《妳做咩將成碗譚仔倒落我個頭上面！？》: 第十三章(下)
「司徒珞先生！」芷翹既叫喚聲，將我由回憶中抽離。
我望一望周圍，啊，原來我地仲係企左係跑道上面。
「做咩發晒呆咁啊，係咪又諗囡囡！」芷翹跳左係我面前，個樣有D似係嬲咁一野吱落我條腰到。
「哈哈哈唔係啦~~~！」我俾佢吱到係咁笑，連忙解釋 : 「我只係諗番起前年自己跑4 X 400米贏冠軍姐哈哈哈~~~！」
「原來你有跑步架？」芷翹停左手，好驚訝咁講。
「搞錯呀！我呢兩年分別跑左四四同埋個人四一喎！仲要全部有獎攞架，你無聽過司令台叫我個名攞獎架咩！」我沒好氣咁講。
「哈哈…係咩…我無乜點留意……」芷翹用左手R住頭，然後伸一伸脷咁講。
「咁都無留意！罰你俾我吱番！」我伸出雙手，然後一野吱落去芷翹到。
「唔好啊我好怕……哈哈哈~~~！」我無示芷翹既警告，係咁吱係咁吱，搞到佢笑到就黎無氣。
「哈哈哈~~~停手呀喂哈哈~~~！」芷翹一野黎個反攻，吱番落我到！
因為我無預計佢吱落黎既關係，隻右腳一時企唔穩，踩左落芷翹到。
點知個下芷翹咁岩縮腳，搞到我失左平衡，成個人撲左落芷翹到！
芷翹根本受唔住我既體重，所以我同佢好順勢咁趺落地下。
我將本來吱緊佢既個對手抱實佢雙腰，然後黎個180度轉身，將自己既位置轉左做先落地個個。
「呯！」我背脊撞左落地下，好彩係跑道上面唔多痛。
「SORRY呀你無事啊麻……」當我一睜開眼既時候，我發覺眼前既芷翹同我非常近！幾乎係臉貼臉、嘴對嘴！
我對芷翹依家既動作，就係女上男下，然後訓左係跑道。
芷翹既身體同我完美咁貼合住，由胸部去到大腿，再去到小腿，都係我地肌膚既接觸。
咪住咪住，胸部之間係有衫架，哈哈。
係芷翹身上個種清新淡幽既味道，嗅起上黎就好似香水百合咁，不斷傳入我既鼻子裡面。
「嗯…？」芷翹雙眼同我對望住，臉頰早已經變得通紅，而口裡面則好似有D野想講，但係又講唔出咁。
我地維持左呢個動作成十幾秒，期間一路對望住，嗅住對方既香味，感受住彼此既體溫。
「噗噗~~~噗噗~~~！」我已經分唔清，呢個係我既心跳，定係芷翹既心跳。
望住眼前既芷翹，我唔知點解覺得周遭既野都停晒咁，而且仲Blur朦晒咁，只有芷翹係彩色、識郁既。
我慢慢將頭向前哄，而芷翹都好配合咁，慢慢挨落黎。
我地既臉，越貼越近。
我地既嘴唇間，仿佛只係得番紙張咁薄既距離。
「喂！你地係到做緊咩！！！」
突然間，一句說話由入口處傳黎，將我同芷翹喚醒番！
我地慌忙咁彈番開企番起身，然後望向聲音既來源。
「哈哈哈，唔好意思喎，阻住你地添！」蛋撻係到喪笑。
屌咩！你個死人蛋撻！！
我一野衝左過去，箍住蛋撻條頸。
「嘩嘩嘩抖唔到氣！呀嫂救我呀喂！」蛋撻係痛苦之中，都不忘要抽我地兩個水。
我望向芷翹，點知佢咁岩又望過黎！
我地眼神接觸之後，我Feel到自己個身又變得滾燙起黎，而芷翹更加係紅都臉晒。
芷翹勁快咁避開我既視線，然後左望右望咁講 : 「丫……我…都係上番看台先喇！」
講完之後，芷翹就雞咁腳跑左上去藍社所屬既看台位置。
我都放番開蛋撻，然後同佢一齊上番黃社既看台。
