《妳做咩將成碗譚仔倒落我個頭上面！？》: 第十四章(上)
結果，我同芷翹就走左去食譚仔。
我為左握機會去認識多d芷翹，我係食譚仔個陣不斷嘗試去展開唔同既話題。
基本上一d普遍既問題芷翹都會答既。
之但係當我問到深入d既問題，比如話係第一識佢既時候拍枱走人既男仔係邊個個陣，芷翹就會咁答 :
「呢個的而且確係一個值得深究既話題！之但係呢今日既問答機會已經用晒喇，明天請早啦！」
佢講完呢句說話我都唔知笑好定喊好，
總之就好搏打啦！
食完野之後我就送芷翹去條馬路，望住佢過對面番屋企，然後自己就慢慢行番歸。
係回家既路上直至訓係床上準備訓覺既前一刻，我既腦海裡面都一直徘徊住芷翹既身影。
由當初咁特別既邂逅，去到糊里糊塗既陌生人相擁 ; 再去到第二次邂逅，慢慢咁熟絡，周不時串下大家，周不時互相對望。
再去到身體既接觸，然後尷尬，然後呷醋，然後曖昧……
一切一切，都仿佛無聲無色咁進行，但又為我乏味既生活帶來了不一樣既色彩。
色彩或者係藍色，或者係紅色。
但更加多既可能係，
溫煦而甜心既蜜糖色。
一開始，我覺得自己將芷翹當左做阿娜，所以會好嬲，會同佢忽冷忽熱。
因為我唔道究竟應該點面對眼前既芷翹。
但係後來，隨住我慢慢咁了解芷翹、慢慢咁認識到芷翹之後，我先明白到兩者根本就唔一樣。
儘管有地方係相似，但係唔同就係唔同。
芷翹係芷翹，阿娜係阿娜。
我雖然仲中意阿娜，
但係依家既我好清楚咁知道，
我更中意既，係眼前如此獨特既芷翹。
從今日起，我要努力忘記阿娜，然後努力認識芷翹！
好快咁第二日既陸運會都完左喇！
裡面詳細既內容我就唔多記述啦，因為其實同第一日都差唔多。
不過值得一提既都有幾樣既！
首先，就係我攞左4 x 100亞軍！雖然攞唔到冠軍，但係我並無唔甘心！
因為……冠軍個個係蛋撻！所以輸是常識吧。
其次呢……就係我同芷翹喇，嘻嘻！
唔知道大家明唔明白，人與人之間既感情其實係一樣好深奧既野黎。
本來作為朋友既兩人，可以靠一件事而變得親密既上黎。
但係事實上呢一件事又只係一個契機，如果無平日既相處，就無可能親密起上黎。
我諗我可以用一個好簡單既比喻去形容！
感情呢樣野，就好似大家插條瑣匙去開門咁。
假設自己係一條瑣匙，出面有無數既門。
首先，你一日未試過插條匙落道門到扭既話，你一日都唔會知道係岩key定唔岩key。
所以大家要做既就係，試下條匙！
然後，大家要知道既係，無論係咩瑣匙都好，都一定要插到最入，先知道扭唔扭得開道門。
所以大家要做既係，尋找機會不斷去認識道門，透過日常相處去深入了解道門，唔好死衝爛衝，調轉左條匙都係到鳩插！
跟住我想大家細心諗一諗，其實世間上每道門同每條匙都係獨特既，佢地各自都有屬於自己獨特既另一半。
所以就算插晒落去之後都扭唔開既話，唔好灰心，亦都唔好格硬黎。
因為，你地總會搵到一個屬於自己既門。
如果大家咁岩得咁橋扭得開既話，咁就恭喜晒！因為咁就代表左，你可以真正咁了解門後既事物。
話唔定入到去會係一個天堂！
但亦都可能唔係自己想像咁美好。
不過就算點都好，大家都要記住，你扭得開呢道門其實已經好唔簡單。
唔好為左一d小事而放棄呢道門。
因為，要搵到另一道門，係好難好難。
而且，原來既呢道門，或者已經唔會再為你打開。
大家不如試下接受門後既事物，或者係幫佢打掃，咁唔係黎得更加直接，更加好咩？
所以我諗，我已經順利打開左芷翹呢一道門，而我亦會好好咁照顧呢間屋。
