《妳做咩將成碗譚仔倒落我個頭上面！？》: 副終章: 故事仍在蔓延

沖完涼之後，我地就上左床......
 
        放心，係上左床攬住訓覺姐！
 
        我地互相向大家表明晒一直以黎向對方既心意，亦都將整個故事既來龍去脈解釋好晒。
 
        「珞仔......」芷翹攬得我好實。「但就算依家點美好都好，你聽日都要去法國喇......」
 
        「我好唔捨得你啊......」
 




        「傻妹黎既，去兩個月咋麻，又唔係永遠唔番黎！」我安撫芷翹。「而且我地仲可以wtsapp、skype聯絡架麻！」
 
        其實，我都好唔捨得你啊，芷翹。
 
        但係一方面我應承左阿娜呢個妹妹一定要陪伴佢，一方面我又唔想放棄呢個學習既機會，
 
        而且最重要既係，我臨時先黎放飛機唔去既話係會直接影響法國藝術學院對香港，對我校，對我既評價。
 
        所以，我唔能夠唔去。
 




        「我梗係知道......」芷翹好失望咁講。「其實如果當初我能夠早d向你坦白既話，就唔洗搞成咁......」
 
        「點會係你既責任呢！」我反駁。「其實係因為我既自以為是，先令到件事發展成咁......」
 
        「珞仔啊，」芷翹抬起頭望住我，個樣非常不安。「你去完法國番到黎之後會唔會唔要我架可......」
 
        「放心啦芷翹，我唔會唔要你。」我輕撫著芷翹既頭髮。「我應承你，我司徒珞永遠都唔會再咁幼稚，再咁輕易讓你離開我。」
 
        「我會一直咁照顧你，愛著你，唔俾你再為我流一滴傷心既眼淚。」
 




        芷翹聽完之後，眼淚情不自禁咁流左出黎。
 
        「你係先好講啊，唔好再開空頭支票俾我......」芷翹哽咽咁講。「因為......我真係會信你架......」
 
        「嗯，今次我絕不食言。」我笑一笑。「所以......一定要等我番黎啊，芷翹。」
 
        芷翹同我對望住，莞爾一笑。
 
        「嗯，我一定會等你架，珞仔。」
 
        講完之後，我地就接吻起上黎。
 
        呢個吻，代表住D咩？
 
        呢個吻，代表住承諾，代表住內疚，代表住感動，代表住熱情，代表住浪漫。




 
        最緊要既係，代表住愛。
 
        我地整晚彼此相擁著，完全沒有半點分開既意思。
 
        或者，咁樣係因為我同芷翹都明白到，呢個動作要兩個月後先能夠再次實現，所以非常珍惜。
 
        呢一晚，我無點樣訓過覺，全程都係到望住身邊呢個小美人。
 
        望住佢，令我回想起第一次見面。
 
        個一晚之前，我仲係一個頹廢既行屍走肉。
 
        直至遇到妳，我既生命終於開始泛起了一點點既浪花。
 




        當初，我抗拒妳，因為我怕自己把妳當成水泡。
 
        但去到後來更多既相處之後，我終於明白到，我係確確切切深愛著妳。
 
        在此之後，每一日令我最期待既事，就係朝早與妳飲檸檬茶。
 
        我地經歷左重重波折之後，終於係埋左一齊。
 
        雖然之後都仲有唔同既難關，但我地總能夠攜手一一克服。
 
        直到今日，妳依然仲係我身邊。
 
        呢樣係我最大既鼓舞，最大既禮物，最大既恩賜。
 
        我愛妳，芷翹。




 
        但要走，總要飛，時間仍然會流走。
 
        天空，已經漸漸明亮起上黎。
 
        我慢慢退開整個人落床，諗住先去刷牙洗臉，然後再煮個靚早餐俾芷翹食。
 
        點知我一落床，芷翹就瞪大左雙眼。
 
        「珞仔，你要去邊！」芷翹一個箭步踏上黎。「唔準自己偷偷地咁走左去架！又話唔會離開我，你呃我！」
 
        「我去刷牙洗臉咋傻妹！」睇到芷翹呢個動作，我真係好心痛，痛在責怪自己點解俾唔到安全感芷翹，搞到佢咁驚我會走。
 
        無錯，我要做番D實際既野去挽救。
 




        「芷翹，」我咀左芷翹額頭一啖。「一陣我送D野俾你啊。」
 
        「嗯？」芷翹疑惑咁問。「送咩俾我？」
 
        「呢個係秘密！」我笑一笑。「等我地刷完牙洗完臉食埋早餐之後先再講！」
 
        於是乎我拖住芷翹去左梳洗，然後就一齊煮早餐。
 
        係我煎緊腸仔同蛋既時候，芷翹就從後攬住我 ;
 
