《妳做咩將成碗譚仔倒落我個頭上面！？》: 第十四章(下)(平安夜)

「哼哼哼……終於都到今日喇……哼哼哼……今次就用你啦！」
 
我打開高達倉庫既門……啊唔係，係衣櫃既門，係裡面抽出我既戰衣。
 
「平安夜大作戰，開始！」我雙眼發光咁望住我套英倫風格衫講。
 
無錯喇，今日就係平安夜！！
 
即係話今晚……我就會同芷翹……嘻嘻……
 




啊，各位唔好誤會，我係諗住表白架咋，無諗住失身！
 
下？你話我笑得好淫？痴線，先無d咁既事，嘻嘻~~~！
 
我梳洗換好晒衫之後對一對錶 : 下午1時28分
 
掂呀！約左芷翹兩點鐘係佢屋企樓下等，依家行過去岩岩好！
 
我照多左二十分鐘鏡之後，就跑左過去芷翹樓下。
 




「呼……呼……好彩趕得切！」我直接打俾芷翹。
 
「喂？你到左拿？」係電話裡面既芷翹睇黎都好興奮咁。
 
「係呀，依家係你樓下喇！」
 
「你依家上黎呀！我有d野要俾你睇！」
 
「下？！」究竟芷翹想俾我睇咩？唔通係佢自己！？
 




嗚呀！唔準諗呢d架司徒珞！！！
 
結果我又再一次上左去芷翹屋企。
 
「嘩，好快手喎！入黎啦入黎啦~~~」芷翹仲係著住屋企衫咁迎接我。
 
就係我岩岩除左對鞋個陣，眼前突然一黑！
 
「跟我過黎啦！」原來芷翹係我後面遮住左我對眼。
 
由於乜都睇唔到既關係，我只好乖乖地跟佢行。
 
「懶神秘咁，到未呀~~~」我雖然唔知芷翹想做咩，但係我靠記憶都估到我地應該行左入芷翹間房。
 
「得喇！」芷翹放番對手。




 
「呢個……就係所謂既驚喜？」映入我眼簾既，係芷翹個衣櫃，不過已經執到乾乾淨淨。
 
「拿，我由頭到尾都只係話有野俾你睇咋，無話驚喜~~~」芷翹走到去我面前。
 
佢繼續講 : 「我今朝晨早流流起身執左成個鐘架喇！」
 
「唔通……你就係因為我琴晚講話好亂，所以就執好佢俾我睇？」係呢個時候，我唔知邊度黎既勇氣舉高左手，然後做出左個「壁咚」動作。
 
芷翹先係俾呢一下嚇親，然後塊面變到勁紅 : 「咩喎……我先唔會對你講既野咁上心囉好無！」
 
「嘻嘻！傻妹~~~」
 
「咩喎，哼！」
 




「快d換衫出去行下啦！」
 
「但係……」
 
「但係咩？」
 
「你係到我點換衫……」
 
「唔怕啦我陪你換……嗚呀！」
 
就係咁，我俾芷翹一個side kick踢左出客廳個梳化。
 