啊！講番我同芷翹先~~~
係陸運會既第二日，唔知道係咪因為發生左第一晚個件事既關係，我同芷翹竟然變得曖昧起黎。
我地一齊去運動場既時候，雖然都係講埋晒d無聊野，但係語氣之間好明顯已經過晒電咁，而且周不時對望到既時候，仲會眼甘甘咁望足十幾秒，然後就一齊笑左出黎，感覺非常甜蜜。
然後呢係運動場既時候，我就會企係芷翹後面陪佢計時，得閑個時就一齊傾計，然後就一齊去食lunch，最後又一齊走咁囉！
不過，我始終都係無問到芷翹關於第一日個男仔既問題。
因為我知道芷翹覺得我係好重要既話，就一定會同我講，唔洗我問。
所以我會耐心等候芷翹徹底相信我，想我成為佢傾談對象既一日！
總之呢一句講晒，
我依家好撚開心呀！！！芷翹~~~芷翹~~~
陸運完左之後就係一日既假期。
原本我就約左蛋撻去網吧打lol既，不過因為琴日芷翹話想今日去自修室書，所以我就放左蛋撻飛機，然後陪芷翹喇！
「屌你啦，又話當人呀妹你條仆街，一時一樣咁想點！」琴晚打俾蛋撻爽約個陣，佢一句車埋黎。
「喂！咁人有混亂係正常架麻，我依家諗好咪得！」我反駁。
「你係諗好先好呀！唔好玩鳩芷翹呀，你知你份人架啦，唔嗲唔吊咁勁搏打！」蛋撻雖然好似鬧緊我咁，但係佢心底裡其實替緊我開心。
「知道喇柒頭！」
「聽日做足安全措施呀！」
「痴線去自修室咋，而且我地未一齊架！」
「唔好做陳輾楠呀！」
「知喇！」
同蛋撻傾完電話之後，我就wtsapp芷翹。
「聽日想幾點？」
「咩話？你肯陪我去自修室？好耶！！！萬歲！！」
「傻妹！咁即係幾時呀？」
「嗯…就12點半啦！因為……我想訓耐d，嘻嘻~~~」
「好啦咁，聽日見啦，晚安！」
「晚安喇司徒珞先生！」
***
「喂，傻佬！」芷翹係我後面伸隻手出黎，搣住我塊面咁講。
哈哈哈！傻佬呢個名又幾好聽~~~
「咁遲架傻妹！」我拎番轉面搣番住芷翹。
今日既芷翹上身著左一件純白色中袖t-shirt，下身就著左條黑褲，然後背住個牛仔布既「斜咩袋」。
斜袋既「咩帶」打斜咁壓左落芷翹個胸到，將佢兩個山峰形狀表露無遺。
一句講晒，好撚正！
「我訓耐左麻嘻嘻~~~行喇行喇我好多野要溫！」芷翹一路講，一路就撓住我隻右手。
我地就好似情侶咁肩並肩上左去自修室。
因為今日只有我地學校放假既關係，自修室都只係得番d阿伯係到偷wifi上網，同埋一d唔知係邊度黎既青少年。
我地求其揀左兩個位坐低，然後就開始溫書。
我諗番起自己中四個陣，基本上日日都係玩訓食，根本就唔會提「溫書」兩隻字。
所以望住眼前呢個假期都去自修室既芷翹，我忽然覺得有d慚愧。
「喂，」我細細力拍左一下芷翹，繼續講 : 「其實你咁努力溫書做咩？有排都未到期中考啦，過埋聖誕假先考喎！」
點知，芷翹無應我機。
「喂，做咩唔應我？」我督左一下芷翹。
佢都係無應機。
「搞咩呀……」我企左起身，由芷翹既左邊行去右邊，望下佢依家做緊咩。
芷翹佢左手托住塊面，右手攞住枝筆，然後係到……訓緊覺。
「頂！原來訓緊！」呢一下我真心笑左出黎，笑係笑自己岩先仲咁慚愧，點知原來芷翹都係一擔擔！
芷翹佢左邊塊臉豬登俾佢托到拱起左，成個樣好似細路仔訓覺咁，真係好可愛。
我看得入迷，不知不覺咁慢慢貼近芷翹。
突然間，芷翹睡眼惺鬆咁張開眼！
佢一開眼個下，我同佢都嚇親，對眼一齊碌到勁大！
之後芷翹塊臉又好唔科學咁變到紅卜卜，雙眼望實我。
「你…你…你做咩望住我！」芷翹保持住細聲既聲浪，但都仲係好驚訝咁講。