        係芷翹洗緊碗既時候，我就從後攬住番佢。
 
        但願呢個早上，唔好咁快流走。
 
        「早餐就食完喇，有咩禮物送俾我先！」芷翹攤大隻手板。
 
        「嗯......你合埋眼先！」我懶神秘咁講。
 
        「好啦，」芷翹乖乖合作咁閉上雙眼。
 
        我從後推住芷翹走到入房間，然後就讓佢坐係床上面。
 
        「做咩又入番房既？」芷翹雖然係閉上緊雙眼，但一摸落張床到就知道。「拿，唔準做曳曳野架！」
 
        「如果我要做既話琴晚沖涼個陣就做左啦！」我奸笑住咁講，不過芷翹佢睇唔到，哈哈！
 
        我繼續講 : 「不過你咁講一講喇喎......哼哼哼......」
 
        講完之後我就吱左芷翹條腰一下。
 
        「嗚哇哈哈！」芷翹縮左一縮。「唔好亂黎呀，我叫架！」
 
        係呢個時候，我已經趁機攞起左部結他。
 
        無錯，我要送番呢份久違既禮物俾芷翹。
 
        「珞仔？做咩無晒聲既？」芷翹聽唔到我講野，個樣顯得有點擔心，但仍然遵守住承諾，閉起上眼。
 
        「呼......」我深吸了一口氣，然後對住芷翹講 : 「芷翹，可以開眼喇。」
 
        於是乎芷翹就立即張開眼，然後就一臉驚訝咁望住我。
 
        「呢份生日禮物，雖然足足遲左4個月先送俾你，」我輕掃一下弦線。「但當中所包含既愛，亦都足足多左4個月既份量。」
 
        「所以......希望你會中意啦。」
 
        我再次輕掃起弦線，然後唱起周柏豪既小孩 : 
一路唱既時候，我都同芷翹一直對望住。
 
歌中每一句既歌詞，都係我衷心想對芷翹講既說話。
 
唱完之後，我坦率咁對芷翹講 : 「芷翹，多謝妳。」
 
「只要妳係我身邊既時候，我就能夠忘記一切煩惱，與妳一起嬉戲暢遊 ;」
 
「只要妳係我身邊既時候，我就能夠承受一切苦難，為妳抵擋一切風雨。」
 
「我只想抱住妳，與妳一起做個簡單既夢 ;」
 
「我只想愛著妳，與妳一起走過平凡既人生。」
 
「芷翹，多謝妳呢個天真既小孩，讓我再不憂鬱 ;」
 
「芷翹，多謝妳呢個可愛既小孩，為我帶來陽光。」
 
「芷翹，我愛妳。」
 
「......」芷翹聽完之後，沒有說出一句說話。
 
但係佢臉上既眼液，卻早已經流了出來。
 
我放下結他，緩緩走過去芷翹面前，攬住佢講 : 「我，係絕對，絕對，唔會再離開妳架喇，芷翹！」
 
「嗚嗯......」芷翹整個身體都軟左落黎，伏在我腰間一直哭，一直哭。
 
唔知過左幾耐，芷翹突然開口 : 「珞仔......」
 
「在！」我講。
 
「我應承你，我唔會再亂諗野，乖乖地等你番黎架！」芷翹講。「因為......你頭先既說話，令我覺得我可以相信你唔會再離開我！」
 
媽咪呀！我終於得左喇！！！
 
「嗯！」我笑住咁講。「我一定會番黎架！」
 
「嗯！」芷翹亦都笑住咁回應我。
 
就係咁，芷翹陪左我番左屋企攞行李，然後就join埋我老豆架車3個人一齊去機場。
 
「珞仔！」泊好架車一去到機場門口，就見到媽咪衝過黎。
 
「媽咪！」我拖住芷翹跑過去。
 
哈哈，唔知係咪因為自己知道即將要走呢，竟然忽然好唔捨得身邊既所有人。
 
我衝左埋去之後就攬住左媽咪講 : 「媽，唔洗擔心我架，我照顧得掂自己！」
 
