《妳做咩將成碗譚仔倒落我個頭上面！？》: 副章二 : 我是Crystal，我沒有男朋友，唉！
「嗶嗶......嗶嗶......」手機既鬧鐘正係到不斷咁響起。
「嗯啊！」我緩緩咁坐起身伸左個大懶腰，希望可以擺脫周公既魔掌。
大家好，我係Crystal，一個平凡得唔可以再平凡既23歲小女人。
如果要我形容自己既生活既話，我諗「無憂無愁」呢個詞語都幾應景。
點解我會咁講？
事關呢我依家就係xxx書院到任教緊藝術科老師一職既，咁錢雖然就唔多，不過都叫做自給自足，夠俾公屋屋租之餘又買到架二手私家車咁囉。
或者你地會好羨慕我既生活。
不過，呢種生活卻俾我有一種「平淡得有d空虛」既感覺。
點解？好簡單姐。
因為係我既生命裡面係未曾出現過轟轟烈烈既愛情呀！
拿，我講明先呀下，我唔係樣衰個d黎！
其實我由幼稚園開始去到大學畢業個陣一直都係學校既萬人迷黎架喇，要追我既男仔真係多到如天上繁星！
聽d男仔講，佢地中意我既原因係因為我天然呆，可愛得黎又有女人味，個樣睇起上黎仲要好似「朱茵」咁，總之就一句講晒 : 好lun正。
其實有咁正咩？如果真係咁正既話點解我咁耐以黎都遇唔到一個合眼緣既男人？
拿，我先唔係眼角高，我擇偶既條件不知幾簡單！
最緊要就係 : 有feel。
由細到大身邊d男仔都淨係識獻殷勤，搞到我勁反感。
所以直到去依家咁大個女，我都仲未拍過一次拖，初吻都淨係送過俾自己隻狗。
我梳洗完換好衫之後就出左門口準備番工。
由於學校係觀塘而我住寶琳既關係，我每朝早都要預早少少出門口搭七點半鐘既地鐵，然後再徒步行十分鐘番去學校。
「呵欠~~~」上到地鐵之後我隨意搵左個位坐低，然後係到放蚊。
突然間，就係車門閂緊個時，有個男人從月台到打側身勉強跳左入黎車箱！
唔知係咪因為衝力太大呢，佢跳左入黎之後企唔穩，個頭一野撞左落條柱到！
「砰！」呢個男人既腦袋撞落去個一剎那發出左巨響。
「嘩......好痛......」佢蹲左係地下，雙手按住個頭痛到係到苦叫。
哈哈，佢係咪黎搞gag架！
「噗茲！」我望住呢個咁好笑既情景，竟然一個唔小心笑左出黎。
個男人聽到我笑佢之後就望左過黎。
於是乎我就立即意識到自己剛才既失態，所以立即用雙手掩住個嘴。
就係咁，我同佢之間既視線完美咁接上左。
呢個男人睇起上黎應該同我差唔多年紀。
1秒......2秒......3秒......
我地既視線由接上既一刻開始，就再無斷過。
「er......」我突然覺得勁尷尬，所以拎轉左塊面。
個個男人徐徐企起身，然後......向我既方向走過黎！
死喇死喇，我岩先咁樣笑佢，佢實會鬧到我狗血淋頭！
「唔好埋黎唔好埋黎唔好埋黎......」我掩住塊面喃喃自語咁祈禱道。
個男人走到去我身旁既位置坐低左！
嗚呀，唔好罵我呀！
「對唔住啊，我唔係有心笑你架！」我係害怕既心理低下，一時衝動咁直接望住隔離既呢個男人道歉。
佢同我再次對望住，而且今次仲要係勁近距離。
「噗噗......噗噗......」望住佢，我既心跳竟然不自覺咁加速起上黎。
「小姐，我唔係想罵你啊！」佢向我報以一個微笑。
一個，非常窩心既微笑。
佢繼續講 : 「我只係覺得暈暈地，想搵個位坐咋！」
......我好樣衰啊......
「哈哈......乜原來係咁呀......」我紅都臉晒咁講。「點都好啦，岩先笑你係我唔岩，sorry啊！」
「無所謂啦，我呢d傻頭傻腦既男人，俾人笑慣架喇！」佢似乎一d都唔介意。「係呢，你平時都係搭呢班車架？」
「嗯，我番工搭呢班車就岩岩好。」我點頭回應。
「我呢平時就搭八點鐘車既，」佢講。「不過因為我今日要早少少番工既關係，所以惟有好似頭先咁趕搭呢班車！」
「哦......」我不知所措咁講。
嗚呀，其實我唔係想答得咁求其架！
結果，如我所料，個男人無再應我，dead air了。
係忐忑既心情下，好不容易咁終於坐到去調景嶺。
講起上黎，我做咩會覺得忐忑既？算啦唔理喇，轉車！
我企左起身，準備等車埋站。
係我旁邊既男人並無起身，即係睇黎佢應該係去港島個邊番工。
終於埋到站喇！
門緩緩咁打開，而我就準備行出去。
但係好奇怪既就係，我竟然唔想走。
「小姐！」係我踏左出去月台個陣，個男人叫道。
我另轉面望住佢，發現佢跑左過黎門口位望住我。
「我......」男人深吸一口氣。「我諗，我以後都會搭呢班車番工！」
「所以......聽日見！」
我聽完之後，心裡面竟然泛起一點暖意。
「嗯！」我會心微笑左一下，然後望住佢講 :
「聽日見！」
依家諗番起，如果當日唔係多得呢個傻佬咁大膽同我講呢番說話既話，我地之間都唔會有可能走到今日。
『所謂的緣份，就是上天給予男女的一個相遇機會。』
『所謂的努力，就是自己有沒有捉緊機會，拉近彼此的距離。』
『所以請大家緊記，』
『縱使緣份來了，若然自己不願意多走一步的話，機會也是會流走 ; 』
『縱使萬分努力過了，若然上天不給你們機會的話，最終也只是徙勞無功。』