「行得lu~~~」芷翹既聲音從後傳出，於是乎我就放低電話拎過去。
 
眼前既芷翹，真係好靚好靚！




 
佢著上左一件純白色長袖恤衫，打左條黑呔，然後著上左條黑色蛋糕短裙，配襯埋黑絲加一對紅色Dr.Ma，簡直無得輸！
 
啊唔係，係已經贏左！！！
 
芷翹見到我呆晒咁望住佢，所以叉起腰對住我講 : 「喂，做咩用埋晒d咁奇怪既眼光望住我呀，咸濕仔！」
 
「無啊……只係……你今日真係好靚啊！」
 
「哈哈，有無咁誇張呀~~~」芷翹走到去飯枱到攞起一件棗紅色既中褸，然後拎轉頭望住我。
 
「let’s go , army !」
 
「好地地講咩英文啊大少姐！」
 




「咁我地兩個今日都係英倫風，咪配合下個主題囉，哈哈！」
 
就係咁，我地開始左今日既行程。
 
本來我地去左apm行街，但係由於每日番學都會行咁濟，所以行左一陣已經好悶。
 
「不如去megabox溜冰？」係我地正苦惱緊去邊既時候芷翹無啦啦提議。
 
「都好喎！不過原來你識溜冰架，都無聽你講過既？」我問。
 
「哈哈，其實我……係未去過溜冰架！」芷翹伸一伸脷。「不過反正遲早都要學識，擇日不如就撞日！」
 
芷翹都未等我回應，就好hyper咁撓左我去megabox。
 
「喂，你得唔得架……」
 
我地入左溜冰場換好晒鞋之後，芷翹就雞手鴨腳咁企左起身，準備入去冰面。
 
「傻啦你當我係邊個！我係歐陽芷翹大少姐，呢d野邊難到我！你睇下我依家著住溜冰鞋係地下都行到啦！」
 
「大少姐……著溜冰鞋係地下係level 0黎架咋……」
 
我係後面睇住芷翹，一齊入左冰面。
 
芷翹一開始仲係扶住側邊個扶手，不過行左兩三步之後就突然放開左，仲好型咁拎轉面望住我。
 
「哈哈，都話我實得架啦，就算係level 100都無問題……」
 
「哎？！」就係芷翹好有自信咁講緊獨白既時候，佢一個唔留神竟然「線低」左，成個人向住我個方向仆埋黎！
 
「喂，小心呀！」我即刻滑前兩步接住佢。
 
「嘩……好彩咋，差d趺到變花面貓……」芷翹好似俾岩岩個下嚇左一嚇。
 
「傻妹，等你仲咁口響話溜冰唔難呀拿！」我扶住芷翹番去扶手既位置。「好彩岩先有我呢個將軍咋！如果咪你件靚靚衫實聽污糟晒！」
 
「搞錯啊淨係理我件衫，唔洗理我既！」芷翹又鬆開隻手向前走。
 
「梗係唔係啦！」我過狗衝過去芷翹身邊。「我點會唔理你呢~~~一於就等我教你溜冰啦！」
 
芷翹望住我笑左一笑 :
 
