《妳做咩將成碗譚仔倒落我個頭上面！？》: 第十五章(下)

聖誕假話咁快就完左，又到左番學既日子。
 
「仆街！」
 
我一睇下個鬧鐘 : 7時30分
 
屌喇，我仲要番去陪芷翹買檸檬茶！
 
我九秒九梳洗換衫之後就跑番學校。
 




我用瀨那既速度岩岩好係7點50分趕到去canteen門口。
 
「safe！」我一個魯芬急剎車停左係芷翹面前。
 
「哈哈，算你無遲到啦！」芷翹撓起雙手於胸前。
 
呢個情景，令我諗番起第一日同芷翹黎canteen個陣，我都係岩岩好趕到。
 
「safe！」我一個dup big lag，出現係企係canteen門口既芷翹後面。
 




「咦咦咦~~~！乜咁都無遲到呀抽水怪！仲以為第一日就有兩包檸檬茶飲咁開心添！」芷翹裝出一個失望既樣，但係嘴角卻向上揚。
 
我望向眼前既芷翹，佢既笑容依然係如此既漂亮。
 
「眼下你呀，跑到成頭汗喇！」芷翹抽出一張紙巾，走到黎我面前，為我拭去額頭上既汗。
 
「傻仔~~~！」芷翹一路抹個陣一路笑。
 
「咩…咩…咩喎！」我lag晒機咁講。
 




鬼咩！我除左老母之外就再無俾其他人抹過汗架喇，更何況係女仔，更何況係女朋友，更何況係眼前咁美麗動人既芷翹！
 
「得喇！」芷翹替我抹好汗之後就撓住我隻手。
 
哈哈，呢個動作真係懷念。
 
「都係咁樣舒服d！」芷翹笑笑口咁講。
 
無錯，我都覺！
 
「哈哈，咁岩既我都覺！」我捏一捏芷翹高挑既鼻子。
 
「嘻嘻~~~」芷翹好甜咁笑左一下，然後就扯住我入去canteen。
 
隨後既呢段日子裡面，我同芷翹每一日都好似糖痴豆咁，日日朝早都好似放閃光彈咁係canteen巡遊 (其實我地只係買檸檬茶！)，而每星期就會搵一日一齊食lunch，週末日就會求其揀一日出黎行街拍拖。




