《妳做咩將成碗譚仔倒落我個頭上面！？》: 第十五章(下下)
係搭地鐵既路程上芷翹Wtsapp我。
芷翹 : 「傻仔，做完SBA未呀？」
究竟講唔講俾芷翹聽我去搵阿娜好呢？
唉，都係唔好喇，我怕攞屎上身。
阿珞 : 「做完啦，不過我媽咪想我陪佢收舖然後食野，所以我今晚會夜番屋企囉！」
我再補充一句 : 「如果你眼訓既話今日早D訓啦唔洗等我傾電話喇，傻妹！」
咁係因為我地慣左每晚都一定要傾電話，傾完之後向對方講晚安然後先會去訓覺。
芷翹 : 「真係架？仲諗住聽下你把聲添~~~好啦，咁你番到屋企既話就Wtsapp我啦，珞仔！」
阿珞 : 「知道知道，大少姐！」
我將手機放番係褲袋到，然後閉上眼養神。
因為我總係覺得，自己一陣間將要迎接一個非常沉重既情景。
轉眼間就到左廣華醫院。
「二樓......心臟內科部門......」我係路牌上尋找緊剛才阿娜Wtsapp俾我佢現正身處既位置。
我一走到醫院既內部，一陣陣藥水味立即撲鼻而來，令人有一種不安既感覺。
我按照路線圖既指示，終於去到心臟內科部門。
「點解阿娜呀媽會入左黎呢到既......」我一邊推算緊各種可能性，一邊推開大門。
一打開門，映入眼簾既係一條長長既走廊，左右兩邊都係一排病房，而直望到遠處既位置就係手術室。
整個部門均使用一種刺眼既白光，光線照射到旁邊既白牆上再不斷反射，令整個地方都染成蒼涼，使人不寒而驚慄。
但更令我為之在意既，係在強烈既白光下，一個身穿平凡校服，坐在凳上抱頭痛哭既柔弱身影。
我走到去呢個身影面前，然後輕輕按著佢既頭頂。
「阿娜，我黎左喇。」
阿娜徐徐抬起頭黎望住我，雙眼早已哭不成人。
「阿......阿珞......阿珞！」阿娜仿似如夢初醒咁呼喚住我既名字。
阿娜一野彈左起身，然後雙手跨過我肩膀上將我緊緊咁擁實。
「我岩先放學諗住番屋企，點知就收到一個電話，話媽咪佢做做下野暈左......」阿娜係我懷中不斷哭泣，哽咽咁將整件事講左俾我知。
「於是乎我就即刻趕到黎醫院，個d醫生就同我講話媽咪係突發性心臟病，要即刻做手術......」佢繼續講 : 「好彩岩先做完手術之後佢地話媽咪已經暫時脫離生命危險，所以送左佢去病房到觀察......」
「我好驚呀，我真係好驚呀！我好驚媽咪會就咁離開我！」阿娜捉緊我既衣服。「係呢一刻我腦海裡面咩都諗唔到，只係諗起你......所以......我好想見你呀！」
「嗯，我明白架。」我輕輕擁著阿娜。「你好叻女架呀，好堅強，做得好好！」
我補充一句 : 「你睇，我依家已經黎左喇，所以唔洗再自己撐落去架喇，萬大事有我幫你頂！」
阿娜聽完呢句之後，仿佛好似被我溶化左咁，哭聲再次一發不可收拾。
唔知過左幾久之後，阿娜突然推開左我。
「唔得架......你有女朋友......」阿娜拭去雙眼既淚痕。「你都係走啦，我唔想見到你。」
「阿娜，」我雙手搭係佢膊頭上面。「唔好再壓制住自己既思想啦，係你叫我黎架！」
我繼續講 : 「我知道你需要我，所以我會出現。」
「不過，我係以一個老朋友既身份去幫助你，開解你......」
「阿珞，點解你仲未明呀！！！」阿娜突然叫左出黎。
呢下聲音非常震撼，令我完全晃呆了。
「點解你仲未明呀......」阿娜將頭壓係我既胸前。「你當我係老朋友姐，我唔係呀......」
「我仲係好中意你，仲係好需要你係我身邊呀，阿珞......」
「但係你已經有女朋友架喇，而且佢對你咁好，你又咁愛佢，所以我唔可以再繼續中意你，破壞你地既關係架......」
「我依家可以做既，就只有壓住自己既思想，唔去搵你，唔去見你，唔去掛住你......」
「所以唔好再出現係我既視線之中！」阿娜憤怒咁望住我。
「我怕......我怕......」阿娜既眼神變得鬆懈落黎。「我怕，我會控制唔到自己，再次愛上你。」
「我......我......」對唔住，我真係唔識點樣去回應阿娜。
原來「成熟」呢個詞語，係要承受如此大既壓力。
我當初仲以為阿娜要放低我，對佢黎講係一件容易既事。
但原來佢一直以黎佢都只係盡力咁壓抑住自己，唔俾自己做d幼稚既事。
我依家真係好懷疑，究竟我當初係咪真係確確實實認識過、了解過阿娜。