「咁就梗係要教啦，仲洗講！」
 
就係咁，我由基本功開始教芷翹溜冰。
 
「唔洗驚跌架我會扶住你！」
「雙腳一左一右咁推出去！」
「係喇，當自己係平地到『線』黎『線』去咁就得架喇！」
 
雖然中途芷翹都唔知跌底左幾多次，但由於我一直係身邊扶住佢，同埋佢自己都勁努力去學既關係……
 
芷翹離開左扶手，一步步咁依照我既教法向前行。
 
「無錯喇，keep住一左一右！」我係芷翹後面一直為佢加油。
 
「左…右…左…右……」芷翹一路唸住我既口訣，一路望住地板。
 
「芷翹……」我望住眼前既芷翹，已經走到五米遠。「你學識左喇，芷翹！」
 
芷翹聽到我講之後，即刻抬起頭黎望向後方，只見扶手已經離佢非常非常遠。
 
「我……真係學識左？！」芷翹臉上既喜悅實在難以用筆墨形容。
 
「係呀，你學識左喇！」我好開心咁走到去芷翹面前。
 
「真係架？！好yeahhhhhhhhhhhhhhhh~~~」芷翹好開心咁一野跳起左。
 
「喂！呢到冰面黎架……」我都未講完，芷翹就因為落地個一下企唔穩，成個人再次仆左落我到！
 
由於我唔夠力去承受呢一下衝突，成個人亦失平衡跌低左。
 
「嗚呀……」我同芷翹依家就堆埋一舊咁坐左係冰面上。
 
「sorry啊！阿珞你有無事呀！？」芷翹勁擔心咁講。
 
「跌落地下呢野就無事既……」我抬起頭黎望住芷翹。「不過呢……你咁重仲成個人壓左係我上面，就真係有事喇，哈哈！」
 
呢個時候芷翹先發現原來自己正正壓左係我上面。
 
「我…我……」芷翹紅都臉晒咁同我對望住。
 
「芷翹呀……」
 
「嗯？」
 
「不如起身先，我個patpat好q凍……」
 
「……衰人！」
 
我地溜多左一陣之後就走左。
 
「溜冰真係好好玩呀！」芷翹成個小朋友咁望住我講。
 
「車，」我勁輕挑咁講 : 「我今日落足心機咁教人溜冰，點知仲要俾人一野壓落黎，真係唔方唔好玩喇！」
 
「我壓落你到個下真係好痛架？」芷翹雙眼水汪汪咁講。
 
「er……」望落芷翹好似好內疚咁。「其實唔痛架，我講下笑架咋！」
 
「哦，乜原來唔痛架！？」芷翹一野搣落我塊面到。「點解會唔痛架，仲諗住個下可以一野紮死你個衰人添！」
 
「點解我係衰人喎！」
 
「因為有人唔珍惜機會！哼！」
 
「機會？咩機會？」
 
「哼，唔答你呀，衰人！」
 
我地打打鬧鬧咁一直係megabox裡面個ikea行街。
 
其間我地一直都撓住手行，而且見到d乜野都會攞黎玩一餐。
 
「哈哈，呢隻毛公仔好醜呀，同你有得揮喎司徒先生！」
「我就係萬獸之王！」我戴住頂獅子帽。
「哈哈低能！」芷翹笑得不亦樂乎。
 
就係咁，我地玩下笑下就到左食晚飯既時間。
 
「成六點鐘喇喎大少姐，係咪去吉野家打邊爐？」我問。「如果係既話，我記得二樓有吉野家……」
 
「等等！」芷翹打斷左我既說話。「無錯係要去吉野家打邊爐，不過唔係呢到！」
 
「下！？」
 
「我地去，尖  沙  咀！」
 
由尖沙咀月台一出去，人山人海既場面已經搞到所有出口都水泄不通。
 
「雖然我本身都諗住同你黎尖沙咀，之但係我打算食完野先黎架麻！」我一路架起手擋住d途人撞到芷翹，一路講。
 
「哈哈……」芷翹一臉苦笑。
 
「你唔好同我講，你無諗過呢個方案下話！」我沒好氣道。
 
「哈哈……一時興奮得濟，無諗過原來可以食完野先黎，哈哈……」芷翹一臉歉意咁講。
 
望住佢呢個咁可愛既樣，真係咩怒火都即刻收晒皮。
 
「不過其實早d黎都好既……咪當早d感受下過節氣氛囉，係咪先！」我臉紅咁解釋。
 
「多謝你，司徒先生！」芷翹拎轉過黎望住我，會心微笑左一下。
 
就係唔知幾耐之後，我同芷翹終於逼到佢吉野家。
 
「嘩，痴線，真係多人到呢。」我地上左吉野家等左勁耐先搵到位。
 
「咁係咪唔滿意先！」芷翹扮嬲咁講。
 
Er……又好似係真嬲。
 
「點會呢點會呢！」我慌忙叫芷翹坐低睇位。「等將軍我去買野食得架喇，大少姐你就稍事休息一下，微臣好快就會呈上食物！」
 
我講完之後一個箭步就去左排隊。
 
又係等左唔知幾耐之後，我終於都買左兩個粉絲竹輪煲番去。
 
「等左好耐喇大少姐？食物到喇~~~」當我又係到賣緊口乖既時候，芷翹突然間雙眼發光咁望住我。
 
「珞！我地快d食喇，就夠鐘！」佢勁快手咁幫我擺低左d食物，然後叫人黎開火。
 
「下？去邊到？」我一臉不解。
 
「就係……呢個！」芷翹按左一按手機屏幕，然後遞過黎俾我睇。
 
屏幕裡開住一個電影app，上面寫住 :
  
