《妳做咩將成碗譚仔倒落我個頭上面！？》: 第十六章(中)

 
        「逐段逐段舊情似是遺憾，就是日後共誰有著緣份，始終不可取替著這親切質感XXXxxx...」
 
        我閂左手機個鬧鐘之後，就起身去左刷牙洗面，然後換上一套富有藝術風格既英格蘭式裙服。
 
        係呀大家無睇錯，我真係著裙！
 
        點解我要咁著？咁就梗係原因啦。
 
        唔知道大家有無參加過呢d公開既國際藝術比賽呢？其實呢種比賽裡面係存在住好多既潛規則，又或者係一d潛在得分點。




 
        就以我今日參加既呢個繪畫比賽做例子啦。
 
        呢個比賽係要求大家係限時之內畫一幅符合大會要求既畫，而評判就會根據畫作既技巧、用料、特色等各方面黎評分，從而選出冠軍。
 
        之但係既然評判只按畫作黎俾分既話，咁點解又要我地係會場到畫？
 
        答案好簡單。除左係為公平起見之外，更多既因素其實係為左觀察參賽者畫畫時候既表現，就比如係佢地調色既速度，又或者係佢地起草稿既時間等等。
 
        而且唔單只係咁架，其實就連參賽者既儀容裝扮亦會被考慮作評分之用。




 
        呢d，就係所謂既「印象分」。
 
        所以我專登揀左呢件「戰衣」出黎，希望可以係畫作既表現外攞到更多既分數！
 
        搞掂好晒個look之後，我就拖住個裝住勁多畫具既大喼出門口。
 
        就係等緊小巴落觀塘市中心既時候，芷翹wtsapp俾我。
 
        芷翹 : 珞仔，一陣要專心d畫畫，唔好淨係掛住諗我！




 
        阿珞 : 如果係都要我唔諗你既話我寧願唔參賽！
 
        芷翹 : 哈哈，傻仔 <3
 
        阿珞 : 多謝你鼓勵呀，傻妹 <3
 
        芷翹 : 嘻嘻 <3 好啦，我唔阻住你蘊釀情緒喇。我等你比完賽之後既好消息！
 
        阿珞 : 嗯 <3 ！
 
        搭車落到去市中心之後，我就行上去apm既吉野家。
 
        一入到去就已經見到Crystal坐左係裡面。
 




        「嘩珞仔，你今日好掂喎！」Crystal上下打量我今日既裝束。「點呀，一陣間比賽喇喎，有無信心先！」
 
        「咪玩啦Crystal！」我笑一笑。「如果我無信心既話，依家就唔會坐係到要你請我食lunch啦！」
 
        「哈哈，夠晒自戀，我鐘意！」Crystal拍一拍我膊頭。
 
        我地係食飯既呢段時間都不忘繼續討論比賽既細節同重點。
 
        「珞仔，聽講今次比賽既人全部都有番咁上下實力。」Crystal將一啖飯放落個口到。「佢地唔係攞過咩國際獎呢就係唔知邊個既得意徒弟，總之就個個都好那把炮啦！」
 
        「咁我都唔差姐！」我望住Crystal。「我話晒都係Crystal入室大弟子！」
 
        「咁睇得起我呀！」Crystal笑住咁講。「總之一陣間就好似平時上art堂咁，盡情去畫就得架喇！」
 
        「仲有！」Crystal補充 : 「仲有一樣野都幾重要下，就係一陣間大會公佈既『額外繪畫條件』。」




 
        「我係D朋友到打聽番黎講，話以往呢個大會每逢搞親比賽個陣都好中意加呢D額外條件，之但係呢D條件往往都係出奇不意，搞到D參賽者崩晒潰。」
 
        「有無咁誇張呀？」我俾Crystal講既野搞到嚇左一嚇。
 
        「總之，唔好按常理出章就係架喇！」
 
        「你估依家拍緊雀聖咩Crystal姐姐......」
 
        食完野之後我地就搭地鐵去會場------香港會議展覽中心。
 
        入到去會展之後我地就落左去最底層既一個展覽廳，亦都即係用黎舉辦「國際藝術展」個個。
 
        由於我同Crystal早左少少到步既關係，我地就決定搞完D登記手續之後去逛遊會場一圈。
 




        唔知道大家有無去過書展或者動漫節啦。如果你地有去過既話，有無覺得每次一踏入展覽廳個下，都總會嗅到一股會議展覽中心先有既獨特氣味！？
 
        「嘩......」一入到去，首當其衝既就係嗅覺既享受。
 
        老實講，我覺得陣味幾正......
 