 
我同芷翹既關係變得越黎越好，親密得黎又有朋友既相處方法，即係唔會掛住kiss同攬呢d身體接觸，而係著重心靈上既交流。
 
有時我咁愛芷翹既原因，或者就係因為佢好識體諒我，會俾我有私人既時間同空間，比如話係俾我同蛋撻個d去踢波，又或者叫我多d去維繫朋友既關係，唔洗成日陪佢等等。
 
所以睇起黎，我諗我真係搵到一個完美女朋友喇！
 
啊唔係，芷翹其實有一樣野唔多完美，就係……
 
「嗚啊！！」我痛苦的叫喊。
 
今日係二月頭一個星期六，我上左去芷翹屋企。
 
至於你問我上去做咩？
 




我諗，可以話係參加「烈士訓練班」。
 
邊個係訓練導師？唔洗講啦下話。
 
「點呀，好唔好味呀？」芷翹雙眼發光咁望住我。
 
「嗚呀！好撚好味呀！」我淚水已流出，望住天花板大叫 : 「上帝呀，點解呢碟炒飯咁好味架，你係咪想食死我呀！？」
 
我將頭望番落眼前呢碟飯焦多過飯既「炒飯」上面，苦笑左一下。
 
「真係好好味呀？等我又食下先！」芷翹攞起匙羹，諗住撈起d飯！
 
「唔得！」我一野搶左佢支匙羹。「呢d咁好食既野，你點可以同我爭！」
 
哈哈……如果俾芷翹食番既話，我諗上帝都會笑鳩死。




 
「嘻嘻，咁你第時要上黎食多d喇，又或者係我整飯盒帶番學俾你呀！」芷翹好開心咁跳黎跳去。
 
雖然d飯既味道就係真麻麻，不過見在芷翹呢份心意，依家口裡面就只係得番d甜味。
 
係我辛辛苦苦食左呢碟飯……啊唔係，係享受左呢碟飯之後，我就攤屍咁訓左係sofa上面。
 
「食完飯就訓，變肥仔珞架喇！」芷翹一野跳左上黎我個肚上面。
 
呢個動作本來就好溫馨既，不過……芷翹跳上黎個陣，兩個膝頭哥一野鋤左落黎我雞心到！
 
「嗚呀！」我一痛個下自然反應咁想屈埋雙腳。
 
「哎？！」但係芷翹因為坐左係我上面既關係，所以我一屈個下就撞中佢背脊，搞到佢成個人向前仆左落黎。
 




結果，我地兩個依家既動作就係我下佢上，嘴勁貼嘴，就好似當初係西貢運動場跑道上咁。
 
「喂……想點先依家！」芷翹紅都臉晒咁望住我。
 
「er……我唔小心架咋……」我同芷翹既臉非常貼近，甚至可以感受到佢呼出黎既空氣。
 
其實我都唔係好明，點解女仔連呼出黎既氣都係香既！？
 
突然，芷翹好似成個人放鬆晒咁墜左落黎，彼此既身體貼到無得再近！
 
我完全感受到芷翹既雙乳壓左落黎……咪住，咁軟既？佢唔係無帶bra下話？！
 
「芷翹……你係咪無帶bra……」我勁尷尬咁問。
 
「係呀你又知既？！好聰明呀！」芷翹輕輕咁抬高頭，然後扯低自己個衫領......
 
