《妳做咩將成碗譚仔倒落我個頭上面！？》: 第十三章(中)
***********************************************************************
「下？」足球隊教練一聽到阿娜講話我想落場之後，好驚訝咁講。
佢繼續講 : 「但係我地本身呢就已經齊晒人，無啦啦俾阿珞上場好似唔係幾好咁……」
「算啦阿娜，教練講得岩既，下年先啦！」我係阿娜耳邊偷偷地咁講，然後捉住佢前臂諗住拉佢走。
點知阿娜竟然企左係到唔肯郁，然後繼續同教練講 : 「求下你俾一次機會阿珞呀，佢真係好想好想落場比賽架！」
之後，阿娜係咁用言語攻勢，又哄又讚咁話教練好靚仔、英姿凜凜。
終於，
「咳咳……」教練清一清喉嚨，繼續講 : 「咁啦，我知道有個隊員唔多想跑既，一於就阿珞你頂上！」
我同阿娜係司令台上番去看台，然後搵左個位坐低。
「其實呢，」我將心裡面既疑問講出黎 : 「其實點解咁想我落場既？」
阿娜佢望一望我，然後仰頭望向天空。
今日既天空好靚，太陽高高咁掛係蔚藍色既畫布上面，一片片白色既薄雲仿佛為單調既顏料上增添一點點既美感。
「我都唔知啊，」阿娜繼續望住天空，但視線早已經隨白雲飄到遠處。
「或者，」
「或者係因為，我想爭取多一個機會，去令你表現自己多一D。」
「亦都俾個機會我，」
「去欣賞你多一D。」
*******************************************************************
「下一站係 彩虹，NEXT STATION IS 彩虹 (唔識串) ……」
我望一望隻錶，依家係7:30分！
「咁早黎到，應該無死掛……」我心裡面一路諗，一路對住地鐵個車門喪照鏡喪摷頭。
你地問我做咩咁緊張？梗係啦！今日同芷翹一齊去西貢運動場呀！
咦？係喎，只不過係同芷翹姐，點解我會咁緊張既？
諗下諗下，我就出左閘，行去出口。
突然間，有人係我後面伸左對手出黎，搣左落我塊面到。
「估唔到你咁早架喎！」芷翹係我後面彈左出黎。
「咁你都好早姐！不過洗唔洗連招呼都未打就搣我呀小姐！」我拎轉身望住佢。
芷翹今日著上左藍社既運動服，係白色既PE衫裡面隱約透出佢窈窕既身段 ; 而佢今日既馬尾亦都比平時紮得更高，睇起上黎更加配合到運動型既裝扮，感覺好清新。
「搣你咪就已經係同你打招呼！」芷翹扮到勁細路咁講呢句，搞到我笑左出黎。
就係咁，我地就行左去等一架開往大埔……呀唔係，一架開往西貢既小巴。
好彩我同芷翹早左好多就黎到彩虹，所以好快就有車。
係車上面，我同芷翹都係好ON J咁傾下D無聊野，然後就到左。
「嗯啊！！」芷翹一落車，就伸左個大懶腰。
「西貢呢邊既空氣真係好正呀！！！」芷翹係到大叫，似足一個去緊旅行既小朋友咁。
「有無咁誇張呀！」我笑一笑，然後學佢咁深呼吸一下。
嘩！D空氣又真係好鬼死清爽！
「好爽呀！」我學芷翹咁喊。
「哈哈識話人唔識話自己，你咪又係咁誇張！」芷翹笑番我轉頭。
我地笑下傾下咁，就去完麥記食左個靚早餐，然後行去運動場。
我地由運動場既入口走入去，行到跑道上面。
我抬起頭，望向遠處。
今日既天空，好靚好靚，碧藍而雪白。
就好似中三既個一日咁。
*******************************************************************
「以下落黎，係學會比賽4 x 400最後一次召集，請各位參賽者到看台右手面集合……」一把響亮既廣播聲音，令本來係看台上坐立不安既我更為之一嚇。