「就係聽到你咁講我先擔心呀，傻仔！」媽咪講。
 
母愛，就係養兒一百歲，長憂九十九。
 
呢個時候老豆行左埋黎，然後輕撫住我個頭講 : 「大個仔架喇，記得似番個男人，去到法國個陣要好好保護阿娜呀，知道未！？」
 
「得啦老豆，有我係到洗擔心咩！」我舉起隻大姆指。
 
父愛，就係鐵造既暖爐。外表冰冷，卻比所有東西都還要來得燙手。
 
我地四個徐徐走進機場內，前往櫃檯辦理登機手續。
 
就係我搞完手續行番出黎既一刻，我就發現父母同芷翹身邊多左一個身影。
 
「死仔！」蛋撻一個箭步走上前，用最熟悉既動作做見面禮。
 
佢一野箍住我條頸，然後拉我埋去。
 
「頂你，就無d更加溫柔既方法打招呼架咩！」我沒好氣咁講。
 
比著係平時既我，一定會不停咁掙扎。
 
不過今次，我無。
 
「死仔，去到個邊，記得唔好掛住溝女，專心d學野呀！」蛋撻腼腆一笑。「如果真係有靚女既話，記住幫我向佢攞個電話，番到黎個陣俾我！」
 
「得啦，等我介紹條豬扒你識！」我奸笑。
 
然之後我地又因為咁樣係機場到打打鬧鬧左一陣，旁邊既人都淨係得個睇字，哈！
 
胡鬧過後，我同蛋撻都弄得身水身汗。
 
「啊，你條友，走得咁鬼快既？」蛋撻行番埋黎。「連我都唔夠你跑！」
 
「承讓承讓！」我自豪咁講。「無計，天資問題。」
 
「挑！」蛋撻走晒音咁講。
 
於是乎我同蛋撻同時笑左出聲。
 
笑左一陣，蛋撻搭住我膊頭。
 
「死仔，記得買手信番黎呀。」蛋撻講。「我等住收你份大禮架。」
 
「嗯，一定會。」我搭番住蛋撻膊頭。
 
兄弟之情，就係凡事不用說太白，卻能夠從打打鬧鬧中領悟至極。
 
我走回到芷翹既身邊，重新拖住佢。
 
「仲有一個鐘，周圍行下啦。」
 
「嗯！」
 
我同芷翹係機場裡面緩緩咁散步，漫無目的咁游走。
 
期間我地無乜點傾計，只係好想享受呢片僅餘既時光。
 
過左一陣，我地就走回到離境大堂既閘前。
 
只見那裡又多左三個人。
 
Crystal、Hani、阿娜。
 
佢地三個見到我拖住芷翹個下，都係先一齊驚訝，然後就好似明白晒所有野咁。
 
「掛住拍拖，唔洗理miss架啦！」Crystal第一個走埋黎，然後笑住咁講。「記住呀，呢個機會真係好難得，一定要好好珍惜！」
 
「知道架喇！」我報以微笑。「Crystal，好多謝你既鼓勵同教導，我一定會學有所成，番黎好好報答番你架！」
 
「嘩，講呢d呀！」Crystal笑得非常燦爛。「我睇好你架珞仔，加油！」
 
師生之情，就係不斷既鼓勵，努力既報答，無言既感激。
 
走到去Hani既身旁，佢先係望一望我拖住既芷翹，互相深遠咁點左一下頭，然之後先再望番住我。
 
「係犀利喎，珞仔！」Hani甜甜咁笑住講。
 
「都係多得你姐，Hani！」我衷心咁講。
 
「我同你講呀，如果你再整到芷翹咁傷心既話，我一定唔會放過你！」Hani一路講，一路做出個「沙煲咁大個拳頭」既姿勢，甚是可愛。
 
「放心啦家姐，量佢都唔敢架喇！」芷翹側視住我係到講。「你話係咪喇，珞仔~~~？」
 
「係係係！」我慌忙回答。
 
「哈哈，咁咪乖囉！」Hani拍一拍我膊頭。
 
「哈哈......哈哈......」我苦笑。
 
唉，睇黎我天生注定要俾佢地兩姊妹食住架喇。
 
「珞仔，路上小心啊。」Hani突然行前一步攬左我一下，然後好快鬆番開。
 
不過最好笑既係， Hani攬埋黎個下係我耳邊細聲講左一句 : 「等你番黎飲咖啡！」
 