再諗落去，究竟我又係咪確確實實咁認識芷翹呢？
究竟，我識唔識拍拖？
又或者應該話，我究竟識唔識做「人」？
「阿娜，好對唔住......」我諗，呢句說話已經係我惟一能夠講既野。
「阿珞，原諒我既任性。」阿娜苦笑左一下。「我地仲係好朋友黎架，係咪？」
「嗯，永遠都係。」我退後左一步，回復番去朋友之間既界線。
「嗯，永遠都係。」阿娜伸出手。
我亦都伸出手，同阿娜握住。
呢個動作，大概就係我同阿娜之間最好既結局。
我地兩個走到去病房門前，透過窗口望入去係裡面正在昏睡既Antie。
「有無話幾時會醒番？」我問道。
「醫生話媽咪純粹係因為攰而訓左，所以如無意外既話應該聽朝就會醒。」阿娜一直望住裡面既Antie。「我喊完已經好番好多架喇，所以你都係快D走啦，廢事你女朋友誤會！」
我望一望手機屏幕既時間 : 7時22分。
「你未食野架可？」我指一指個屏幕。「不如一齊食埋先？」
「嗯......」阿娜莞爾一笑。「好啊。」
係行緊去醫院canteen既途中，我將我呃芷翹黎醫院既事同左阿娜講。
「唔係掛，你講真架？！」阿娜個樣既係抱歉，又係憤怒。「雖然係我叫你黎既所以我都有唔岩，但係你點可以咁樣呃女朋友架！你咁樣點做人男朋友！」
「嗯......」俾阿娜咁講兩講，我真係無地自容。
「我真係要重新考慮下自己係咪仲要中意你呢個人渣！」阿娜沒好氣咁講。
「對...對唔住......咁依家點算......」我個頭痛到就黎爆。
「你依家直接打俾佢，講個真相出黎，再同佢道歉，然後話俾佢知自己唔會再犯，咁就得架喇！」阿娜忽然做左我軍師。
我輸入左芷翹個電話號碼之後望住個畫面，久久都未夠膽按下撥出鍵。
「我都係唔得呀！」我仰天長嘯。
唉，我係咪男人黎架，又婆媽又自我中心，唔肯認低威之餘做野又不顧後果，衝動得黎又要毫無建樹.....
「啊！」阿娜突然係我身邊好驚訝咁講。「可唔可以借你個電話黎，我想打個電話，但我手機無晒電。」
「哦好啊。」反正我又唔夠薑打俾芷翹，所以我就遞左部手機俾阿娜。
阿娜接住我部手機之後，突然間向前跑走左！
「阿娜！？」我反應唔切，所以俾阿娜拋離左幾遠下。
我追到過去既時候，發現阿娜已經一早轉左入女廁。
「喂，阿娜！」我拍拍女廁既門。「你攞我部手機去做咩呀？」
過左一陣，阿娜把聲從女廁傳出 : 「我幫你去做d你唔夠膽做既野！」
下？！即係咩？
唔通係......打俾芷翹？唔撚係掛！？
「阿娜！！！」我再拍拍女廁門，呢個時候已經有幾個路人望住我，搞到我好尷尬。「你唔係打俾芷翹下話！？唔好啦，我想自己講，所以你出黎先啦！」
裡面水靜鵝飛，沒有一聲回應。
由於我唔想俾人當變態佬既關係，我決定坐係旁邊一張凳到等阿娜出黎。
「死啦......今次仆硬街喇......」當我一幻想到芷翹同阿娜傾計，仲要話題係圍繞帶罪之身既我既時候，我既冷汗就不自覺咁流下。
過左十分鐘之後，阿娜斯斯然咁係走番出黎。
我即刻跑過去搶番佢手中既手機。
「你搞咩黎呀阿娜！」我勁驚咁問。「快d同我講啦！」
只見阿娜甜笑左一下，然後裝作不經意咁望住我講 : 「我只係打左俾你女朋友同佢講左d野，然後佢就話依家黎緊，半個鐘後到姐！」
「唔係掛......」我已經感受到死亡既來臨。「你即係玩我姐......」
「死唔死呢就唔係由我決定既，」阿娜一隻手指督住我心口。「係由你決定既。」
「咁你笑得咁開心係點解？」我望住眼前呢個甜笑中既阿娜。
「因為？」阿娜上下打量住我。「因為......」
「呢個係女人既秘密，嘻嘻！」
我一路喪打俾芷翹，佢都唔聽我電話，Wtsapp俾佢又唔應機。
「唔該，要一個焗豬扒飯！」阿娜溫柔咁講。
「好既，盛惠38蚊……下位唔該！」一個幾標緻既女服務生係到呼喚我上前。
「唔該……要一碗砒霜……」我抽出一張100蚊，遞左俾佢。
「……」
我地買好野食之後，就搵左個近門口既位置坐低。
「阿娜……」我就黎想搵個窿塞自己入去算數。「你點會無啦啦幫我同芷翹講架……依家都唔知點收科喇……」
其實我覺得如果係我自己向芷翹坦白既話，佢最多都係嬲我一兩日姐。
但依家竟然係阿娜幫我講，咁即係反映我唔夠膽道歉啦，而且仲要係ex幫我出聲……