        接住落黎就係視覺既享受！
 
        整個會場被佈置成為一個以黑色為主調既藝術平台，而會場中心就係一張張蓋住黑布既長枱，相信就係用黎俾我地呢D參賽者用。
 
        「真係好隆重咁喎......」我,不斷四處張望，隨後目光就注視左係演講台上面一個閃閃發光既獎杯裡。
 
        天父，希望你能夠保佑我得到呢個殊榮啦！
 
        行完之後我趁仲有少少時間，即刻打俾芷翹。




 
        「芷翹，我到左會場喇，個比賽15分鐘之後就開始！」接通左之後我已經急不及待咁講。
 
        「加油呀！！！」芷翹係電話裡面大喊出黎，搞到勁有日劇個種青春Feel。
 
        「你記住千其唔好咁緊張呀，如果咪會發揮得唔好！」芷翹十萬個替我擔心咁講。
 
        「知道喇！」聽到芷翹既鼓勵聲音，我個內心又莫名咁被滲進一絲絲暖意，將我僅餘既緊張感覺都掃走晒。「我會加油架喇，我愛你呀芷翹！」
 
        「我都愛你呀珞仔！」芷翹講完之後我隱若聽到佢媽咪係背後叫佢。
 
        「你媽咪好似搵你喎！」我笑住咁講。
 
        「係呀，我媽咪叫我換衫，然後出去join埋家姐行陣街，再直落食buffet！」芷翹答。
 
        「咁你快d去啦，有你岩先既打氣我已經充滿力量架喇，狼鷹呢d畜牲都可以打死幾十隻！」我忍住內心勁想叫芷翹陪多我一陣既衝動。
 
        「咁好啦！」芷翹都好似勁依依不捨咁講。「我等你呀！」
 
        「我一定會平安番黎架！」我對住部電話大叫。
 
        哈哈......呢d究竟係咩高質對話黎......
 