「嗯嗯！」我表面上係答緊「路上小心」，實際上係答緊「飲咖啡」。
 
「乖！」Hani莞爾一笑。
 
呢個......唔好意思，我唔知咩情黎，所以講唔出，哈哈。
 
天外之音 : 去聽下MP魔幻力量既《偷偷的》啦，你就會明白架喇。
 
我同芷翹終於走到阿娜既面前。
 
「恭喜晒你地啊，阿珞，芷翹！」阿娜係真心祝福著我。「見到你地係番埋一齊，我真係覺得好欣慰。」
 
「阿娜，好對唔住......」芷翹出聲道歉。「我當初以為放手俾珞仔你就係對大家好，點知到頭來反而令我地三個仲辛苦......」
 
「傻啦芷翹，我咪講過囉，呢件事對我黎講其實已經好完滿架喇，所以唔洗覺得抱歉。」阿娜笑一笑。「因為，我全靠呢件事，重新擁有左一個親人。」
 
「可，阿哥？」阿娜望住我。
 
「梗係啦，細妹！」我微笑。
 
遺憾的愛情，就係千言萬語，一言難盡 ; 有數不清的話要說，卻只能以微笑代替。
 
我地三個互目而視，彼此點一點頭。
 
我地之間，已經無需再有任何解釋。
 
因為要解釋既話，就要重新用二十多萬字講多次個故事。
 
與其係咁既話，不如大家重新睇多次個故仔，咁樣會仲實際，哈哈。
 
「飛機就開喇，我都係唔阻你地傾計！」阿娜向芷翹單左一下眼，然後自動自覺行開左。
 
依家，我既眼中就只剩下芷翹一人。
 
我相信，芷翹都係一樣。
 
「珞仔，」芷翹攞出左佢個銀包，然後係當中抽出左一張摺合左既白紙出黎俾我。
 
我打開一睇，發現上面寫住 : 「加油加油，我會永遠支持你！」
 
呢張......係我聖誕暖流個陣送俾芷翹既白紙。
 
「拿！你既生菜魚肉仲有你朋友個空杯！」芷翹一野隊左兩杯野過黎俾我。
 
        芷翹勉強裝出一個笑容可掬既樣繼續講 : 「唔知道仲有咩想要呢司徒珞先生？如果無既話就呢邊走啦，多謝惠顧！」
 
        「有啊！」我遞左一張摺合左既紙俾芷翹，然後講 : 「司徒珞先生希望將呢樣野交俾歐陽芷翹小姐，麻煩你幫佢轉交啦，拜拜！」
 
        我講完之後，頭也不回咁就推左蛋撻離開現場。
 
「呢張......」我驚訝咁講。
 
估唔到，芷翹仲有keep住呢張野。
 
「仲記得個一日，因為你黎搞搞震，搞到我不知幾嬲。」芷翹噗茲咁笑左出黎。「不過，當我一打開呢張野黎睇個陣，即刻咩怒火都無晒，心裡面淨係得番一點點既甜。」
 
「你依家要去法國喇，但我都無咩可以送俾你。」芷翹用雙手捉實我既雙手，將白紙放入我既掌心之中。「所以，我只好送呢張野俾你。」
 
「希望......你能夠努力加油啦......我會永遠支持你架，珞仔！」芷翹眼濕濕咁講。「記住呀，佢係我最珍惜既野黎架，唔準整唔見！」
 
我望住芷翹，淚水不斷咁溢出。
 
呢一份，係我咁大個仔以黎收過最好既一份生日禮物。
 
好既原因，唔係在於禮物既大小、貴賤。
 
好既原因，係在乎當中擁有芷翹對我既個份愛。
 
「多謝呀......芷翹......」我哽咽咁講。「我一定會好好，好好咁珍惜......」
 
「傻仔黎既，洗唔洗喊到咁誇張......」芷翹一路講，一路替我拭去淚水。
 
但係，芷翹其實比我哭得更厲害。
 
「傻妹！」我一野扯左芷翹過黎，然後直接吻下去。 
這一吻，或者不過是微不足道的一個身體接觸。 
但係當中所包含的情感，卻是比天上的繁星還要多，比寬闊的草原還要廣。 
因為，這一吻，是需要經歷過重重波折和考驗，才能成真。 
不知道擁吻左幾耐之後，我地始終都要不情願咁鬆開。
 
