《妳做咩將成碗譚仔倒落我個頭上面！？》: 第十五章(中)
「一定要係到啊拜託……」我心中暗暗祈求著，然後踏進譚仔裡面。
一走到譚仔裡面，個陣湯麵既香味立即撲面而來。
呢一種味道，令我回想起第一次遇見芷翹。
「食屎啦你！」
一碗冒著白煙既譚仔湯麵，就好似罰球咁以時速三百幾公里既速度飛向我臉上！而伴隨住既，係一把可愛動人、但同說話內容格格不入既女性聲線。
「嘩屌！好熱啊！！！！！」我一野彈左起身，不停係咁用雙手撥走校服上面既麵條，同時間用憤怒既眼神望向呢位女生。
我沿著回憶走到當初既位置坐下，而對面則坐左一個食客。
「唔該，」我伸手呼叫服務員。「要一個雞肉牛丸清湯，飲凍檸茶。」
落完單之後，我四周打量呢個環境。
「呢到對我黎講，都唔知話係幸運之地定係不幸之地喇，哈哈！」我笑住咁講。
「雖然，我係呢到俾人用成碗譚仔倒左落個頭到，」我雙眼堅定咁望住前方。「但係，我亦因為咁而認識到一個，亦係惟一一個我心愛既女仔。」
「佢叫做歐陽芷翹。」
「你既雞肉牛丸清湯！」呢個時候，服務員呀姨為我遞上一碗熱辣辣既麵。
「所以，」我將碗麵推向對面既客人。「話唔定重演一次既話，呢個女仔就會再次出現。」
「做下好心，幫下我呢個忙啊，好無呀，芷翹？」我問道。
「……衰人。」芷翹與我對望著，雙眼早已變得通紅。
我企左起身，徐徐走到芷翹旁邊坐低。
「芷翹……」我伸出手拖住芷翹，然後無視場面既尷尬勁大聲講 : 「我愛你！」
我一講完，隔離個d人即刻望晒過黎。
「喂啊你做咩喎！」芷翹既眼淚開始流出黎。
佢舉起左另一隻無俾我拖住既手掩住我個口 : 「好醜怪啊，衰人！」
我隨即舉起自己另一隻手，捉實我嘴前既小手。
「你一日唔原諒我既話我就繼續講！」我拉開左芷翹隻手。「就算講到無氣我都要繼續講！」
芷翹一時間麵唔知俾咩反應我好，所以只有臉都紅晒咁俾我捉住雙手望住我。
「咁我繼續講架喇！」我深吸一啖氣，然後發出震撼性既聲音。「我愛你呀芷翹……？！」
就係我講呢句個陣，芷翹無啦啦成個人哄前，嘴唇緊緊咁與我連接住。
「……芷翹……？」呢一個咁主動既接吻動作，令我成個人變得非常滾燙。
「我…我…我廢事你亂講野咋，想阻止你但我又無手，咪…咪…咪用口囉……」芷翹側面逃避我既視線。
「芷翹呀！」我已經控制唔到自己，一野攬住左落芷翹到。
「我好掛住你呀芷翹，好對唔住呀芷翹！」我緊緊咁攬住芷翹，唔俾佢有反 抗既機會。
「我都好掛住你呀，傻仔……」芷翹攬番實我。「唔準再呃我架，知道未？」
「我保證，以後都唔會再呃我既大少姐！如果咪我就……生仔無屎忽！」
「妖！」芷翹一野推開左我。「咁咪即係要我生仔無屎忽？」
「嘻嘻！」我奸笑左一下。「乜你已經諗住嫁俾我喇？好呀好呀！」
芷翹終於意識到我句說話既trick位，於是乎鼓起泡腮咁望住我講 : 「你個衰人，岩岩先原諒你咋喎咁快就造反！？信唔信我扔你麵呀喇！？」
「扔啦！」我攤開雙手。「扔者愛也！」
芷翹聽完之後「噗茲~~~」咁笑左出黎，然後拉左碗麵過黎。「食野先啦，傻瓜。」
「嗯~~~！」我遞上一張紙巾俾芷翹，然後重新拖住佢隻手放到我大腿上。
係食緊麵既時候，我忍唔住咁成日望向芷翹。
但最好笑係我每一次望佢既時候，佢幾乎都係雙眼亮晶晶咁望番住我。
「做咩係咁望住我喎！」我食完最後一箸麵個陣望住芷翹講。
「因為……」芷翹搣一搣我塊面。「我係到諗緊，我連成件事既來龍去脈都未清楚晒原諒你，好似益左你咁姐~~~！」
我立即慌忙咁解釋番今日既事俾芷翹聽。
不過阿娜攬住我個部份就俾我改左做係m記傾計，而阿娜仲中意我呢段我更加刪除埋。
你估我真係咁想呃芷翹架咩大佬，我只係唔想世界大戰咋！
所以……原諒我啦芷翹！
「原來係咁……」芷翹若有所思咁轉一轉眼珠。「但係撞到正個下好tvb劇情囉，叫我點信！」
芷翹捏住我個鼻繼續講 : 「好講真話喇喎！」
「我每一個字都係出自真心架！」我勁重鼻音咁講。「信我啦，大少姐！」
「而且……」我搣番住芷翹塊面。「我邊到夠謄再欺騙我呢個咁體貼、咁可愛既女朋友呀？」
「哼哼，信住先你啦！」芷翹甜甜一笑。「不過你個衰人都幾好命架喎，ex同現任女朋友都係咁高質既美女！」
「哈哈……」我尷尬咁R左下頭。
我地食完野之後就拖住手行左去隔離個韆鞦。
「其實你點知我係譚仔既？」芷翹鬆開左我隻手，彈下跳下咁坐左落個韆鞦到。
「因為……我地心有靈犀囉！」我坐左係佢隔離。
「係心有靈犀既話就唔洗我坐左係裡面成個鐘啦！」芷翹開始係到fing黎fing去。
「咁即係你一早覺得我會黎？」我好奇一問。
「唔知架，」芷翹仰望天空。「但我相信你會黎。」
「芷翹，」我望住身旁呢個女仔。「好多謝你俾呢個機會我。」
「咁……都要睇你識唔識珍惜既！」芷翹莞爾一笑。「我話你聽呀，如果你岩先一黎就同我解釋既話，我一定唔會show你！」
「點知道你咁識Tum人，一黎就搞到我喊！」
「哈哈！」我都仰望天空。「我其實只係心裡面有邊一句就講邊一句出黎架咋！」
「咁即係讚自己好識溝女仔啦，司徒珞！」
「No no no！我係讚緊自己識Tum歐陽芷翹姐，哈哈！」
我地又變番從前咁串下大家，咩無聊野都講一餐，笑下笑下咁蕩住韆鞦傾計。
由於芷翹要去到31號先有得再出街既關係，我呢幾日都乖乖咁留左係屋企睇戲，然後每日就靠wtsapp傾電話同芷翹遠距離拍拖拖。
不過有樣野好好彩既就係，我同芷翹既關係無因為咁而生疏。
或者係因為，我地兩個算係識左好耐再拍拖個種情侶關係，所以唔需要話怕對方會因為無左新鮮感而離開。
而係31號個陣我同芷翹又傻左咁出左去尖沙咀逼餐死睇煙花。
不過有幸同我身邊呢個咁可愛既芷翹一齊踏入2015新一年，真係畢生無悔。
「芷翹，我愛你！」我攬住芷翹，大大聲咁講。
「我都好愛你呀，司徒珞！」芷翹好天真咁望住我。
我地相擁著，係燦爛既煙花下黎左個深情一吻。
大概，呢d就係真摰既愛情。