《妳做咩將成碗譚仔倒落我個頭上面！？》: 第十四章(中)
時間一跳，就到左聖誕假前既一個星期日。
過埋星期一既聖誕聯歡會，同埋星期二既聖誕暖流 (大家可以當係「藝墟」，即係好多攤位食野買野個d) 之後，就係放假喇！
之後星期五就係23號，去ball既大日子！
再之後就係24號平安夜……我表白既好時機，哈哈哈！
啊講番今日先，由於聖誕暖流同去ball都要買衫既關係，我今日就約左芷翹出黎行街睇衫。
「去邊到睇衫好呢？」芷翹係我身邊問，而撓住我隻手呢個動作仿佛已經成為獨處時大家既習慣，亦係彼此既默契。
「不如去九龍塘又一城啊！又多名牌店又夠大，之後仲可以搭車去沙田繼續行，然後去食姨媽傢俬！」我提議。
哈哈，其實我一早就諗定呢條路線架喇，因為我好想食肉丸！
「好啊好啊我想食肉丸！」芷翹一聽到去姨媽傢俬食野，就即勁興奮。
「我想係喎咁岩既！」我都勁興奮。
「哈哈，結果今日出黎既目的好似變左食肉丸！」芷翹伸一伸脷。
「有乜所謂姐，出發！」
就係咁，我同芷翹就先去左九龍塘行街，然後再搭車去沙田，不停穿梭於各大牌子既店舖之中。
「呢件好唔好睇啊？」
「呢隻色岩唔岩我啊？」
「呢件衫襯呢件外套呢？」
「呢條裙好似好短咁啊嗚！」
我地成個下晝以黎，都唔知講過上面呢d句子幾多次，哈哈！
「刷嚓~~~！」一個趟簾被拉開既聲音，芷翹由試身室徐徐咁行左出黎。
眼前既芷翹，穿上左一件黑色既低胸露肩晚裝裙，頸上帶住一條晶瑩剔透既項鍊。
晚裝裙上配有一條幼身既束腰帶，將佢上半身既完美線形show晒出黎 ; 而呢條裙既長度僅僅長過雙手下垂時既大腿位置，所以亦將芷翹白滑既長腿表露無遺 ; 加上芷翹將頭髮紮成一個髻，看起上黎更加pure、更顯動人。
芷翹真係好靚好靚，就猶如天使下凡般，令我呢個平凡人看得個目瞪口呆，一時間比唔到反應。
「係咪唔好睇啊？」芷翹怕羞咁打量自己，繼續講 : 「我始終都係覺得條裙短左少少姐……」
我未等芷翹講完，就行到去佢面前，雙手繞到佢條腰後面環抱住佢，然後拉佢埋黎我到。
芷翹無預到我會抱佢條腰仲要拉埋黎，所以一開始勁驚訝。
不過當我拉左芷翹埋黎之後，佢就抬起頭望住我，然後臉上展現出點點既蜜意。
依家我同芷翹就係一間名牌店既試身室門口到痴埋一舊。
哈哈，不過我先唔理咁多！
「你……你做咩姐！」芷翹俾我拉左埋黎之後，雙手唔知放邊好，所以就用黎搣我塊面。
「因為你太吸引喇，所以我實在係忍唔住，哈哈！」我無視住芷翹搣我，將佢拉得更埋。
「咸濕仔你唔準低頭望我啊！依家同你咁近，你一低頭望就咩都俾你睇蝕晒！」芷翹講完之後，就放番開雙手唔搣我。
之不過！佢竟然唔係垂低番雙手，而係雙手跨過我條頸，然後「晾」係我雙肩上面。
簡單d講，我地依家既動作就係咁 :
「咁……即係靚定唔靚姐……？」芷翹既語氣變到勁可愛，搞到我好想…好想…好想！
好想d咩，自己諗啦！
「靚！超靚！我諗世上無人夠你靚！」我哄個頭埋佢芷翹到，額頭掂額頭咁講。
「嘻~！把口浪過油啦你！」芷翹笑得好甜、好甜。
我地對望住，不知不覺間彼此既嘴唇越貼越近。
「先生…小姐…！」
突然間，一個職員叫停左我地！
我同芷翹又即刻彈番開，然後一齊講 : 「sorry啊sorry！」
結果芷翹就決定買呢條裙，而我就因為屋企有西裝既關係唔洗買，淨係買左d暖流著既便服。
我右手幫芷翹攞住d衫袋，左手就俾芷翹撓住咁行去新城市中心既姨媽傢俬食野。
「嗚……好肚餓啊……」芷翹成個細路仔咁係到撒嬌。
「就行到去架喇，前面就係！你要頂住啊大小姐！」我扮到好似生離死別咁講。
「我唔得架喇，以後既野就拜託你喇，將軍！」芷翹又同我玩埋一份。
「車，淨係將軍咋！？起碼都駙馬啦！」我裝嬲咁講。
「你就想喇，雜卒！」
我地打打鬧鬧咁，就去到姨媽食肉丸。
食完之後，我就送番芷翹去佢樓下條馬路。
「司徙珞先生！」
係講左byebye之後，芷翹無啦啦叫停左我。
「做咩呀，咁快掛住我喇？」我係對面馬路喊過去。
「如果呢……」芷翹欲言又止。
「如果咩呀？」我繼續大喊。
「我話呀如果！」芷翹都大喊。
「如果，」佢繼續講 : 「如果你想做駙馬既話，記住提親呀！」
佢講完之後，完全無等我覆佢就拎轉身走左。
我呆左咁企係馬路既一端。
「我愛你呀歐陽芷翹！！！」
唔知隔左幾耐，我先突然意識過黎，然後對住芷翹所住既屋苑大喊。
雖然我唔知芷翹聽唔聽到，
但係總有一日，我會親口向你講呢番說話。
我一定會向你提親架，等我啊芷翹！
「你我繼續繼續跳舞~~~眼裡閃光將我升高~~~我報以甜笑來控訴~~~不應 一杯醉倒，Wu Wo E Ho~~~！」
屌，聖誕聯歡會姐，邊撚個揀首Club歌黎播呀仆街！
唔知道每間學校既聯歡會係咪都係一樣架呢，就係播歌食野玩遊戲。
「嘩屌，邊個咁撚識揀，呢首歌正呀喂！」蛋撻係到聞歌起舞，但其實咪即係係到un下un下咁，都唔知佢做乜鳩。
