【真人真事】當年中七AL，我打左成年天堂二，但我無悔！: 79-紅樹葉禁區
自果日單挑起，理想世界幾乎無時無刻都派人捕係兩個城到，一發現紅樹葉出現就立即吹大雞、圍殺之。
最初幾日，紅、樹、艾爾等幾個極端好戰份子仲會嘗試屈佢地速度，用當初打遊擊既戰術去不停挑釁佢地，每次理想世界都只係吹雞晒馬，方陣立正霸晒成個鎮。紅樹等人一樣係弓手，只要係弓手射程範圍就係一樣，你射到人既話，人地就一定射到你。佢地方陣企定定，弓手企外排，死都唔郁，結果只能由紅用+2000弓，硬打硬互射。雖然我地吹佢唔漲，但最起碼佢地都一樣吹我地唔漲，一齊累鬥累。
但理想世界既人只係缺乏經驗，畢竟唔係傻既，打多幾次，佢地除左死捕係到之外亦都開始出現唔同變陣。
由被分散打擊到開始識前後包抄、由包抄到開始識四路封門、再由封門演變到識得留一條活路再埋伏，我地睇住理想世界進化。不停去挑釁，等同俾機會佢地學習，更何況多次攻城戰上既明暗交峰，已經表明理想世界係抄我地橋方面有好高造藝。無論幾多戰術幾多計，理想世界有無限硬件軟件支援，要學識我地既戰術根本冇難度，遲早我地都會唔夠打。
唔洗幾耐，紅樹葉就停止左呢種無意義既戰鬥。
終於，紅樹葉正式成為過街老鼠。
連入城買野都要開冇盟既分身先買得，唔係過街老鼠係乜野？情況簡直仲衰過我岩岩番黎果陣。
奇岩、亞丁兩城，已經成為名副其實既紅樹葉禁區。
我以為戰神同gm唔會視而不見，一定會幫手，起碼都應該出下聲。點知果日同戰神傾完計之後，佢就冇再on過line。gm更加唔洗講，等左咁耐，一封pm都冇覆過我。
呢場亞丁守城戰，我叫佢做既呢一日，影響既唔單只係我地紅樹葉，仲直接影響"可夢風同盟"呢班新力軍。
新力軍，說穿了就係繼理想世界、壬生一族、紅樹葉後，gm既第四個潛在客戶。可夢風同盟可以話係私服入面既第三大同盟，但係人數上同理想世界既"大理想世界"，以及我地同壬生既"漫畫卡通同盟"相比簡直係差天共地。
大理想世界入面，單單係理想世界本身就已經過百人，而日殺因為入面有娃娃等分身係到，實際人數一向係迷，但最起碼都有六、七十個active，總計約170。
"漫畫卡通同盟"呢？剩係壬生一族都百半，加埋紅樹葉直頭破200，只不過基於壬生一族既背景，入面大部份都係和平愛好者，以至一直以黎打仗時候人數優勢都唔太明顯。
可夢風同盟又如何？三個盟加埋，100人都未夠，但毫無疑問，假若呢班人入面有十靚個肯俾錢贊助，佢地既實力就會質既飛躍，不容忽視。
所以美國風買武器後，我就一直留意佢地動向。
"D-Day"之後，可愛家族整個盟近30人，直接拉大隊離開左呢個私服，而夢幻無限、風之谷都有少數玩家跟埋佢地走，加加埋埋，差唔多蒸發左一半人，可夢風同盟，立時變成夢風同盟。
但同時間，隨著美國風係"D-Day"第二日就買左把+1000法杖，好快夢風同盟入面又多左一把+500小刀，過多幾日又多一件+500拳套，之後就再無新增個案。
因為我同樹不停、不停、不停地遊說。
係gm唔回覆我既第二日，我同樹就決定要改變目前既局勢。
紅樹葉既問題，係雙方既戰爭正式爆發既一刻開始，就再唔單單係紅樹葉同理想世界兩個盟既事。
「其實你地再繼續贊助都冇用。
第一，贊助武器平時係唔可以用係普通玩家身上。你地以前都有睇論壇post係咪？我就係因為咁俾gm收左把武器。
第二，俾你地攻城，最主要都係攻奇岩同亞丁呢兩個有實際收入既城姐，但係理想世界有成幾十把贊助，再買都唔會夠佢地打。
第三，買黎打怪賺錢既話，效率的確會高少少，但係你又諗下，有左成套贊助武防你仲要錢黎做乜野？
第四，買黎打王既話，你地而家三把基本上可以秒殺好多王喇。尤其係你地三把都係高傷害職業，+500暴君，開牛圖都已經屈左機。」
