【真人真事】當年中七AL，我打左成年天堂二，但我無悔！: 76-信任
廟街分別後，我又自己係街兜左幾個圈先番屋企，食完飯慢慢散下步，係我一向既習慣。
online，係獵人村一上線，一個人都冇，卻見到世界頻道上面韓修修同一早番左去既樹係到嘈。
韓修修：「偷偷地殺我咁多盟員，卑鄙！快寫千字文道歉！」
我一邊睇佢地鬧交，一邊睇緊自己既盟員名單…
樹：「你都痴線，我幾時殺你既人？係咪計埋攻城戰？食左藥未？」
我一路碌，碌到去"尖頭瑞拉"。佢已經俾理想世界踢左，如果再俾我踢埋就真真正正無家可歸……又如何？鬼叫佢做針？踢。
韓修修：「廢話，薰已經泄晒底！星空物語果個"酒店大享"就係你！」
我又換番隻分身，creamonion，開始碌狼來了個血盟名單…
樹：「係，咁又點？唔好唔記得我地既和約係唔關星空物語事，我完全冇違反和約，何況你殺soso我都冇同你計！」
碌碌碌…碌到去超級小刀，即係as，萬年針。兩次城戰夾夾埋埋收過咁多次流料，我諗佢或多或少都注意到自己既身份已經暴露，再擺係盟內冇意思，盞自己心煩，踢。
韓修修：「聽你放屁！殺soso係因為你地既戰神殺我盟員，而家你又殺我人，依照和約理應寫一篇千字文道歉，否則後果自付！」
我又順便將壬生過檔狼來了幫手既人員踢晒，等佢地番去壬生一族。
樹：「理應？我就同你講道理，星空物語根本就不受和約約束，星空物語既人殺你你就同薰講，同我地三盟和約有乜關係？反而你果陣殺soso掛既係日殺盟徽，受和約約束，講道理應該係你寫千字文先岩！」
韓修修：「你咁樣叫講道理？soso既事大家扯平算數。星空物語既事，照你說法人人都可以開分身殺人啦，和約仲要黎做乜？最後通碟，你一係寫千字文道歉，否則就係你主動毀約！主動向我地宣戰！」
暗殺係同盟頻講左句：「就當係我地理虧，但毀約同宣戰係兩回事黎架下話…？」
當然係兩回事，韓修修係世界頻道到嘈，至不過係做場戲，霸佔道德高地，等所有人，最緊要係自己既盟員都認同，以致有足夠理據開戰。
好多人唔明，online game之麻打咪打囉，要理由既咩？一個打一個，或者幾個打幾個，當然係隨心所發唔洗理由。但係你作為一個幫派領袖，要帶動手下幾十人，什至百幾人去開拖，你就必須要有一個理由。你話「對面好樣衰，見一獲斬一獲！」冇錯係可以做一個理由，但係呢個理由可以帶動幾多人？因為佢樣衰你斬佢？打交自己都會死，自己死左都會跌level有機會跌裝，我升level練下功唔好？做乜無啦啦要冒風險走去斬人？又唔係咩深仇大恨。
每個人都有自己既道德及價值觀，每個人都會講私利，冇人會因為忠於盟主，所以盟主叫你去死就去死。所以，韓修修要開戰，首先必須要有個冠冕堂皇既理由，等手下可以毫無懷疑全心開拖。而有咩理由會好得過原來係對方主動想開拖？「我都唔想架，只不過人地打我，我地被逼迎戰咋。」簡直係最好既開戰理由。
其實三盟和約既關鍵在於實力平衡，大家都需要對方先食到龍，先可以維持到平衡，令和約繼續。而家理想世界買左大批軍火，實力平衡已經打破，佢地根本就可以單拖食龍，和約既合作屠龍反而成為限制。何況，樹有份參加日殺同星空物語既盟戰，韓修修一早就估我地有份，要嘈又點會到而家先嘈？換句話說，係理想世界換出果批紅橙黃綠青藍紫既同時，和約已經冇存在理由。而佢地買軍火之餘仲要求gm開放pk，更加係為左開戰做準備。呢場戰，無得避。
