【真人真事】當年中七AL，我打左成年天堂二，但我無悔！: 75-煲仔飯
九點五十五分，離攻城結束仲有五分鐘。
日殺成功封印亞丁後，狼來了、紅樹葉、可愛家族、星空物語所有人全部被踢番黎獵人村。
我軍一臉死灰，了無戰意。
但日殺唔係。
係獵人村等緊我地既，就係日殺果批紅橙黃綠青藍紫，幾十人既贊助大軍，係破城一刻立即自殺，先我地一步番黎獵人村，等候宰殺我地呢班眼光光、輸到一敗塗地既羔羊。
「偷城丫喇！火星人丫喇！！」光頭一箭又一箭射向Γπ及Σα，口中唸唸有詞，係全頻道：「咁多詭計咪又係唔夠我地打！！」
「唔好還手，任佢打，影相放論壇。」呢個係我可以作出既唯一反抗，無力既反抗。
面對在場廿幾三十把贊助武器，我仲可以做乜？除左搵GM告狀，冇野可以做。
但係搵GM又有咩用？呢一刻，就連我自己都開始懷疑，到底係咪我先係呢個私服入面最唔應該存在果個？我先係壞人？幾日前我已經感覺到日殺同GM有古怪，但係我點估都估唔到，居然係一次過買左幾十把武器，係一大批軍火交易！！GM偷偷地開番PK區，原因明顯係因為呢筆大生意－－買完批軍火，當然要俾地方佢地用，唔通真係用黎打怪咁傻仔？換言之，今日呢場贊助武器大屠殺，係GM賣武器果一刻、係GM開放PK果一刻，已經俾GM默許左。
所以搵GM有咩用？冇用。
我打左咁耐，設計左咁多"詭計"出黎又有咩用？一樣冇用。
日殺係獵人村繼續屠殺，不問對方係普通玩家定係乜都好，總之非日殺者盡殺之。
夜幕下，一隻烏鴉飛過皎潔明亮既滿月。
我死係橋上，望住天空，呢個恐怕係我見過最美麗既景色。
襯托滿月下既鴉聲，係遍佈整條村既哀號。
其中一條屍體，美國風，忍唔住係世界頻道大叫：「外掛狗！！」
光頭意卻氣風髮：「嘿嘿，小白唔夠人打就話人外掛。」小白係台灣網路用語，可以理解成"小白痴"既意思。
美國風：「廢話！一箭萬七你有種話自己唔係外掛？葉開狂打我爆擊先一萬一刀！」
光頭和尚：「不自量力。你睇下我把野先再出聲！」
話剛講完，光頭就係普通頻道show左佢果把+1500伊克魯斯弓出黎，俾獵人村在場所有人睇。
美國風見到，呆左一呆，又立即道：「咪一樣係用外掛點出黎！」
我見到，一樣呆左一呆。但我既驚訝，同美國風既驚訝，係完全兩回事。
紅同我一樣呆一呆，係電話問：「乜依家咁公開既咩……？」
樹，大概以至整條獵人村既知情者，大概都想問同一個問題。
可能連佢老婆韓修修都冇諗過，光頭和尚會咁大無私樣，係眾目睽睽下，就咁show把武器出黎俾在場全世界睇。
突然間，戰神係白頻回左一句：「你白痴架光頭！？」
「戰神！」我立時大叫！一直冇出場既最關鍵人物，原來一直匿係獵人村？我不由得立即問：「你一早就知！係咪！？」
戰神：「知乜野？」
我繼續係白頻問：「買左幾十把贊助！你唔黎守城，係咪一早就知！！？」
「我岩岩先訓醒，訓過龍冇黎幫手唔好意思…」戰神係獵人村武器店走出黎：「你話乜野幾十把贊助？」
美國風卻執著係個買字：「買乜野？你既意思係佢把武器係俾錢買番黎？」
韓修修又執著係幫手二字，插嘴道：「你唔好唔記得戰神同我既停戰協議，戰神唔可以干涉紅樹葉既事，更莫說幫手！」
現場實在太混亂。