總之成件事bug到無得再bug啦！！！
「放心啦！」阿娜拍拍我膊頭。「幼稚既野我係唔會做架，所以我又點會好似你咁成日腦衝，唔諗後果做野！」
「哈哈……哈哈……」我感受到自己已經中晒暗箭。
「係喇！」阿娜忽然講。「唔知芷翹食左野未呢？係咪應該等埋佢，或者買埋佢個份？」
咩料呀，傾左十分鐘電話咋喎，咁快熟到叫人做芷翹？！
「唔怕啦，我share我個份俾佢就好……」我諗，我依家個樣應該仲核突過李克勤俾人扔左份禮物個陣。
突然間，背後一陣寒氣殺到！
我成身因為呢d寒氣，搞到不停顫抖！
「司……徒……珞……」一把明明應該係好甜美既聲音，竟然會變得如此恐怖！
「係……？」我戰戰競競咁慢慢將頭轉過去。
只見一個身穿白色T-shirt配黑色牛仔褲，著住一件Tiffany色冷衫既芷翹企左係我面前。
不過點解……芷翹周圍好似有D「霸氣」圍住佢咁既……？
當我仲未反應過黎既時候，芷翹已經一野搣落左我塊面到。
不過呢下堅係大力，痛到我即刻叫左出黎。
「哇！」我痛到標眼水咁制，但又唔可以推開芷翹隻手。「對唔住呀對唔住呀！我有苦衷架！」
「我先唔理你有咩苦衷呀！」芷翹另一隻手都伸埋出黎搣我另一邊面。「總之你係呃我就係呃我，邊個都無情講！」
我苦苦咁側一側眼望向阿娜求助……頂，佢係到好Enjoy咁食緊個豬扒飯！
「你唔洗諗住求助喇，阿娜係企我呢邊架！」芷翹望過去阿娜，佢地眼神交接左一下，然後點左下頭。
咩話！？傾左十分鐘電話咋喎，就已經熟到組成左「復仇者聯盟」！？
「我……我……」呢個時候我都唔知喊好定笑好喇。
不過望住芷翹，我硬係覺得佢無嬲過我咁，就算係對望住既時候佢都完全無任何失望既味道，反而覺得佢眼裡仲透出一點點既甜。
「你原諒我啦芷翹！」不過都係睇定D先。「我以後唔會再犯架喇！」
「上次聖誕節你夠係咁講啦！」芷翹放開左我，坐左係我隔離。「我唔會再信你架喇！」
「唔好啊！」呢下我真心驚，於是乎做出個發誓既手勢。「我用人頭保證啊！我以後都唔會再呃歐陽芷翹架喇！」
「噗茲~~~」笑出黎既，係坐對面既阿娜。
笑咩笑，笑你呀媽瀨屎呀……啊唔係，唔可以罵阿娜媽咪架！
笑咩笑，笑你呀爸瀨屎呀！明明係阿娜你搞到依家咁既情況架，咁都仲笑得出！
但係諗真D，又好似係我搞到依家呢個情況既責任多D……
「保咩證啊，咪又係呃我！」芷翹雙手撓胸。「我先唔信你！」
「咁你點先會信番我啊！」我輕輕力扯芷翹既衫袖。
「真係想我信番你？」芷翹側眼望住我。
「係！」
「咁……俾左你個焗豬扒飯我食！」
唔記得講，我最後都係買左焗豬。
「下？！」我O晒嘴咁望住芷翹。
「係咪唔俾先？」芷翹側面唔望我。「咁我唔會再信你架喇，死人司徒珞！」
「唔係啦！」我即刻推左盒飯俾芷翹。「只係……好似咁簡單咁姐……」
「乜你想再難D咩？」芷翹見到我推左盒飯俾佢，就即刻攞起餐具。
「梗係唔係啦！」我慌忙解釋道。「快D食啦，凍左唔好食架喇大少姐！」
芷翹望住個飯，又無動手食。
「做咩？」我問。
芷翹拎過黎望住我，扮到好唔情願咁講 : 「咳咳……我怕我食唔晒……所以……一齊食啦，好無？」
「好啊！」我已經餓到暈。
「嗯！」芷翹遞左隻叉俾我。
「救命，我係咪要換個靚位呢？」對面既阿娜反一反白眼。
如果話北極光係世界奇觀既話，我諗我今日已經見到北極光。
係食飯既時候，我竟然係一粒聲無出過。
唔係我唔想講野，而係因為……
芷翹同阿娜居然「吱吱喳喳」咁講不停！
但係最恐怖既係咩？就係佢地講既話題大多數都係圍繞……都係圍繞……
都係圍繞「我」……哈哈……
「話你聽呀，如果見到阿珞佢講野支支吾吾咁呢，就代表佢身有屎！」
「我都覺我都覺！仲有呀，珞仔佢好中意睇人個GAP架！」
「唔係掛，咁變態？！」
佢地講完之後用好奇怪既眼神望一望我，然後拎番轉面繼續傾計。
屌，本身呢個組合都已經夠晒尷尬架啦 (定係只有我尷尬)，依家仲要係我面前數我，唉……
天父呀天父，你即係玩鳩我姐，想我上黎陪你都唔洗咁架下話……
食完飯之後，我地就上番去望下Antie。
不過，我地上去個陣仍然係維持住芷翹同阿娜係前面傾計，我單機行後面既情況。
我地上到去病房既窗前，再次望入去。