        「即係點？」
 
        「即係去睇戲呀，傻仔！」
 
        「咁……即係邊套……？」
 
        「霍金：愛的方程式！」
 
        「喔！完來係呢套，d人話好好睇架！」
 
        「哈哈，搞錯呀，英文都唔識睇，虧你仲夠膽著英倫風既衫！」
 
        「咩喎！咁我英文真係差啊麻……」
 
        「哈哈，快d食野啦傻仔！」呢個時候火煱已經滾起黎。
 
        就係咁，我同芷翹勁chur咁食晒個火煱，而且佢有大半份肥牛都係由我食晒！
 
        「大少姐……你食唔晒俾我食唔係一個問題，但係你要我極速食晒佢呢下就真係好攞命！」我撐住肚皮咁講。
 
        「嘻嘻，咁就夠鐘啊麻，廢事遅左入場啦係咪先！」芷翹睇起黎完全係對我呢個飽到就爆既肚”I don’t fucking care”，淨係一路撓住我隻手跑去戲院。
 
        我地入到戲院之後好快買左飛，然後等待入場。
 
        「依家先8:23分咋，岩先行過黎都唔會遲啦，仲要跑！」我已經feel到一陣陣既搞肚痛既意識。「可能岩先食太飽，所以……依家有d急屎，哈哈！」
 
        「真係架？！」芷翹露出一臉唔好意思既樣。「不如你依家去左先啦，廢事一陣睇睇下要去！」
 
        「又好姐！」我放低左個袋俾芷翹保管，然後就朝夕陽，啊唔係，朝廁所奔去。
 
        「%$^$%&%^#%!#!......」一陣暢快既痾屎聲。
 
        「嗚呀！爽呀！」我坐左係馬桶上面講。
 
        「話時話，今晚我應該點樣向芷翹開口先岩呢？應該係咩場合講先無走雞呢？」我一路係到諗，個腦一路係到自我補原d表白畫面。
 
        諗下諗下，個腦就浮現左一段段今日同芷翹一齊既溫暖畫面，就好似係上佢屋企、一齊去溜冰、周圍行街，又或者係去吉野家chur邊爐。
 
        「嘻嘻~~~芷翹呀芷翹~~~」我好似食左毒品咁精神失晒常，係個廁格裡面傻笑之餘仲要係到自言自語。
 
        出番去大堂既位置，我就見到芷翹坐左係側邊一張凳到，而且手上仲揸住一杯汽水同一杯爆谷。
 
        「你去左火星個洗手間啊，搞咁耐架！」芷翹見到我行過黎，就笑住咁講。
 
        「咦，你又知既？唔通……你跟蹤我去廁所？！」
 
        屌，唔通要我同芷翹講我岩先掛住係廁格裡面諗作戰計劃諗到天荒地老咩！
 
        「妖，好核突呀你！」芷翹遞番我個袋俾我。「行啦，開場喇！」
 
        我地入左去影院裡面坐低左。
 
        「芷翹啊，其實得一杯汽水係發生咩事呢？」
 
        「咁岩先食得咁飽，無理由仲買二人餐架麻，d爆谷夠塞爆你同我個肚有突！」
 
        芷翹繼續講 : 「所以我咪買個單人餐算囉！而且……一齊飲同一杯汽水唔好咩！」
 
        哈哈，仲要淨係攞一枝飲管~~~芷翹我愛你！
 
        「梗係好啦！」我笑得勁開心咁講。
 
        突然間，影院開始變暗，而出面個熒幕都開始收窄。
 
        「開始喇開始喇！」芷翹完全無視我，雙眼發光咁望實個熒幕。
 
        先係到講解一下呢套「霍金：愛的方程式」。
 
        故事講述著名科學家「霍金」係年青既時候同佢老婆邂逅於劍橋大學，繼而譜出戀曲，愛得火熱。
 
好可惜天意弄人，霍金在21歲既時候竟然被診斷出罹患俗稱「漸凍人症」既肌萎縮性脊髓側索硬化症 (ALS)，健康將每況愈下。
 
但呢個時候霍金老婆並沒有捨棄霍金而去，反而好堅定咁要同霍金長相廝守。
 
最後霍金憑住老婆既愛，決心勇敢面對病魔，積極渡過佢既人生，最終成為傑出既科學家。
 