「我…我…我見你訓覺個樣好可愛，所以咪望耐左！」我勁怕羞咁講。
芷翹聽完之後，塊面更加紅。
可能係因為俾我發現左佢訓覺！
「有…有…有幾可愛喎！你快d坐番低啊！」芷翹扯住我件衫尾，拉我番埋位。
我坐番低之後，想聊番芷翹傾計，之但係佢一直都嬲爆爆咁唔肯應我。
跟住慢慢咁我地都開始各自專心溫書，好快就去到夜晚食飯時間。
芷翹佢忽然扯一扯我衫袖，所以我就望過去。
「好肚餓啊~~~」芷翹鼓起泡腮，扁起個嘴咁講。
嗚呀！！好可愛呀，好想咀落去~~~
不過我司徒珞貴為正人君子 (好似係) ，點可以未有名份就先咀人！
所以我壓制住自己，專注番係條問題上面，然後講 : 「咁落去食野啦！」
由於我地諗住食完野就番歸，所以我地執齊晒野就離開左自修室。
「食咩好呢？」我望住自修室下芸芸眾多既餐廳，一時間選擇困難症發作。
「去食吉野家呀好無！今期有得換B-duck公仔，我想換番個俾家姐！」芷翹忽然捉實我隻左手講。
「下？！乜你家姐咁男仔，原來都中意B-duck架？」我笑住講。
「咁佢始終都只係扮男仔架姐，內心其實都係中意女仔野既，就好似毛公仔呀，飾物呀咁囉！」芷翹撓住我隻手，一路行一路講。
「咁你即係都中意呢d野？」我問。
「哈哈梗係唔只啦！」芷翹望一望我，然後繼續望佢前方 : 「我仲中意好多好多野架，特別係……」
「特別係咩？」
「特別係你囉。」
咩話！！！？
呢d算唔算係表白呀！？
點解係女方表白先既！？乜依家d女仔咁大膽架咩！！！
我聽完之後，一時間消化唔到，塊面變到勁熱，個身僵硬晒咁唔受控制，而且仲有種衝動好想攬住芷翹然後一野咀落去。
芷翹望住我呢個咁怕羞既反應，即刻笑左出黎。
「洗唔洗啊司徒先生！你紅都臉晒喇哈哈哈~~~等你岩先仲睇住我訓覺啊拿，今次仲唔玩番你！」芷翹既笑容非常真摰，而且帶住濃濃既蜜意。
車！原來係玩我既，仲等我咁認真添！
跟住之後，我地行去apm吉野家幾耐，芷翹就笑足我幾耐。
食完野加行左陣商場之後，我就送左芷翹番屋企，然後訓歸訓覺。
最後，今日就係同芷翹既約會之下，甜蜜輕鬆、簡簡單單咁完結左。
「邊個係司徒珞，同我出黎！」
一把雄厚既聲線劃破長空，將小息一時班房既吵鬧聲都給掩蓋晒。
班房頓時間變得寂靜，個個都朝門口方向望過去。
包括訓緊覺都俾佢嚇醒左既我。
「屌，邊個黎架，美好既星期一就咁俾佢搞垮晒！」蛋撻坐係我隔離，望住企係門口一個健碩既男子講道。
「我問多一次，邊個係司徒珞！同我出黎！」門口個位男子再次出聲。
「我就係，搵我咩事？」我一野企左起身，行過去門口，同佢同望住。
眼前呢位男子真係幾大隻，應該平時做開gym。
不過因為我都有做開既關係，佢唔算大隻過我好多，而且個樣仲要傻頭傻腦咁，應該都係個d大隻佬on 9。
「你就係司徒珞喇下話？」
「屌，我岩先咪講左囉。」
我講完之後，班房裡面即刻傳出一陣又一陣既恥笑聲。
個男子好似知道自己柒左咁，即刻勁大聲講野去俾番d威勢 : 「你同我出黎！」
佢帶左我去後樓梯附近，好似想講數咁。
不過我先唔驚佢，因為我同班既同學已經走晒過黎襯熱鬧，所以佢都唔可以對我做d乜。
「聽講，你近排同芷翹bb…啊唔係，同歐陽同學行得好埋下喎？！」個無腦既男子首先開口。
哦，原來係為左女！仲等我以為得罪左咩黑社會添。
「係啊，唔知道你係芷翹邊個呢？」我反問條友。
只見佢即刻口塞塞，一時間答唔出咩話黎。
「你係佢同學？」我特登誘導佢答。