Antie仍然好似剛才咁未醒。
「Antie會幾時醒？」芷翹問道。
「大概聽日啦。」阿娜一望到antie咁樣訓係病床上面，目光就會變得好呆滯。
「咁你依家諗住點？」芷翹再問。
「我諗我都要番屋企沖涼換衫先，始終著全校服都唔係幾好。」阿娜望望身上既校服，然後對住我地講 : 「所以我聽朝先會再番黎探媽咪。」
阿娜再補充 : 「今日真係好多謝你地黎啊，阿珞、芷翹。其實我依家已經好番好多，可以照顧自己架喇！而且依家都咁夜囉，阿珞你都係快d送芷翹番屋企啦！」
「嗯……」
「唔得！」芷翹突然間打斷左我既說話。「點可以要阿娜自己一個番屋企架！而且……佢媽咪又係醫院，佢自己一個邊到訓得落覺！」
「咁……你想點？」
我直覺話俾我知，我又要準備O嘴。
「我地一於……去阿娜屋企陪佢訓！」
「唔包括我架可？」我問。
「你忍心兩個女仔自己訓咁危險咩？」芷翹道。
「但係阿娜未必肯架呢……」我望向阿娜。
「好啊好啊！」阿娜雙眼發光。「其實我好想有人陪我訓！所以你地兩個一於就上黎啦，雖然地方就真係細左D……」
「唔怕啦，最多咪三人同床！」芷翹跳下彈下咁過去捉住阿娜雙手。
「嗯！」阿娜好開心咁笑。
我既意見不會被考慮的嗎……
仆街了，今次真係仆街了……
我要同EX加現任一齊訓……呢個係咩情況……
我同芷翹各自打電話交代左唔番屋企訓覺之後，就由阿娜既帶領下離開醫院。
我地搭地鐵去到深水埗站，行上地面之後唔知轉左幾多個圈，終於去到一座舊式唐樓既門口。
「我地真係要上去？咁樣打擾阿娜唔好意思既……」我再三問芷翹。
「點會唔好意思姐，阿娜都話好架麻！」
你係女仔就梗係唔會唔好意思啦！大佬，我同阿娜係EX既關係黎架，而且岩先又同阿娜咁樣，依家又一齊訓……
最重要係咩呀，我係你男朋友黎架大少姐！你點會俾我同EX訓架！
我輕力扯一扯芷翹去旁邊，然後咬耳仔咁問佢 : 「其實呢……阿娜係我EX黎架喎，點解你仲會咁放心既？」
「因為？」芷翹望住我甜甜笑左一下。「因為……」
「呢個係女仔既秘密！」
「下？！」我都未反應得切，就俾芷翹拉左入去。
我地三人係昏暗既樓梯行上去，行到去5樓。
我地行到去一個門口，阿娜扭開左之後裡面仲有幾個門口。
阿娜再帶領我地行去其中一個門口到。
「裡面有D窄架，唔好介意……」阿娜講完之後就扭開左道門。
呢間屋，基本上已經唔可以叫做「屋」，甚至連「房」都稱唔上，盡其量都只可以話係一個「空間」。
呢個空間稍眼望落大約80呎，裡面就只係有一個碌架床、一個萬用櫃同一張書枱，但就已經將整個空間用得所無幾剩。
碌架床下層同底下既位置都放滿晒野，只有上格床係空左出黎俾人訓覺。
我地三個入左去之後，我就坐左係書枱面，而佢地兩個就上左去上格床。
「阿娜，得一張床你同你呀媽點訓？」我好奇一問。
「哦，其實唔夠訓架！」阿娜苦笑左一下。「所以媽咪佢突登去左搵一D夜更既工作去番，咁大家就可以輪流訓唔洗爭床。」
原來咁耐以黎，阿娜都係咁孤獨咁自己訓……
所以唔怪得岩先芷翹一話陪佢訓，阿娜就開心成咁。
「原來你咁慘架……真係辛苦你喇阿娜！」芷翹一野攬左落去阿娜到。
「本身都唔係好慣架……不過慢慢捱下捱下，就開始適應左。」阿娜撫摸住芷翹個頭。
喂喂喂，當我透明架你地兩個！
我望住佢地咁樣，真係好想笑，但又有D嬲。
我嬲D咩？屌，我都唔知呀！！！
「係呢，咁煮野食同沖涼個D點搞？」我再問。
「我地呢三間割房戶會Share一個廁所黎用，而呢個廁所其實同平時大家屋企個d一樣架咋唔污糟！而且因為我地呢三間用戶既感情都幾好，所以一早夾好晒咩時間邊個用，邊個清潔咁，所以唔會話成日爭廁所。」
阿娜補充 : 「至於煮野食呢就係靠世上最偉大既兩樣發明！」
「即係咩？」芷翹問。
「就係電飯煲同埋電熱水壺！」阿娜指住下格層既個兩舊野講。
阿娜望一望牆上既掛鐘 : 「嘩，成9點幾架喇？我地10點前要沖好晒涼然後俾番個廁所人地用！」
「好啊好啊！」芷翹成個細路女咁。「不如我地一齊沖？」
咩~~~話~~~！？
「唔包括珞仔！」芷翹好似明白我諗咩咁突然望過黎。「只有我同阿娜，你一陣先自己沖！」
車，仲以為有艷遇添！