我一於少理，自己行左去班房中間d枱到食野。
隨住d自拍神棍出晒黎，就意味住今日既聯歡會差不多接近尾聲。
行左出去走廊既石壆，俯視著操場正係到奔跑追逐既中一生。
「中五咁就過左一半喇，好快啊可？」蛋撻徐徐咁係班房行出黎，挨左係我旁邊既石壆到。
佢嘆左一口氣之後繼續講 : 「好多野眨下眼就變成左過去。」
「望下樓下跑緊個班中一生，想當年我同你咪又係咁樣嬉嬉戲戲又一日。依家眨下眼，低form既日子已經變成過去。」
「再諗下form 3 form4既時光，原來眨下眼又已經過左年半有多。」
蛋撻講呢句到既時候，我既腦海裡面忽然浮現出一個久違既臉孔。
係喇，講起上黎，原來阿娜離我左我已經有一年多。
由當初接受不了，世界仿佛變到黑白色，每日只懂混混噩噩地渡過 ;
去到芷翹既出現，震盪我既生活，令我再次感受到一點浪花 ;
再去到最後，芷翹徹底佔據左我既生命，成為我最重要既女人。
呢一步步既過程，並非一朝一夕可以做到，而係需要每一日既悉心灌溉，先可以改變人既思想。
諗到呢到，我先赫然發覺，原來芷翹已經係我身陪伴左我半年。
係我最頹喪、最旁惶無助既日子裡面，都係全靠芷翹，我先可以捱過去。
「柳暗花明又一村」，我知道呢一個否極泰來既機會真係好難得。
我諗，呢個如此可愛、如此刁蠻、如此溫柔、如此率直、如此爽朗……
最重要係我如此深愛既芷翹，一定係天上賜俾我既最大禮物。
無錯，我一定要好好咁照顧佢。
「無錯，時間真係過得好快，所以人更加應該要學會放下過去，勇於捉緊未來。」我仰望天空一處飄散既白雲。
「睇黎，我地既阿珞終於大個仔喇。」蛋撻搭住我既膊頭。
「蛋撻啊，」
「咩？」
「你可唔可以行開d啊，你跳完舞流晒汗咁，好撚臭。」
「……屌。」
聯歡會终於都完左，大家都紛紛離開學校，盡情使用餘下既晏晝時間，唱k既去唱k，打機既去打機。
我無跟到蛋撻仲有同班既frd去唱k，反而係繼續留係班房，自己一個人坐下，享受寧靜既一刻。
唔知大家有無試過成個班房得番自己一個，然後仰望窗外景色，細聽操場傳黎既笑聲、打波聲呢？
個種豁然開朗既心靈治癒，實在難以用筆墨形容。
我坐左係班房中央，合上雙眼，挨住椅背，感受身邊既一切。
「喂！」
突然間，一把好似用左擴音器咁強大既女聲由我右耳傳黎！
「嘩！」由於我本身完全feel唔到有人係我身邊既關係，我俾呢把聲嚇到彈左起身。
我一望過去聲音傳黎既方向，就發現有個傻左既芷翹笑到碌左落地下。
「哈哈哈~~~」芷翹雙手捉實椅背，去支撐個個笑到無力既自己企番起身。
「你個衰妹嚇我？！」我扮到好嬲咁行埋去。
「嘩嘩嘩你想做咩呀，我喊非禮架！」芷翹仲係笑得好開心咁講。
「嘻嘻嘻…你喊破喉嚨都唔會有人黎救你架喇，受死啦！」我一個箭步踏上前，然後一野吱落芷翹條腰。
「喂啊奸矛啊又吱！……唔好啊哈哈哈好痕呀~~~<3」芷翹俾我搞到就黎笑到斷氣。
芷翹無啦啦將雙手放係我條腰上面，然後講 : 「唔準再吱啊！如果咪我就吱番你！」
「哈哈哈，我呢個大魔王先唔怕吱……」
都未講完，芷翹就吱左我一下。
「嘩哈哈哈我投降！唔好吱！」我舉起雙手咁講。
「咁就乖喇！」芷翹笑住講。
「好啦，見你咁乖……」芷翹繼續講 : 「我就獎勵下你啦！」
芷翹講完之後，就將放係我腰上既雙手向前伸，然後成個人貼實我，就好似攬枕頭咁攬住我。
「喂……你做咩呀……」我一時間俾芷翹呢個舉動搞到心跳加速，口都窒埋咁講。
「獎勵你囉！乜你唔中意咩？咁唔攬囉！」芷翹準備放鬆番雙手。
「唔好呀我好中意！」我一野攬番落芷翹到。
「嘻嘻~~~」芷翹係我懷抱中笑得勁甜。
攬到夠之後，我地就分番開，一齊坐左係課室中央個排凳到。
「做咩你仲唔走既，又話約左你個班d人去燒野食？」我問芷翹。
「係啊！不過佢地話下晝3點先要去觀塘地鐵站集合，咁我見仲有時間，屋企又咁近，咪諗住……上黎睇下你係唔係到，然後先番歸換衫囉！」芷翹望一望我，然後即刻望番住黑板。
「咁即係……」我哄過去芷翹耳邊細細聲講 : 「你掛住我？」
「妖，食屎啦！」芷翹紅都臉晒咁搣我塊面。
「嗚啊哦啊…….」我俾芷翹搣緊既時候連講都講唔到野。
「哈哈，智障！」芷翹又好似以前咁係到串我。
「但係你掛住一個智障！」
「我無囉！」
「咁你上黎做咩！」
「我……上黎睇智障！就好似去動物園睇馬騮咁！」
「啊你個衰妹呀！」
「嗚呀又吱~~~！」
芷翹你呢個傻妹，叫我點樣唔愛你！！！
「我係呢到宣佈，聖誕暖流正式開始！大家盡情去玩啦！！！」
隨住學生會會長主持既開幕禮禮成之後，今年既聖誕暖流終於都要開始喇！
知唔知道點解我會咁興奮？
因為所謂既聖誕暖流講白d其實就係一場比賽！一場鬥靚鬥多既比賽！
鬥靚，就係鬥著衫靚！
因為今日每個人都可以著便服，所以好多靚仔靚女，甚至係平日唔顯眼既小僂儸，都會把握機會突出自己，改變自己係人地心目中既形象，甚至係黎個谷底反彈，絕地翻身！
