《妳做咩將成碗譚仔倒落我個頭上面！？》: 第五章

        「唔準走！」芷翹係我拎轉身準備走既時候，大聲喊左出黎，語氣行間更加帶有一點點命令既語氣。
 
        呢一句說話，令我回想起當初自己劃破晒臉咁哀求阿娜番黎既情景。
 
        「你係咪痴撚左線呀？我同你三唔識七仲要俾你淋湯麵都算喇，依家竟然命令我！？學頭先條仔話齋，你都真係好蠻不講理。」我冷淡咁回應，眼角稍為斜望佢。
 
        唉，唔講頭先條仔由是可，一講，芷翹對眼又即刻充滿晒淚水。
 
        「一個二個都唔理我呀麻，好呀，我死左佢算喇！」芷翹喊住咁跳左落韆鞦，然後向住馬路方向狂奔。
 




        「嘩屌你黎真架！？咪呀喂！！！！！」我拉都拉佢唔切，惟有跟住佢跑。
 
        好彩我中三中四既暑假都有KEEP住做GYM，體能極佳，所以兩三步就已經追到係馬路邊既芷翹。
 
        「咪做傻事呀小姐，冷靜D先！你試諗下，如果你有咩意外既話，叫你老豆老母點算？佢地一定會好傷心！」我捉住左芷翹既手臂。
 
呢D時候，就梗係用番警匪片既談判手法黎安撫呢位咁激動既HEIDI啦！
 
        「老豆……我無老豆架！我無老豆！」芷翹聽到我講之後，仲用力咁想掙脫我隻手。
 




        救命呀師父！！！乜解救我好似講咩錯咩咁……咦！？咪住先，佢話自己無老豆？
 
        係我思考緊既時候，一個唔留神竟然俾佢鬆開左！！
 
        芷翹佢用盡晒所有僅餘既力氣想跑去馬路中間。
 
        喂小姐……你咁樣衝出馬路，我係司機都見到你減速啦，仲點會撞死你，用下腦啦。
 
        但係基於救人要緊既關係，即使意外機率幾細都好，都唔可以俾佢有事。
 




        我右腳向前一踏，右手一拉，連飲奶既力都用埋，一野拉番芷翹番黎。
 
        可能係拉力太大，佢失去左重心，成個人仆左落我到。我本能反應之下，一野抱住左佢……
 
        結果依家我地既動作，就好似係情侶咁 : 大家面向住大家，然後女方既頭挨左落男方胸口 ; 而男方就雙手緊抱住女方，將佢拉埋黎自己既懷內。
 
        芷翹心口兩股軟林林既物體，完美咁壓左落我到。
 
今次仆街鳥！！！！我咁樣抽水法，今次仲唔扔核彈！？神佛妖魔乜野都好啦，快D出黎打救我！！！
 
        「一個二個都係咁......嗲DEE又係咁，阿修又係咁……嗚嗚……」
 
芷翹無好似我預期咁打我兩巴或者踢我下體，反而係雙手緊緊捉實我衫既腰邊，成個人挨左埋黎，係我心口對上係咁喊、係咁喊。
 
係紅燈唔知轉左幾多次綠燈、我地兩個唔知承受左幾多個路人奇異眼光之後，芷翹終於由山洪暴發漸漸減弱為小橋流水，再變為有聲無淚既哽咽。




 
睇黎佢終於都好似意識到自己同個陌生男人攬左十幾分鐘，所以好快咁推開左我，低頭咁講 : 「你唔好誤會呀！……我唔係咁隨便既女仔黎……」
 
Um……我諗我比較在意既唔係呢樣。
 
「無所謂啦我又無損失既，蝕底個個點係都係你啦！哈哈！」我雙手擺出一個WFC既手勢。
 
芷翹望一望我，再望望自己個胸，然後個樣谷到紅晒咁講 : 「你！……你信唔信我再扔你湯面呀拿！？」
 
「唔敢唔敢！」我雙手舉高做出一個投降姿勢 : 「咁啦，我都未自我介紹。我叫司徒珞，中五，住係對面個山頭綠色個幢。」
 
「咩話！！？」芷翹一臉詫異望住我。
 
「做咩呀你，第一次見人複姓呀？」我笑住咁同佢講。
 




「唔係啊……只係……原來你就係司徒珞……」佢打側左個頭，雙眼四處張望。
 
「喂喂喂，我有無咁出名啊……唔通，你又係讀xxx書院！！？」
 
「係……」芷翹好似好尷尬咁唔想答我，然後望一望手錶 : 「嘩！原來已經九點幾架喇？好夜喇好夜喇，我要番屋企LU！」
 
佢一路講，一路拎轉身跑過對面馬路。
 
「喂！！！唔好再做傻事喇！我救你唔到架！！」我向住慢慢離去既佢大聲叫道。
 
「我暫時唔想做傻事住喇！」芷翹跑到去對面馬路之後，忽然拎轉面向我大喊。
 
佢轉身望住我既時候，凌亂既頭髮下楚楚動人既臉容，竟然令我有一下子心跳加速……
 
「因為……」佢細聲咁講，搞到我好辛苦先聽到頭兩隻字。




 
「你講乜呀我聽唔到呀！」我向住芷翹再一次大喊。
 
「我話呀！」佢深吸左一啖氣，然後大叫 : 「因為『塞翁失馬』呀！」
 
「下？」我對佢講既野一d頭緒都無。
 
「喂我唔明……」正當我諗住追問落去既時候，芷翹忽然大喊 : 「又話唔準講自己地址出黎，你做咩又話我知！哈哈！」
 
        佢講完呢句之後，無等我回應，就調轉頭狂奔番屋企。
 
        我望住芷翹既身影消失左係轉角位，嘆左一口氣 : 「我見你咁智障，先陪下你咋，白痴。」
 










『焉知非福』