「哈哈，量佢都唔敢啦可，阿珞？」阿娜奸笑咁望住我。
頂，我係由幾時開始俾呢兩個大魔頭食住上架！
「我邊到夠膽呀，哈哈……」我勁無奈咁笑。
其實，你地願意既話，我一定樂意奉陪，嘻嘻嘻~~~哈哈哈~~~！
阿娜遞左d衫俾芷翹一陣間換，然後就走左去沖涼，剩低我一個係房到面壁。
「點解d劇情會咁峰回路轉架……仲tvb過tvb……」我望住道牆好似痴左線咁自言自語。
「惟一可以解釋成件事既，就係佢地傾電話個十分鐘！」我為自己既聰明感到自豪。「無錯喇，佢地一定係講左d好特別既野，所以先無啦啦變到咁frd！」
好啦，等我今晚搵個機會去問下其中一個先！
佢地沖完涼之後就換左我去沖涼。
不過我真係要對割房改觀，原來除左只係比正常屋細之外，其實整體環境都唔會話太惡劣。
起碼個廁所都係可接受範圍。
我沖完涼之後就著番件校服 (我都無番過屋企)，然後行左番房。
唔知道係咪因為有兩個女仔逼左係間咁細既房，而且仲要岩岩沖完涼既關係，成間房都瀰漫住一陣陣芬芳既女人味，混合住阿娜既薰衣草味同芷翹既香水百合。
我一入到去，簡直即刻暈低咁濟。
「阿珞，你諗住一直著校服呀？」阿娜見到我仲著住校服入黎，所以問道。
「都要架喇，因為我都無其他衫。」我回應。
「不如……你著住我d衫先？」
「下？！」我即刻望向芷翹。「咁唔係幾好既……」
「好呀好呀！」芷翹雙眼發光咁望住我。「你不如著條短裙黎睇下！」
於是乎我即刻叫阿娜俾左件T-shirt同鬆身長褲我，然後狗衝去廁所換。
講起上黎，我都係第一次著女仔既衫。
阿娜身上既薰衣草味道仍然殘留左係衣服上面，嗅起上黎非常香……唔得！我有芷翹架喇，唔準亂諗野！
我忍住呼吸換好件衫 (其實我都唔知點解要咁做，純粹只係覺得嗅到薰衣草味既時候就好似對唔住芷翹咁)，然後行番出去。
「哈哈，都唔錯呀，唔會話太女仔，幾襯你！」我一番到去阿娜就笑我。
梗係啦！你知唔知我搵左幾耐先搵到呢set中性d既衫！
我坐番上去枱面然後講 : 「我今晚坐係呢到訓得架喇，你地兩個訓上面啦，如果咪會唔夠位。」
「不嬲都係諗住咁架啦！」芷翹同阿娜幾乎同時間出聲。
「……」Ok，fine。
我地閂左燈，芷翹同阿娜訓左係上格床，而我就坐左係書枱到傾計。
我地傾下時事、傾下八卦野，總之就咩無聊野都傾一餐！
傾下傾下，大家就係不知不覺間訓著左。
「珞仔……珞仔！」
突然間一把甜美既聲音打擾左我既睡眠。
「嗯……？」我緩緩咁張開眼睛。
環境非常昏黑，睇黎應該仲未天光。
之但係我第一眼望到既，就係芷翹哄到勁埋咁係我面前！
由於無開燈既關係，眼前既芷翹只有一個人影既輪廓，但係佢身上既香水百合味就係咁傳過黎。
由於岩岩起身加上遇到d咁刺激既畫面，我不自覺咁扯左。
「嘩！」我俾芷翹嚇左一嚇。「你做咩……？！」
就係我諗住問芷翹搞咩落左床既時候，芷翹一野咀左埋黎。
「#$@%%&%^&#$......？」我feel到成日都非常滾燙，就好似d人偷情個陣既感覺咁。
救命呀，巨龍兄你冷靜d呀！！！
巨龍兄 : 係你要冷靜d……
「我好掛住你呀，珞仔~~~<3」芷翹成個人向前攬住左我，搞到我背脊撞左埋去後面道牆到。
「做咩咁突然……」其實我總係覺得夜晚既芷翹根本係第二個人黎，會變到勁開放。
定抑或係……芷翹本身就係呢個性格！？
「咁我真係好掛住你麻，琴日又無得痴住你<3」芷翹成個人壓左係我上面，佢頭上不斷咁揮發著誘惑既髮香味。
「傻妹~~~」我完全俾芷翹征服左，所以緊緊咁攬住左佢。「我都好掛住你！」
我繼續細聲咁講，廢事嘈醒上面既阿娜 : 「你真係無再嬲我啊麻？」
芷翹甜甜咁笑左一笑 : 「傻仔，我都無嬲過你！」
「下？！」我勁驚訝。「但係我呃你喎！」
「因為……」芷翹指向我書包既方向。「因為我見到有個人突登洗開我，然後去左超市買材料諗住整情人節蛋糕我食囉！」
「下？！」我十級驚訝。「你點解會知道架！」
「你覺得我會唔會唔知你幾時講大話，幾時講真話？」芷翹勁奸咁望住我。「我先唔信你要整SBA，所以咪回頭跟蹤你，跟住咪見到晒！」
芷翹繼續講 : 「不過咁，我本身見到你接左個電話之後大叫左聲『阿娜』，然後唔知咩事勁緊張咁跑去地鐵站，之後仲要呃我話同呀媽食飯個陣，其實我都幾唔開心架！」