鬥多，就係鬥食野多！
暖流期間會有好多個食物攤位擺放係學校各處，而且種類繁多，就好似係菠蘿腸仔、生菜魚肉、冬甩等等，應有盡有！
可惜所有食物都係有限量供應，所以身為學生既我地就要制定最短既排隊路線，去食最多既野！
哈哈哈，衰d講句，聖誕暖流就係一個爭明鬥艷、弱肉強食既社會縮影！
天外之聲音 : 屌，主角呀主角，你係咪諗多左呢？其他人只係當今日係holiday架咋！
阿珞 : 屌！你呢個唔知邊到黎既天外之聲音，識條撚！
為左呢個一年一度既大日子，我特登係同芷翹出街買ball衫個日買左一件深藍色既中褸，配合埋對Dr.Ma，簡直係將我「藝術王子」呢個名完全投射左出黎呀！
我入左廁所照一照鏡。
我望住鏡中超帥既自己，暗爽咁講 : 「掂呀！斯文得黎又有點敗類，不羈放縱得黎又有點愛自由！」
一走出去廁所，就見到蛋撻經過。
「蛋撻，let’s go！」我一野衝過去箍住佢條頸。
「屌，鑊撚鑊都係咁，一到暖流就好似傻撚左咁！」蛋撻勁唔情願咁講，但始終都係死死地氣陪我周圍排隊搵野食。
好啦各位讀者，其實我今日咁開心既原因並唔係上面呢d。
又或者應該係話，唔只上面呢d。
今年，多左一樣野令我好興奮。
呢樣野就係……
芷翹今年有份搞攤位呀！！！
我拉左蛋撻去一個賣生菜肉魚既攤位。
一路排隊，一路就聽到前後既學生係到講 :
「嘩，從前有雞排妹賣雞扒，家陣有生菜魚肉妹賣生菜肉魚！」
「之但係雞扒妹係賣雞扒架咩？」
「屌，撚知咩！繼續昅女啦！」
望住呢條水蛇春咁長既隊裡面，有絕大部分既人都係為左一睹盧山真面目，我就知道賣緊魚肉既芷翹係幾大吸引力。
眺望遠處正係到工作既芷翹好努力咁係到售賣緊產品同埋收錢找錢，忙到係呢個凍冰冰既天氣下都滿頭大汗，都真係幾替芷翹心痛。
「多謝惠顧！下一位請上前……」
芷翹招呼完前一位客人之後，轉身準備繼續收錢，點知就見到我同蛋撻兩個。
「唔該小姐，我要一杯多菜少肉！」蛋撻唔知係咪玩野，突野刁難芷翹。
我一個鬆踭鋤落蛋撻到，佢當堂臉容扭曲。
「哈哈……sorry啊嫂，我淨係要個杯得喇……」蛋撻左手抱肚，右手舉起隻手指公講。
「你地兩個黎搞搞陣下話！？」芷翹撓起雙手咁講。
「梗係唔係啦，我黎幫襯你架，生菜魚肉妹~~~」我攞左兩張代用券出黎遞俾芷翹。
只見芷翹被我戲弄到臉紅起上黎，然後嬲爆爆咁接過我d券。
「拿！你既生菜魚肉仲有你朋友個空杯！」芷翹一野隊左兩杯野過黎俾我。
芷翹勉強裝出一個笑容可掬既樣繼續講 : 「唔知道仲有咩想要呢司徒珞先生？如果無既話就呢邊走啦，多謝惠顧！」
「有啊！」我遞左一張摺合左既紙俾芷翹，然後講 : 「司徒珞先生希望將呢樣野交俾歐陽芷翹小姐，麻煩你幫佢轉交啦，拜拜！」
我講完之後，頭也不回咁就推左蛋撻離開現場。
由於我知道芷翹呢日一定都會好忙唔得閑食野同應酬我，所以我專登去晒唔同攤位買晒各式各樣既食物，然後等待放學既時間攞俾芷翹食。
「鈴鈴~~~」
等左咁耐，終於都放學！
雖然我一直係暗處偷望芷翹做野個認真樣其實都幾爽，哈哈！
「大家今日做得好好呀，辛苦晒，yeah~~~！」芷翹同佢班同學執好手尾之後，就行左出黎操場中間係到左望右望，好似搵緊人咁。
「傻妹！」我特登繞過左佢既視線走到佢後面，然後好溫柔咁講。
芷翹一拎轉面見到我，就好開心咁講 : 「我岩先正想搵你啊哈哈！」
「我知啊~~~我仲見到有個傻妹係操場到唔知望乜添！」
「啊你見到又要匿埋架喎！」
「咁係因為……我想俾驚喜你麻！」
我講完之後，就係背脊攞左一盤食物出黎。
「嘩！你特登買架？！」芷翹見到之後好驚訝咁問。
「係啊，你知唔知我排左勁耐隊先買齊所有食物！不過呢……就算點辛苦都好，都唔夠你成日無野落肚咁辛苦既，芷翹大小姐！」
芷翹會心笑左一下，然後忍住內心既開心咁講 : 「好啦，見你咁好口又咁有心機，我就勉為其難收左呢d野食啦！」
我地搵左個樹蔭下既長凳坐低。
「今年d野食水準又幾高喎！」芷翹左手攞住個冬甩，右手攞住杯西米露，個口仲食緊野咁講。
「唔好食得咁急先得架，成個細路咁！」我取笑芷翹。
「咩喎！咁……d野係你特登攞俾我架麻，我梗係要落力d食……」
哈哈，咩理由黎架！
不過呢個傻頭傻腦既性格，正正就係我愛芷翹既原因。
我伸左隻手出黎，輕撫住芷翹既頭髮。
「你……做咩啊……」芷翹臉都紅晒咁望住我。
「忽然間……覺得你又再可愛左，哈哈！」我笑得好燦爛咁講。
「……傻瓜……」芷翹一於決定唔望我，繼續食佢既野，但係嘴角已經不自覺咁上揚起黎。
由於芷翹同佢呀媽協議左只準係23、24、25同31號出街黎換取全額資助買晚裝既關係，芷翹基本上成個假期都要留係屋企溫書。
而呢個協議，就由聖誕暖流個日開始。
所以我同芷翹係樹蔭下食完野之後，佢就要番歸做宅女了！
就算我同芷翹行得幾慢都好，最後都係行到去佢樓下條馬路。