「er……係呀！我就係佢同學！」個男子挺胸收腹，對住我講。
車！唔洗問呀貴 (唔係銀魂個個)，都知佢係芷翹既死追啦！
「咁唔知你搵我咩事呢？芷翹既同學。」我串一串佢。
「我！……我同你講，你醒目既就唔好接近芷翹！如果咪我第一個就打柒你！」佢攞出佢沙煲咁大個拳頭兇我，搞到我好驚！
呀！！！講笑姐，我驚條撚。
「咁，請問你同咩身份同我講呢番說話架呢？芷翹既同學？」我又再串佢。
佢當堂打左個突，然後好嬲咁望住我講 : 「你呢種靚仔呀，淨係衰淨把口，將又pure又true既芷翹玩到氹氹轉！你知唔知呀，佢識左你之後呀日日都係班房到傻笑呀！佢呢種咁好既女仔，你呢種花心男唔配擁有！」
的確，我係同阿娜分手之後，玩女換女無數，係學校裡面「厹珞」呢個名一早就廣傳左出去。
但係我知道，自己係真心中意芷翹，唔係玩玩下。
不過一聽到呢個男子話芷翹諗起我而傻笑，我真係覺得好窩心！！
嗚~~~呀~~~！
我忍住自己內心既笑意，好正經咁同條友講 : 「首先，我係百分百中意芷翹，我唔係玩玩下 ; 第二，我唔知點解你咁留意芷翹，但以後唔該你醒醒定定，因為芷翹既事即係我既事，有人騷擾佢既話我一定唔會就咁算數。」
「最後，」
「多謝你話我知，原來芷翹將我睇得咁重要，哈哈！」
條友聽完之後，塊面谷到紅撚晒，一粒聲都無出到就拎轉頭走左。
「喂！你好撚型呀阿珞，果然係我男神！頭先頭on9係咪食錯藥以為自己係男主角？btw錫啖先啦~~~」蛋撻係走廊個邊食完花生之後，衝過黎箍實我條頸，對眼發撚晒光咁。
「有無咁誇張呀！死開啦gay佬！」我勁俾力咁推開蛋撻。
不過咁，我岩先又真係幾型！
各位讀者覺唔覺先？哈哈！！
「哦！原來阿珞你真係同樓下女神有路！」
「大新聞呀，阿珞智破大隻女神兵，仲要插旗保女！」
「威威喇，大個仔喇唉！」
一班花生友都行埋過黎湊熱鬧，仲要係到議論紛紛。
今次仆街了。
以我係學校頗算出名既知名度，加上F.4女神呢個名，呢單新聞一定勁快通天。
我諗……芷翹唔會介意架可？
就係咁，我地行番去班房，繼續上堂。
平日lunch time之後半個鐘既休息時間，我多數都會攞黎訓教，又或者係留係班房畫畫。
之不過……今日我想安安靜靜訓都幾難。
就係我同蛋撻好happy咁完個lunch，一路講緊lol然後行番上班房個陣，驚訝既事情就發生了！
「嘩！做咩班房出面咁多人既？」蛋撻O晒嘴咁講。
我沿住佢既視線望過去，
嘩，人山人海！
「主角一號番黎喇！」有其中一個學生見到我之後大喊。
隨住佢既說話，d人望晒過黎我到，然後無不展示一個怪異既笑容。
「咩……料？」我試圖去理解依法發生既事。
「主角二同三號係裡面等緊你呀！」d人繼續講。
我無視住佢地既笑聲，定係唔知恥笑聲啦唉求其啦，一步一步行入班房。
「阿珞你搞左d咩大頭佛出黎！」係我差左半隻腳入班房，連環境都未睇清楚既時候，無啦啦有一把甜美但係好著急既聲線由我右邊傳黎！之後我就俾人一野拉左去課室角落頭。
我回神過來，先發現眼前既人係芷翹！
「芷…芷…芷翹？你做咩係我班房架？」我詫異咁問，但同時間又因為見到芷翹而好開心，所以掛起左一個笑容。
「你仲好講，咪因為你今朝講話中意我……囉……」芷翹講到一半既時候，臉忽然慢慢紅起上黎，然後說話變到窒下窒下咁。
嗚呀~~~Cute~~~！
「咁但係點解……」我望一望芷翹，再望一望佢身後既大隻仔。
屌，點解條大隻仔都係到既！