樹向夢風同盟講既事全部都係事實。
當然佢唔會講收唔收武器係睇gm心情，唔會講俾gm收果把野根本就唔係樹佢自己既，唔會講係地獄邊界島呢d超高級獵場用贊助打效率快幾多，唔會講三把贊助只係夠小王打………
但係樹由此至終冇講到任何大話。呢點係樹既原則，"講d唔講d"同埋"講大話"，係兩回事，一個只係走灰色地帶，另一個卻係赤裸裸既犯罪！所以樹可以接受自己係三盟和約上走灰色地帶，用星空物語殺人，但唔接受韓修修直情違反合約，直接用日殺開拖。
我唔同，我壓根兒就冇當過講大話係一個罪。細細個人地仲扭緊計叫媽咪買玩具，我就已經計緊點樣打到最大既斧頭俾自己買玩具；到大少少人地仲睇緊哈里波特，我睇既卻係老豆丟俾我果本孫子兵法商戰致勝實例。你可以話我冇乜道德觀念，但係偷呃拐騙呢四個字，由細到大從來都係我好朋友，尤其是個"呃"字。
我向夢風同盟剩低既人講：
「理想世界班人根本就係gm朋友黎既，佢地批武器完全唔洗錢買！就算gm收武器都係收我地呢d用錢買既之麻，你地都記得啦之前靜心同平頭和尚咪又係用神武周圍亂打人，冇記錯仲有份打你地係咪？gm話ban左佢，又話bug武又盛，點知果日你地都聽到啦，改個名咪一個韓修修一個光頭和尚咪又生勾勾咁企係到，光頭仲show埋出黎用緊+1500呀！明顯係gm扮野幫緊佢啦。問心果句，如果唔係成班老朋友薰呀果d都仲係到玩，我一早就走左喇，對住呢班皇親國戚日日係到係威係勢也文也武，真係有點兒嘔心。」
人係好奇怪，當一句說話入面某幾句可以同事實印証，咁成句說話既可信度就會忽然提高。呢個道理同睇相、占星係同一回事，亦係點解常言道講大話一定要三分假七分真。
而事實上，當日靜心同平頭和尚俾人ban，正正係受我地既計謀所逼使，而風之谷、夢幻無限就係當時既涉事血盟之一，係理想世界暴虐下既受害者，點會唔記得？我用第三者角度一講完，忽然間gm就變左做理想世界既朋友，忽然間gm就變成包庇理想世界。
如果話樹係用一大埋事實同資料，理性地分析俾可夢風聽贊助武器係唔值得買，咁我就係用感性，用人類既情感煽動佢地。
其實就算我地唔講，美國風遲早都會發現，佢呢把+1000法杖並冇佢想像中咁實用。
贊助武器，一係用黎打人一係用黎打怪。打人，除左紅樹葉同理想世界，基本上都冇其他盟需要用到。而論打怪，偏偏呢個私服既兩個秘密－－穿牆、贊助，佢地剩係知道贊助。我地早就發現，係遊戲入面，適合贊助武器打既獵場基本上都要用穿牆穿入去，例如係改版前，就有四大陵墓呢個要穿牆先入到既神秘地方。
而改版後，又俾我發現左新地圖"地獄邊界島"入面其中一個要穿牆入既地區"奇美拉區"。呢個區由我番黎到而家都只有紅樹葉既人知道，入面全部怪都係10倍血怪，普通人根本打唔到，但偏偏跌寶量異常豐富，係我地紅樹葉私家寶藏。
再之後我地又陸陸續續係"諸神熔爐"、"邪教神殿"等地方入面發現類似要穿牆先入到既小區，部份有理想世界既人知道，部份只有紅樹葉同壬生一族知道。一番商討後，我地斷言，一係gm特登set，一係呢個新版私服套件既原始設計者特登set既。
而呢一堆地區，美國風偏偏全部都唔知。
所以美國風空有一把牛肉刀，係佢所知範圍內，卻只雞俾佢殺。
所以我同樹本來都認為，美國風玩幾日就會後悔買左呢把野，贊助唔會係佢地盟內散播。點知第二日就多左把刀仔，再之後又黎隻拳套，我地先急急腳做野，不停轟炸式叫佢地唔好買，倒gm米。
但唔知係我地既勸誘太有效，定係私服既局勢令佢地覺悟……四五日後，可愛家族幾個人番左黎，唔係重玩，卻又拉走一批人轉私服……
最終成個同盟居然得番廿幾人，一夜瓦解……