「我要走喇，23號先可以再見喇……」芷翹扁晒嘴，超可愛咁講。
「講到好似生離死別咁既你！仲有wtsapp架麻傻妹！」我輕力咁拍左一拍芷翹個頭。
「又係喎可？hehe~~~」芷翹伸一伸脷。
就係咁，我同芷翹即將就要迎接2日不能相見既日子。
送完芷翹番屋企之後，我又循例咁行番歸。
「咔嚓！」我扭開屋企道大門。
「珞，你番黎喇？」媽咪久違既聲線竟然再次係屋企裡面傳出黎！
「媽？！」我即刻衝入去，就發現媽咪係廚房煲緊湯。
我衝過去攬住左媽咪，然後勁開心咁講 : 「點解你會番黎既？」
「我有d野要番黎搵你老豆傾，咁我又好耐未試過煮野俾你食，咪叫你老豆借個廚房俾我下廚，今晚煮番餐正菜過你嘆囉！」媽咪佢摸住我個頭講。
係媽咪面前，我都只係一個細路仔，哈哈！
「好呀好呀！」我笑住答媽咪。
「咁你同老豆自己做住野先啦，我仲有好多野要準備！」媽咪指一指個枱面。
嘩，又有海鮮又有燒味，正！
我番番自己間房，訓左係床上面，感受呢個難得既家庭味道。
「你諗成點呀阿誠？」
係三人同枱食飯既時候，媽咪問老豆。
啊，順帶一提，我老豆叫司徒誠。
「嗯……咁啦，我自己就無咩所謂既，咪當做下善事囉，不過我係怕手續麻煩姐。」老豆回應道。
「係呢，其實你地兩個講緊D咩呀？唔通就係媽咪你話要同老豆傾既野？」我好奇咁問。
「係啊阿珞。」媽咪答我。
佢繼續講 : 「仲記唔記得以前你每個星期都會寫信俾一個女仔？」
「嗯？」
我沉思起黎，並且不斷嘗試係凌亂既腦海中尋找呢份已淡忘既片段。
***********************************************************************
仲記得個陣係小六升中一既暑假。
「珞仔，過黎啦！」
珞仔，係我細個既時候媽咪叫我既名字。
我聽到之後即刻放低手上既畫筆，然後奔跑出去客廳。
「做咩呀媽咪~~~」
當時既我，真係又肥又純真。
「珞仔，你中唔中意識朋友呀？」媽咪問道。
我不假思索就勁大聲答 : 「梗係中意啦！」
「咁不如你就同呢個女仔做朋友啦好無！」媽咪講完之後，就遞左一張紙俾我。
紙上面寫住一個我唔知道係邊既香港地址，然後下面就寫住一個名 : 巧瑩。
「巧瑩？邊個黎架？」我問媽咪。
「巧瑩呢個女仔係同你一樣歲數，係我同老豆透過『保良局兒童助養計劃』撫養既細路女黎架！」
「咁即係點？即係佢無父母架？佢會唔會同我地一齊住架！？」一大堆問題突然係我腦海不斷浮出。
「人地有呀爸呀媽，所以唔會同我地一齊住架珞仔！呢個計劃其實只係需要我地每個月供錢俾佢就得架喇！因為我同老豆想做番D善事，所以咪決定助養小朋友，幫輕一個貧困家庭既日常支出咁囉！」媽咪解釋俾我聽。
「之但係我又未見過呢個女仔，咁點同佢做朋友呢？」我再問媽咪。
「咁就簡單啦，」媽咪攞出一疊紙同一支筆講 : 「寫信識朋友咪得囉！一於你每一個星期就寫一封信俾佢啦！」
就係咁，我開始左人生第一次既書信往來，認識左生平第一個筆友。
「你好呀，我叫司徒珞，同你一樣係準備升中一既男仔，好高興認識你呀，巧瑩！」
「你就係誠叔叔個仔？你好呀，我都好高興認識到你！」
起初，我估自己應該會半途而廢放棄同巧瑩書信。
一黎我唔認識巧瑩呢個女仔，二黎我都未試過寫信，我怕無話題！
不過後來我漸漸發現，原來我既憂慮係多餘！
巧瑩呢個女仔除左話題多多之外，文筆仲非常生動！
就算係一個完全唔知巧瑩咩樣貌既情況下，閱讀佢來信既時候都會仿佛有一個「巧瑩」活生生咁企係我身邊同我講野！
不知不覺間，我地彼此既書信來往越黎越頻繁，上至天文下至地理無一不談。
而閱讀巧瑩來信同埋寫信俾佢既短短幾十分鐘，就成為左我每星期最期待既時間。
可惜書信始終要兩三日先能夠送達，所以每個星期最多都只係能夠收到巧瑩兩三封信。
係書信來往左半年之後，我終於忍唔住寫信問巧瑩。
「巧瑩，不如我地出黎見面啊！」
「嗯……好對唔住啊，我父母管得我好嚴架，所以唔會俾我出街！」
「咁啊……好啦……」
雖然之後我偶爾都會問番巧瑩同一個問題，但係佢都只係會用同一個回應答覆我，所以漸漸咁我都打消左見面既呢個念頭。
隨住同巧瑩書信來往越黎越多，我地信中既內容都開始越見深入，有時會講下校園既生活，有時會講下朋友咁。
不過一講起校園生活就好笑喇，巧瑩佢唔知點解好中意係信裡面問我關於中學既所見所聞，但係明明佢就同我一樣係中一級學生！
我一問佢做咩咁想知，佢就會答話咩因為每間中學生活都唔同，所以純粹想知道黎比較下咁話喎！
但係……就算點熟都好，巧瑩始終都唔會講自己屋企既事俾我聽。
記得有次我好好奇咁問佢家庭狀況，佢就竟然成個禮拜唔覆我信！所以為左保險，我都無再問過呢D敏感話題。
或者，呢D就係「家家有本難唸的經」啦！
時間過得好快，眨下眼就到左中一升中二既暑假。
有一日，正當我照常咁係到寫信既時候，媽咪突然間走入黎。