n方勢力同時聚集係獵人村，資訊既不完全，每個勢力都有自己既秘密、每個勢力都唔知信唔信得過。可愛家族既人唔知知唔知贊助既事、戰神唔知知唔知日殺買幾十把贊助武器、韓修修又唔知知唔知星空物語既人全部係紅樹葉、光頭又唔知做乜無啦啦自爆、戰神又唔知有心陰我定真係訓過龍、GM又唔知打緊咩算盤、超級小刀呢隻內鬼又仲係盟入面……
好混亂、好煩、好頭痛。
「我想靜下。」一個制cut左紅樹葉三人既三line，再一個制我off埋line。
行出露台，望住露台出面既公園，有班靚仔係到踢波。我抖啖大氣，深呼吸一陣，閉上眼，聽住公園既雀仔叫、球場既嬉戲聲……
行番入廳，望望電視機旁既日歷，今日係十一月十六日，我暗自記下。
我冇上番線。
我拎起電話，重撥。
我地紅樹葉三個人，約左去廟街興記食煲仔飯。
老老實實，興記煲仔飯真係好難食，唔係因為隔離果間成日冇位，我諗佢都唔會有生意做。但係難食既野有難食既好處，最大既好處係夠晒醒腦夠晒提神。食一食，成個腦清晒，煩腦一掃而空，人生只剩下一個難題：點樣清左兜飯去。
紅：「我信戰神佢真係唔知情！」
樹：「佢知唔知情其實都冇乜分別，問題係gm到底想點。」
紅：「咪就係賣武器囉，有錢賺佢唔賺咩！」
樹：「都唔會咁揚一次過賣咁多，犯緊法架。佢係唔驚既話之前就唔洗賣得咁偷偷摸摸。光頭仲要直接show出黎，冇gm默許佢會咁做咩？上次奶過野喇喎光頭。」
紅：「光頭不嬲都onon99架啦，奶完再奶我覺得佢會。」
講下講下，兩條友望住我，似係等緊我既意見。
我好專心地爬緊飯，聽到冇晒聲，先台頭望望。見到佢地兩個望實我，先出句聲：
「老老實實……你地覺唔覺d豉油冇乜味？條蠟腸又膠膠地咁？」
紅：「屌豉咩油蠟咩腸呀，講緊光頭呀！」
「你把贊助仲有幾耐玩？」
紅：「乜你講野咁跳脫……把野十二月就玩完。」
「我十二月十一號飛。」
樹：「你既意思係？」
「飛左我就唔會再玩。我地得番最後一次機會，30號攻亞丁。」
紅：「點攻呀？」
樹：「你想買武器？」
我望一望紅，答：「痴線，唔會啦，有原則有底線加麻。」
樹笑一笑，又問：「你想叫美國風班人買武器？」
紅立即反對：「就算佢地買左武器，做乜要幫我地先？買完到佢地座大咪排我地出去囉，佢地自己同理想世界鬥都得架。」
其實我都認同紅所講。
「我唔知。你地覺得gm到底係想點？」
「你話題可唔可以唔好轉咁快…」紅講番最開始佢既答案：「gm咪想賺錢囉，就係咁簡單。」
「我既意思係，gm到底係點諗我地，我地有冇存在價值係到？我地對於gm黎講，到底係眼中釘定係搞屎棍……定係搖錢樹？」
紅r晒頭：「搖錢樹？」
我繼續講：「gm一直以黎都唔認有贊助武器，除左熟人，普通人要買武器都係經戰神。賣果陣仲要講埋遊戲平衡，例如你果把最盡都係俾你去到2000。但係今次一反常態，一次賣左幾十把咁高調，仲為左賣武器特登開埋pk，我唯一諗到既就係佢好等錢洗。」
我爬一爬飯，續道：
「而我地紅樹葉破亞丁，就正正係個箭靶，俾左個誘因佢賣軍火。今次又拉埋風之谷班人落水，唔理戰神知唔知啦，如果gm真係好等錢洗，佢好大機會sell軍火俾佢地。」
樹靜待我既發言，紅卻急不及待問我：「咁你想點？」
「我係到諗緊，係咪可以利用呢點，從中r下著數姐…」講到呢到，我又咬一咬條蠟腸……
頂唔順，拍一拍台，丟低一舊水，大叫：「頂你兜野都唔知熟未既，走喇唔食喇！」