「喂，你地做咩進展咁快！！岩先如果無我，你地KISS左啦！」蛋撻一坐低，就係到嘲笑我。
「你都知呢？無你就咀左喇仆街！！！」我勁激動咁講。
「車，我係幫緊你咋！你之前係咁同我講話唔係中意芷翹，我廢事你用下體諗野，行差踏錯咋！」蛋撻勁有說服力咁講。
「啊……係喎……」
蛋撻唔講起，我都唔記得左原來自己之前講過，話只當芷翹係妹妹。
咁究竟我依家對芷翹係點架呢？
的而且確，我對芷翹非常有好感。
芷翹好靚女，性格開朗得黎又可愛，甚至可以用萌黎形容 ; 加上每一日都同佢有獨處既時間，令我覺得彼此間已經有D共同秘密咁，感覺上好親密。
最後再加埋岩岩個野，真係通晒電！
不過，我對芷翹既認識又有幾多呢？
佢係一個點既人我唔知 ; 佢中意D咩我唔知 ; 佢有咩興趣我唔知 ; 佢屋企情況係點我唔知。
而且最重要既係，佢中唔中意男仔，中唔中意我，我唔知。
當然啦仲有一個好大既問題就係，
我個心裡面仲有阿娜。我唔知道放多個芷翹落去心中，會唔會係一個錯誤。
或者，我會將阿娜既影子放左落芷翹身上，咁樣佢芷翹好唔公平。
我唔希望再傷害任何一個女仔，特別係芷翹。
所以，
「做得好呀蛋撻！我差D就行差踏錯！」我拍一拍蛋撻膊頭。
「你真係咁諗？你真係唔中意芷翹？」蛋撻問番我轉頭，搞到我一頭霧水。
「喂，你究竟係咩立場架！」我問蛋撻。
只見佢嘆左一口氣，然後對住我講 : 「我岩先制止你地，然後再問你係咪中意芷翹，其實都只係想俾個機會你反思下自己內心既真正心意。」
「所以我好想知既係，你反思完之後，都仲係覺得自己唔中意芷翹？定抑或係因為，你心裡面仲有阿娜？」蛋撻好語重心長咁同我講。
果然做左五年既兄弟，無野係瞞得過蛋撻。
不過，我已經決定左，依家既關係，對大家係最好。
「嗯，我當佢妹妹姐。」我望向天空既遠處。
「咁……你諗清楚就最好啦。」蛋撻抖左啖氣，繼續講 : 「你要知道好似芷翹呢種女仔，身邊一定不乏追求者。因住俾人捷足先登啊。」
「哈，到時先算啦。」
我地兩個望住個天，開始好感慨咁，
講番琴日打RANK俾人雷到跌牌既情形。
好快陸運會就開始左。
大忙人既蛋撻由於參加左勁多比賽，所以基本上係唔會上番看台陪我。
不過呢五年黎咩都慣晒啦，所以我又係自己一個孤獨咁坐左係看台到。
「喂！」蛋撻係賽道叫上黎。
「咩啊？」我問。
「一陣間你跑完4 x 100米初賽之後就係放飯時間喇，我係門口對出個馬路等你，你行過黎啦！」蛋撻講。
啊係喎，唔提一提我都唔記得自己參加左個人四一添！
於是乎我就係看台坐到11點幾，然後行過去報到處。
結果好快就跑完啦，我就以第二名既資格晉身聽日舉行既決賽。
換番對波鞋之後，我就徐徐咁行出去馬路口搵蛋撻食lunch。
行出去既時候，我個腦唔知點解又浮現番今朝同芷翹既畫面，仲有佢同我對望既情景。
「嘻嘻！」一諗到芷翹個臉紅樣，我嘴角竟然不自覺咁上揚起黎，露出一個真摰既微笑。
我諗隔離d路人望到我傻笑，應該會以為我係智障。
「你搞咩呀，全日都心不在焉咁既？」見到蛋撻之後，佢無啦啦同我講。
「下？我有咩？」我講。