「珞仔，你寫緊信俾巧瑩呀？」媽咪臉上有一種說不出咩感覺既表情。
「係啊，媽咪你做咩呀，好似好煩惱咁既？」我突然感覺到一D不安。
「其實就係咁既……」媽咪支支吾吾咁講 : 「因為巧瑩屋企出左D問題，所以佢地退出左保良局既資助計劃，然後仲搬左屋。」
媽咪繼續講 : 「由於保良局方面要保障別人私隱既關係，加上我地已經唔係巧瑩既助養者，所以唔可以攞到佢地既新地址。」
「所以……你以後都唔可以再寫信俾巧瑩喇。」
我聽完之後，半晌也不能夠說出話來。
我仲好記得後來自己一直都唔相信呢個事實，所以決定每日都要繼續寫信寄去巧瑩舊地址，希望等到佢回信既一日。
可惜，最後我寫既信全部都退晒番黎。
隨住歲月流逝，我無再寫信，並將巧瑩呢個人物放在係回憶既深處。
*******************************************************************
「哦……巧瑩呀麻，我記得。咁同你地傾緊既野又有咩關係？」
我從回憶之中抽離番出黎，然後問媽咪。
老實講，過左咁多年之後，呢段回憶留下俾我既只街下一點一滴破碎既畫面，對現在既我黎講係完全無感覺。
「我同你老豆當初係咪透過『保良局兒童助養計劃』助養巧瑩既，跟住係佢搬左屋之後我地就轉左去助養另一個細路仔。」媽咪解釋俾我聽。
佢繼續講 : 「不過去到依家呢個男仔大個左喇，所以我都既助養計劃都完左。跟住琴晚保良局個邊打黎問我繼唔繼續助養其他小朋友，咁因為我同你老豆依家離左婚，D手續會變到好麻煩，所以咪特登上黎搵你老豆傾囉！」
老豆係呢個時候補充 : 「我就無咩所謂既，所謂助人為快樂之本呀麻，哈哈！」
「咁就好啦，你遲下同我去保良局個邊搞埋D手續啦！依家就專心食野！」媽咪望住我講 : 「試下條魚，睇下我D手勢有無差到啊，珞！」
「好呀！」我笑住咁夾起左一舊魚肉。
***
「肥仔一跌落渠就連部單車都失去~~~叫朋友，過來救命換來一下被拒~~~！」
一聽到呢個鬧鐘鈴聲，我就即刻彈左起身。
望一望個手機屏幕 : 2014年12月23日，上午10時45分！
「哈哈哈……終於都到左今日喇……哈哈哈！」我係床上面發晒癲咁傻笑。
聖誕暖流之後，我同芷翹足足分開左兩日。
無錯呀，係兩日呀！你知唔知我幾辛苦呀！
不過，今晚我將會見到芷翹喇，嘻嘻 <3 ！！
我即刻Wtsapp芷翹 : 「傻妹，想我今日幾點去接你呀！」
「我今日要去髮型屋set頭呀，set完之後我就番歸換衫。你預……1700啦！」佢好快就上左線覆我，睇黎佢都好興奮咁。
果然不出我所料，佢好快就補多左一句 : 「好期待呀！！(加一大堆亂打既emoji)」
覆完芷翹之後我就打俾蛋撻。
「喂，今日幾點邊到等？」我問蛋撻。
「就1點啦！我地食埋個lunch之後先去叮叮搞頭！」蛋撻好爽快咁答我。
p.s. 叮叮係一間髮型屋。
「不想再作良朋這個身份~~~」收左線之後，我就哼住《哈利路亞，CHANCE！》走左入廁所沖涼梳洗。
望住鏡前既自己，穿上左一件白色晚禮服，配襯住一個半弧形既黑色領結，真係非常帥氣。
成個樣大概就係咁 :
由於廢事帶袋既關係，我淨係帶左紙巾銀包鎖匙同埋電話，然後就出左街。
一出到去觀塘地鐵站，就見到蛋撻。
佢今日著左件灰色西裝、黑西褲同埋白恤衫，一個鮮紅色既煲呔加上清秀既外表，相信今晚蛋撻都應該會成為全場女生爭奪既對象。
「嘩，溝死女啦！」我係後面拍一拍蛋撻。
「挑，本身就溝死女啦！不過你今日都好睇得下喎，溝死呀嫂啦！」蛋撻取笑番我。
由於我地今日身上既衣服都好撚貴既關係，我同蛋撻為左唔整污糟件衫，就決定去吉野家食野。
「珞，你一陣間set咩頭型？」係我瘋狂食緊個三文魚籽飯既時候，蛋撻無啦啦問我。
「er……我仲未諗，哈哈！」
蛋撻唔講既話，我真係唔鬼記得左頭型要自己諗。
「一於叫老闆娘幫你set個『柯震東凌亂平陰頭』啦！反正你依家頭髮長度岩岩好！」蛋撻勁興奮咁提議我，仲攞左部電話出黎search圖俾我睇。
「又幾好睇喎！好啦我就set呢個！咁你呢？」我決定左頭型之後就問蛋撻。
「哼哼哼……等我set完你咪知！」
「哈哈……咁好啦……」
望住眼前自信爆棚既蛋撻，我心裡面突然感覺到佢將會走超現實路線。
由於我同蛋撻一路食飯一路傾計既關係，所以食完野行到去叮叮既時候都已經成2點半。
「屌，咁晏架喇？我一陣5點鐘仲要去接芷翹呀，不如俾我搞頭先！」我著急咁同蛋撻講。
「得啦，你就算唔講我都諗住俾你搞先，因為我個頭型要保密！」蛋撻露出一個奸險既笑容。
「嘩！」一入到去叮叮髮型屋，我先發現原來今日好多去聯校ball既人都走左黎呢間野到set髮，所以成個場都人山人海。
結果唔知等左幾耐，終於都到我搞。
「你要set咩髮型呀靚仔？」老闆娘問。
「唔該老闆娘，黎一個柯震東！」我勁霸氣咁講。
我講完之後，髮型屋頓時變得鴉雀無聲……