芷翹應該理解到我想問咩，所以好快就回答我 : 「今朝單野之後，呢個男仔無啦啦係班房到大叫，話LUNCH之後要同你決一死戰，目標就係我咁話……」
乜料呀，你估依家係動漫劇情咩……依家香港人既壓力真係大……
「芷翹，」我雙手按係芷翹既雙肩，好似主角打boss既既獨白咁講 :「芷翹，我一定會贏架，等我啊！」
芷翹望住我，O左嘴。
我一個箭步上前，對住條大隻佬講 : 「喂，你係咪飲大左啊，依家芷翹係你架咩？佢識都唔識你呀！」
大隻佬好型咁撐起個身同我講 : 「我係默默守護住芷翹既天使！」
我即刻拎轉身望芷翹，只見佢「灑晒手、拎晒頭」，示意我知佢並唔認識個大隻佬ON 9。
「總之依家請你即刻離開，我唔想搞大件事。」我伸出右手指住門口講。
「喂阿珞！」蛋撻走左埋黎講 : 「不如你就同佢鬥下啦，好似好好玩咁！」
「屌你咩！」我一野捉實左蛋撻，係佢耳邊偷偷講 : 「如果輸左既話要俾芷翹佢架！搏唔過！」
「我話你飲撚大左先岩呀！」蛋撻一句車埋黎 : 「你係咪傻撚左呀，你估依家係電視劇咩，芷翹大大個人咁企係你面前，又點會跟個大隻佬走呀，最多咪輸左你柒咁解！」
咦係喎！我究竟係到諗乜野，芷翹係中意我既話就唔會走架啦！
「你又岩喎！」我諗通左之後，係到笑自己岩先幾ON9。
「我係唔會走架！決一勝負啦，花心蘿蔔！」個大隻佬展示出佢強壯有力既臂彎。
「好啊，你想點鬥？」反正依家又悶悶地，我又無咩好輸既，一於鬥番場！
「……」我望住眼前既啤牌，真係無野講。
「你……」我指住D啤牌，按捺住心中既怒火咁問 : 「你想鬥啤牌？」
「無錯！」條友仔好撚有自信咁講 : 「我地一於鬥Show Hand！」
屌，條友係咪智障，我仲竟然陪佢癩……
「咳咳……Miss Crystal~~~」我知道Crystal今日負責巡樓，所以係度大叫，希望呼喚佢過黎捉玩啤牌。
「屌你唔夠我做走去叫雞？」個大隻佬好驚咁講。
「屌……係吹雞呀！」我當堂笑左出黎，跟住其他人都笑埋一份。
條友又柒左，所以好激動咁推開晒d人，離開左班房。
D花生友見無野睇，紛紛「chur！」左一聲，然後就散晒band。
「哈哈~~~條友係咪黎搞get架！」蛋撻係我隔離笑到碌左落地下。
「哈哈哈~~~」呢一把勁大聲既笑聲，係我後面不斷咁傳出。
我一拎轉身，就發覺笑聲係黎自芷翹身上！
「哈哈哈~~~！我笑到透唔到氣喇……」芷翹笑到彎晒腰，臉上既笑容好天真，好可愛。
我行過去芷翹身邊，督一督佢講 : 「喂，你笑到好誇張啊傻妹！」
「咁真係好好笑麻！」芷翹嘗試收番細d笑聲，然後望住我。
佢繼續講 : 「不過呢……邊個俾你插旗架！」
芷翹扮晒嬲咁一路講，一路搣住我塊面。
「無架，我只係將心裡面最真既說話講出黎咁解！睇你個樣……好介意咁喎！」我順住芷翹既劇本繼續行。
「哼，唔只介意，係超超超超超介意！」芷翹同我對望住，雙目傳遞住一份好溫暖既情感。
「我介意……」芷翹臉上泛起微微紅粉。
「我介意，你唔親口同我講！」
最後，呢個午膳時間就係打打鬧鬧中渡過。
啊，聽講呢，
個大隻仔之後一直都keep住俾人取笑，最後頂唔順退左學。
好似係。
有人話時間過得最快既，就係高中既生涯。
我一直都深信住呢句說話，因為我總係覺得，日子一點一滴咁好快就流走左。
自陸運會以黎去到依家，貶下眼又過左兩個月。
清爽既秋天，慢慢咁變成左寒冷既冬季。
之但係咁樣，亦都無阻我同芷翹之間溫暖既關係。