我一望落去，佢個個gap完美咁show係我面前。
 
「見唔見到呀，我真係無帶bra架，哈哈！」芷翹鬆番開手，再成個頭僕番落我心口上面。
 
頂！你咁樣即係誘惑我姐芷翹！
 
我先無咁易中招！……
 
好啦，我有生理反應了，you win。
 
「喂芷翹……不如你落番黎先……」由於我扯左既關係，我廢事芷翹繼續訓係我上面，如果咪佢一陣feel到有巨龍寶寶既存在就唔係幾好啦！
 
「點解喎！我要訓覺！」芷翹完全唔肯離開，仲成個身訓係我上面扭計咁un左兩un。
 
芷翹頭髮上香水百合既味道不斷傳入我鼻裡面，搞到我成個人都蘊蘊躉躉。
 
仆街了……巨龍兄，唔好出黎呀！！
 
我紅都臉晒咁支支吾吾同芷翹講 : 「你…你…你搞到我扯左呀……」
 
芷翹一聽到之後，即刻抬起頭望住我！
 
「乜原來男人咁樣就會扯架喇，咁廢架！」芷翹取笑道。
 
咩話？！咁樣就叫廢？！係你太勁咋芷翹大少姐！
 
「係你太吸引咋！又唔係唔知道自己幾咁好條件先得架，有邊個男仔見到會唔心動……」我同芷翹對望住。
 
「喔！」芷翹勁大力拍左我心口一下。「咁即係你原來係睇我樣先中意我既！」
 
「唔係呀唔係呀！」講錯野添，死火！
 
我慌忙解釋 : 「我中意既係你體貼、傻下傻下、努力不懈、有愛心既性格！」
 
「喔！」芷翹又再拍左我心口一下。「咁即係如果有令一個人係呢個性格既話你就會中意佢啦！」
 
屌，我死左佢算喇！
 
「咁……都要睇樣既……」
 
「咁即係靚女就中意啦！」
 
「咁……都要睇性格既……」
 
「咁即係人地性格好過我既話就中意人啦！」
 
「我淨係中意歐陽芷翹架咋！」
 
「咁即係有人同我同名既話你就會中意佢啦！」
 
「……」
 
結果，我地係呢個話題上面傾左半個鐘，傾傾下仲要訓埋。
 
我地維持住我係下面芷翹係上面既呢個姿勢，好溫馨咁攬埋一舊訓覺，安逸咁渡過左呢個下午。
 
時間一跳期中考就完左，仲要派埋成績表喇！
 
由於芷翹日日都捉左我落觀塘自修室溫書既關係，我既成績都有好明顯既進步。
 
梗係啦，我本來就唔係蠢，只係攞晒d時間黎畫畫姐，哈哈！
 
家長日之後既上學日早上。
 
「嘩！」我望住芷翹張成績表，真係O晒嘴。
 ‧‧‧
 
「你究竟係何方妖孽，竟然能夠迷惑老師去騙取如此高分？快快報上名來！」我一野將芷翹張成績表好似貼符咒咁貼左落芷翹個額頭上面。
 
「我咪就係……」芷翹突然撲前攬實我。「我咪就係珞仔女朋友！」
 
「做咩學我媽咁叫我！」我係咁推開芷翹。「仲有呀……呢到canteen門口黎架，好多人呀，快d放手啦！」
 
「唔制啊，我要攬珞仔！」芷翹成個細路咁係我懷中傻笑。
 
「傻妹……」我都係決定投降，任由芷翹攬個夠算。
 
我舉起芷翹張成績表再望一望，唉，睇黎我都要俾心機先得喇！
 
同芷翹買完檸檬茶之後我就行番上課室。
 
「司徒珞！」呢個時候Crystal係我前面走埋黎。「珞仔，遲下有個公開國際繪畫比賽，主題係『小孩』，五月頭就要交畫，你有無興趣？」
 
啊，係到講一講，除左我屋企人之外，Crystal係第二個叫我珞仔既人。
 
「梗係有啦，畫畫呢樣野我樂意至極！」我爽快咁答。
 
「咁就好喇，我幾驚你掛住拍拖無時間！」Crystal突然取笑我。
 
「嘩你點知架？！」我竟驚訝咁望住Crystal。
 
「點會唔知呀，金童玉女拍拖喎，傳到街知巷聞啦！」Crystal哄左個頭埋黎，佢身上既香水味即刻揮發左出黎。「喂，珞仔，我地好似好耐未試過……嘻嘻！」
 
「好…好…好耐未咩呀？！」我紅都臉晒咁講。
 
「好耐未試過……傾計姐，哈哈！你諗d咩衰野呀！」Crystal係到傻笑。「咁遲下我約你出黎飲野，再俾d比賽既詳細資料你啦，拜拜！」
       
我望住Crystal既背影，剛才既心跳感仲係未有減退。
 
唉，呢個Crystal，都唔知係咪老師黎架，一無咩人姐就係到玩我，講野仲要鬼死咁挑逗！
 
番到班房之後我就攞出本畫簿係到畫畫。
 
我不自覺咁將芷翹既容貌素描左出黎。
 
「哈哈，傻妹~~~」我望住幅畫居然都可以笑出黎，睇黎我應該中左芷翹既幻術喇！
 
「嘩，痴漢呀！」呢個時候蛋撻突然係我身後彈左出黎。「唔差在畫埋佢個body出黎啦，番屋企自己攞去J下都好麻！」
 
「你食屎啦！」我箍住蛋撻條頸。「我先無你咁變態！」
 