老闆娘O撚晒嘴咁望住我，然後講 : 「呀仔，去ball剪光頭咁撚把炮？」
屌！原來成班人都get錯左。
「唔係啦……我講緊既係『柯震東凌亂平陰頭』，哈哈……」我勁尷尬咁講。
結果一set又set左半個鐘。
我set完之後望下個鐘，弊！四點半！
正當我轉身諗住同蛋撻講我走先既時候，蛋撻就望住我做出一個「你走啦，我唔想搞大佢」既手勢，所以我即刻放低左d錢，然後就狂奔去芷翹屋企。
跑到去芷翹屋企樓下，好彩都係4點48分。
我攞起左部電話打俾芷翹。
「!@#!%@#$^@&$......」
放心，呢d唔係粗口，而係芷翹個邊傳黎既嘈吵聲音，聽起上黎就似係執緊野定唔知搵緊野既聲音。
過左一陣之後，電話另一端終於傳黎我聽得明既語言。
「喂？阿珞？我未落得黎住啊，我仲搵緊野！」芷翹好似好炆咁。
「哦，你慢慢啦，我依家到左你樓下架喇，如果你得既就打俾我啦。」
所謂「女人發火，非同小可」，為保自己安全，都係唔好催芷翹好d。
「下？你到左樓下喇？咁不如你上黎啦。」
「下？！」
「我話，你 上 黎 呀，傻佬！」
「22樓H室……22樓H室……」係lift裡面我一直望住個數字板係到喃喃自語。
嗚呀！我上緊芷翹屋企呀！
唔知佢屋企係咩樣架呢？芷翹係咪著緊屋企衫呢？佢會唔會請我入去佢間房望下呢？我地會發生咩事呢……
「啊！！！」一諗到呢到，我就係架lift到大聲鳩叫左出黎。
出左lift之後轉左行幾步，就到左H室門口。
我吞左一啖口水，然後按左落門鈴上。
「叮噹~~~」
「黎緊黎緊！」芷翹係門後面叫道。
「咔嚓！」芷翹打開左門，然後同我對望住。
眼前既芷翹紮起左條短短既馬尾，然後著住一件黃色長袖T-Shirt加一條黑色運動褲，望落好有賢妻feel。
唔知道係咪太耐無見過芷翹關係，我一同佢對望個下個心竟然卜卜聲咁跳起上黎，而且越黎越快！
「做咩傻左咁企係到呀，入黎先啦！」芷翹笑得好甜咁講。
跟住芷翹踏入屋企，迎面撲來既就係芷翹身上都有既淡淡香水百合 ; 望向室內，應該係兩房一廳既設計。
「你係個到除低對鞋啦，我番房搵埋件披肩先！」芷翹好似當左我係常客咁，無招呼到我就自己極速衝左入房。
我除左鞋之後本來係到四處參觀諗住消磨時間，等芷翹慢慢搵野。之但係佢搵左成五分鐘都未出番黎，所以我就好奇咁行左入芷翹間房。
「……」我望住眼前既一切，簡直難以置信。
芷翹既房間非常簡潔，只有一張床，一張書枱連書架，同埋一個衣櫃。
而佢所有野都好整齊咁擺放左係各自既位置，比如係書本放係書架、書包放係凳上。
但係惟獨芷翹個衣櫃，簡直可以用「恐怖」黎形容！
衣櫃裡面既衣服凌亂不堪，D衫堆埋一舊咁窒晒落去，睇落勁似舊梅菜。
由於芷翹依家成個上半身舂左落去衣櫃裡面搵野既關係，佢根本留意唔到我就企左係佢身後O撚晒嘴既樣。
「去左邊呀嗚呀！！！」芷翹勁炆咁係到講，但係上身仲係伸左入衣櫃裡面係咁搵係咁搵。
眼前芷翹既背影非常美麗，望落去仿佛成為左別人老婆一樣。
應該話，仿佛成為左我司徒珞既老婆一樣。
望住呢個傻妹，我既心跳再次係不自不覺間急速起上黎，而且仲化為一股衝力推動我全身。
我走過後芷翹身後，雙手跨過佢腰間，從後攬住芷翹。
我地依家既動作就好似咁 :
芷翹一feel到我攬住佢，先是驚訝，後是害羞。
「咸濕仔，我媽咪落左街好快番架喇，你咪亂黎……」芷翹拎左少少個頭過黎望住我，臉上早已好似塗了胭脂咁變得通紅。
「我好掛住你啊芷翹！」我講完之後，將芷翹攬得更緊。
我都唔知點解自己會講呢一番說話，不過個刻腦海浮現出既心底話就係呢句。
「嗯……」芷翹既臉紅得就快要爆炸。
「我……我……」芷翹深吸左一啖氣，然後講 : 「我都好掛住你呀！」
芷翹講完之後，我地維持住後抱既姿勢對望住，彼此既呼吸聲漸漸同步起黎。
從芷翹背部傳黎既體溫，不停咁沖紛住我既腦袋，令我緩緩將頭哄前向芷翹臉上。
我同芷翹鼻貼著鼻，大家仍然對望住。
「芷翹啊……」
「嗯？」
「我想去廁所……」
「……」
「嗚呀我岩先係到做緊咩呀！！！！」我係廁所裡面係咁用凍水潑落塊面到懲罰自己。
大家唔好誤會，我並唔係責怪緊自己岩先差d咀左芷翹，而係責怪緊自己岩先做咩唔咀落去！
「唉，做咩岩先唔一野咀落去芷翹到呀……」我望住鏡中既自己，係到反思自己岩先做咩唔咀落去。
岩先，就係同芷翹鼻貼鼻準備kiss既一剎那，我腦海裡面竟然浮現出一個芷翹喊緊既畫面。
我唔知點解自己腦海會出現d咁既野，總之個下就令到我一野縮開左。
話說，屌，呢d畫面唔係準備扑女個陣先會出現架咩？！
唉算啦，我又未扑過，鬼知咩。
我行番出去個時，就見到芷翹攞住一件白色披肩企左係廁所門口。
大概係咁既樣 :
「我終於搵到喇，靚唔靚呀！」芷翹好開心咁講。
「你著乜都靚架啦傻妹！」我笑住咁推番佢入房，然後指住佢個個恐怖衣櫃講 : 「不過呢……你呢堆梅菜就真係唔方唔靚喇，哈哈！」
