《妳做咩將成碗譚仔倒落我個頭上面！？》: 副章三 : Hani的一天
「Hani啊~~~」
放左學之後，阿妤一路叫住我個名一路衝埋黎。
啊，係到提一提，阿妤係我上左中學之後認識既好姊妹。
「又點呀妤姐，」我笑左一笑。「見你個樣咁誠懇，唔方又係有d野想拜託我做咩！」
「嘩，你點知架！」阿妤一臉扮驚訝既樣。「果然係我呢一世人既好姊妹！」
「得喇唔洗再賣口乖！」我徐徐收拾好書包。「點啊，有d咩想我幫手？」
「就係咁既......」阿妤唔好意思咁講。「我呢上個星期就係觀塘廣場到預訂左個電話case，咁就聽日星期六可以去攞......」
「之但係我聽日就約左男朋友出街，所以就攞唔到......」阿妤係呢個時候望住我。「唔知道Hani姐姐可唔可以幫我攞呢？」
「啊，你份人啊，洗人唔洗本，叫個好姊妹去攞野，自己就走去拍拖！」我扮嬲咁講。
「唔好嬲啦Hani！」阿妤捉住我既手臂。「最多我星期一請你食雪糕？」
「嗯......」一聽到有甜品食，我就動搖lu。「唉，好啦，睇在雪糕既份上，今次就幫你啦！」
「好yeah！」阿妤放下心頭大石咁講。「都話左Hani係世上最正既女人黎架啦！」
「要人幫手個陣先識擦鞋啦你！」我笑住咁講。
其實，如果我真係最正既話，點解我會無男朋友？唉......
就係咁，星期六一早我就出左觀塘攞電話case。
「係咪呢個case呀靚女？」店員遞左個殼俾我。
「係呀唔該！」其實我鬼知咩，我俾張單你，你俾個case我，咁咪就係呢個囉！
攞完之後我見時間仲早又未到食lunch時間，於是乎就選擇周圍行下。
不過其實觀塘有幾大先得架，話咁快就行晒。
我望一望個電機屏幕，依家係12點幾。
「嗯......依家做咩好呢......」我企左係地鐵站既入口位。「唔通番屋企？又好似好悶咁喎......」
係喇！去搵媽咪呀妹食lunch咪得！
我即刻打俾呀妹。
「喂，家姐？」芷翹接聽左電話。
「細妹你依家同媽咪係唔係屋企？」我問。
「媽咪出左去打牌，我就係屋企煲緊劇囉！」芷翹答。「做咩咁問？」
「無呀，事關我今日就去左幫阿妤去觀廣攞d野，所以依家攞完之後咪係觀塘無野做囉！」我繼續講。「所以就想問下你一唔一齊食lunch之麻！」
「好呀好呀我好肚餓喇！」芷翹爽快咁講。「不過......我又想煲劇唔想落街食，所以不如......家姐你買上黎食？」
「啊你個懶豬呀！」我沒好氣咁講。「唉，怕左你喇，我依家買野上黎食啦！」
「好yeah，家姐萬歲！」芷翹好開心咁講。
「咁你想食咩呀？」我問。
「我要......」芷翹諗左一諗。
「我要食譚仔！」
於是乎我就去左買譚仔，然後就上左去同芷翹一齊睇住「求婚大作戰」食麵。
未睇過「求婚大作戰」呢套日劇既讀者唔洗擔心，依家就等我黎介紹下啦！
呢套劇分左十二集，每集45分鐘，係好多人公認既神劇。
故事講述男主角有一個青梅足馬既女主角，佢地由細個開始就已經互相中意對方。
但由於男主角一路都唔嗲唔吊，唔肯向女方表明自己心跡既關係，女主角最終選擇放棄，然後同左第二個人係埋一齊，最後仲要走到去結婚既地步。
而最諷刺既就係，男主角竟然要為呢場婚禮作致詞。
於是乎男主角只好壓抑住自己既感情，講出左一段「假祝福」，然後就落番台觀看女主角成長既幻燈片。
係幻燈片上，男主角越睇就越不甘心，因為自己明明一直都陪伴住女主角成長，同佢結婚個個都應該係自己。
係呢個時候，主角既思念引起左一隻妖精既興趣，於是乎妖精就讓主角可以回到每張幻燈片既日子，改變過去。
經歷過無數次既時空旅行之後，男主角終於明白到，單單改變過去係無用。
因為，「最重要的事情，不是悔恨過去的現在，而是想改變現在的未來」。
結果，妖精讓男主角再次回到致詞的一刻，而男主角亦都終於能夠把握機會，講出多年來從沒對女主角講出既心底話。
女主角聽完之後大為感動，亦同時勾起左以往一直對男主角既愛意。
最終，女主角堅決離開婚禮，與男主角係埋一齊。
我同芷翹一路睇就一路眼濕濕，睇到結局個下更加係喊左出黎。
點解我會喊？好簡單姐，因為我好羨慕男主角同女主角最後能夠大團員結局。
相反，我自己就......