「但係後來阿娜打左俾我，同我講左D野之後……我就咩事都無Lu！」
「咁……你地講左D咩？」終於都到戲肉喇！
「都話左……」芷翹搣一搣我塊面。「係秘密！」
唉，睇黎我永遠都唔會知道真相……
我地攬左一陣，然後對望住，跟住開始接吻。
咀咀下，我地仲伸埋脷去對方既口中，黎個口水交融。
而我就將芷翹拉得更貼近自己，佢雙乳基本上緊緊咁貼實係我心口到。
今次既感覺真係好刺激，就好似D人係辦公室搞野唔可以俾人發現咁，勁有挑戰性！
芷翹好快就上番去張床到訓覺，但係臨上去之前仲向我伸一伸脷，真係非常可愛！
「樹蔭有jojo錫 塊面紅撚晒，歸家有的士佬載 然後妳睡在我的身邊~~~」
我既電話鬧鐘響個不停，就即係意味住已經到左朝早喇！
由於我整晚都維持住坐係枱面抱膝訓覺既姿勢，所以一起身個下D肌肉同關節都好撚痛！
「嗚哇……」個身體就好似唔係我咁痺晒，D血勁唔流通，搞到我雙手乏力郁唔到，閂唔到個鬧鐘。
「妖……好嘈呀！」上格床既芷翹突然間勁大聲咁叫，然後成個枕頭車左落黎。
個枕頭完美咁降落左係我個頭上面。
哈哈……其實我個頭係咪俾芷翹set左個定位裝置，點解鑊鑊都中到應一應既……
過左一分鐘到我雙手終於郁得番，於是乎我即刻閂左個鬧鐘，如果咪下次扔埋黎既一定係手榴彈。
阿娜好快就起左身去梳洗，而我同芷翹就訓多左陣回籠覺。
咁又係既，始終阿娜既媽咪仲係醫院，所以佢訓唔得冧係正常既。
咦咪住！咁阿娜琴晚其實會唔會聽到......甚至係睇到我同芷翹......
「阿珞，呢到有D新既牙刷，你去刷牙啦。」阿娜唔知幾時走番入黎，將我從思考中抽番出黎。
「哦......好！」我一時間竟然覺得有D尷尬，所以支支吾吾咁答。
「搞咩呀你，好似心不在焉咁既！」阿娜笑左一笑。「係咪因為琴晚訓得好差呢！」
「Er......係呀！」難得阿娜俾個藉口我解釋，咁就梗係認左佢啦！
「真係唔好意思啊，因為地方真係唔大......」阿娜有d抱歉咁講。「所以真係好多謝你同芷翹啊，就算呢到個環境咁差都仲堅持黎陪我！」
「唔好咁講！」我勁客氣咁講。「係呢到訓左一晚，都算係一個特別既經歷黎既！」
起碼對我黎講，琴晚同芷翹個d經歷真係夠晒特別，可一不可再架！
「你咁講似係串我多d喎！」阿娜一野彈手指彈落我額頭到。
「咁客套既說話我唔識講麻，哈哈！」我笑住咁講。
「快d叫樓上隻懶訓豬起身啦，我地仲要去醫院架！」阿娜再彈多一下我額頭。
跟住阿娜突然將頭哄前，細細聲同我講 : 「阿珞，芷翹好女仔黎架，記住好好對人！」
佢補充 : 「如果你搞喊佢呢......睇下我點樣煎你皮拆你骨！」
我望住眼前既阿娜，真係好想知道佢究竟係有幾大既覺悟，先講得出呢番說話。
「聽唔聽到我講咩呀司徒珞！」
「收到收到！」
於是乎我就叫左芷翹起身，然後大家梳洗好之後就落左樓下M記食早餐。
係食緊早餐既時候，醫院打黎話auntie醒左。
「你地唔洗陪我架喇，我想自己去探媽咪！」阿娜極速咁食晒成個餐。
「咁啊......好啦，你到左之後wtsapp我啦！」我望住阿娜講。
「嗯，咁我走先喇！」阿娜背好個袋，然後望住我同隔離既芷翹 : 「你地好好享受下情人節啦，拜拜！」
呢個時候，芷翹無啦啦企左起身，伸左隻右手出黎 : 「阿娜，下次再見既時候就唔同講法架喇！」
「因住輸俾我啊，芷翹！」阿娜富有挑戰性咁笑左一笑，然後伸出右手握住芷翹 : 「公平競爭！」
「放馬過黎！」芷翹都笑住講。
「Er......你地究竟講緊咩？」我感覺到即將有一場大戰要爆發。
「係女人既秘密！」
阿娜走左之後，我同芷翹就斯斯然咁食我地既早餐。
突然間芷翹成個人哄埋黎，由下而上咁望住我！
「咩...咩...咩事？」我口裡面仲咬住塊熱香餅。
「我個蛋糕呢？」芷翹伸左隻手板出黎。
「傻左咩，你都知我整唔切架！」我指住個書包，不解咁望住芷翹。
「唔制，我要食蛋糕！」芷翹裝作扁嘴咁扯我既衫袖。
我極度懷疑芷翹係有心刁難我！
「咁......不如我買俾你？」我試下水溫咁講。
「唔要！」芷翹繼續扯我既衫袖。「我要係珞仔你整既蛋糕！」
咁你即係玩鳩我姐！我邊到變個蛋糕俾你......