「咩喎！我…我…我未有時間執炸麻！」被我取笑既芷翹係到慌忙解釋，非常可愛。
呢個時候，芷翹上下打量我個頭型同裝扮，然後雙眼發光咁講 : 「阿珞！你今日好型仔呀！」
「搞錯啊，我入左黎起碼十幾分鐘，依家先望到！」我扮嬲咁講。
「哈哈……我岩先掛住搵野無留意麻，對唔住！」芷翹雙手合掌咁講。
佢望一望個鐘然後繼續講 : 「嘩，五點半架喇！？我去換衫先你係客廳等我啦！」
「不如我入房陪你一齊換……嗚啊！講笑講笑唔好搣！」我俾芷翹推左出廳坐低。
過左一陣之後，芷翹係房行番出黎，而身上則穿著住上次陪佢買既黑色晚裝裙，然後外加一件白披肩。
「行喇！」芷翹望住我，會心微笑左一下。
我地搭的士直接去到九龍灣展貿中心既門口。
「終於都到左喇！」落左車之後，芷翹望住個門口係到講。
「唔知裡面係點樣架呢？」我望一望個門口，然後番望住前面既芷翹。
今晚既芷翹化左個淡裝，穿上左晚裝裙，紮起左個圓卜卜既髻，再襯上一對高跟鞋，望起上黎真係好似專業既模特兒咁，好靚好吸引。
「珞啊~~~」芷翹拎轉身望住我，然後撒嬌咁講 : 「我今日著左高跟鞋行路好辛苦，所以……你要俾我撓手，成晚扶實我！」
我即刻跑上前，好似行婚禮既男主人咁叉起隻左手俾芷翹撓，然後懶型咁講 : 「請移玉步到舞會廳啦大少姐，我會扶實你。」
芷翹好配合咁撓住我隻手，然後答我 : 「咁就有勞晒你喇，將軍！」
「搞錯啊仲係將軍！」
「鬼叫有個人淆底唔肯提親，仲要借尿遁咩，呵呵！」
核對完身份之後，我地就由大門走入去舞會廳。
唔知大家有無去過呢d大型聯校ball，其實呢d舞會既場地就即係展覽廳，只不過係中間清空左黎跳舞，而左右兩邊就放左好多張紅布長枱係到擺食物飲品咁解。
「請大家盡情享受今晚既食物飲品，仲有如此高興既跳舞氣氛啦！」
隨住主持人話畢，場地既燈光開始逐漸調較變暗，意味住今晚既舞會正式開始。
身為去ball新手既芷翹同我，係開始之後仲係成碌木咁企左係原位無郁過。
「阿珞呀……依家呢……究竟要做d咩架？」芷翹扯一扯我手臂。
「不如……去搵蛋撻先？佢有去過ball，應該會知道有咩好玩！」講完之後，我就同芷翹撓住隻手咁一齊去搵蛋撻。
「啊……條友係邊呢？」我地搵勻全場都見唔到蛋撻。
就係呢個時候，舞會既大門突然俾人推開左，所有人既焦點都落晒去門口既一個人影身上！
呢個人影穿著住灰西裝白恤衫黑西褲紅煲呔，非常英偉咁步入舞會既中央！
但係最型既係，佢頭上唔知道係真定係假既……
冬 ‧ 菇 ‧ 頭 ‧ 髮 ‧ 型 ‧ ！
呢個人影徐徐走到我同芷翹身邊……
「屌，你個頭做乜撚野呀！」我勁大聲笑左出黎。
「呢個叫『海派甜心小朱頭』呀，我整左勁耐架喇，你呢d廢柴識條撚咩！」
無錯，呢個人影正是蛋撻！
「你個frd好可愛呀，哈哈~~~！」芷翹係我隔離笑得好開心。
應該話，恥笑得好開心，哈哈！
「呀嫂，俾番d面好喎！」蛋撻唔憤氣咁講。
由於蛋撻一入黎已經吸引左大部份人既目光，而佢又行左過黎我同芷翹身邊既關係，依家我地三個就好似打左spotlight咁俾其他人昅住晒。
「喂，個邊個兩個男仔好靚仔喎！」
「咪就係，一個可愛一個美男子！一於一陣搵個機會食左佢地…啊唔係，識左佢地先！」
「著黑裙個條女好正呀！」
「但係佢隔離有仔架喎。」
「屌，怕乜呀，黎ball就係識女架啦，理得佢有無仔！」
一句又一句既說話不斷係我身邊傳過黎。
「死人蛋撻，你搞到我地變左主角喇！」我一野踩左落去蛋撻左腳鞋面。
「話你聽呀，黎得ball既人個個都係想做最出名、最多人想認識個個！我幫你地出名做主角，而且仲要唔收你錢，夠老友喇掛！」蛋撻勁有自信咁講。
「食屎啦仆街！」我再踩多左鑊蛋撻隻腳，然後繼續問佢 : 「咁其實去ball有咩好玩架姐？」
「如果係普普通通咁去ball既話，最好玩既地方當然係去識人跳舞啦！」
「不過呢……」蛋撻奸笑左一下然後講 : 「不過好似我地三個咁已經出左位既話，最好玩既野就梗係……等人過黎搵我地跳舞啦，哈哈！」
我同芷翹O晒嘴，跟住互相對望點左一下頭，然後就頭也不回咁行走左，留低蛋撻自己一個。
「咁樣拋低你個frd會唔會唔係幾好啊？」芷翹憐憫之心啟動左。
「傻啦，佢恨不得單獨行動識囡囡！所以唔洗理佢架！」我回應道。
我諗，如果話司徒珞有「聖誕暖流發癲症」既話，咁丘旦達就應該有「舞會發癲症」，哈哈……
不知不覺間，我同芷翹就行到去跳舞既地方。
「芷翹，不如我地跳舞囉！」我企左係芷翹前面望住佢講。
只見芷翹個表情變到十級驚訝，而後奮力搖頭咁講 : 「唔好啦，去食野算啦，我唔識跳舞架！」
「咁黎到Ball唔跳舞好怪姐！」我嘗試誘導芷翹跳舞。
「唔制！」芷翹睇起上黎真係幾怕跳舞，個樣好緊張咁講 : 「我真係唔識跳舞架……一陣出醜會好隸衰……」
我伸出右手，輕輕撫摸著芷翹既臉蛋。
「唔洗怕喎，就算出醜都有我陪你麻，」