我望一望手錶，嗯，夠鐘喇。
 
「我要走喇，芷翹。」我強忍住離別既思痛，揉揉芷翹既臉蛋。
 
「嗯，再見喇，珞仔。」芷翹拭乾淚水，勉強露出歡容。
 
我向阿娜點一點頭，然後就向在場各位講byebye。
 
道別之後，我同阿娜就走進到閘口裡面。
 
係轉角位之前，我最後回眸一眼，只見到咁多位熟悉既身影正在向我們揮手。
 
我望向芷翹，腦海中忽然想起了一句說話。
 
不要做後悔的事哦！以為總還有明天，會吃苦頭的哦！明天再做的人是傻瓜。
 
無錯喇......想講既野，依家就好講 ; 想做既野，依家就好做！
 
我深吸左一大啖氣，然後用盡力量向芷翹大叫 :
 
「俺が戻ってくるまでお待ちください！その後、一緒に譚仔で食事しよう！」
 
芷翹聽到之後笑左一笑，然後向住我大叫 :
 
「いいよ！もう一度あなたの頭に麺をぶつけてやる～」
 
我笑得非常窩心，然後拎轉身走向飛機通道。
 
我想，緣圓的愛情，大概就是這樣的吧。 
 
***
 
十年後。
 
呢幾日係我搬屋既大日子，於是乎我都忙於係新居到執拾物品。
 
我隨手「界」開左最近自己既一個紙皮箱，諗住將裡面d野攞出黎放番好。
 
結果開左之後我先發現，原來呢個箱係裝住一本本既厚相簿。
 
我緩緩坐落地下，然後拿起左一本經已封晒塵既啡色硬皮相簿係到翻閱。
 
望住一張張小時候與爸媽影既全家幅，我既眼淚又不自覺咁落下。
 
上一年既暑假，老豆因為急性中風，離開左人世。
 
老豆既離去，令我頓時感到人生無常，所以更加覺得應該要好好珍惜身邊既人，唔好再讓時間白白流走。
 
揭下揭下，我就翻到去一張我第一次攞藝術獎既時候影既相片。
 
「真係好懷念啊......」我望住相裡面既自己，突然覺得時光真係好短暫，眨下眼就過。
 
自從當年暑假去左法國留學之後，我既藝術造詣就越見淳純。
 
結果，我之後真係入讀左法國藝術學院，而係畢業之後我就被一間國際藝術公司聘請為產品設計師，仲要有得留係香港做野。
 
經過幾年來係職場打滾累積經驗之後，我依家總算係同行裡面薄有名氣，job都越接越多，生活亦可以叫做無憂無愁。
 
可惜，以前既我就只係掛住拼搏，都無好好同老豆相處。
 
依家，已經再無機會......
 
「呀！！」突然間，一把尖叫既聲音由客廳傳黎！
 
「阿娜！？」我大叫左一聲，然後立即放下相簿跑出去。
 
一出到去，我就見到阿娜按住自己既右手食指，而指上面正係到不斷咁流血。
 
於是乎我就轉過頭跑左去廁所攞急救箱，然後出番黎替阿娜包紮。
 
「乜你咁論盡架！」我勁緊張咁坐左係阿娜隔離。「攞隻手出黎啦！」
 
「嗯嗯......」阿娜遞左隻手出黎俾我。「Sorry啊，我淨係諗住執快d，結果就一個唔留神俾d釘界親......」
 
我望一望個傷口，好彩，唔算好深姐。
 
「我唔係想鬧你啊傻妹，」我用黃藥水替阿娜消毒。「我只係擔心你咋。」
 
「如果你有d咩事既話，我真係唔知點樣同老豆交代喇！」
 
「阿珞，你又諗起uncle？」阿娜問。
 
「嗯。」我點一點頭。「岩先我係房到睇番以前d相簿，所以一時間又有d感觸。」
 
「咁又過左一年喇......」阿娜嘆一嘆氣。「有陣時我會係到諗，如果當年uncle無收養我既話，我依家究竟會變成點呢......」
 
仲記得個陣係中六畢業既前夕，大家都忙住搞gradin、去旅行。
 
但由於阿娜無父無母既關係，佢實在係難以有錢繳付呢一串串既費用。
 
阿娜逼於無奈之下，惟有請求於我，希望我可以幫手解決呢件事。
 
於是乎我就直接將阿娜既事同左老豆講。
 
點知，佢聽完之後諗都無諗就直接講話 :
 