「咁又係既，聽日直接食左呀嫂都仲得啦你！」蛋撻從我既束縛術之中逃番出黎。
 
「下？」我唔係好明佢UP乜。
 
「聽日喎？2月14喎？你唔好同我誚你唔記得左下話？！」蛋撻沒好氣咁講。
 
屌！係喎！我真係唔記得左原來聽日就係情人節！！
 
「死喇我真係唔記得左！」我即刻扯住蛋撻。「有無D咩好橋介紹黎用下呀，我咩都無準備！」
 
「哼哼哼……幫你都得既，」蛋撻撳住我個頭。「請我食一個星期既LUNCH！」
 
「屌你啦我邊有錢！」
 
「咁算啦唔教LU~~~」
 
「兩日LUNCH！」
 
「唔得，三日！」
 
「……好，DEAL！」
 
蛋撻係我耳邊講左幾句之後，我即刻如有神助咁搭住佢膊頭講 : 「果然係溝女王！射射奶！」
 
「不用射！」
 
***
 
眨下眼就放學了。
 
「珞仔！」芷翹係我班房門口叫入黎。
 
芷翹繼續講 : 「今日我放學無野做呀，一齊走囉！」
 
好啦，為左聽日可以成功，今日惟有忍痛割愛！
 
我跑左出門口，扮到勁唔好意思咁講 :  「對唔住啊芷翹，因為我今日約左Crystal搞SBA既野，所以唔可以陪你走喇……」
 
芷翹聽到之後扁晒嘴咁撒嬌 : 「嗚……真係架？仲想同珞仔你去拍拖拖添……」
 
「唔好傷心啦！」我輕輕力拍芷翹個頭。「反正聽日係星期六，我一於就出黎陪你行街街拍拖拖！」
 
        芷翹轉一轉眼珠，然後笑得好燦爛咁講 : 「好呀！」
 
        送左芷翹出去學校門口之後，我即刻跑番上課室背書包，然後往樓下既超級市場進發。
 
        情人節大作戰，開始！
 
        「朱古力……」我係超市既通道間來回穿梭。
 
        「搵到！」我將三包朱古力放左入手推車，然後繼續望住手機屏幕裡面既材料表。
 
        「仲有整餅底既消化餅……」我行到消化餅既貨架，然後伸手去最高既位置。
 
        突然，有個巨型既黑影係我身邊出現！
 
        我一拎轉面……
 
        「HI靚仔，咁岩呀<3？」
 
係我眼前既，係一部久違既坦克車。
 
「咁…咁…咁岩呀……哈哈……」我即刻執左包餅乾落手推車，然後慢慢移開個人。「我有野做呀，走先，拜拜！」
 
就係我諗住馳騁天際既時候，坦克車小姐一野扯住左我背脊。
 
「你諗住整蛋糕呢？」佢遞上一包餅乾。「用呢隻牌子會好D架，無咁易散開。」
 
「喔……唔該……」我接住左包餅。
 
唉，我又係衰既，原來人地一心想幫我，我就好人當賊扮咁，點得架呢？
 
「真係唔好意思啊，岩先咁失禮……」我萬分抱歉咁講。
 
「如果你真係覺得唔好意思既……」坦克車小姐突然哄埋黎！
 
佢繼續講 : 「不如上我屋企一齊整呀，會好味D架！反正我都要整！」
 
我一個轉身，跑左出去俾錢然後走人。
 
「屌你老母，依家D人真係痴撚線……」我左右手攞住一袋袋既食物，係超市門口行番出黎。
 
「DO......DO......」呢個時候電話無啦啦震動起黎。
 
但係由於我無手聽既關係，我決定無視呢個CALL。
 
「DO......DO......」過左一陣之後，電話又再響起。
 
「唉，邊撚個呀！」我放低右手個袋，然後攞起電話。
 
「喂？」我唔好老脾咁講。
 
「......」電話對面傳黎既，只有空氣流動既風聲。
 
咦......唔係喎，聽真D，好似係人既抽泣聲！
 
「喂？！」我再三咁打招呼，但係對面都係無人應。
 
唔通係玩電話？唉算啦，都係快D番歸整蛋糕好過。
 
就係我準備收線既一瞬間，對面突然出聲！
 
「......阿珞，我好驚呀！」
 
我勁驚訝咁捉實部手機，向裡面大喊 : 「呀娜！？你係咪阿娜呀！？」
 
        「......我依家係廣華醫院......媽咪佢......媽咪佢......」之後換黎既又係一番抽泣聲。
 
「得，你等等我，我即刻過黎！」我緊張咁講。
 
        我講完之後，阿娜仍然未停止抽泣。
       
        所以我惟有同佢講左聲再見之後就收番好部電話，然後攞番起袋食物。
 
我望住手中既食物，暗暗掙扎 : 「如果我過左搵阿娜既話，睇怕都唔會有時間整到呢個蛋糕......」
 
不過，無理由見到朋友有難而見死不救姐！
 
「算啦，今晚番到屋企先通頂整埋佢啦！」
 
我將食物強行塞左入書包裡面，然後往地鐵站進發。