「所以放心啦，」我左手放背，同時伸出右手手掌，作出一個紳士邀舞既動作。
我雙眼堅定咁望住芷翹 :
「所以放心啦，」
「我一定會永遠咁係你身邊陪伴你、照顧你架，傻妹。」
芷翹聽完之後，嘴唇變成了一個彎彎既月亮，然後將左手輕輕放係我既右手上。
「咁，」
「以後就拜託你喇，傻仔。」
我拖著芷翹行到舞池既中心，然後左手放係佢既腰間。
「要睇住我啊！」芷翹笑住講。
「知道喇大少姐！」我亦以笑回應。
伴隨住音樂既節奏，我地緩緩咁踏出了彼此既第一步。
「嗚哇~~~好攰呀！」
隨住舞會完結，我同芷翹踏出左九展既門口，然後一齊叫左出黎。
「我就話著左成晚高踭鞋所以覺得攰姐，咁唔知司徒先生你又做咩咁攰呢？」芷翹挑釁咁講。
「咁你就有所不知喇，」我玩弄番芷翹。「我今晚除左全天侯咁服侍一個著高跟鞋既大少姐之外仲要係咁俾一個唔識跳舞既女仔踩，咁你話攰唔攰喇？」
芷翹鼓起小腮: 「攰既咪唔好繼續服侍大少姐囉，辛苦晒你喎哼哼！」
「雖然攰就真係攰左d，」我伸出右手搣落芷翹塊面。「不過我真係好開心、好滿足！」
「開心既原因係因為……歐陽芷翹，你係我身邊。」
「食…食…食屎啦，衰人……」芷翹塊面滾燙得唔知可以放邊，惟有害羞咁低下頭。
由於我同芷翹都好攰既關係，我地截左的士番歸。
係車上面，芷翹熟睡咁挨左係我膊頭，展現出一個我從未過既樣子，就好似一個初生嬰兒咁，非常吸引。
「著到好靚喎後生仔，岩岩去完舞會呢？」的士佬突然間講野。
屌呀，隔離自修室post個的士佬走左過黎！？
我透過倒後鏡反射望過去的士佬到，好彩，係一個平凡既男人。
的士佬無等我回應就繼續講 : 「隔離個女仔係岩岩識既？」
「哦，唔係啊，我地識左好耐架喇。」
我向來都幾中意同d的士佬傾計。
一黎佢地全日困左係間車到其實都真係幾悶，會想搵人傾計。咁吹水呢樣野其實都只係舉手之勞姐，何樂而不為呢？
二黎唔知大家有無一種感覺，就係的士佬佢地每日都要接載唔同種類唔同階級既乘客，所以佢地既見識一定比任何人要廣，而且對社會現象亦往往有獨特既見解。
有時聽佢地發表自己既諗法，其實都真係別有一番風味，令我獲益良多。
「佢係你女朋友？」
嘩，一黎就直屌大本營，的士佬你係得既！
「er……」我望住旁邊睡得正甜既芷翹，下定決心。
「依家仲未係，」
「但平安夜之後就會係。」
的士佬係倒後鏡望一望我，然後笑住講 : 「後生仔，我呢d做夜更既見人執屍one night stand就多，好似你呢種眼神如此堅定既人就真係買少見少。」
「不過，」的士佬係紅燈位既時候拎轉黎望住我。「不過，男人呢種生物向來都好撚犯賤，淨係識用下面諗野。你係咪貪呢個女仔夠靚女咋？」
的而且確，芷翹國色天香既容貌無時無刻都令我神暈顛倒，完全吸引住我既視線。
之但係我更加清楚既就係，我中意芷翹d咩。
一次也不 推說亂和倦 ， 一次你都 未曾去計算。
我中意既，係在我亂發脾氣既時候仍然對我不離不棄既芷翹。
給了再給 始了便無斷 ， 無條件分 擔各種辛酸。
我中意既，係無論點都要串我但心底裡其實處處體諒我感受既芷翹。
從前沒講 今次要說多謝你 ， 我有你給的愛因而完全。
我中意既，係將我由一個頹廢生活拉番出黎，成為活生生既司徒珞既芷翹。
誰人是我 心裡至愛生命至尊，都也是你 真了不起 親愛的你。
我中意既，係呢個好努力咁拉近我地彼此距離既芷翹。
我平淡而踏實咁道出自己既心底話：
「雖然，我真係好中意呢個女仔既外表；但係我更中意既，係佢如此美麗既內心。」
的士佬向我伸出一個「我睇好你」既手勢，然後就轉過頭黎繼續揸車。
直至去到芷翹樓下，的士佬先再出聲：「到喇，叫醒佢啦！」
我輕撫芷翹既臉頰：「起身喇懶訓豬！」
芷翹揉揉眼睛，然後就恰下恰下咁落左車。
「後生仔，愛一個人既話，就要令到佢無時無刻都笑。呢個既係你既責任，亦係你對佢最重要既承諾。」就係我離開車廂準備閂門既時候的士佬突然出聲。
「加油啦！」的士佬將門閉上，然後絕塵而去。
「走得喇，可以番屋企訓覺喇。」我走過去個個企係度都訓著左既芷翹面前捉住佢雙手。
芷翹睜開雙眼，個樣就好似係岩岩訓醒既睡公主一樣。
「好啦咁~~~我批準將軍你依家番歸！」
「咁你想微臣聽日幾點去到你樓下？」
「嗯~~~？做咩聽日你要黎既？」
「平安夜呀，傻妹！」
芷翹一聽到我講，就即刻精神起上黎，fing住我雙手講 : 「係喎係喎~~~！拿我唔理呀，我聽晚一定要去食吉野家打邊爐！」
「你話點就點啦，聽日你話晒事！」我笑住咁fing番佢雙手。
等芷翹走左入屋苑之後，我無直接番屋企，而係走到同芷翹第一次相擁既公園。
我坐左係當初既韆鞦上面，抬頭仰望今晚呢個萬里無雲既天空。
腦海之中芷翹既哭臉，忽然又呈現眼前。
「我記得喇……」我此時先赫然記起，原來呢個影像正正係第一眼望見芷翹時既畫面。
我諗，我有必要搞清楚呢件事先。