「得啦，我以後會全數助養阿娜，叫佢唔洗擔心！」
 
就係咁，阿娜就開始同我屋企有一個特別既聯繫，之後仲搬埋黎同我地一齊住 ; 而老豆之後就認左阿娜做女，當佢係親生既咁黎看待。
 
「我諗，如果當年老豆無收養你既話，我地就唔可以好似依家咁close。」我望住阿娜。「而且，老豆就會無左你呢個咁乖既孝順女。」
 
「應該係話，我會因為咁而無左個咁好既爸爸坼岩！」阿娜好天真咁笑說。「又或者係話，我會因為咁而無左你呢個好哥哥！」
 
「哈哈，傻妹黎既！」我笑住咁用手按住阿娜既頭頂。
 
「笑番咪好囉！」阿娜眼仔碌碌咁望住我。「我諗，uncle在天之靈都唔想你為左佢而愁眉苦臉既。」
 
無錯，阿娜講得好岩。
 
「嗯，我知道架喇！」我樂意咁點一點頭。
 
「咁就乖喇！」阿娜捏一捏我既臉蛋。「而且......」
 
「你就黎做人爸爸架喇，所以係咪更加好應該係呢段時間裡面表現得開開心心呢？」
 
聽完之後，我非常驚訝咁望住阿娜個肚。
 
「阿娜......你有左啊！？」我講。
 
「妖！」阿娜一腳伸開左我。「一d都唔好笑囉！」
 
「一陣間俾芷翹聽到你就知死！」
 
「哈哈，我就係見佢出左去我先講咋麻！」我緩緩企番起身，然後望一望隻錶。「講開又講，都差唔多係時候去接芷翹架喇！」
 
「咁就行啦！」阿娜坐左係地下伸出雙手，示意我拉佢起身。
 
「你呢個懶鬼細妹啊！」我沒好氣咁捉住左阿娜。
 
「嘻嘻，」阿娜莞爾一笑。「唔該呀哥！」
 
於是乎我就同阿娜由將軍澳既新居出發，搭地鐵回到觀塘。
 
啊，係喇，我想係到講下自己點解會揀將軍澳黎買樓！
 
原因好簡單，就係因為將軍澳係位於觀塘同西貢既中間，所以可以方便芷翹探伯母或者係探Hani！
 
就係搭緊車既期間，阿娜既電話突然響起。
 
阿娜接聽完電話之後，就一臉抱歉咁望住我講 : 「哥......我呢......」
 
「點呀妹，」其實我都估到阿娜想講咩。「係咪你男朋友又搵你去街街呀？」
 
「哈哈，你真知我心喇！」阿娜伸一伸脷。「所以呢......唔知我可唔可以......」
 
「唉，有仔就唔識哥哥！」我扮傷心咁講。
 
「唔好嬲啦！」阿娜扁嘴咁講。「最多我遲下再幫你執過屋！」
 
「係先好講！」我嘆左一口氣。「好啦，你走啦！」
 
「yeah！」阿娜道。
 
結果，我就係觀塘落左車，而阿娜就繼續搭去唔知邊到搵佢男友。
 
出閘之後，我就緩緩向伯母既屋企進發。
 
一路上，我聽住歌咁觀看著身邊呢個伴我成長既觀塘小市區。
 
由出世開始去到依家成28歲，都可以話已經過左四分之一個人生。
 
而當中絕大部份既時間，我都係於觀塘中渡過。
 
呢到既一花一草、一樹一木、一動一靜，仿佛都滿載住我童年時既蹤跡、我曾經經歷過既回憶。
 
唔知道......我以後既人生又會係點樣走過架呢？
 
陪伴係我身邊既人，已經唔再係我既父母喇。
 
陪伴係我身邊既，係我既老婆，芷翹。
 
同埋......芷翹肚裡面既bb。
 
係呢個時候，我收到芷翹既wtsapp。
 
老婆豬 : 我探完媽咪喇，依家差唔多落樓，你係樓下等我得喇！
 
於是乎我就打算直接走到去對面既韆鞦，然後坐係個到等芷翹。
 
行下行下，我就經過到譚仔既門口。
 
唔知點解，我好自然咁就走左埋去。
 
從落地玻璃窗外望入去店舖裡面，我重新找尋到當日那個熟悉既位置。
 
