《妳做咩將成碗譚仔倒落我個頭上面！？》: 第八章
「喂啊衰人！今日全日都無同你傾計，咩唔搵我wo！」阿魚係放左學之後，即刻跑到我面前同我講。
「阿魚，今日一齊放學好無，我有d野想同你講。」我冷淡咁講。
「啊……？好……」阿魚臉上掛起一個不安既樣。
「咁行啦。」我背起書包，向門口行去，而阿魚就緊隨其後。
由頭到尾，我無望過佢一眼。
***********************************************************************
「喂等左好耐啊！？」阿娜失機無神係後面彈出黎，勁大聲咁講。
「嘩！」玩緊手機既我俾佢嚇親。
「哈哈你有無咁細膽啊白痴！」佢對我甜甜的笑左一下 : 「我真心架，你係咪等左好耐？ Sorry啊我掛住襯衫遲左出門口，嘻嘻！」
「點會呢，我都唔係等左好耐姐~~~」我一手拖住阿娜，同佢十指緊扣。
「況且，」我補充一句 : 「男朋友等女朋友，唔係天經地義架咩？」
就係咁，我地就開始漫無目的咁行街。
呢個動作，已經係我地每個星期日既指定活動。因為我同佢各自都有好多課外活動要搞既關係，所以好難得先遷就到每個星期日下晝可以有拍拖撐枱間既時間。
而亦都係因為咁，呢半日就成為左我同阿娜彼此間最珍惜既時間。
「知唔知今日係咩日子！」阿娜突然間鬆開左我隻手，企係我面前叉腰咁講。
「下？！唔通係……佛誕？」
救命，點解D女仔咁中意問呢D問題？竟然連十級不港女既阿娜都會問！！
「你就佛誕！」佢好似真係有少少嬲咁。
「你今日諗唔起既話，就罰你以後無得拖我隻手！」佢調轉頭自己一個行左去。
咦，淨係唔準拖，都仲有得錫，即係唔算太嚴重啦！
我奔跑過去追番阿娜，一手將佢拉埋黎面向我，然後一野咀左落去。
「喂啊衰人！邊有人話俾你鍚……我仲嬲緊架！」雖然阿娜口裡面係咁講，但係佢個樣已經無晒怒氣，淨係識對住我傻笑。
哈哈，成個傻妹咁，真係好可愛。
「唔好嬲啦~~~其實係咩日子都好，我都係咁愛你，係你身邊架啦！呢D野係唔會因為咩日子而變架WO！」我當街當巷咁攬住阿娜，將佢收入我既懷抱之中。
「哼哼哼！口水浪過油啦你！連拍拖100日都唔記得！」
……WTF。
「哈哈，乜你覺得我真係唔記得咩？我諗住俾個驚喜你咋！」我求其作左個藉口掩飾。
「係咪架？」阿娜一臉懷疑咁抬起頭望住我 : 「我唔信，你有咩驚喜俾我先？」
「嗯……」今次仆街鳥，唔通咁就玩撚猿？
唔怕！我驚都未驚過！
「有！」我靈機一觸，講左個收唔到科既大話。
「就係，」
「見‧家‧長！」
***********************************************************************
「點解呀……點解要分手……」阿魚臉上流住兩行淚水，握緊掌頭，絕望咁望住我。
「好對唔住，但係我覺得大家唔係好夾。 而且……你配有一個更好既男朋友。」我閉上雙眼，等待緊一個狠心既結局。
「啪！」一個清脆響亮既聲音，經由我左臉臉頰同阿魚右手手掌既接觸而發出。
「唔係真架……明明你琴日都仲話好愛我架！」阿魚既聲線已經開始沙啞。
「……好對唔住。」除左呢一句，我都已經唔知道仲可以講咩。
我無視著背後聲嘶力竭咁呼叫我既阿魚，一步步咁離開。
***
天空隨住夕陽西下而變得昏暗。
但對於我黎講，其實由半年前開始，世界就只得黑夜。
「咦？」我抬起頭望一望，先發覺自己身處係譚仔既門口。
「我明明想番屋企架……」我一路諗，一路被譚仔湯麵既香氣吸引。
一踏入門口，有個熟口熟面既人無啦啦行埋黎，笑到四萬咁口同我講 : 「咦，先生，你咪琴日黎過食野個個？」
屌，我終於記得你係邊個喇，原來係個個唔想背鑊既7頭經理。
「哦……係呀，乜你呢度唔歡迎我咩？」我笑住咁串條仆街。
「梗係唔係啦絕對歡迎！你黎左既話，我都無咁擔心個位女士再發癲扔麵！」經理用視線帶領我去一個穿住我校校服既女仔身上。
「喂，」我襯個女仔放緊啖麵落個口個陣，一野拍左落去佢個背脊到。
「！！！！！……咳咳咳……」佢俾我搞到嗆左一嗆。
嘩哈哈哈哈哈哈！今日既仇仲唔一次過報晒！？要我日日請你飲檸檬茶呀拿！抵死！
「哈哈哈，樣衰！」我坐左係佢隔離，右手托住個頭挨左係張枱上面。
「想謀殺咩司徒珞！……咳咳……」芷翹依然係到咳緊。
「點啊，你無事啊麻？」死火，望住芷翹個樣咁辛苦，好似玩大左添！
我即刻叫人俾左杯水黎，同時間攞左張紙緊出黎遞俾佢。
「Sorry啊大力左少少……」我望住芷翹，內疚咁同佢講。
「哼！」佢一手攞左我張紙巾抹嘴，然後攞起左杯水黎飲。
唔知大家有無試過食譚仔個陣攞水飲。有試過既人都會知道，佢地既水係滾到可以碌熟jerjer。
「嗚呀好熱！」佢俾杯水燙親，一個神經反射動作……成杯水趺左落地下，仲要趺正係我既左腳上面。
「嘩屌！」
***
「靚仔你要既雞肉牛丸清湯！」阿姨將一碗熱辣辣既粉送到我面前。
「喂啊……唔好嬲啦，反正……你著住皮鞋都feel唔到熱啦係咪先！！」芷翹雙手合實對我做出一個請求既手勢，個頭就打側左少少咁講野，加上佢後面條fingfing下既馬尾，實在無咩理由嬲得佢落。
「算啦唉，反正係我唔岩在先，當無數啦！」我攞起對筷子，夾起左一箸麵放入口。
「好耶~~~你唔嬲我就好喇！」芷翹成個細路仔咁拍手掌，然後攞起筷子繼續食佢碗麵。
「係呢，」佢一路食麵一路講 : 「點解你又會落黎食野既？」
「你係咪傻架，」我都一路食住麵講 : 「唔通間譚仔係你架咩，我想食咪食！」
「車，仲以為你掛住我添！」芷翹拎左個頭過黎望住我，但係個口仲擔住一埋麵，成個樣好滑稽。
「你食埋啖麵先啦……你個樣好好笑！」我望住佢，笑左出黎。
「乜你依家個樣又好好咩！食住啖麵係到傻笑，仲要笑到見牙唔見眼！」芷翹同我雙目而視。
嗯？我笑到見牙唔見眼？點解我會笑既？
「係咩。」我收番起剛才既笑容，避開佢雙眼，冷冷咁對佢講 : 「咁你點解又黎譚仔食野？」
「你話點解啊……」佢好似知道我有意回避佢眼神咁，所以都拎番轉個頭繼續食麵。
「因為，」
「因為，我掛住你囉，哈哈！」
『當你會對著一個人無故傻笑的時候，就代表你愛上她了。』
『但是，會不會只是因為她，與你愛的人很相似，才令你無故傻笑而已？』