套戲一開始除左有d笑位之外，好多時候都重點描寫霍金同佢老婆相愛既羈絆。
 
芷翹係睇呢d畫面既時候，經常都不自覺咁露出甜絲絲既笑容。
 
之但係當劇情急轉直下，講到霍金被診斷出有病，而佢同佢老婆之間即將面臨一個又一個考驗既時候，我同芷翹竟然都喊起上黎。
 
去到電影既最後，霍金同佢老婆講出一段又一段既愛情獨白，並透過獨白表達出佢地對對方深厚既感情，縱使排除萬難都要永遠係埋一齊既堅定決心，實在令人感動，為之催淚。
       
        芷翹從後半場開始，眼睛一直都處於濕潤狀態，眼淚周不時仲會流出黎。
 
        望住旁邊呢個芷翹，我不知幾想一野攬落去！
 
        結果，我淨係遞左幾張紙巾俾佢。
 
        咩姐……我先唔係淆底！我只係……廢事阻住芷翹睇戲之麻！
       
        「頭先你有無留心聽到霍金老婆既真情剖白啊？真係好感動，聽到我打晒冷震，係咁喊！」
 
        睇完戲之後，我同芷翹係後門行番出行人路，而芷翹就一路抒發自己感受。
 
        等佢將心中所想講晒出黎之後，我就哄個頭埋佢塊面到講 : 「雖然我都喊左出黎，之但係……你洗唔洗喊得咁誇張呀，對眼腫晒喇！」
 
        芷翹勁驚訝咁攞部電話出黎照自己，然後谷起泡腮咁講 : 「咁…咁…咁真係好感動呀麻！我呢d叫做感性，唔似得你咁冷血！」
 
        「我都有份喊架喎大少姐！」
 
        「喊唔夠！」
 
        「咁……依家喊番囉！」我雙手揉眼咁係到扮喊。「嗚嗚嗚~~~」
 
        「食屎啦，仲笑我，衰人！」芷翹又係咁搣我塊面。
 
        我地跟住人流既方向，慢慢咁行左去碼頭既位置。
 
        「嘩，真係好多人！」芷翹係人海之中係咁「吉」高對腳周圍望。
 
        「今日平安夜喎大少姐，想唔多人都唔得啦！」
 
        「chur，我夠知囉洗你講！」芷翹撓番住我隻手。「呢到咁多人，記住睇實我啊！一陣間我同你失散左既話就惟你是問！」
 
        「你都識講同我失散左啦，又點搵惟我是問！哈哈~~~嗚啊痛呀不要搣……」
 
        我地一路逼一路逼，愎慢咁走入去鐘樓既位置。
 
        其間芷翹成人俾人撞親，所以我係咁拉佢埋黎自己到，又架起隻右手去擋d人。
 
        「啊對唔住，」一個路人又撞親芷翹，都唔知佢地真係唔少心撞親呀定抑或係想抽芷翹水。
 
        「妖，睇路啦！」我一句車落去條友到，只見佢勁淆青咁走左。
 
        「算啦，我諗佢地都係唔少心架姐。」芷翹係我身邊安撫我。
 
        芷翹呀芷翹，你身為天使就梗係不識人間煙火啦，世途好險惡架！
 
        無錯！我要保護芷翹！呢個就係將軍既責任！
 
        我一野扯左芷翹去我前面，然後雙手晾係佢雙肩上，就好似情侶後抱式既動作。
 
        「咁樣既話，就唔會再有人可以撞到你架喇，哈哈哈！」我勁hyper咁講。「要撞歐陽芷翹？問過我司徒珞大將軍先啦！」
 
        「傻瓜。」由於芷翹係我前面而我又攬住左佢，所以我唔知佢係咩表情。
 
        不過就咁聽落，芷翹既聲線非常溫柔，而且帶住濃濃既蜜意。
 
        我抬頭望一望鐘樓既時間，原來依家已經11點半。
 
        我地維持住「我係後面攬住芷翹，而佢就捉番實我雙手」既姿勢，行左去一個稍為空曠既位置，大概就係4號碼頭附近。
 
        「終於唔洗屎忽撞屎忽喇！」我從後將個頭挨落去芷翹右肩上。
 
        「喂，你睇下個邊，」芷翹用手指住碼頭前面一個攞住結你唱緊歌既男仔。
 
        我地分番開，然後芷翹撓住我隻行過去。
 