        「各位在場人士請注意，比賽將於十分鐘後開始。如非工作人員或持有特許權既人士，請立刻關掉任何電子裝置，以確保比賽的保密性及公平性。」呢個時侯廣播響起。
 
        「我真係要收線喇......」唔知點解我硬係有種感覺，覺得呢種同芷翹曖昧既通話將會不復再。
 
        「珞仔......」芷翹好似好多野想同我講咁。「你要記住，我好愛你呀！」
 
        「我都係呀，芷翹！」我激動咁講。
 
        「byebye喇，傻妹......」
 
        「beybye喇，加油呀傻仔！」
 
        「do~~~do~~~」電話終歸要斷線。
 
        我關上電話，然後拖住個喼行去屬於我比賽既位置。
 
        我望向嘉賓及導師席既方向，Crystal對住我做出一個「Fighting」既動作。
 
        「呼......終於都要開始喇......」我沉住氣咁觀察身邊既對手，發現佢地睇起上黎都好冷靜咁，應該都食過唔少夜粥。
 
        「各位參賽者請注意！」司儀循例咁講左一輪老土既開場白之後，就開始帶入比賽既重點。「眾所周知，今日既比賽將會有一項即場宣佈既『額外繪畫條件』。」
 
        「依家，我地就會公佈呢個條件。」
 
        黎啦！無論係咩條件我都唔驚架！
 
        點解？因為我一早就諗好左成幅畫既構圖，就係一個小朋友好天真咁盪韆鞦！
 
        「呢個條件就係，」
 
        「大家要按『小孩』呢個主題繪畫，但畫中唔可以有小孩。」
 
        「咩話？！」我內心極為之驚訝。
 
        此時場內亦傳出一陣哄動。
 
        「咳咳！」司儀既清聲令會場回復平靜。
 
        「既然條件已經公佈，就即係意味住比賽將會開始。」
 
        「根據會場既時鐘，現在係3時正，大家將會有3小時既繪畫時間。」
 
        「比賽......正式開始！」
 
        隨住司儀話畢，我身邊既人都立即攞起鉛筆開始構思草圖。
 
        「唔係掛......」向來最擅長畫人物像既我，依家呢個額外既條件對於我黎講簡直同殺左我無分別。
 
        我呆滯咁企左係枱前，腦海一片空白。
 
        唔通......我要輸了？
 
        「滴…答…滴…答……」
 
        時間一分一秒咁過去，十五分鐘話咁快就消逝左。
 
        眼見其他人既草圖已經畫得七七八八，但係我就連個喼都未打開。
 
係呢一刻，一股軟弱既無力感不斷流經我全身，使我完全唔能夠釐清思緒。
 
        「點算好……我應該畫咩呀……」我勉強咁打開左個喼，攞起一枝鉛筆對住張白畫布。
 
        不如就咁畫個韆鞦出黎？
 
        唔得！咁樣既話就無左「小孩」呢個感覺！
 
        咁……不如唔好要韆鞦，直接畫d「小孩」既物品，就好似係……奶樽！
 
        唔得唔得！咁樣真係好核突，成幅畫一d重點都無！
 
        咁……不如兩樣mix埋一齊，畫個奶樽係到盪韆鞦！
 
        哈哈！我真係聰明……個屁呀！
 
        呢d爛橋真係虧我咁都諗得出，你叫我點對得起個個辛苦教導我既Crystal！
 
        正當我係到望住張白紙發呆既時候，有個鬍鬚伯伯評判行左過黎我身邊望住我。
 
        「What are you thinking of？」WTF，個評判居然撩我傾計？！
 
        乜可以咁樣架咩？唉算啦，只能怪我太「大鄉里出城」。
 
        「I am thinking of …… none。」我如實咁講出自己依家既情況。
 
        只見個伯伯似懂非懂咁碌大對眼，然後向我點左一下頭就走左。
 
        「just follow your mind，kids。」突然伯伯回頭望住我，向我笑左一笑。
 
        我望住佢，忽然有一種和藹可親既感覺。
 
        「Thankyou……」我講完之後，佢就真係走左去第二張枱睇人畫畫Lu。
 
        「跟隨住自己既思想……即係點？」我閉上雙眼。
 
        我既內心……究竟係到諗緊d咩呢？
 
        「珞仔，加油呀！」
 
        芷翹既聲音忽然在我腦海中回響。
 
        無錯喇，我既內心就只有芷翹。
 
「小孩......小孩......」我係到上網睇緊d細路仔既相。
 
望住眼前呢一班白白滑滑、天真無邪、如此純潔既小孩子臉孔，我竟然開始幻想起上黎。
 
唔知道......第時我同芷翹生既bb會係咩樣架呢？究竟bb會似爸爸多定媽媽多呢？
 
佢會係仔定女呢？如果係仔既話會叫咩名呢？女又叫咩名呢？
 
話唔定佢會好似我咁藝術一樣好出色！但係我又好想佢學似芷翹咁天真爛漫，就算無咩才能都可以開心渡日。
 
唔知道......我同芷翹可唔可以走到呢一日呢？
 
        一段段既記憶慢慢從思緒中被抽取出黎。
 
