《妳做咩將成碗譚仔倒落我個頭上面！？》: 第九章
第九章
***********************************************************************
「下！！！！你講真架！！！？」阿娜攬實左我。
「梗係啦……難得拍拖100日，梗係要好好紀念佢啦！！」我用右手撫摸住阿娜既頭髮。
哈哈……今次仆街了……收唔到科……
「但係……你爹dee媽咪唔係……」阿娜有少少尷尬咁問。
「嗯……今日就去見我媽咪啦，反正佢依家係舖頭，搵佢傾下計然後去撐枱腳！」我拖住阿娜，往地鐵站進發。
自從我老豆老母係我中三暑假離婚以後，我已經有三個月無見過媽咪。
仲好記得媽咪執好行李搬出去住既個一晚，我反瑣左個房門，無出過去望佢一眼。
點解？因為我好怕一見到佢，我就會喊，喊住咁求佢唔好走。
雖然我個陣已經係一個十五六歲既青少年，但當站在母愛既面前，我都會變番原來天真爛漫既小孩子，希望向母親盡情撒嬌。
我諗，大家同我一樣，都會明白呢一種感受。
結果，媽咪三番四次咁拍我門，但都係食白果，惟有默默咁，離開。
所以今次呢一個巧合，或者係個天想我補償番當日自己既決絕。
又或者，係個天想俾母親補償番，一個向兒子坦白既機會。
「你真係決定入去？」阿娜Fing一Fing我地拖實緊既雙手。
「咁唔黎都黎左，無咩理由走姐。」我抬起頭望住「黃埔商場」四隻大字。
雖然我把口係咁講，但係我顫抖既雙腳已經話左俾我知，我仲未面對到我既母親。
「珞，」阿娜企左係我前面，捉起我雙手。
佢雙眼好堅定咁望實我講 : 「你無端端話要見家長，其實我都知係你求其作個藉口呃我姐，你唔好當我lulu先得架！」
「嗯……」一時間俾阿娜識穿左，都唔知俾咩反應好。
「不過咁，」佢展現番一個熟悉既微笑 : 「我覺得呢個正正係上天俾我既一個好機會，去幫你面對番呢個現實。」
「有我同你一齊去面對架，唔洗驚。 相信我啦阿珞，好無？」阿娜既眼神話俾我知，佢好有決心要幫助我克服呢個心理障礙。
傻架咩！無啦啦帶條女去見一個三個月無見既家長，我就唔信咁無稽既組合都可以幫到我喇！
好啦其實我講笑姐。
阿娜既呢一番說話，已經足以令我鼓起勇氣，行出第一步。
***
「唔該……」
「係！唔知先生……阿珞……？」媽咪本身係到執緊貨架，一拎轉身見到我之後，露出一個我唔識形容既複雜表情。
「伯母你好！我叫王妙娜，叫我阿娜就得喇，多多指教！」阿娜失機無神係我後面彈出黎，雙手放後面成個樣勁可愛，而且語氣變到勁活潑，好似飲左幾桶葡萄適咁。
「你好……呢位係？」媽咪向阿娜打左聲招呼，然後望番住我，等我俾一個回答佢。
「佢係我既女朋友。」我尷尬咁同媽咪講。
我再補充多句 : 「因為我地今日咁岩經過呢頭……」
我都未講完，阿娜就一句插埋黎，勁大聲咁蓋過我既說話 : 「阿珞平時成日係我面前提起伯母你，話你好靚架！然後因為見今日得閑，所以佢就想話黎探下你，我咪死都要跟住黎見下伯母真人囉！ 估唔到真係學阿珞咁講，國色天香！」
……阿娜，出少句聲當幫忙啦……
阿娜講完之後，我扯一扯佢隻手，然後狠狠咁啤左佢一下。