「梗係有啦！你擺左個含春樣出黎成日喇！」蛋撻笑我咁講。
「傻啦我點會！」我扮晒蟹咁收番埋個笑容。
「唉唔知你喇，又要唔中意人，又要含春！」蛋撻講完之後，就扯左我去一條小巷既西餐廳食飯。
坐低叫左野食之後，蛋撻又繼續問 : 「咁你今日有無再去搵芷翹傾計呀？」
「無啦，佢今日要做計時員啊，邊有時間招呼我。」我答完之後，先突然get到個重點。
「況且！」我連忙解釋 : 「況且我做咩要無啦啦搵芷翹！we are only friend okay？」
「你點話點好啦，你明白自己諗緊咩就得架喇……咦！？」蛋撻講講下，無啦啦窒左。
「搞咩呀你，」我問蛋撻
「無啊，你個『friend』係個邊同個靚仔食緊飯之麻！」蛋撻講完之後，用眼神示意我望去佢12點鐘既方向。
我一拎轉面，就見到芷翹係對面個間餐廳裡面！
但係最可怕既係咩？就係佢對面坐住左一個著便服既美男子！
呢個美男子，望上去比其他男生仲要白晢，眼睫毛濃密而修長，真係好有韓國d明星feel。
我望住芷翹同佢有講有笑咁，真係O撚晒嘴。
而且，仲有一陣陣既酸意係心裡面徘徊。
個種感覺，就好似覺得芷翹背叛左我咁，又嬲又苦。
「個個男仔你識唔識得佢架！！？」我拎番過黎望住蛋撻，好緊張咁講。
「痴線我鬼識咩！睇佢個樣咁靚仔，如果係我地學校既學生既話，一定會好出名啦，仲點會唔識佢！」蛋撻串番我轉頭 : 「況且，芷翹既野你一定熟過我啦，係咪先！」
唉，蛋撻呀蛋撻，其實我同芷翹唔算超熟架咋……
結果我一路食飯，一路就係到昅實芷翹同個個美男子，成個變態佬咁。
「喂佢地走喇！」蛋撻示意我去追佢地先，佢去埋單。
「唔該晒老友！」我拍一拍蛋撻膊頭，然後跟隨住前面兩人既背影。
跟下跟下，就去到西貢巴士總站。
我繞過左個草堆，係樹後面偷望住等緊車既美男子，同埋陪佢等車既芷翹。
突然間，個美男仔哄個頭埋佢芷翹到！！！
唔準呀屌！！！！
我心裡面雖然已經講晒粗口，但係奈何自己又做唔到d咩，惟有繼續係樹後偷望。
個美男子哄左個頭去芷翹耳邊唔知講左d咩，跟住芷翹就笑得勁開心，然後調番轉對住個美男子咬耳仔。
屌呀！！！！好嬲呀！！！！
唔知點解望坐芷翹同其他男仔咁親密，我居然覺得好憤怒，而且好想當場將條美男仔撕開兩邊。
正當我暗自詛咒緊條美男子俾巴士車死既時候，有個巴士駛左埋黎，然個美男子都準備上車。
就係上車前一刻！條美男子一野攬住左芷翹！！
屌！忍無可忍呀！
我一個箭步諗住衝出去打鳩個咸濕佬既時候，身後突然有股力壓住我。
我一轉身望，就發現係蛋撻。
「睇埋先啦，唔好咁衝動！」蛋撻勁大力咁壓住我，搞到我行唔到。
我望番住芷翹，佢俾個美男子搞到郁都郁唔到。
芷翹呀！大聲喊唔好啦！我會黎救你架！！
可惜，最後芷翹都係無喊到，條仔攬完之後就準備上車。
係美男子踏上巴士既一瞬間，佢既視線望左過黎我呢邊，仿佛我同佢既眼神接上左一樣！
然後，佢竟然望住我笑左一笑！！
屌！佢唔係見到我下話？唔通佢岩先做既野係做俾我睇，諗住插旗？
你條仆街！！！
番到運動場之後，我想即刻搵芷翹問清楚，究竟條仔係邊個！反正我今日既問答機會都未用！