「好凍啊~~~」芷翹係我身邊訴苦道。
今日係十二月頭既一個星期六，我約左芷翹出旺角行街。
「咁洗唔洗我攬下你，幫你取暖呀？」我故作淫賤咁講。
「妖！咸濕仔我先唔要又俾你抽水！」芷翹推開我，但係臉上就掛住笑容。
我同芷翹雖然仲未開始情侶關係，但係曖昧既程度就已經爆晒棚。
不過呢我就係正人君子黎，所以拖手同kiss呢d情侶做既野我都未做過！
Er……攬芷翹個單野就另計啦……哈哈！
「咁……咁樣得喇掛？」我叉起左手，示意芷翹撓過黎。
「咁就差唔多！算你啦！」芷翹兩隻手環抱式咁撓住我隻左手，成個頭挨左落黎我肩膊上然後繼續行街。
我望住身邊可愛既芷翹，心中暗下承諾 :
平安夜我就要正正式式咁同芷翹表白，令佢成為我既女朋友！
「咁多位同學，聖誕假之後就係期中考喇，唔知你地開始左溫書未呢？如果溫書溫到悶既話，不如搵d節目放鬆下自己！黎緊12月23日係九龍灣展貿中心將會舉行一個200多間聯校既聖誕舞會，陪伴大家踏入平安夜，希望同學能夠踴躍參與！詳情如下……」
今朝早會既時候，學生會會長係到呼籲同學參加佢地個聯校ball。
「阿珞，你有無興趣去玩下？」
小息既時候蛋撻走過黎我個位到問我。
「乜去ball唔係淨係為左溝女架咋？我都有芷翹啦仲去黎做咩！」我同蛋撻講。
「咁你去溝芷翹咪得囉！」
「下？」
「即係叫你約芷翹去ball呀屌你！你試諗下幾可會有呢d盛裝舞會先得架！而且裡面d氣氛又咁好，咪當留個回憶囉實無死架！」
「你又岩喎！好啦等我問下芷翹先！咁你呢你去唔去？」
「廢話梗係去啦！識囡囡係我本份，食囡囡係我責任！」
於是乎我就係lunch break個陣落左樓下搵芷翹。
我一行到去4C班房門口，就有個樣貌端好既女仔行左出黎。
「你搵邊個架？」佢一路講，一路挺起個身阻住我睇班房裡面既情況。
「ER……我搵歐陽芷翹架，請問佢係唔係到？」
此起彼落，我一講完句野姐，條女就發晒狂咁對住班房大叫 : 「芷翹條仔黎搵佢呀！！！」
依家D香港人……
裡面D人聽到之後，都望晒過黎我到。
「咦，又幾靚仔喎，等我做佢SP先！」
「佢咪就係單手游出公海，淨係用手指尾都打到大隻佬殘廢個個！？」
「佢唔係藝術小王子咩？攞國際賽冠軍，俾愛迪生收做徒弟個個呀麻！」
屌，實在太多吐糟位，你要我點答你地呀！
我一於決定無視呢班唔知係咪同青山病人調轉左既學生，專心尋覓我既芷翹。
「搵我呀傻佬？！」芷翹突然間係我後面出現左，雙手拍落黎我肩膊上，搞到我嚇左一嚇。
「喂，你班同學好Hyper咁喎……」我望一望班房裡面係咁「wow~~~」既個班人，再望番住芷翹。
「哈哈……佢地係咁架喇，唔洗理佢地！」芷翹尷尷尬尬咁講，然後拉左我去走廊既石壆到。
「你今朝有無聽早會？」我問芷翹。
「我咁岩去左幫miss攞野所以無聽到啊，做咩？」
「佢地話黎緊12月23號晚會舉行個聖誕ball，所以呢……」
我都未講完，芷翹就爭住講。
「oh！！！我未去過ball架，不如一齊去啊！！！」芷翹好興奮咁講。
有無咁順利呀！感謝主！
「好呀好呀，我就係想邀請你去！」我即刻答番芷翹。
「之但係……我無咩靚衫係屋企……」芷翹望實我，然後講 : 「不如你搵日陪我去買！」
「噢……好啊……」我勁臉紅咁講。
即係其實我就同芷翹出過好多次街架喇，但係特登為左買衫而出街就係第一次！
而且……仲可以見到芷翹係我面前換衫……啊唔係，應該話可以見到佢換完衫個靚樣先岩，嘻嘻！