「家姐，呢套野真係好好睇啊可？」芷翹一路係到執拾枱面一路係到抹眼淚。「不過如果男女主角一開始就能夠互相坦白既話，佢地之間就唔洗再經歷咁多不必要既波折，直接就可以係埋一齊啦。」
「但係你要知道喎細妹，坦白呢樣野一D都唔容易架，需要好大既勇氣先做到！」我笑一笑。
芷翹諗左一諗，然後好似明白左D野咁講 : 「嗯，我諗我明白你既意思！」
佢繼續講 : 「就好似我同珞仔咁，其實我向佢坦白阿修件事個陣，我都用左好大既勇氣。」
「所以細妹你其實已經好叻架喇！」我講。
無錯，芷翹佢真係好叻。
因為坦白呢一樣野，我從來都做唔到。
當初中意阿修個陣，我無向佢坦白，講出自己既心意。
之後阿修講俾我聽佢中意芷翹個陣，我就呃自己唔再中意阿修，所以就去左做TB，無向自己既內心坦白。
直到阿修消失左之後，我終於漸漸放低左佢。但由於感覺上好似無左個人生目標咁，於是乎我又呃自己仲中意阿修，又無向自己坦白。
結果，依家我連自己想點都唔知。
照常理黎講自己明明就好應該放下阿修，重新擁有一個新生活，重新去愛一個人 ;
但自己偏偏又唔想失去呢個寄託，於是乎又呃住自己仲中意阿修。
唉......
執好野之後我就同芷翹傾左一陣心事，然後我就番屋企喇。
係一路上我都係到諗緊，究竟依家既自己可以點做。
「唉......」我慢慢走到去一個馬路口。
望住眼前遠處既路燈正在泛起緣色咁一閃一閃，而旁邊既貨車則正蠢蠢欲動，於是乎我都緩緩放慢腳步準備停低落黎。
突然間，一個戴住耳機，唱住「與我常在」既男子身影係我旁邊擦身而過，而且無視住紅緣燈既閃爍準備繼續過馬路！
「喂，睇車呀！」我大叫左一聲，但係個個男仔竟然聽都聽唔到！
「睇車呀！」我再大叫多左一聲，佢終於好似聽到少少咁，開始放慢腳步！
之但係......佢依家已經行緊出馬路！
「睇車呀！」我第三次講出呢一句說話，並且一個箭步跑上前，伸手將呢個男仔拉埋黎。
就係我拉佢埋黎既時候，貨車就應紅燈即衝，係男仔面前近距離飛過。
唔知點解，我個下覺得勁嬲，於是乎就一野從後除左個個男仔既耳機。
我一路行過去男仔前面，一路大罵 : 「你係咪傻架，淨係掛住聽歌完全唔睇路架喎！」
結果，當我見到呢個男仔個正面既時候，我內心當堂窒左一窒。
佢......咪就係珞仔？
「……芷翹家姐！？」珞仔似乎都好驚訝咁講。
哈，算佢有心啦，我頭髮長左咁多都仲認得我。
我立即平復番個內心，然後講 : 「好彩我岩先及時拉住你咋！」
只見珞仔無應我，只係紅都臉晒咁呆左望住我。
點解珞仔佢會臉紅架呢？
「喂！」我叫醒佢。「眼甘甘咁望住我做咩呀你，信唔信我同細妹講呀拿？！」
「你識我？」珞仔講。
「邊有可能唔識呀，珞仔呀麻，個日係西貢個個跟蹤狂呀麻！」我取笑道。
我講完呢句之後，珞仔塊臉紅得仲「膠關」！
哈哈，佢又幾可愛架喎！
「er……哈哈……」珞仔勁緊張咁尷尬一笑。「係呢芷翹家姐，我都未知你叫咩名添。應該點稱呼你？」
係呢個時候，我記番起芷翹話唔可以俾珞仔知道我個中文名，於是乎......
