【真人真事】當年中七AL，我打左成年天堂二，但我無悔！: 74-D-Day (三)
「搵到贊助未？」贊助玩家雖然只係少數，但係佢地既逆天程度足以左右大局，眼下居然成批唔見晒，我又點可能安心？
可惜暗殺及煌兩位斥侯既回答一致：「亞丁附近都搵唔到。」
係天堂二入面要搵人好簡，用巨集設定"\目標 id名"，只要目標人物係範圍內就可以自動target，無所遁形，除非佢地好似兩位斥侯咁一樣識隱身，不過呢班贊助玩家既職業我暸如指掌－－弓手、劍鬥士、巫師、騎士，根本冇一隻識隱身。
我係電話同紅樹二人講：「好奇怪，暗殺同煌都搵唔到佢地，我係城堡都target唔到佢地。」
樹er左一陣，思考完答我：「呢個情況係咪有少少似曾相識？」
似曾相識？呢四個字簡直係一言驚醒夢中人！
呢個情況何止似曾相識！？而我居然察覺唔到－－錯id！換左名，咪搵唔到囉！同火星人係一樣道理，佢地又抄我橋！？
係戰場由亞丁轉去獵人村，再轉去歐瑞城鎮既期間，大把時間俾佢地換人物，真係換左都唔出奇。
但我又立時想通，韓信身為日殺盟主呢點係冇得變，換言之，佢地點換都好，最終要破城都要靠韓信。
一搞清楚呢點，簡直係豁然開朗，所有事情都明白好多。
樹說明後，紅亦都搞清楚韓修修班人到底做緊乜，立即問我：「你唔係有ip list咩？快d對下佢地新名係乜。」
我既思緒已經翻滾左六千次，一早將所有問題同答案係腦內重覆地自我問答，紅一問我，霎時間我就將未組織好既語句答左出黎：
「佢地咁做冇point，所以分身一定唔係軍內，唔會查到，你番內城走廊standby隨時入封印室。」
紅：「ok。」
我唔知紅係咪真係明我講緊乜，我亦都唔想廢時解釋，但我好肯定紅會明白最後一句「番內城走廊standby隨時入封印室」，只要咁就足夠。
細想一下，日殺而家破唔到城既關鍵，就在於可受家族呢班肉盾，逼住佢地唔用得贊助武器之餘，又要同時受紅混於其中既贊助部隊抽水。佢地要攻入黎，就只可以直接穿牆入封印室封印。封印室有咩人佢地最清楚明白，因為佢地放係狼來了既無間道"超級小刀"，就正正係封印室內防守既一員。狼來了既人即係壬生一族既人，全部都係知曉秘密既人，就算用贊助武器攻打GM都唔會理，到時佢地用日殺軍係門前亂戰做掩護，用贊助清空封印室，韓信就可以長驅直入直接穿入去封印。
而城前既我軍贊助部隊，就算即時係城門前沖番入去防守，都唔會夠時間趕到去番去救狼來了。入到去係冇狼來了幫手下，兩邊贊助對打只係五五波，更何況韓信既無敵鐵甲？但門前冇左紅等人抽水，可愛家族既守軍就輸硬。到時佢地主力攻入黎，就神仙都難救。
我當下諗到既對策，就係將紅既部隊匿蹤係走廊中間，唔比超級小刀知道之餘，只要對面穿牆入黎，紅行幾步就入到去封印室幫忙防守等同一隊伏兵。理想世界一穿入黎，就受紅部隊加上狼來了圍攻，五五波即成八二波。
至於點解唔查ip list，好簡單，根本冇時間。如果佢地既分身係日殺盟入面，咁我一早就已經知道。如果佢地唔係日殺入面，就有如大海撈針，浪費時間。
「樹，你都番去幫美國風佢地防守。」
「唔封亞丁？」樹帶領既星空物語，本來任務就係拖字訣－－封鎖亞丁城鎮，用遊擊戰術阻礙佢地大軍，等理想世界主力連城堡都去唔到。
「戰況有變，集合戰力比較好。」
然後，我又令煌、暗殺、風聲鶴唳三個行者，分別查探城堡內各通道及城堡外鋼索，睇下有冇敵軍召喚師係到埋伏。
離攻城戰完結大概仲有五十分鐘，日殺早已經集齊人馬，見星空物語退兵，就立即準備第二波正面進攻。
人群中，卻依然未見韓信、韓修修等人既身影。
門前再次展開混戰。
第一波攻勢，可愛家族加狼來了vs日殺，我方人數幾乎係佢地兩倍以上，尚且俾佢地攻破半邊城門。更何況呢一波只有可愛家族同星空聯盟？所以，今次我都要防守，一直係亞丁之顛既Σα，騎住飛龍直接衝向城門前狂噴火抵擋日殺攻擊。飛龍係守城利器，攻防雙絕，冇血果陣仲可以飛高避戰，能力一流。
「我去守城睇唔到場，紅你睇定d，韓修修隨時穿入黎。」
正門雖然有薰呢位+500巫師係到，但其他人普遍只有+20，根本就唔係日殺+100大軍既對手，我軍且戰且退，好快就已經由廣場退守回橋上。但一上橋戰況就演變成膠著狀態，橋上陝窄環境，正好俾薰用範圍魔法掃場，我亦飛到日殺後方不斷噴火抽水，敵軍受前後夾攻，一時間又有十數人又被送番去獵人村。
