標只係買左贊助武器果三個人。
因為其他+20玩家，作為戰力根本可有可無。更何況，收編美國風一個人，佢作為盟主，後面自然會跟隨廿幾個bonus。
因此，更加準確少少，我地既目標就只有美國風一個人。
樹開始針對美國風作出設身處地既分析：
「玩左贊助幾日，我諗你自己都發現你把武器打怪賺錢效率其實同本身相差無幾。無論你幾高攻，mp就係得咁多，怪重生時間又係永遠固定，其實用+100已經係頂級效率，再+上去幾多都冇分別。我之前都講過，贊助武器唯一既用途就係打人，但係贊助武器唯一可以合法打既就係贊助玩家。而家你地盟得番果幾個人，莫講話有你一把+1000法杖，就算有多10把你地都冇可能打得得過理想世界，只有好似我地紅樹葉咁挨打，最尾連亞丁奇岩都冇得入。」
樹俾佢回一回氣，再展開攻勢：
「唔係幸災樂禍，我只係想講俾你聽，如果你唔想浪費呢筆錢既話，點解唔索性帶隊加入我地紅樹葉一齊抗戰？我地有一大堆備用既+100武器，有你地二十幾人加盟，我相信我地絕對可以返攻亞丁！你打怪賺錢，效率點都比唔上亞丁一日十億收入掛？」
聽到十億，美國風雙眼仿忽發出閃光：「亞丁一日有十億咁多架咩？」
風之谷只佔有狄恩呢個冇收入既小城堡，又點會知道奇岩、亞丁既巨大利潤？我作為曾經既奇岩、亞丁城主，當場向佢解釋一下。
最後我加多句：「講到尾呢個只係遊戲，既然俾左錢玩，就應該要玩得開心過癮。俾左錢都仲係日日打怪，實在太無聊。」
美國風話俾少少時間佢考慮，我就答佢：「仲有唔夠幾日就係亞丁攻城戰，希望你趕緊考慮。」
呢次勸導，其實已經唔算勸導，我地直頭係明刀明槍叫美國風加入紅樹葉。
事實擺在眼前，整個同盟只剩廿幾人，咁樣既人數，係現今既局勢，憑三把贊助又有乜野作為？十一月係淡季，私服冇乜新血加入，佢地短時間內冇可能抗大血盟，想有所作為，加入我地似乎已為眼下唯一途徑。不過我地就只係講左咁多，唔似得之前咁日講夜講，我地唔想俾太多壓力佢。美國風既然話考慮，就由得佢考慮。
言語上我地唔催促，當然就要靠另類方法……
自從奇岩亞丁兩鎮成為紅樹葉禁區後，光頭就日日駐紮於奇岩，拎住果把新買既+1500大刀係到耀武揚威。企到無聊果陣，佢就周街搵人決鬥，直到神憎鬼厭冇人睬佢，佢就會係世界頻道大叫：
「你地紅樹葉唔係好勁既咩？又話自己一打一無敵？而家匿埋晒係邊到呀？快d滾黎奇岩同我決鬥！」
除左第一次我去左玩下，之後我地紅樹葉整個血盟都係直接無視，就連火爆既艾爾都唔理佢，因為係人都知光頭一唔夠打就會吹雞，乜野1on1乜野決鬥全部都係假話。
不過今日，我特登叫紅去亂一亂佢。
我純粹想俾美國風睇下，乜野叫做「玩遊戲」。
「紅，去搞下光頭啦，我要入購物區買野。」
紅當左我係佢：「你買野直接衝過去咪得囉，佢又追唔到你，我平時都係直接跑。」
紅口裡說不，身體卻很誠實，say完no卻即飛奇岩，一到步就毫不客氣一箭射向光頭。
難得有人理佢，光頭表現出異常興奮，立即向紅在衝。但紅又怕乜野？身為弓手，卻身穿一身重甲，+500重甲加持下，紅防禦力仲高過光頭！於是索性連跑都唔跑，面對光頭大刀亂揮，紅卻氣定神閒，開啟必需要企定定先可以用既"狙擊"，加強攻擊力及爆擊率，就咁企係光頭面前，遂箭遂箭射爆光頭個頭。
弓手能夠咁霸氣地面對破壞者，紅睇怕都係第一人。
但光頭又豈係善男信女？斬左幾刀見紅郁都唔郁，就明白單憑普攻根本冇用，隨即卸下一身重甲，打算任由紅殺至紅血再開三狂。
紅日日同我呢個破壞者專家打，光頭揚一揚尾就已經知佢想點！只見紅輕叫一聲放出"極限閃避"，再直接發動弓箭技能喪射。一記"七箭"，光頭血如湧般噴出，卻又神速反應過來，咋咋臨狂啪橙汁同時著番件甲，卻又再食紅一擊"死之螯針"，再緊接一發"斷魂箭"，立時三聲狂號－－光頭終於爆三狂！
一爆就係一刀揮下，紅硬接卻深知不妙，隨即取消"狙擊"，向後跑再連環橙汁，電光火石間卻又再食一刀。雖然大命死唔去，但亦唔敢再霸氣硬接，開始認真打帶跑。
「單憑呢兩刀，我相信光頭既已經吸滿血。破壞者最神既地方就係呢到，雖然要跌至30%血先可以爆狂，但一爆完三狂，斬一刀就已經可以吸番滿咁濟。」我向一旁既美國風解釋。
高手間單挑，如果冇人導賞，普通人根本唔會意會到箇中奧妙：
「岩岩紅企定定懶係型咁，其實唔係懶型，係表態話俾光頭聽佢弓手都可以企定定殺佢，引佢除衫爆狂，結果光頭真係中計除左衫，立即被紅狂射，差d死埋要狂啪橙汁回血。」
弓手對任何近戰職業，最大既優勢就係打帶跑，屈速度。紅放棄弓手既絕對優勢，開啟"狙擊"強制立定，明顯係用緊身上既+2000弓+500重甲以本傷人，羞辱光頭。而光頭亦都不負紅所望，少少屈辱都唔受得，諗都唔諗一黎就除衫搏扣血開狂。
但除衫呢一招，必須建基於自己強大既攻擊力所帶黎既吸血能力，否則空身面對贊助武器，任何人都擋唔到一擊。但係紅居然係呢個無關痛癢既時刻開啟應急技能"極限閃避"，光頭半刀都揮唔中，又點吸血？一下子血量狂瀉，差少少就被紅秒殺。
「點知紅又衰on9，手快快連按完技能唔識收，俾佢著番衫硬食多兩箭，仲岩岩好開埋狂，搞到自己差d俾佢斬死…」
紅vs光頭，係無限打帶跑下，又以光頭吹雞作完場，眾人為免麻煩作鳥獸散，狼狽地逃走。
但係我仿佛見到美國風……旁邊個兩位，+500拳套半獸人暴君"忘殘年"，+500小刀既黑妖行者"暗影殺手"蠢蠢欲動，欲欲想試。一場pk演示，上釣既唔係美國風，而係呢兩個近戰贊助玩家！