「叫我Hani得架喇！」我拍一拍珞仔膊頭。「放鬆d啦，我又唔會食左你既！」
「頭先真係唔該晒，我以後會睇路架喇！」珞仔好抱歉咁講。「er......我有野做要走先喇，遲下再傾啦！」
啊，依家d人呀，都未講夠兩句就想走！
「喂！」我一野拉住佢個衣領。「話晒我都係你救命恩人呀，係咪循例都應該請我飲番杯咖啡呢？」
「er……好。」珞仔吞左一啖口水。
於是乎我地就去左apm個間Starbucks到坐低飲咖啡。
「係呢芷翹家姐啊......」珞仔仲係好緊張咁講。
「叫我Hani得喇！」我笑一笑。「家姐前家姐後咁，搞到我老晒！明明我同你係同年架麻！」
「係既Hani！」珞仔無啦啦坐直左個身，甚是搞笑。「係呢Hani，點解你會係觀塘出現既，你唔係住西貢架咩？」
好啦，見佢咁緊張，一於就同佢開下玩笑放鬆下！
「哈哈哈！俾你發現左添！」我扮晒野咁哄埋去珞仔到。「其實……我係黎特登搵你架……珞仔<3！」
「咩話！？」珞仔塊面再次紅晒咁縮番後個頭。「你…你…你搵我做咩！？」
哈哈哈，佢真係好純情！
「哈哈哈！」我俾佢搞到笑左出黎，仲要笑到肚痛個隻。「我會唔會係黎搵你呀？我講笑咋傻仔！」
「唔好笑囉好無！」只見珞仔鬆左一口氣，然後好似唔甘心俾我玩咁講 : 「咁你點解會係觀塘姐！」
「無啊，我岩先幫朋友去觀塘廣場買野，咁買完見無野做咪上去左搵芷翹傾計囉，之後一落番黎無耐就係馬路口見到個唔睇車既柒頭，咁咪即刻衝埋去拉住佢囉！」我稍為抖番順條氣。。
我繼續講 : 「咁你呢，唔係話有緊要事做架咩，做咩仲咁得閑請我飲咖啡？」
「其實我真係有緊要事架！不過我呢樣緊要事，想急都急唔黎。」珞仔唔好意思咁R住個頭講。「因為我依家其實係希望周圍行下，從而搵到畫畫既靈感……」
「畫畫靈感？」我不解咁問。
於是乎珞仔就將佢比賽既事講左俾我聽。
「嘩，原來你咁犀利架！」我從來都勁中意d有才華既男人。「睇你個樣CHOK下CHOK下成個沈震軒咁，仲以為你係個D咩都唔識既死MK黎架添！」
「我會唔會係MK呀！」珞仔扮嬲咁講。「咁我當初夠以為你真係男仔啦，點知你係TB！」
只見珞仔講左出口之後，神色即刻變得慌張。
「er……Sorry。」佢無啦啦道歉。
哦，原來珞仔都知道左我同阿修之間既事。
「傻啦我都無野。」我笑一笑。「芷翹有同你講阿修既事？」
「嗯。」珞仔點點頭。「咁你知唔知道3月14號既事？」
「梗係知啦。」我攞起杯咖啡黎飲。「而且我仲一早知道阿修做咩要係3月14日約芷翹出黎。」
於是乎我就將我知道既事同晒珞仔講。
講講下，我腦海裡又再次浮現番起關於剛才「向自己坦白」呢問題，於是乎心情又再次低落下來。