呀點知，佢竟然用番一個恐怖到似係想殺左我既眼神啤番我轉頭，搞到我jerjer都縮埋，即刻無聲出。
唉，睇黎我大個都係老婆奴黎架喇，成世俾老婆蝦……嗚嗚……
「嘩靚女你真係識講野喇！」我媽咪唔知做咩好開心咁捉住左阿娜隻手。
係因為阿娜讚佢，定抑或係阿娜講話我讚佢？
仲記唔記得我之前話我媽咪好IN？其實佢依家都只係三十尾架咋，唔單只品味好又夠潮流，個樣望落仲幾似郭羨妮添！
我記得以前我媽同我講過如果唔係唔小心同老豆搞左我出黎，應該都會去做空姐嫁番個有錢人。
不過咁，我媽其實都係講笑架姐。
自從佢跟左我老豆之後，一直都盡老婆老母既本份，將屋企打理得頭頭是道，又將我同老豆養到肥肥白白。
「係呢，唔知你地今晚有無野做呢？如果無既話不如一齊食飯？我依家就去收舖……」媽咪望住阿娜講，但雙眼周不時就望過黎，然後好快就望番住阿娜。
「唔好喇，我地諗住…..」
「好呀！我好想聽下伯母既故事！」阿娜又打斷左我既說話。
阿娜拎轉頭望住我，露出一個暗藏小刀既笑容 : 「同伯母一齊食晚飯囉，好 ‧ 無 ‧ 呀 ， 阿 ‧ 珞？」
「好呀好呀！」我笑一笑。
屌……女人……好恐怖……
***
「阿娜啊，我地唔係講好左去撐枱腳架咩……」係等緊媽咪收舖其間，我同阿娜就係商場裡面求其周圍行下。
「同女朋友食飯就幾時都得架啦！但係……同媽咪食飯，就唔同講法喇~~~」從阿娜既笑容同語氣睇起黎，我已經無任何挽回既餘地。
呢餐尷尬飯，
我 食 撚 硬 。
好快媽咪就搞掂晒d野黎匯合我地。 佢話附近有間日本菜好好味所以就帶左我地去食。
行過去既呢段路裡面基本上都係阿娜同媽咪傾計，講下我同佢點識、識左幾耐、我點樣表白等等。
而我呢，就一直行係佢地後面，無出過聲，淨係阿娜間唔中怒啤我既時候先點下頭咁。
好快就行到過去間舖頭，然後入去坐低左。
「係呢阿珞……」係叫完野食之後，媽咪終於開口同我講野。
佢有d內疚咁講 : 「呢幾個月黎，你同老豆點呀？」
「無病無痛，幾好咁囉。反正有無你，我地都係咁生活架啦。」我滑住手機屏幕，無望過媽咪一眼咁講。
其實我唔係想咁樣答架！！！我真係唔係想咁樣答……
我好想話你知，你走左之後我同老豆關係好差，我都無再同老豆食過一餐晚飯。
而且，我好掛住你，媽咪。
但係唔知點解，一見到面，我就講唔出口。
就連簡簡單單一句溫柔既語氣，我都講唔出。
「！！！」突然間，我feel到隻右腳腳面俾個高跟鞋大大力咁踩左一下，好痛……
我拎側個頭望住阿娜，用眼神質問佢 : 「做咩踩我！！！」
只見佢用責怪既眼神望一望我，再帶領我望向媽咪既方向。
原來我岩先個句，搞到媽咪好傷心。佢低頭咁望住個餐牌，但係都掩飾唔到佢哭鼻子既聲音。
「啊！弊家伙！」阿娜突然叫左出黎，我同媽咪都即刻望住佢。
佢著急咁講 : 「我岩先飲左杯咖啡，所以依家好肚痛！唔好意思啊伯母，我失陪一陣去個廁所先，一陣番黎先聽你既故事！」
我講完之後，向我打左個眼色，然後向廁所狂奔。
就係咁，依家得番我同媽咪眼甘甘咁對望。
王妙娜，你好耶！！！！！
***********************************************************************
「黎啦黎啦，唔好嬲啦，我玩下咋麻~~~」芷翹一路係我身邊圍圈咁轉，把聲勁鬼甜咁同我講。