        眼前呢個男仔，睇落應該同我差唔多歲數，不過聲音就非常溫柔動聽，令人聽完之後有一種安逸既感覺。
 
        係個男仔彈唱完幾首英文情歌之後，芷翹突然同我講 : 「其實男仔識彈住結他唱歌真係好有型！如果第時我既男朋友可以望住我自彈自唱就好lu~~~」
 
        WTF？芷翹你唔係同緊我講掛，我唱歌難聽不特止，音樂造詣簡直係零！啊唔係，係負數先岩！唔好話彈結他，玩三角鈴都會撻Q！
 
        「係咩，哈哈…哈哈……」我試圖避開呢個如此恐怖既話題。
 
        「今日係平安夜，希望所有情侶都能夠共渡呢個佳節。」就係呢個時候，個位結他男仔開口。
 
        「以下落黎送俾各位情侶既歌係陳奕迅既，天下無雙。」
 
        隨住結他既獨奏，男子一句句唱出動人既歌聲 :        無錯，芷翹就係我既「無雙」。
 
        我望住身邊既芷翹，呢個如此美麗動人、如此溫暖我心既芷翹，我就知道佢會成為我終生都想奔向既人。
 
「芷翹。」
 
「嗯？」芷翹拎左過黎同我對望住。
 
我捉實左佢雙手，然後向住佢踏前一步。
 
        「做……咩……」芷翹臉上早已變得通紅。
 
        「芷翹，咁耐以黎好多謝你。」我舉起芷翹既雙手，按左係我心口前面。
 
        「仲記得一開始識你既時候，我因為成日覺得你好似阿娜，所以有意無意之間總會向你發脾氣，有時對你忽冷忽熱不特止，仲會好想避開你。」
 
        「咁係因為，我唔知、唔識點樣去面對你。」
 
        「但去到後來，我終於開始真正咁認識到歐陽芷翹呢個傻妹。」
 
「佢係一個好中意串我、搣我，但其實好了解我、好尊重我既女仔 ; 佢亦都係一個口不對心，但其實清楚知道自己心意既女仔 ; 佢仲係一個傻頭傻腦、缺點多多，但總係好努力咁去做每一件事既女仔。」
 
「而且最重要既係，」
 
「歐陽芷翹係一個特別、唔係阿娜影子既女仔。」
 
「你進入左我既生活、我既心扉裡面，逐漸咁將我由回憶之中抽出黎。」
 
「以前，我每日既生活就只係得食訓玩，成個人就好似只剩下一個軀殼咁，行屍走肉 ; 但自從你出現之後，我既生活泛起左一點又一點既浪花。」
 
「每一日同你打打鬧鬧，不知不覺間已經成為左我最開心、最期待既時間。如果有朝一日失去左你呢個咁可愛既傻妹既話，我真係唔敢想像自己又要番去個個黑色既頹廢世界。」
 
「所以，我好多謝你一直以黎對我不離不棄，令我既生命重新變番做彩色。」
 
「歐陽芷翹，我愛你。」
 
「我好希望你可以永遠留係我身邊，繼續串我、繼續搣我、繼續體諒我、繼續照顧我。」
 
「所以，」
 
「做我女朋友啊，好無？」
 
芷翹一路聽我講，本來已經乾透既眼睛再次濕潤起黎。
 
「司徒珞，你個衰人……」芷翹垂下頭，哽咽既聲音早已蓋過佢既說話。
 
「芷翹，你講咩話？」我問。
 
「我話呀！」芷翹呢個時候抬起頭黎，嘴角早已隨我既說話而上揚起黎。
 
「死人司徒珞，你唔好再遲d先講？」芷翹笑得非常燦爛。「之前咁多次機會，你都唔同我表白！」
 
「咁……呢d野要睇timing架麻……」我唔好意思咁講。
 
        「咁上次係屋企乜你唔岩feel咩！」芷翹扮嬲咁講，但淚水卻一直落下不止。
 
 
「其實個下我有後悔架！我勁後悔做咩唔錫你……」講講下，我都臉紅起上黎。
 
「後悔有咩用喎，係後悔既咪去補償囉！」芷翹反過來將我雙手捉得更緊。
 
「下？」我唔係好明。
 
「即係話呀！」芷翹既臉紅得好可愛。「即係叫你，補番個一吻啊……」
 
「之但係你都仲未答我，我又點可以錫喎……」我fing一fing芷翹雙手。
 
「咁……」我裝上一臉正經。「未知大少姐意下如何，能否批准微臣我擺脫將軍呢個污名，成為你既附馬？」
 
芷翹會心微笑左一下，然後強忍笑意，裝作正經咁講 :
 