「城堡入面住左隻仙子，佢叫做咩名！」突然間珞仔係到問我！
「下？……er……er……」俾佢咁問一問，我居然真係係到認真諗。
諗左一陣，我都係唔識。
「嘩好難喎，唔知道！」我勁期待答案咁望住珞仔。「快d講答案！」
「哈哈，答案就係……」珞仔勁high咁企左係身勁大聲咁講。「答案就係，」
「堡‧仙‧子！」
……
「傻瓜~~~傻瓜~~~」出面有隻烏鴉飛過。
「……」珞仔終於意識到自己失態，於是乎臉都紅晒咁坐番低，乖乖地咁飲咖啡。
珞仔佢究竟係咪黎傻架！
「嘩哈哈哈哈哈~~~！」我再次俾珞仔搞到笑左出黎。「好好笑呀頂你！係有料到喎，保鮮紙都俾你諗到，哈哈~~~！」
其實我笑緊既，係珞仔既天然呆。
「笑夠未呀，邊有咁好笑！」珞仔怕羞咁講。
「真係好好笑麻！」我扁嘴咁望住珞仔。
珞仔見到之後，又係另一次臉紅。
有無咁易臉紅呀！！！
由於我個頭岩先因為笑黎笑去搞到亂q晒既關係，我就攞左個髮cool出黎紮左條馬尾，然後用一副欣賞既眼光望住珞仔講 : 「睇黎我細妹眼光都幾好喎，揀中個又睇得，又講得，又畫得既男朋友！」
「哈哈，有無咁誇張……」珞仔道。
其實我一d都唔誇張，因為珞仔份人真係唔錯，又可愛啦又有才華啦又靚仔喎！
之後我地就傾番畫畫靈感既問題，而我就俾左個建議珞仔，跟住佢就勁開心咁話有得諗，仲三番四次多謝我。
飲完咖啡之後珞仔就話要番屋企畫畫，所以我都無謂阻住佢。
「我走先喇咁，遲下電話聯絡！」珞仔送到我落去mtr，然後面露微笑咁講。
哈哈，你呢句說話俾芷翹聽到就知死！
「好呀，反正我都有你電話number！」我高興咁再次哄個頭埋去。「不過珞仔，記住今日呢件事，千祈唔好唔好同芷翹講喎！」
「下？！」珞仔嚇左一嚇。「點解既？」
「因為……」呢個時候我先意識到呢句說話同我想表達既野好有出入。
明明我想話廢事芷翹誤會所以先唔好講，點知依家就變左好似偷情唔可以俾人知咁。
於是乎我求其作個藉口講 : 「因為我想我地之間有個小秘密囉！咁樣友誼先可以長久！」
哈哈，呢個藉口真係假到呢......
「係咁架咩？」珞仔好懷疑咁講。
「我話係就係啦！」我笑住咁揮手。「快d番歸啦你，記住睇車呀！」
「哦……咁我走喇，byebye！」珞仔既臉上變番一個笑容，然後揮手而去。
「byebye！」我講完之後就拎轉面入閘。
「哈哈！」我會心微笑左一下。「其實......我同佢之間有呢個小秘密......」
「都幾好啊，嘻嘻！」
我有呢個咁可愛既妹夫，真係好開心，好滿足！
......
我......係咪又對自己唔坦白了？
『我沒有理會有沒有，連伴侶也要花費多幾倍力才望個夠，但仍然難擁有。』