【真人真事】當年中七AL，我打左成年天堂二，但我無悔！: 外傳-潛入
時間黎到攻打巴列斯既數日前，紅岩岩發現gm重新開放pk…
「理想世界招收新盟員，經驗、等級、裝備通通不限，只要你熱愛遊戲就歡迎加入我地既大家庭，新手畢業後仲有一千萬獎金喔！有意請密韓修修或韓修愛。」
「理想世界招收新盟員，經驗、等級、裝備通通不限，只要你熱愛遊戲就歡迎加入我地既大家庭，新手畢業後仲有一千萬獎金喔！有意請密韓修修或韓修愛。」
「理想世界招收新盟員，經驗、等級、裝備通通不限，只要你熱愛遊戲就歡迎加入我地既大家庭，新手畢業後仲有一千萬獎金喔！有意請密韓修修或韓修愛。」
世界頻道廿四小時都會見到韓修愛用巨集發出既理想世界洗板式招人廣告。望得多真係覺得好煩，但毫無疑問，呢種廣告，尤其是係尾二果句「一千萬獎金」的確好有成效，理想世界從來都不愁新血。
佢地既學院一早就係私服第一幼兒培育機構，就連私服論壇既新手攻略都寫明"入大盟學院->畢業->領獎金->二轉->自由身"，仿佛大盟學院係一個官方認可機構一樣，仲搞到其他盟學院都唔好意思唔派獎金。
但係我鄙視呢種廣告，我直情鄙視韓修愛呢個人。
「佢每收一個人係咪有佣金？」我實在不能理解。除左錢，有咩人會咁忠心幫自己組織做野？我從來都唔期望自己既盟員會因為忠心而幫你做野。，無論交情幾好都好，無論盟內向心力幾強都好，盟員幫完自己血盟做事，我一定會發放相應報酬。明知血盟利益等同於盟主既個人利益，依然做事不求回報既人，唔代表佢好忠心，只代表佢係一個蠢人。我喜歡利用蠢人，但我絕對鄙視蠢人。
紅：「佢叫韓修修做阿媽加麻，幫阿媽做野邊有佣金。」
韓修愛好耐以前就係理想世界既參謀。佢不嬲都叫靜心做靜媽，靜心都一向叫佢做乖女，只不過靜心收左皮，改左名做韓修修之後就冇再叫過。一直到戰神係世界頻道爆左韓修修就係靜心後，韓修愛先再次改口叫番靜媽。亦正因為呢兩個人個名咁相近，我地曾經懷疑韓修修=韓修愛，不過韓修愛一向居於幕後，從來唔參加任何戰爭，連王都唔多打；相反韓修修卻每戰必打，所以好快就肯定佢地係兩個人。個名咁相似，只不過係因為韓修修本來就係韓修愛既分身，靜心被ban後就直接俾左靜心用。
我不以為然：「如果佢唔係有用，韓修修會認佢做女？」
韓修愛係一個蠢人，但佢辦事一d都唔蠢。如果韓修修係理想世界既右腦，咁韓修愛就係理想世界既左腦。我唔太清楚佢地既內部運作，但係派臥底呢類情報工作、以致攻守城既基本方針，相信都係源自韓修愛呢個左腦。不過講到尾佢除左識玩插針同番炒我既戰術之外，大概都冇野叻，我打從心底鄙視佢。
但呢個左腦，近日卻令我異常心煩。
gm開放pk區，肯定係同理想世界有關係。但內裡到底係咩葫蘆賣咩藥，我實在睇唔透。
分析一下，其實我心底大概估到個端兒：
理想世界一直受制於三盟和約，為左要合作食龍，就算明知我地搞到靜心平頭被ban、冇左本來把贊助武器、令一眾小盟敵對理想世界，都要逼住停戰，唔可以向我地報仇，心中一股怒氣無處宣洩。而假若想打破呢個局面，最簡單直接既方法就係增強實力，直到可以單拖食龍，咁就可以無視和約。
眼下要增強實力，最簡單直接既方法，就係買多幾把贊助武器。有左足夠單盟食龍既實力，就唔再受和約所制，咁要向我地報仇既限制就只剩低禁止pk。而打破pk區禁制，唯一方法就係同gm講數。普通玩家同gm講數有咩本錢可以講？所以講數一定係由贊助玩家負責－－成件事通晒－－理想世界就係買左贊助武器，逼令gm開放pk，打算開我地拖。
但以上種種都不過係我既猜測，完全冇實據支持。為左係亞丁守城前，完全確定理想世界既意圖，我決定再次潛入佢地既大本營，再玩多次無間道，証實我既想法。