「咳咳，本少姐~~~」
 
「批准<3」
 
芷翹一講完之後，我就將佢一野擁入懷內。
 
「yeahhhhhhh！我係附馬喇！有得錫公主喇！」我勁開心咁攬實芷翹。
 
「傻瓜，你不嬲都有得鍚架啦，係你唔鍚咋喎！」芷翹再也忍不住佢既笑容，亦緊緊咁攬番住我。
 
「既然係咁……」我輕輕力推開芷翹，然後額頭貼住佢額頭。「不如……依家補番？」
 
「哼，鬼有人想俾你鍚啊，衰人……」芷翹好甜蜜咁講。
 
我慢慢咁將嘴唇靠近芷翹，而芷翹則徐徐閉上眼睛。
 
「啜。」
 
係接上既一瞬間，我感受到芷翹既嘴唇非常柔軟而且富有彈性，就好似甜甜既綿花糖般，滋潤我既心靈。
 
呢一個觸電既吻，代表住我地彼此間一直既愛意，亦係我對芷翹以後既承諾。
 
「後生仔，愛一個人既話，就要令到佢無時無刻都笑。呢個既係你既責任，亦係你對佢最重要既承諾。」
 
無錯，從今以後，我都要令芷翹笑，唔可以令佢為我而傷心。
 
我地雙唇緊緊貼合住，久久不能分開。
 
唔知過左幾耐之後，我地終於有共識咁分番開。
 
「傻仔……依家俾你錫番喇，開心啦？」芷翹怕羞咁講。
 
「哈哈~~~！」我笑得不亦樂乎。「開心就開心喇，不過仲未夠喉囉！」
 
「嘩，得寸進尺？！果然係咸濕仔……」
 
「十！……九！……八！……」芷翹既說話突然被其他人既叫喊聲蓋過。
 
「倒數喇！」我捉實芷翹雙手。「一齊數呀，六！……五！……」
 
「三！……」芷翹雙眼同我緊緊對望住。「二！……一！……」
 
「聖誕快樂！~~~」全場既人一齊叫左出黎，而伴隨既係一堆堆既笑聲。
 
「芷翹，我愛你。」
 
「阿珞，我都好愛你。」
 
我地再一次接吻起黎，而且仲要彼此伸脷到大家既口中，黎個口水交融。
 
呢一吻，非常溫暖、非常窩心。
 
「終於都番到黎觀塘喇！」芷翹係落巴士之後吸左啖大氣。「番黎用左有無2個鐘呢？好似唔止，有2個半鐘！」
 
「咁……俾多d時間我地拍拖唔好咩，女朋友！」我一手拖住芷翹既右手。
 
「好實好架！但係都可以唔係車上面拍架麻！」芷翹笑住咁講。
 
的確，係車到真係無咩好做，我地岩先仲要攰到挨埋一舊訓著左。
 
不過一路訓一路聞住芷翹身上既香水百合，都係一件賞心樂事，哈哈！
 
我地兩個拖住手，慢慢咁行到去芷翹樓下。
 
「到喇喎男朋友！」芷翹跳左係我面前。
 
「係囉，咁就到喇？好唔捨得你啊~~~」我撤嬌咁講，然後上前攬住芷翹。
 
「傻仔，聽日咪有得見囉！」
 
「係喎！過埋聽日25號你先要係屋企坐監！」
 
「哈哈~~~咩形容詞黎架！」芷翹串我咁講。「不過聽日晏少少先出黎！因為……早起身我會好攰！」
 
「得啦，大少姐點話點好！」
 
「咁就乖喇，附馬！」
 
「傻妹~~~<3」如果可以既話，我真係想一直攬住芷翹唔放。
 
「好喇~~~我要走喇，我媽咪仲未訓係上面等緊我！」芷翹指一指隻手錶，嘩，原來成3點鐘。
 
「好啦咁……聽日見喇傻妹！！！」
 
我輕輕向前一伸，吻了芷翹一下。
 
「chur！肉麻到死！」芷翹笑得非常可愛。
 
「呢d叫goodbye kiss！」我裝作正經咁講。
 
「咁你番到去就wtsapp我啦！」芷翹一句說話之後，就轉身走左入屋苑。
 
「嗚哇！我得左喇！unbelievable！！！」我勁開心咁喪係街到大叫。
 
係呢個時候，電話忽然響起。
 
我打開屏幕望一望，係一個我未見過既number。
 
「咁夜既，邊個打黎？」我隨意按下接電鍵，然後放在右耳邊。「喂~~~」
 
「……喂？阿珞？」
 
我既心跳好似停頓左一樣，周遭所有事物亦伴隨我既感覺而逐漸變得緩慢。
 
「......阿娜？」
 






『愛一個人既話，就要令到佢無時無刻都笑。呢個既係你既責任，亦係你對佢最重要既承諾。』
 
*******************************************************************