可惜我搵極都搵唔到芷翹，然後下晝既比賽又準備開始，所以惟有遲下先。
我係看台上面，終於發現到芷翹！
佢坐左係終點附近既計時區，為黎緊既跨欄比賽作準備。
望住芷翹既背影，我忽然好有衝動落去搵佢！！！
我係看台上面來回踱步，最後都係決定落去。
「110米跨欄最後一次召集，請參賽者到召集處報到……」
我行左去芷翹背後，深吸左一啖氣，然後拍佢既膊頭。
芷翹一拎轉面發覺係我之後，臉上白滑既肌膚泛起左微微既淡紅色。
「芷翹，我有d野想問你。」我忍耐住自己既著急，對住芷翹講。
「但係比賽就開始喇……」芷翹眼尾望一望已經就定位既裁判，再望番住我。
「不如咁啦，我地今日一齊走好無？」我唔想俾機會自己亂諗野，所以想越快解決越好。
「嗯？！」芷翹聽到之後，臉上既紅光變得更加明顯。
佢支支吾吾咁講 : 「好啊……咁……你一陣係門口等我啦！我執埋D手尾就黎！」
「好啊，我一定會等你！」我講呢番說話既時候，其實係有雙重含意。
就係咁，我頭也不回就拎轉身上番看台，等待放學。
終於！心急如焚既我終於都等到放學喇！
我同蛋撻講聲再見之後，就行左去門口等芷翹。
「喂！SORRY啊等左好耐呀？」過多左一陣之後，芷翹就係門口出黎，然後走過黎同我講。
「無所謂啦，你肯陪我放學我已經好開心！」
我一方面真係因為係芷翹陪我放學而覺得好開心，而另一方面就係因為可以解答心裡疑問而開心！
「係呢，我有D野想問你……」正當我諗住直搗黃龍既時候，芷翹突然開口截停左我既說話。
「我想去M記食抹茶雪糕！」芷翹好興奮咁講，然後就撓住我隻手行！
發生咩事！？做咩無啦啦撓我隻手！
你知唔知道，咁樣會搞到我好亂架，明明岩先先同個美男子攬埋一舊……
之但係我又好撚享受依家呢個動作喎！好矛盾呀師父！
係呢一程麥記路上，芷翹一直都撓住我隻左手，然後一輪嘴咁講岩先陸運會D趣事，又問下我跑成點咁。
雖然我一直都想搵機會問佢岩先LUNCH既事，但係又唔想咁快完結呢個咁美好既時光。
就係咁，我地去左麥記一人買左一杯雪糕，然後舔住行去往觀塘既小巴站。
「好好味啊~~~！」芷翹食得勁開心，個嘴角仲痴住左D綠色既雪糕。
「你食到好污糟呀！！」我笑住咁指住自己個嘴，希望示意俾芷翹睇污糟既位置。
「係咩？邊到啊？」芷翹整極掂都唔中，成個姿勢好搞笑。
「呢到啊傻瓜！」我伸左隻右手出黎，輕輕放落芷翹既臉上，為佢拭去污痕。
咦！我係到做緊咩！！
我做完呢下動作之後，先發現自己過左火，搞到同芷翹好似情侶咁！
芷翹望住我隻手，之後塊面又紅起上黎。
「唔…唔…唔該晒……」佢怕怕羞羞咁講，加上水汪汪既眼睛，真係好吸引！！
或者係因為望到呢個咁可愛既芷翹關係，我個身都不自覺咁滾燙起黎。
「嗯…嗯……」我尷尷尬尬咁答芷翹。
好快就有小巴，我地坐左係尾二個排雙人位到。
再唔問就無機會喇！
「係呢芷翹，」我故作輕鬆咁講 : 「今日個問答機會好似未用啊可？」
「係喎係喎！你問啦你問啦！」本來有D眼訓既芷翹係聽到我講之後變得好興奮。
「其實係咁既……」
雖然好難問出口，但係都要頂硬上架喇！