        我諗到喇……我終於諗到要點畫喇！
 
        我緊握住鉛筆，向白布畫下第一道痕跡。
       
        畫上既每一筆線條、每一份色調、每一處光暗，都包含住我對芷翹既濃濃愛意。
  
        一直都陪伴係我身邊既芷翹，其實就好似一個細路仔咁，好貪玩、好純真、好可愛。
 
        正正係因為芷翹如此像一個小孩，先能令到我忘掉一切煩惱，更令我勇於面對任何難關。
 
        所以，芷翹，你就係我的小孩。
 
        我好希望好希望，將來能夠與呢個小孩建立一個幸福美滿既家。
 
        如果可以既話，我梗加希望可以見證住呢個小孩成為媽媽，誕下屬於我同佢既孩子既一刻。
 
        諗得好遙遠？
 
哈哈！唔好意思，我藝術性格~~~
 
        「各位參賽者，距離比賽完結仲有五分鐘，請大家控制好時間分配！」司儀既聲音一出，所有人都即刻加快自己既步伐去完成畫作。
 
        「仲有10秒！」司儀仿佛好似講到十秒後就世界末日咁。
 
        「......比賽結束！」
 
        我緩緩放下筆，然後審閱著眼前呢幅由自己醉心繪製而成既畫作。
 
        「嗯......都真係幾掂，嘻嘻！」我微微一笑。
 
        「依家係6時正，由於大會需要大約半小時進行畫作評審，所以勞煩在場所有人士請先行離開展覽廳，並於6時30分重新進入會場，謝謝！」
 
        「呼！」我走到落地玻璃幕前，抬頭仰望天空。
 
        半懸掛著既太陽正徐徐下山，使整個藍海染成一片橘紅色。
 
        望住眼前如此美麗既景色，忽然令我諗起陳奕迅既一句歌詞。
  
        我攞起部電話，諗住wtsapp芷翹。
 
        咦咪住，不如都係等結果出左先再搵芷翹啦！
 
        於是乎我就閂番電話，然後去左個洗手間。
 
        「珞仔！你嚇死我喇！」一出到黎Crystal就衝埋黎我到。「頭先一開始見你郁都唔郁下咁，仲以為你怯場呀！」
 
        「岩先其實我真係怯架！」我笑住咁講。「無啦啦出個咁既條件，真係玩死我呢個專畫人像既畫家！」
 
        「但係我見你最後都畫左個女仔出黎喎！」Crystal勁奸咁望住我。「而且我仲認得出個個係歐陽芷翹！」
 
        「不過，真係估唔到你會咁樣畫。」Crystal補充。「真係好出色。」
 
        「有無咁誇張呀Crystal姐姐！」我好尷尬咁笑。
 
        「睇黎，呢個冠軍你攞硬！」Crystal拍一拍我膊頭。「因為......」
 
        「你已經係一個擁有自己既藝術風格、能夠獨當一面既畫家。」
 
        「我都好希望能夠勝出。」我發自內心咁講。
 
        「評審階段已經結束，請大家重新進入會場......」廣播突然響起，所以我同Crystal講左聲再見之後就行番去比賽既位置。
 
        「現在場共有五十位參賽者，而每一位既畫作都已經經由十二位評審觀看及評分。」司儀係到講介評分既程序。「我地最後會根據大家既各項繪畫技巧、畫作扣題與否、作畫過程表現等等而綜合出一個平均分，呢個就會係你地既最後分數。」
 
        「現在將公佈頭4名！」
 
        呼，黎啦！
 
        「第4名係......xxx既畫作，《XXXX》！請上台領獎牌！」
 
        跟住就係一輪掌聲同埋個作家係到介紹佢幅畫。
 
        嘩唔係講笑！一望落去呢幅畫個陣真係會以為係唔知邊個名畫家既作品。
 
        「然後就係第3名......就係yyy既《YYYY》！」
 
        同上。
 
        「之後就係第2名......zzzz既《ZZZZ》！」
 
        再同上。
 
        「最後就係隆重其視既第一名喇......」司儀賣關子咁壓低聲線。
 
        到喇，終於都到喇！
 
        「第一名就係......」
 
        黎啦，叫我啦！
 
        「第一名就係......」
 
        快D啦仆你個街！
 
        「第一名就係，aaa既《AAAA》！」司儀好興奮咁講。
 
        「YEAH！」aaa係到好開心咁叫，然後跑左上台領獎。
 
        「點會咁架......」我望住佢個幅構圖極為普通，純粹以技巧取勝既畫作，真係唔明白點解自己會輸比佢。
 
        論技巧，其實我都同佢不相佰仲。
 
        論扣題，我好明顯中晒。
 
        唔通......係因為繪畫過程？
 
        我即刻望過去評判既方向，發現剛才個位伯伯坐左係前排。
 
        佢既視線同我接上，然後笑一笑咁點頭。
 
        「頂，係你扣我分搞到我輸左架喎，仲好意思對住我笑！」我心底裡極之憤怒咁講。
 
        但係唔係喎......如果只係輸呢樣既話，我無理由連亞季殿軍都攞唔到架......
 