呢個時候暗殺傳來軍情：「搵到召喚師！佢地係後面平台召左入黎，殺左我！」
我即刻向電話入面既紅報告：「入緊。」
同時間，係飛龍上我終於見到韓信。佢一個人係廣場遠方慢慢行入戰場，一進入戰場範圍就企定定。普通人或者以為佢只係為左方便觀察前方軍勢用以指揮大軍，但我地玩開teleport既人完全心知肚明，一睇就知，韓舍係等緊佢地既召喚師召喚。
見狀我立即飛過去，打算用飛龍同佢隻抽，一開打佢就變成戰鬥狀態不能召喚。但估唔到，我都未飛埋去佢就消失左－－已經被召喚入城內。
韓修修居然將我既偷城策略完全複製，用主力做掩護，精英部隊就係後方偷城－－可惜我早就有所防範！
未幾，紅就傳來三字真言：「已搞掂。」
不費吹灰之力，理想世界既精英報隊就俾紅呢三個字伏擊死亡。
我命紅：「快出黎幫手，攻左入內城喇，一樓外左邊走廊！」
日殺後方既偷城部隊全滅，但係前方防守既可愛家族同星空物語亦都全滅，理想世界主力既殘餘部隊已經突破正門攻入走廊，準備攻打中門。同其他城堡唔同，亞丁城堡除左內外城門，仲有一層中門。
隔住一層中門，紅就企係門後面迎接呢群殘黨，破門既一刻，亦係佢地死亡既一刻。
第二波攻勢，以正門、中門被破告終，時間尚餘約二十分鐘。
日殺大軍自知時間無多，係獵人村一重生就立即召喚座龍，務求以最快速度趕番戰場。
樹：「集中火力殺一件得一件！」
同日殺一齊死番去獵人村既就係樹薰二人帶領既星空物語，以及係封印室內戰死既狼來了盟員，我方為數唔多，冇可能再重演第一波攻防既封橋戰，只能企係村門口不停放箭，試圖再次封鎖獵人村三個門。
奈何日殺人數太多，我方人員根本做唔成威脅。
日殺大軍用座龍直線狂奔，完全無視一旁封門既星空物語眾人，名副其實既死衝！就係樹面前，迎面幾十隻座龍受箭所傷卻施毫不退，掂行掂過視箭傷如無物。一陣衝鋒，幾十隻座龍就如風一樣衝破封鎖，丟棄死傷者，其餘幾十條龍沙塵滾滾地向亞丁城堡狂奔。
無可奈可，樹等人亦只能召喚座龍從後追趕，但係大家都係座龍，跑既速度都係一樣快，樹只能係後面食塵，根本追唔上。
極速狂奔下，大軍用左三分鐘就衝番黎城堡，但係時間只剩下十數分鐘，日殺做咩都冇用，我已經嗅到勝利既味道。
日殺大軍衝到城門前既廣場集合，面對我方守軍，佢地施施然落龍，施放附助buff，準備第三波，最後一波攻勢。
樹等人從後趕上，繞路兜個圈係城堡後方番入黎，加入守軍勢力。
日殺放好buff，做好準備，幾十人同時亮出佢地手上既兵器……
「仆街…玩完了。」
我面前既……理應係+100武器所發出既一大片紅光，呢一刻，卻係一大堆紅、燈、紫、綠、白、黃光……
我面前既……唔係第一、二波攻勢既+100海，而係無數既贊助武器海！！！
韓信一聲大叫，日殺既贊助大軍就向城門衝鋒！！
「痴撚線…」突如其來既變掛，將我心中所有步處打亂。我腦裡已經直接預想到最終結果，但係心入面仍然抱有最後一絲希望……
韓信大叫既同時，我立即控制企係封印水晶前面既狼來了盟主Γπ，封印城堡－－我既最後手段，backup plan，狼來了登記做攻城方，就係為左打唔過既時侯，就立即搶先封印！
但大軍就如龍捲風一樣橫掃整個戰場，根本唔係打仗，係單方面虐殺！係sm！就連飛龍都被秒殺，可愛家族同星空物語更加毫無反抗能力，日殺已經冇任何底線，為左攻破亞丁城，係最後呢十幾分鐘豁出去，唔理任何規條，將佢地既贊助屠刀伸向所有敵對血盟！！
「殺韓信呀！韓信一死佢就玩完！！！」
「狼來了做人牆呀！封門！！」
…
但我每講一句說話，腦入面就立時對我反駁。
「殺韓信呀！韓信一死佢就玩完……」
「比著你係韓信，你會唔會親身上陣比機會人地殺丫？」
「狼來了做人牆呀！封門……」
「人地紅橙黃綠青藍紫乜都齊晒，一下就破你人牆啦！」
我明知，韓信根本死唔去。
我明知，人牆根本頂唔到。
我明知……本來……我已經嬴左……
…
電話入面傳來紅既聲音：「痴線，秒殺，sm。」
Γπ既封印需時五分鐘，但唔洗一分鐘，日殺就已經突入封印室。
系統無情既一句《蒼日對你造成12406的傷害》，將backup plan完全粉碎。
我留番條屍係封印台前，睇住韓信一步一步走上台，踏上Γπ既屍體，封印。
第三波攻勢，我軍完敗。