「洗乜理佢講乜，佢一早就想開戰啦，只不過之前打冇著數，先同我地一直拖到而家。」樹係同盟頻內答暗殺，又係世界頻答韓修修：「我一向係講道理，我完全冇犯和約，你憑乜野叫我寫千字文？當初和約你睇完你話同意先簽既，有咩問題你果陣唔問而家先黎問？你想開戰既話我實奉陪到底，但唔好講到係因為我地毀約！」
韓修修：「好，即係你要毀約啦，咁就唔好怪我地狠！」
樹即時係盟內吹雞：「奇岩開戰！快黎！」
似乎仲未有人留意到我on左line，我亦樂得清閒，佢地有佢地打，我有我同美國風傾計。
亞丁城戰早就係三個鐘頭前完結，我諗美國風等人係我地紅樹葉三人去左廟街呢三個鐘頭入面，應該已經打聽到呢個server到底係咩一回事。
但我估唔到事情既發展比我想像中快左六萬倍。
我密美國風，問佢：「你知道日殺班人咩事未？」
美國風唔直接答我，用例子答……佢居然當場show左一把+1000伊克魯斯弓比我睇，我真係o左嘴！完全冇諗過佢巫師要把弓黎做乜，心入面只有不斷驚訝「短短三個鐘就買左！？有冇咁快？」
良久以後，我先反應到，問一句：
「…乜台灣咁夜都過到數既咩？」
美國風依然用例子答我，show晒佢一身行頭出黎：「+250王朝皮甲、+250王朝皮脛甲、+250王朝皮手套、+250王朝皮長靴 、+250王朝皮頭盔、+250王朝項鍊、+250王朝介指、+250王朝耳環。」
我認得呢一套防具。嚴格黎講，我係認得呢一套舊版制服。呢套防具，同戰神，以及而家樹身穿，本來屬於太極果套防具一模一樣。佢地套野係未改板果時已經贊助番黎，果陣gm仲係玩緊永久贊助，唔似而家係玩月租。而月租果班人，包括紫幽、紅、艾爾等等，佢地套防具全部都係新版既新防具，唔係用王朝皮甲，而係"王朝水晶皮甲"，同埋我既"王朝白金重甲"。新版王朝甲可以自己揀戰士型弓手型乜乜型物物型咁，每個職業都可以有專屬既能力加成。而舊板就係普既"王朝皮甲"、"王朝重甲"等，冇分職業型號，只有劃一既能力加成。
我立即問：「戰神已經講晒你聽？」樹係奇岩開緊戰，套野好明顯係戰神所有，戰神"開導"緊佢地。
美國風答非所問：「你地盟有幾多個贊助呀？」
我認真地數下，唔計紫幽唔計薰唔計樹被gm收剩套防具，其實只有紅、艾爾同soso。
「三個。」
美國風：「你地得三個都走去同日殺開戰，真係有種。」
我亦都答飛所問：「你諗住買？」
美國風：「岩岩試完有少少心動呀。我問過戰神，又唔係好貴，租三個月仲打八折喎，打官服都要錢啦。」
一句「官服都要錢」，已經揭示左美國風既強烈購買欲望，呢條水魚已經上釣，已經冇得救，戰神真係快狠準。
我毫不客氣，立即密戰神：「老老實實你做sell屎係咪有佣金收？」
戰神反問：「我幾時有做sell屎？」
「你岩岩咪sell左俾美國風，仲有日殺果一大批呢？」
然後，戰神有史以來唯一一次用多過三句說話黎答我：「葉，果批真係唔關我事。問心，我幾時有害過你？我要賣既話唔會到而家先賣俾佢地。細佬既事我一向唔理，又麻煩又要改野，玩個遊戲咋。只不過係你地次次有人想買就叫佢搵我，當正我係賣家咁，咁咪幫下手，難道我倒自己細佬米？光頭show把武器出黎，美國風又問艾爾，艾爾又叫佢問我，我咪俾佢睇下囉，你教我點做！你與其發我脾氣，不如諗下你地盟咁耐以黎彈左幾多麻煩野俾我！」
我真係唔知信唔信佢好。尤其係網路世界，連表情都睇唔到，到底可以點樣判斷信唔信一個人？