        最衰都係個個aaa，好地地xxxyyyzzz之後到我咪好囉，係要接番上第一個字母！
 
        「唉......」我望向Crystal個邊，佢俾左個「我懂的，他媽的」既表情俾我。
 
        初初仲講到攞硬冠軍既我，一陣間真係無面目去同Crystal講野，甚至係無面目去見芷翹喇......
 
        「好喇，名次經已全部公佈晒，所以依家就有請法國藝術學院既校長出黎為我地做總結，以及公佈能夠遠赴法國留學既學生名單！」
 
        輸左就係輸左，一切已成定局。
 
        算啦，其實咁樣咪仲好！咁就唔洗煩要陪芷翹好定去留學好！
 
        呢個時候坐係評判席既個位伯伯突然企左起身，然後緩緩走到台前！
 
        「唔係掛！？」我一直都唔知道原來佢就係校長！
 
        唔怪得我只係俾佢一個見到我發呆，就已經搞到無獎攞啦！
 
        下次真係要做足d資料搜集先得喇......哈哈......
 
        *以下對話內容為中文翻譯版本，要睇原始英文對話版本既請自行上網google translate。*
 
        「大家好，我係法國藝術學院既校長『亞瑟』！」伯伯笑一笑。
 
        「我好高興今日有咁多人參加呢個比賽，亦都好高興今日能夠認識到咁多位畫家以及欣賞佢地既畫作。」
 
        「無論在場既咁多位學生今日有無份攞獎都好，我都好希望你地能夠繼續堅持行『藝術』呢條路，」伯伯語重心長咁講。「因為你地每一個都係獨特既畫家，都係能夠作為先軀去推動香港既藝術發展。」
 
        「所以我萬分之肯定，在座咁多位學生，將來必定會有出色既成就。」
 
        伯伯既聲音真係非常溫柔，就好似係個種看透世事、與世無爭既聖人咁。
 
        「好喇，廢話我就唔多講喇！」伯伯清一清喉嚨。「係時候公佈名單！」
 
        「幸運兒，只有一名。」
 
        「就係司徒珞先生。」
 
        「......咩話？！」我又再一次震驚。
 
        「請你帶埋你幅畫作上黎台前啦，司徒珞先生！」伯伯伸出佢既右手。
 
        「但係佢無攞獎架喎！」
        「佢有咩資格！」
        「黑箱作業！」
 
        一句又一句難聽既說話係我身邊不斷響起，當中包括攞獎既人同埋個d花生友。
 
        我緊握住自己幅畫，徐徐走到台上。
 
        「恭喜晒你！」突然間伯伯走過黎攬住我。
 
        佢係我耳邊細細聲咁講 : 「對唔住，其他個11個評判水準太低，根本唔識欣賞你幅畫。可惜我地係十二個人俾分然後攞平均分，所以得我一個人係唔能夠令你攞獎。」
 
        伯伯再補充一句 : 「不過揀人去法國，就只有我能夠決定，呵呵！」
 
        係我仲消化緊一切既時候，伯伯已經推番開我，然後望去觀眾。
 
        「其實大家唔洗咁驚訝，呢個決定並唔係咩黑幕內定，亦都唔係咩特別既事。」伯伯係到替我辯護。「相信大家睇完司徒同學既畫作同佢既講解之後，就會明白點解我有呢個選擇。」
 
        「去啦，小朋友！」伯伯面露微笑。
 
        「嗯......」我深吸一啖空氣，然後揭起蓋在我畫上既紅布。
 
        「呢幅，就係我既畫作，《我的兩個小孩》。」
 
        「大家眼前既呢幅畫，其實係代表緊我期望既將來。」
 
        「整幅畫既構圖其實係模仿緊大家平日用單反影出黎既個種相片。」
 
        「畫中特寫咁描繪住一個正坐係韆鞦上既女子。    呢一位女子身穿淡黃色既鬆身裙，正面望住大家好燦爛咁笑著，然後左手緊握住一隻從畫面外伸進來手，而右手則按住自己那個隆起既肚。」
 