由佢係譚仔裡面講話掛住我開始，我就再無同佢講過任何一句野。直到依家食完埋單走人，行埋出去譚仔門口，我都仲係無回應過佢。
「我唔係嬲，我無嬲，我只係覺得呢樣野唔好玩姐！」我壓制住自己d怒氣，好正經咁同芷翹講。
「yeahhhhhh你終於應我喇！即係唔嬲我啦！笑番啦~~~」佢彈下彈下咁企左係我面前，雙手放後，頭輕輕咁側前，好甜咁對住我微笑。
我望住芷翹既一瞬間，埋藏係心底裡面既一個影子又突然間再次浮現，重疊係芷翹身上。
我搖一搖頭，再望番上黎，影子又變番做芷翹。
「唔好笑囉唔好意思。」我終於忍唔住，激動咁同佢講。
我狠狠咁補充一句 : 「識左我一日都無，就同我賴熟咁話掛住我。 你咁既性格呀同d收兵既女神有咩分別呀？」
芷翹佢聽到之後，個表情變到好驚訝，大概係估唔到我會動真火，咁大聲同佢講野。
佢收起左剛才既笑容，變成一個嬲嬲地既臉紅樣望住我講 : 「司徒珞先生，我有咩得罪你呢請問！？我只係見你頭先無啦啦無晒笑容咁，先同你開個玩笑姐，你咁認真做咩！？」
芷翹呢一刻既樣子，令我回想起個個100日既佢。
「算啦，今次係我唔岩，我唔會再同你開玩笑架喇！」芷翹向後走左兩步，然後講 : 「無咩既話我走先喇，司徒珞先生！」
講完之後，佢就拎轉身，條馬尾fingfing下咁大大步行左去。
望住佢既身影，個個影子突然間又再次出現，重疊左係芷翹身上。
「唔好走啊！」我狂奔向芷翹，然後一手捉住佢隻手。
之後，就好似琴晚咁，一野拉左佢埋黎，緊緊咁抱住佢。
「唔好走啊……係我唔岩……你唔好離開我啊，好無啊……」我一路講，雙手越大力咁將芷翹收入懷中。
眼淚唔知點解，隨住芷翹既體溫流向我既同時，不自覺咁一湧而下，而且一發不可收拾。
「喂……當街當巷……仲要企正係人地門口到……不如，放手先啦……」唔知過左幾耐，芷翹終於開聲講野，而且把聲聽起上黎好好笑，個感覺就似係尷尬得黎又開心咁。
我放開左芷翹，用右手抹一抹眼淚痕，再望一望周圍，先發覺譚仔裡面d人係到望住晒。
「對…對…對…對唔住呀，我…我唔係想抽你水架！！」我萬分抱歉咁望住芷翹講。
喂大佬，我岩先先鬧完佢做娘娘用言語收兵，點知轉個頭自己就做厹走去攬住人唔放，
屌，乜野說服力都無晒。
「嗯~~~？」芷翹用一臉懷疑既眼光望住我。
佢繼續講 : 「喂，司徒先生，醒目既就乖乖地話我知，究竟你岩先當左我係邊個！講！」
「無啦無啦！我見無啦啦得罪你，廢事無左你呢個朋友，先激動左d姐！」我堅定不移咁講。
「你都識講啦我地識左一日咋『朋友』！岩先仲咁冷淡，依家又喊晒咁，我就真係唔明白喇，師父！」芷翹突然向我踏前一步，搞到我向後挨到做左半個拱橋動作。
「哈哈哈……」我以笑黎掩飾自己個個爛到喊既大話。
唔通我又真係會直接咁同你講，
我當左你係佢咩。
『她的倒映，仿佛就出現在你的眼眸之中。』
『說不定我如此的憤怒，不是因為你，而是因為像她的你。』
***********************************************************************