「大少姐，我變唔切個蛋糕俾你架喎......」我搣一搣芷翹塊面。
哈哈，真係好好搣，好彈~~~
「將就下，今日食出面買既，我下個月先再整俾你，好無？」我試住誘惑芷翹。
因為芷翹既生日係3月14日，所以距離今日岩岩好一個月。
「唔要！」芷翹裝作撒嬌咁講。
「咁......不如你食左我算啦......」
「好呀<3」
「......」
「不如......」芷翹笑住咁講，真係好可愛，好想一野咀落去。「不如去我屋企整蛋糕囉！」
「好啊！反正有材料！」我都勁興奮咁講。
梗係興奮啦，又有得上芷翹屋企喎！！！
於是乎我地食完個早餐就搭車番去觀塘。
「不如我地煮埋飯仔囉！」係搭緊地鐵個陣芷翹講。
「不如等我黎煮啦！」我真係唔想又同上帝對話。「你就乖乖地做我助廚！」
「都得<3 ！」
就係咁，我地第一站首先就係去超市買煮飯仔既材料。
大家有睇過求婚大作戰既話，都應該會知道情侶去超市買餸真係一樣好溫馨既事！
「芷翹，你今晚想食D咩呀~~~？」
「珞仔，我想食咖哩雞！」
「......」
我地呢樣攞黎睇下，個下攞黎玩下咁，唔知搞左幾耐終於都買好晒餸上芷翹屋企。
「你媽咪今日唔係屋企咩？」去到門口個陣我先醒起呢個問題。
「佢今日要番工啊，所以......」芷翹一野攬埋黎。「我地可以拍拖拖喇<3 ！」
我入去放低晒D材料之後望下個鐘，見仲係1點幾，就梗係......
攤係sofa到訓陣先啦！
「嘩，終於有得訓下！」琴日無覺好訓既我依家簡直係覺得上左天堂。
「喂啊你件校服好臭呀！」芷翹行埋黎嗅左一嗅。
「咁點算？」其實我一路都嗅到架喇，但係無計啦又無衫。
「琴日就話係阿娜屋企所以要著佢D衫姐......」芷翹沖左入房，然後攞左D佢自己既衫出黎。「依家你係我屋企，就梗係著我D衫！」
嘩屌！正呀，有得著芷翹D衫，嗅個陣香水百合味！
但係我梗係要按捺住呢種變態既興奮情感 : 「咁啊......好啦......」
我攞住D衫入左廁所換，一路換個陣芷翹陣味一路飄出黎，真係好撚正~~~<3
換完之後我就去番SOFA到攤屍。
「成日掛住訓！」芷翹雖然係咁講，但已經成個趴左係我上面。
「咁你又訓上黎，懶訓豬！」我撫摸住芷翹細軟既頭髮。
芷翹向前一伸，個頭就係正我個頭上面然後同我對望住。
其實我都幾中意咁近距離望住芷翹白滑既肌膚、汪汪既雙眼、高尖既鼻樑、櫻桃小嘴、仲有香甜既髮味。
「做咩望住我！」芷翹額頭掂住我額頭。
「你唔望住我，又點知我望住你呢！」芷翹已經搞到我心跳超加速，成身非常滾燙。
「哼！」芷翹無啦啦咬左我個鼻一下！
「咁重口味架，中意咬人個鼻都有既！」我個頭向前一伸，諗住咬番芷翹個鼻。
點知芷翹勁快反應咁避開左，搞到我撲左個空。
「哈哈哈，傻仔！」芷翹又伸埋黎咬多一下。
「啊你個衰妹呀，唔懲罰下你我唔叫司徒珞！」我一野「吱」落去芷翹條腰到，搞到佢「咯咯」聲咁笑。
「好喇好喇我投降！」芷翹俾我搞到無晒力，成個人軟趴趴咁訓係我上面。
「咁......俾我咬番一下！」我勁奸咁講。
「好啦......」芷翹十萬個唔情願咁伸個頭埋黎。「唔準咁大力架！」
望住咁可愛既芷翹，仲邊會忍心咬佢呀！
我伸手去芷翹頭後面輕輕力按住佢，然後推佢個頭埋黎。
「嗯？！」芷翹仲未反應到個陣，我已經咀左落去。
芷翹徐徐閉上雙眼，而我亦都合上眼享受接吻既呢一刻。
嘴左一陣之後，芷翹就臉都紅晒咁講 : 「乜唔係咬我架咩！」
「我點會傷害我既大少姐呢~~~」我攬實芷翹。
「量你都唔敢，哼哼~~~」芷翹既聲音非常溫柔。
我地兩個一訓就訓左幾個鐘，醒番既時候已經係5點幾。
跟住我地就開始整蛋糕喇！
係呢到真係要同大家講，第時拍拖個陣記住試下一齊煮野食、整下蛋糕咁，因為個種感覺真係非常溫馨！
「你要打到D忌廉企身先得架！」
「D餅幫我揼碎佢啊珞仔~~~」
「朱古力唔可以直接放落個鑊到煮架傻妹......」
經過一輪係廚房既角力之後，我地終於完成左個蛋糕喇！
「YaHOo~~~」芷翹望住我將個蛋糕放入雪櫃個陣勁開心咁叫。
「洗唔洗咁High呀你！」我抱住佢條腰將佢拉埋黎。
「我第一次整蛋糕架咋！」芷翹莞爾一笑。
哈哈......我諗番起上次個「飯焦炒飯焦」......