韓修愛不停招人，我就開左個新分身"靈車甩尾棺材飛"，向韓修愛應徵。
「安安，我岩岩入黎玩，係咪入你地盟會有獎金？」
佢地廣告既賣點就係果一千萬，正路當然係為左果一千萬入，我少少都唔掩飾。
韓修愛大概見唔少呢類直接表明意圖既人，好大方咁答我：「係呀，你係我地學員畢左業就有畢業獎金一千萬，你係邊到？我黎收你。」
佢地收學員從來都唔會驗證，連面試都冇，總之係40level以下，唔理你阿豬阿狗都照收，要混入去完全冇難度。我報一報位置，唔洗一陣，一個女白妖就黎到新手村收左我入理想世界。
一加入，我都未講野，就已經一大堆：
「歡迎新人加入！」
「安安啊！」
「新人你好點稱呼？」
「我叫靈車甩尾棺材飛，正職係殯儀館司機，平時最鐘意甩尾……」
好耐以前用creamyonion入會果陣，我就知道理想世界盟員既向心力好強，盟內氣氛良好，同紅樹葉相差無幾。
寒暄幾句，我就開始練功。一邊練功一邊係盟內吹水，扮下新手問問題，同佢地混熟，好快就40level畢業。
「我終於40級喇！」
韓修愛：「畢業後你就係自由身，如果想入番我地盟記得我id名，密我。獎金我已經寄左俾你喇。」
「畢業後就係自由身？入乜野盟？我而家唔係盟內咩？」
韓修愛不厭其煩又解釋一輪：「你而家係我地盟既學院入面，畢業後就會俾系統自動踢出學院，之後再入盟先會係正式血盟成員。」
我又問一問學院同正式盟員既分別，韓修愛又答一輪，我就開始問：
「我岩岩黎呢到冇耐，都唔知入咩盟好，你地可唔可以介紹下？」
韓修愛著略介紹左自己既理想世界，又介紹左另一個大盟壬生一族，然後又講左幾個小盟，每個盟都略為評價，卻完全冇提及紅樹葉。
我故意問佢：「咁果個有塊紅葉既係咩盟？我見佢地好多人係奇岩，果個都係大盟？」
韓修愛未發應，其他盟員已經答先：
「果個係渣盟，專門補刀殺人，個個都係pk狂，係人民公敵，唔好入。」
望一望個id，叫AS6，明顯係as分身。
另一個一直係同盟頻道同我吹水既日殺盟員"木村直樹"又答：「佢地叫紅樹葉，上星期先用卑劣手法呃走左我地亞丁城，唉，人至賤則無敵呀。」
我表示好奇：「啊？點呃？」
木村未答，另一個"吸血茶包"已經搶答：「屌，佢地扮野話個盟主冇上線攻唔到城，話同我地玩，咪同佢玩囉。點知臨完場就定晒我地既人，佢地成班人就穿牆入去封城！正仆街！」
作為一個新人，穿牆呢兩個字我一定要關心下：「呢個遊戲可以穿牆既咩？」
韓修愛科普時間：「穿牆係bug，我地平時只會用黎卡怪，冇諗到佢會用bug攻城。」
唔係掛？大家都用過啦，唔好係自己盟員就扮晒野－－當然我冇可能咁答佢，我只好順住個勢踩多兩腳：「真係賤！」
講起紅樹葉，日殺、理想世界兩個盟都係一肚火，同盟頻道盡是鋪天蓋地既粗口，係佢地口中，紅樹葉堪然就係一個賤人大集合。
眾人愈講愈起勁，其中一句實在令我好感概：「我地從來都冇主動惹佢，佢地就狙住我地打，又補刀殺人，唔夠打就出埋晒d奸招又bug又盛，每日都係到擾亂遊戲秩序，我鄙視呢班賤人！」
我好想原句奉還俾佢：「我地從來都冇主動惹你，你地就狙住我地打，又勒令我地既人退盟，唔夠打就抄我地橋又無間道又贊助又盛，每日都係到擾亂遊戲秩序，我鄙視你班賤人！」
但一瞬之間，我卻意識到，原來呢兩句根本可以互相套用。
我呆左。
一句反駁說話我都講唔出口……
到底係邊個做成今日呢個局面？
我地從來冇主動惹佢；佢地亦都冇主動惹我。
最初既結怨，係由我地免費獲得奇岩城開始……
當下，我click一click轉職師二轉，一到光射向我身上，救贖既聲音響起，頻道立時清空，我已脫離理想世界。
我決定以後唔再玩無間道。
於是，就有左巴列斯之戰。