        「點解個肚會係隆起？好簡單，因為呢個女子正在懷孕。    而女子既老公正正就係被佢捉住隻手個位，亦都即係『將來既我』。」
 
        「整幅畫睇起上黎就好似係一個生活既截圖，描繪著我同我正懷孕既老婆去盪鞦韆，然後我拿起單反隨意為佢拍下一幅相，而佢就好怕羞咁捉住我隻手係到笑，碰岩我按上了快門，就衍生了呢張照片。」
 
        「至於所謂既《我的兩個小孩》，其實就係畫中笑得好純真既女子同埋佢肚內還沒出世既bb。」
 
        「我好希望將來能夠與我現任女朋友走到呢一步，建立一個完整既家，照顧呢兩個小孩。」
 
        「多謝！」我低頭鞠躬。
 
        會場內鴉雀無聲，仿佛連呼吸聲都會破壞呢種寂靜感。
 
        我緩緩抬起頭，發現在場人士既表情無不目瞪口呆。
 
        「啪.......啪啪......啪啪啪啪啪啪！」突然一個拍手聲從遠處傳出。
 
        我望過去，原來係Crystal正在落力咁為我鼓掌。
 
        「啪啪啪啪啪啪！」呢個時候有另一個掌聲從我身旁既伯伯身上發出。
 
        「啪啪啪......啪啪啪啪啪啪啪！」此起彼落既掌聲，終於從每個在場人士既手中陸續發出。
 
        整個會場中既焦點仿佛降落到我既身上。
 
        「好耶呀珞仔！」Crystal係遠處叫過黎。
 
        到目前呢一刻為止，我都仲未接受到依家發生既事。
 
        「多謝晒司徒同學既分享！」伯伯走埋黎搭住我膊頭。「相信依家大家都唔會再質疑佢既實力喇掛？」
 
        在場人士繼續以掌聲黎回應著，表示對我既肯定。
 
        「既然係咁，我係呢到再次恭喜你，你即將可以係今個暑假黎到我地法國藝術學院進行交流！」伯伯笑住咁望住我，睇黎佢為左我能夠去佢學校交流呢件事都應該感到幾開心。
 
        之不過......芷翹個邊點算？
 
        我落番台之後司儀再up左多輪廢話，然後就散得band。
 
        「你掂左喇珞仔！」Crystal衝埋黎一野攬住我。「你真係無令我失望！」
 
        「但係我攞唔到獎喎，哈哈！」我笑住咁講。
 
        點都好啦，雖然我未知道下一步應該點行，不過可以去法國留學，點計都係一件好事黎既！
 
        我應該係要開心同埋去慶祝，而唔係苦口苦臉！
 
        「你去左法國留學之後呀，咩獎都有得你攞啦！」Crystal好似仲hyper過我。「我之前應承過會送個願望俾你，所以你想要d咩既話，即管出聲啦！」
 
        Crystal補充 : 「但係唔準超過一千蚊。」
 
        哈哈......
 
        突然一個想法係我腦海中掠過。
 
        無錯喇......我一個人既話未必能夠說服到伯伯......但係如果多埋Crystal既話，就可能有機會......
 
        「Crystal，我有一樣野想拜託你。」我堅定咁望住Crystal。「呢個係我既願望黎。」
 
        「嗯，你想我做d咩？」可能係因為Crystal見我好認真，所以都收起笑容望住我。
 
        「我想你陪我去搵剛才個位校長伯伯，去為芷翹爭取一個陪伴我去法國留學既位置。」