「之但係呢......」芷翹望一望個廚房。「好亂好污糟......」
的而且確，如果我話呢到係岩岩打完仗既話相信無一個人會懷疑。
於是乎我地又要準備搞一大輪去執野洗野。
我就負責抹碗執野，而芷翹就負責洗碗。
「係喇係喇！」芷翹好興奮咁著上左一條黃色圍裙，戴左對綠色手套。「咁樣先似家庭主婦架麻！」
「咁快就想做我老婆，係屋企相夫教子喇？！」我取笑道。
「妖，食屎啦你！」芷翹一野踩左落我腳板到。
好快我就執好晒d野落個洗手盆到等芷翹洗好再抹，之但係芷翹既洗碗速度真係分分鐘慢過落實真普選。
「你洗好未啊~~~」我企係芷翹後面講。
「等等啦，邊會咁快洗好！」芷翹勁專心咁係到捽緊隻碟。
望住芷翹既背影，我忽然獸性大發！
我從後一野攬左落芷翹到，雙手既高度仲岩岩好頂到佢個胸。
「嗚呀！」芷翹俾我嚇一嚇，碟都跌番落洗手盆。
「你頂到我個胸呀衰人！」芷翹既臉頰又慢慢變得通紅。
芷翹，你真係好可愛呀！
我無視芷翹既說話，哄前個頭嘴左落佢塊面到。
「做咩姐你......」芷翹就黎紅到要爆炸咁款。
依我識左芷翹咁耐，我知道佢每當心跳加速個陣就一定會口塞塞，然後講「做咩姐你」！
所以我肯定依家既芷翹已經逃不出我既五指山喇，哈哈！
我打蛇隨棍上，慢慢將頭移去佢既右耳到，輕輕力咁吹d氣落去。
「嗯......」芷翹無啦啦叫左一聲，跟住成身軟左一軟！
嘩，今次仆街喇！我feel到自己好high！！！
芷翹拎轉塊面望住我，眼神非常誘惑咁講 : 「你曳曳啊珞仔......」
我堅決繼續無視芷翹，由下而上舔佢隻耳仔。
「嗯......」芷翹又再叫多左一下！
呢一下既叫聲真係呢......完全喚醒左男人既慾望！
臉頰早就已經變得紅卜卜既芷翹轉個頭黎同我對望住，然後向前咀埋黎。
我地一直維持住我從後抱芷翹既動作係到濕吻，直至大家都覺得條脷好攰個陣先鬆番開。
「你好曳呀珞仔！」芷翹甜甜咁笑左一笑。「只此一次，下不為例！」
「好啊~~~」我輕力掃左一掃芷翹隻耳仔。「反正，我已經發現到你既弱點喇，哈哈！」
芷翹即刻掩住自己對耳，勁怕羞咁講 : 「唔準再吹我耳仔！」
「哈哈！」我摸一摸芷翹個頭。「快d洗埋d碗啦，如果咪我點煮飯俾你食呀大少姐！」
「係你岩先阻住晒囉，如果咪一早洗晒！」芷翹鼓起泡腮咁講，樣子非常趣緻。
「好啦我錯！」我再次從後攬住芷翹。「咁......一齊洗啦好無呀，大少姐？」
芷翹「噗茲」一聲笑左出黎。
「好啊~~~<3 ！」
洗完碗之後，我地就夾手夾腳開始整晚餐。
「嗚嗚，珞仔蝦我搞到我喊！」芷翹切緊洋蔥個陣流晒眼淚，於是乎係到玩我。
「喂！d雞放入微波爐係禁解凍唔係禁微波！」
「芷翹，咖哩粉係邊？」
「我搵到喇珞仔！Er……唔好意思，沙薑粉黎……哈哈……」
我地係嘻哈聲中好快樂咁煮好餐飯，然後撐枱腳咁食晒d野再加埋個蛋糕。
至於洗碗環節呢……都係skip左佢啦，廢事你地睇到打晒冷震，哈哈！
食完野之後我地就走左去坐sofa，而芷翹就訓左係我大脾上面同我一齊睇電視。
睇睇下不知不覺間已經十點幾，芷翹媽咪亦都岩岩番左黎。
由於已經好夜，加上我廢事阻住auntie訓覺既關係，我都係決定閃水。
「洗唔洗我送你落去？」芷翹扁晒嘴，十萬個唔情願咁唔想我走。
「唔洗喇傻妹！」我按住芷翹個頭。「你今日幫手整左咁多野食都攰架喇，所以都係快d沖涼訓覺啦！」
「咁好啦……」芷翹衝埋黎攬住我，係我懷中講 : 「咁你番到去就wtsapp我啦！」
「知道喇大少姐！」我用右手托起芷翹個頭，然後輕輕咀左佢一下。
「嗯！」芷翹心滿意足咁笑左一笑，然後就目送我入lift。
落到去街上面，我抬頭望一望今日既天空。
整個夜色黑而清，月光明亮而皎潔，繁星細閃而燦爛。
雖然呢兩日既劇情發展並唔係我預計之中，但都總算係一個唔錯既經歷黎既！
我諗芷翹應該都非常享受呢兩晚既時光。
不過我下次唔可以再咁失策架喇，竟然連呢d大時大節都唔記得，仲要臨急抱佛腳黎整蛋糕，搞到鬼死咁「呢hea」！
無錯！我一於就準備個驚喜係芷翹生日個陣送俾佢，而且唔係靠人地 (蛋撻) 既idea！
之但係……究竟可以送咩俾芷翹呢？
『暴風雨。』
***********************************************************************