「其實係咁既！我想問你同今日個個男仔係咩關係！」
講完之後，芷翹竟然唔係我想像中咁驚訝或者係詫異，而係係到傻笑。
「哈哈~~~」芷翹笑到收唔到聲，仲挨左落我手臂到。
「你…你…你笑咩喎！我認真架！」我推番正芷翹個身體，望住佢講。
「喔~~~佢啊，佢咪我男朋友囉！」芷翹笑住咁講。
咩話！！！！？
我簡直唔敢至信，係我身邊呢個芷翹原來已經一早有男朋友！
但係點解佢又要痴住我呢？又要撓我隻手？
唔通佢想收我做兵？！
嗚呀！唔好呀！！
係我思緒極其混亂之際，芷翹既笑聲又再一次喚番醒我。
「哈哈~~~你真係好可愛呀司徒珞先生！」芷翹笑到勁大聲，係車上面既人都望過黎。
「喂，邊忽可愛呢請問！仲有呀一D都唔好笑囉！你笑得好大聲呀，D人都望晒過黎喇……」我既心情真係可以話係趺到谷底。
「好啦好啦，我唔笑囉！」芷翹收起番佢既笑聲，但係臉上既笑容越見燦爛。
洗唔洗呀，一講起佢男朋友就咁開心！
結果，成程車我都再無同芷翹講過野，淨係一味咁沉思。
點解呢？點解我個心會咁痛架呢？
我明明就仲中意阿娜架，但點解對住芷翹既時候，又會咁開心咁心跳加速架呢？
唔得架，我唔可以三心兩意！我仲中意阿娜架，我唔可以當芷翹係代替品咁愛！
之但係……我又好想芷翹係我身邊……好亂呀！！！
諗下諗下，車就到站喇。
我陪芷翹行番去佢屋企樓下，然後先番去屋企。
不過中途就算芷翹點聊我講野，我都無咩心情應機，只係「嗯」「哦」了事。
終於都去到佢樓下。
唉，唔知道佢男朋友平時係咪好似咁樣送佢番屋企架呢？
「喂，你洗唔洗咁頹啊！」芷翹又彈左係我面前講。
唉，我唔只頹，我係酸，我係苦，我係亂呀！！！
「無啊我無頹喎。」我裝作漫不經心咁講。
芷翹望住我，一步一步咁行前，近到我一攬落去就可以將佢收入懷抱中。
「你……係咪因為聽到我話有男朋友，所以咁頹？」芷翹進一步向前行，令到我地既距離只淨低一隻手臀咁短。
「我…我…我……」俾芷翹講中左既我，一時間答唔上。
「咁……」芷翹抬起頭同我對望，好溫柔咁講 : 「咁如果……我話你聽，我其實無男朋友呢？」
「下！？」
我仲未消化到芷翹既說話既時候，芷翹突然間伸出雙手，勁大力咁搣我塊面。
「我話呀！我無男朋友呀！」芷翹笑得好開心咁講。
「咁…咁你岩先又話個個男仔……」
我都未講完，芷翹就爭住黎講 : 「乜你真係覺得佢係男仔咩？！哈哈~~~」
「下下下！？」喂大佬，你UP乜春呀？點解我一D都聽唔明既？
「咁都好既，等我將你個反應同番家姐講先！佢一定會好開心，因為又多一個人當佢做男仔！」
「咩話！？」我今日已經唔知第幾次講呢番說話，搞到驚訝到好唔驚訝。
SOR，我都唔知自己講緊咩。
因為真係太震撼喇！！
「你意思係話，頭先個個男仔，啊唔係，係女仔，其實係你家姐？」我嘗試組織好一切。
「好彩你都無嚇到思緒混亂！無錯喇，你岩左！」芷翹好興奮咁講。
「乜原來你有家姐架？喂唔係喎咪住先，點解家姐要當街攬細妹呀！仲有佢做咩會係個到，仲有佢真係好唔似女仔囉！」我發晒狂咁連珠發炮，係咁將心裡既疑問講出黎。