那個，我與芷翹相遇既位置。
 
「食屎啦你！」
 
一碗冒著白煙既譚仔湯麵，就好似罰球咁以時速三百幾公里既速度飛向我臉上！而伴隨住既，係一把可愛動人、但同說話內容格格不入既女性聲線。
 
        「嘩屌！好熱啊！！！！！」我一野彈左起身，不停係咁用雙手撥走校服上面既麵條，同時間用憤怒既眼神望向呢位女生。
 
那個，我追回芷翹既位置。
 
        「呢到對我黎講，都唔知話係幸運之地呀定抑或係不幸之地喇，哈哈！」我笑住咁講。
 
        「我曾經係呢到，俾人用成碗譚仔倒左落個頭到。」我雙眼堅定咁望住前方。「不過亦係因為咁，我認識到一個，亦係惟一一個我心愛著既女仔。」
 
        「佢叫做歐陽芷翹。」
 
        「你既雞肉牛丸清湯！」呢個時候，服務員呀姨為我遞上一碗熱辣辣既麵。
 
        「所以，」我將碗麵推向對面既客人。「話唔定重演一次既話，呢個女仔就會再次出現。」
 
        「做下好心，幫下我呢個忙啊，好無呀，芷翹？」我問道。
 
        「……衰人。」芷翹與我對望著，雙眼早已變得通紅。
 
那個，我與芷翹再次相遇既位置。
 
        「如果俾你見番個女仔之後，你又會點做？」食客哽咽咁一路講一路行埋黎。
 
        「如果我能夠見番佢既話，」我亦緩緩向前行。「我會一手攬住佢，然後同佢講，」
 
        「永遠留係我身邊啦，好無啊，芷翹？」我踏前一步，然後將眼前呢個同我一樣淚流滿面既芷翹擁進懷內。
 
一點一滴既畫面，在我腦海中不斷放映。
 
唔經唔覺，芷翹已經陪伴左係我身邊有成十多年既時間。
 
曾經，我地因為d小事而嘈大交 ;
 
曾經，我地因為long d而變得好冷淡 ;
 
曾經，我地因為工作時間唔同而搞到好少相處時間。
 
之但係好慶幸既就係，我地最終都能夠一一克服各種困難，攜手走到「今日」。 
「多謝你。」我望住窗內既坐位講，然後就毅然轉身，走到去旁邊既韆鞦。
 
我坐回到第一次見芷翹個陣既韆鞦座位上。
 
仲記得係呢到，我同芷翹經歷左無數次既擁抱。
 
第一次見面，我因為意外係到攬住左芷翹 ;
 
之後，我因為當左芷翹係阿娜，於是再次係到攬住佢 ;
 
陸運會之後，我明白到自己確切愛上芷翹既心意，所以係到攬住左佢 ;
 
係埋一齊之後，我同芷翹經常係呢到相擁接吻 ;
 
落大雨既個一晚，我係到強行攬住左芷翹。
 
呢一個又一個既擁抱，成為左我回憶中不可或缺既部份。
 
無左佢地，我的回憶就再不是完整。
 
「珞仔老公~~~<3」突然間，一把甜美既聲音將我從思考中抽離出黎。
 
一個紮著馬尾、身穿黃色碎花裙、肚子拱得像個皮球既女子徐徐走到我身旁既韆鞦空位上坐低。
 
我望住佢，嘴角情不自禁咁上揚起上黎。
 
「芷翹老婆~~~<3」我窩心咁笑道。
 
我諗，應該咁樣講先岩 :
 
芷翹，妳係我生命中不可或缺既一部份。
 
無左妳，我既生命就再不完整、再不完美。
 
我企左起身攞出手機，然後打開拍照功能，鏡頭對準眼前這位美人。
 
「唔好影啦嗚，今日件衫好醜怪！」芷翹撒嬌一笑，坐係到捉住我既左手道。
 
我把握著這個畫面，隨心按下了快門。
 




『天祐我的愛人　給她永遠笑聲　並常對她偏愛 ; 』
『天祐我的愛人　有她不再覺得生命無奈　敢愛。』