「唔係掛，洗唔洗咁快到我……」我心裡面不斷咁盤算住。
「喂！到你喇！」阿娜行左過黎，拍一拍來回踱步緊既我。
或者阿娜見到我好緊張，所以鼓勵我話 : 「一陣間唔洗咁緊張架！當上PE堂咁跑就得！我知你平時耐力跑都係頭幾名架，所以唔洗驚！」
唉，依家都濕撚晒囉，惟有係唔撚驚啦。
咦唔係喎！
「等等！」我係思考中驚醒左過黎，繼續講 : 「點解你會知我耐力跑係頭幾名既！？明明我地都唔同班！」
阿娜聽到之後，好似知道自己講多左咁，即係紅都臉晒，勁可愛！
「哈哈…哈哈…」阿娜尷尬咁係到笑。
佢繼續講 : 「因為……我轉堂上生物室個時，你地就咁岩上PE堂，所以咪見到……拿拿拿！咁岩見到架咋！」
「做咩咁留意我~~~」我扮晒輕挑咁對住阿娜講。
「咩喎！我先唔會留意一個肥仔囉！」阿娜撓起雙手係胸前，扮嬲咁講。
「知道喇知道喇，咁岩望到呀麻係咪~~~？」望住阿娜鼓起泡腮既樣，真係笑左出黎。
而係呢個時候，我希望係暑假減肥既呢個構思，亦都開始慢慢萌芽。
阿娜走左去我後面，推左我過去集合處。
報完到加埋坐左一陣之後，我地呢回合既參賽者終於都要落去跑道！
「加油加油！」阿娜係我身邊做左個fighting既手勢，目送住我落去。
雖然話因為有阿娜幫我打氣，所以個心定左少少，之但係都仲係驚到腳震震。
喂呀大佬你估我想架咩，我十六歲仔都未試過咁樣落場跑架，仲要對住咁多人……
我望一望身邊既人，
嘩屌！原來除左足球隊既參賽者 (我、蛋撻、兩個雜卒) 之外，其他學會好似游泳隊籃球隊咁，裡面個個都鬼死咁大隻。我呢個肥仔比落去簡直係小毛見大毛、朱茵見魯芬。
落到去，我換左對係學社到借番黎既釘鞋。
唔講你地唔知，原來著左釘鞋之後，真係會自信爆棚，有種打不死既感覺，哪怕係件戰衣已經打鬼凹晒。
係呢個時候，蛋撻走左過黎拍拍我 : 「喂，唔洗驚喎，望住個終點喪跑就得架喇，我跑咁多次第一都係用呢招架咋！」
屌，蛋撻兄，你即係玩鳩我姐！照你咁講，唔通肥仔望終點跑，就可以跑得快過望地下既保特！？
不過咁，我都知蛋撻其實都係想鼓勵我姐，所以我都廢事串佢，而且仲覺得幾感動。
「得啦屌，光速強都唔撚係我對手！」我拍拍心口。
好快，所有第一棒既人都就晒位，而好似我呢d跑第三棒既，就要係草地上面等第二棒接力之後，即刻補上起點既位置。
我企係草地上面，望向看台既方向。
「籃球隊，啪啪啪！籃球隊，啪啪啪！……」支持唔同學會既打氣聲，不斷係人群湧湧既看台上面傳出。
不過我搵極，都係唔見阿娜既蹤影。
「係邊呢……」
係我心裡面暗自忐忑既時候，跑第四棒既蛋撻突然係後面拍一拍我膊頭。
「喂，做咩分晒心咁呀，專心d啦就開始！」
「嗯嗯，你又岩既。」的確，我唔可以再分心架喇！
「黎啦！足球隊必勝！加油！」蛋撻係到大喊。
「好！」我同第二棒，仲有企係跑道既第一棒一齊係到喊。
我拍一拍自己既臉，然後望向裁判。
「on your mark，get set……」
係呢番說話之下，第一棒既參賽者都已經各就各位，做好預備姿勢！
「get set……go！」「嗶~~~！」
一聲令下，所有健兒立即起跑！
所謂4 x 400米，其實就係4個100米。
屌！我唔係講緊廢話架！
我既意思係話，跑既方法，就係4次100米咁跑。
即係點？即係爆足全場！
所以一開跑，大家已經搏晒老命去衝！不過我地既第一棒雜卒A實在係太慢，係5隊之中跑第四。
「屌！唔係咁快就輸下話！？」我暗自叫苦。