「你冷靜D先啦傻瓜！你依家咁慌張既樣真係好好笑！」芷翹係到傻笑。
佢繼續講 : 「我家姐呢其實係我爸媽離婚既時候就跟左老豆住架喇，所以我同佢係中學開始就分開住。」
「不過自從佢跟左老豆住加升上中學之後，就開始轉行去TB路線。本身我都唔慣架！不過之後越望越順眼，仲覺得佢好靚仔！於是乎我就接受左呢個男仔頭既家姐。」
「至於佢同老豆其實住西貢既，所以今日咪順便搵佢食飯囉！」
「不過呢，」芷翹用好輕挑既眼神望住我講 : 「不過呢，食食下飯個陣家姐話有兩個咸濕佬係咁望我，於是我一抬頭就望到有個黑晒臉既司徒珞先生囉！」
「之後我咪同家姐夾計，睇下呢個笨蛋會唔會上當，當左家姐係男仔！」
「足之呢~~~事實證明左，有個人好傻咁俾我玩左成日！」
我聽完之後，呆晒咁望住芷翹。
「做咩啊，你唔信呀？」芷翹笑住咁講。
「咁……真係好難相信既……」雖然我把口係咁講，但係其實……
我好撚開心呀依家！！我先唔理真定假喇！！
總之佢話未有男朋友，我就乜都得架喇！！
咦唔係喎，我咁樣即係點啊，唔通佢無男朋友我就追佢咩。
之但係我依家又真係好開心呀！！
唔知係咪太開心關係，我竟然不自覺咁笑左出黎。
「嘻~~~」我強忍住笑，但係都係泄左道氣出黎。
「喂喂喂，做咩笑得咁淫！」芷翹雙手叉腰扮正經咁講，但係臉上既酒窩早已經出賣左佢開心既心情。
「咩喎我先無笑！」
講完之後，我同芷翹再次對望住。
不過唔知點解，今次既眼神交流比任何一次都要黎得溫暖、黎得曖昧。
嗯……除左運動場個次，哈哈！
望住眼前既芷翹，我腦海裡面所有壓制住自己既思想突然間消失得無影無蹤。
我控制唔到自己，一步走上前，將芷翹攬實。
「你又抽我水，今次係第幾次啊……」芷翹口中雖然好似鬧緊我，但係語氣卻非常溫柔。
「今次唔同D，」我將芷翹攬得更實 : 「今次，我係真真正正咁攬住歐陽芷翹，唔係陌生既女仔，唔係唔小心，更加唔係任何人既代替品。」
雖然我自己心裡面係點諗，我都仲未搞清楚。
但係我講既呢一番說話，百分百出自真心。
今次，我好想攬住既係芷翹，唔係阿娜。
「咁……」芷翹好怕羞咁講 : 「我呢就唔係隨隨便便俾人攬架，除左家姐之外，我先唔會亂黎！所以……機會難逢，你要攬既話……就攬緊D喇。」
講完之後，芷翹伸出雙手，攬番實我。
「好啊。」我將右手跨過芷翹身後，按住佢個頭並將佢拉入懷中。
唔知道我地攬左幾耐，亦都唔知道係邊個放手先。
總之，我地就好似有共識咁分番開。
「咁……我番上去喇。」芷翹低住頭講。
「嗯……好啦，聽朝見喇。」我望住眼前既芷翹，忽然覺得有D內疚。
我搞到好似好曖昧咁，而且仲要攬埋芷翹。
但事實係我連自己心屬何處都未清楚。
不過至少，我依家可以確定既就係，
我中意芷翹。
芷翹拎轉左身，慢慢咁行番屋企。
「芷翹！」
「嗯？」
「不如……去譚仔食麵？」
「又想我扔你麵啊！？」
「哦……好啊。」
「哈哈！傻瓜。」
『光陰不會往後退，應拋開傷心憶記。』
*******************************************************************