突然間！呀A無啦啦爆大技，追過左第三，變左第二！
呀唔係，變左第三。
「加油呀呀A！！」我同蛋撻係終點 (亦即係起點) 到聲嘶力竭咁大喊，而呀B就去左第二棒就位。
呀A終於跑到過黎！佢同呀B交左棒之後，就行左過黎講 : 「對唔住呀大家！我跑慢左！」
蛋撻拍一拍佢膊頭，同佢講 : 「唔洗怕！你落後幾多，我同阿珞就追番幾多！」
望住蛋撻，佢真係好有領袖風範。如果我係女仔既話應該都會中意呢type。
俾蛋撻講兩講之後，我同A都變得士氣高昂起黎。
「殺佢老母！」我地三個係到大叫。
「第三棒請就位，」裁判宣佈。
終於到我喇！！
係呢一刻，唔知係咪受到濃厚既氣氛影響，我已經無左驚惶，反而覺得好興奮。
我同蛋撻呀A攬左一攬之後，就踏上這無盡旅途。
我走到所屬既位置上，轉身望一望呀B。
只見到第二棒既人已經跑左超過半個圈，而呀B就維持緊第三，不過第一第二名已經跑左3/4，就黎跑到我身邊。
「死啦，點追呀……」雖然以現在既情況落去，要攞個銅牌一定無走雞，但係我地足球隊邊到只係想要個銅牌咁簡單！
而且就好似阿娜咁講，呢個係一個機會，俾阿娜佢更欣賞我！所以我一定要盡力跑，有咁快得咁快，做第一！
不過當一諗到阿娜，我就再次係望向看台，希望掃視到阿娜既身影。
可惜，仍然係見唔到。
就係我掛住望既時候，第一第二名已經係我身邊交晒棒！！！
我望向後面，呀B終於跑到過黎。
我一手接住左枝棍，然後望住前方，拔腿狂奔！
我一直全速咁跑，眼睛望住前方相差60幾70米既第二名。
你話第一名？我諗相差100幾米掛……
唔知係咪因為呢一年參加左足球隊，做多左體能訓練既關係，一路跑一路跑都唔算太勊。
不過照依家既速度，我係無可能超越第二名，更加莫講話第一名！
無錯，我要開Trans-AM！
我係呢個全速既步伐之中，將每步既距離拉大，以進行120%既爆發力！
再跑多左50米之後，我已經跑左接近一半既路程，而我同第二名既距離亦係到不斷收窄緊，只係得番20米！
突然間！可能由於我搏晒老命既關係，小腿開始出現疲累既症狀。
「唔係咁快收皮下話！？唔好呀喂！」我腦海裡面不斷諗住阿娜，藉以俾推動力自己。
但係我意志力始終唔夠大，慢慢咁就俾倦怠征服左，速度開始慢起上反黎。
望住眼前既第二名同我慢慢咁拉番遠距離，我心裡面既苦亦恨，恨係恨自己點解跑得咁慢。
好快咁，第二名轉左入最後一百米，而儘管我如何俾力，我同佢之間仍然相差20多米。
唔通咁就要輸？我既機會咁樣就化成泡湯？
「阿珞！！！！！！！！」
突然間，係前方不遠處，有一把動人既女聲正係到大叫我既名字。
「阿娜！」前面既女仔，正係我苦苦找尋既阿娜。
阿娜繼續大叫 : 「阿珞！加油呀！你要贏呀！！！」
望住眼前既阿娜，唔知點解有一股感動係心裡面湧出。
呢股暖流，好快咁流經我全身，而更多的就直落雙腿，化為無比既推動力。
唔通，呢d就係所謂Twin Drive System加埋Trans-AM Burst既威力？
我將眼光放回係跑道上，耳邊不斷傳來阿娜一句又一句既打氣聲音。
阿娜！放心啦，我會加油！
我將畢生飲奶既力放晒落雙腿，然後靠意志力進行超加速！！
「20米…15米…10米…」望住眼前既第二名不斷咁被我追近，係最後50米既時候已經得番10米唔夠既距離！
儘管我已經筋疲力竭，但係身體仿佛好似開左外掛咁，完全無停既跡象。
「三米…兩米…一米…！」我望住前方正準備接棒既蛋撻，「奪命狂奔」！
終於！我超過左個第二名，比佢早四五步交棒！
「衝呀！！」交完捧之後，我放緩腳步，大聲叫喊。
蛋撻貴為「徑項王子」，速度真係好撚快。
佢不廢吹灰之力，就將50幾米遠既第一名追近！
最後一百米！
蛋撻同第一名不相伯仲咁跑緊向我終點既位置。
「蛋撻！！！加油呀！！！」我同一班足球隊、看台上同班既同學，仲有企我對面既阿娜都一齊係度喊。
仲有五步！第一名依然快過蛋撻一個馬鼻！
四步！
三步！蛋撻拉番近！
兩步！我睇唔出邊個快d喇！
一步！！
「嗶！」就係佢地衝線既一刻，電子板上即刻發出聲響，顯示出經由佢地衫上既電子條碼而發出既時間紀錄。
「
第一名 line 4 03:21:27
第二名 line 2 03:21:31
第三名 line 5 03:26:33
第四名 line 1 03:31:13
第五名 line 3 03:32:45
」
我望一望塊板，再睇下自己既線路。
「line 4」
咦！？咁即係…咁即係…
我地係第一名！我地贏左喇！！！
「我地贏左喇！」我係到大喊左出黎。
我身邊既同伴聽完我講，再望清楚d個板之後，都露出一個好燦爛既笑容，一齊大叫 : 「贏左呀！」
我同班隊友衝左過去蛋撻到，大家攬埋一舊。
「贏左喇贏左喇！」
「屌都話我地得架啦！」
「全靠你咋蛋撻！」
我地鬆番開之後，蛋撻佢望住我，然後向住大家講 :「今次最大功勞唔係我，而係阿珞先岩！如果唔係佢力挽狂瀾，係第三棒拉近左成100米既距離，我都唔會跑得贏！」
所有人聽到之後，都望過黎我到。
「阿珞，我對你改觀喇！本身仲以為你淨係識藝術，原來運動都咁叻！」
「咪就係囉，阿珞好野！」
講下講下，佢地仲抬起左我喪拋，仲要一路講 : 「阿珞萬歲！hey！」
一路感受緊俾大家拋既我，係呢一刻真係好開心，開心到唔識形容。
放低左我之後，佢地就準備行番上去看台，而我就係到四周張望。
「阿娜！」終於，我發現到阿娜。原來佢一定係跑道旁邊望住我俾人拋。
佢笑住咁望住我，眼神裡透出無比既喜悅。
我跑左過去阿娜面前，諗都無諗就攬左落去。
「我得左喇！肥仔都跑第一呀！」我越講，就攬得阿娜越實。
「你好勁呀阿珞！」阿娜佢一路講，雙手竟然攬番住我！！！
唔係掛！！？
所謂毒撚奴性心態係咩？就係女神俾甜頭你食你反而唔慣！！
係個一下，我好撚on 9咁鬆開左手，望住阿娜。
雖然推開左阿娜之後我即刻勁後悔，好想攬番落去，但係無理由咁猴禽架麻！
所以我最後都係無咁做到。
「哈哈哈，興奮得濟添……」阿娜雙手放番係身後，對住我尷尷尬尬咁伸左一下脷。
嗚呀！好可愛呀！！
「係我太興奮先岩…哈哈……」我都尷尷尬尬咁講。
我諗我個下應該已經臉都紅晒。
「不過你真係好勁呀！」阿娜雙眼發晒光咁望住我，搞到我勁怕羞。
突然，阿娜補充 : 「雖然正確黎講呢，肥仔你就只係跑第二姐~~~」
「咁係前面個幾棒跑得慢咋！」我連忙解釋。
「哈哈！我講笑咋！」阿娜係到笑我咁講 :「你岩先跑得有幾快，我全部都睇到晒架。」
「咁……其實都係全靠你幫我打氣咋！」我鼓起勇氣，將心底既說話講出黎。
「我有無咁大影響力呀？」阿娜望住我，臉上既笑容越見燦爛。
「梗係有啦，你對我好重要！」我講完之後，先發覺呢句野幾似表白。
「咁……」阿娜忽然變到吞吞吐吐咁。
「咁，」阿娜望住我講 : 「咁其實你對我黎講，」
「都好重要既！」
*******************************************************************