《妳做咩將成碗譚仔倒落我個頭上面！？》: 第四章
第四章
係Heidi隔離個個……呀唔係，我意思係，坐係個個女仔隔離，一個年紀相約既男仔，係佢扔完湯麵之後，無啦啦拍枱企起身 : 「痴線你都蠻不講理既！」然後一個轉身就離開左呢間譚仔。
「點解……點解wo……點解要咁……」女生既淚水不斷湧出黎、雙手放左係大脾上，成身不停咁顫抖。
我攞左包紙巾出黎，第一時間……抹乾自己身上既湯汁。
你唔係覺得我仲會想理呢位女生下話！？我無鬧佢佢都偷笑啦。
「小姐，我今次就當你係唔少心整跌左碗麵，我地唔會再追究，亦都唔會俾多一碗你。」譚仔既經理終於肯走出黎。
經理繼續講 : 「不過俾你淋濕既呢位先生，如果佢要向你追究既話我地按事實協助呢位先生，希望你明白。」
女生並無回應佢，只係繼續喊，不時係到喃喃自語，好似真係short左咁。
「放心啦經理，我地認識架，所以我唔會追究。呢度係我同佢碗面d錢，我地食完架喇走架喇。」
望住呢位女仔喊，我並無任何心動，反而係多左一份同情。
因為佢依家呢個哭臉，就好似當初同阿娜分手個時既自己。
所以，我好自然咁幫呢個女仔講左個大話，話我同佢係認識。
咁樣就可以有個藉口睇住佢，廢事佢做出d咩傻事------講到尾我就真係唔信岩岩會扔麵既人依家心情可以平復到，可以好似正常人咁番屋企。
「喔，如來係咁，咁就好辦喇！」經理俾左一個「好耶！唔洗我背鑊！」既笑容我，然後擺出個可掬樣同我講 : 「咁你一定係識得埋隔離岩岩走左個位男士喇！麻煩你俾埋佢個碗麵錢，盛惠102蚊！」
「屌，點解我要係到扮好人！！」望住一張明明自己只係食左35蚊但就要俾百幾蚊既單，我好想學頭先條仔，拋低一句「屌你啦！」然後瀟洒咁離去，不帶走一片雲彩。
呀唔係wo！碗麵我淨係食左一半，就俾第二碗麵顏射，即係食左20蚊都無……
找完數之後，我見個女仔仲係度喊緊，其他食客就係咁望住佢。
「小姐，走喇，你唔係想咁多人睇住你喊下話？」當我講完呢句之後，個女仔先稍為停一停哭泣，托起頭望下周圍。
我諗佢都發覺到勁多人望住佢，所以即刻臉都紅晒，然後對住我講 : 「行……行啦！」
我地步出左譚仔之後，好順其自然咁行左去旁邊既公園仔，搵左個韆鞦坐低。
「好……好對唔住啊，我岩先唔係想扔你，只係我嬲得制，攞起咩就求其扔……你無事啊麻？」
痴線，如果係你前面既係水果舖咁仲得了既！？容不易你扔個菠蘿過黎我頭都穿埋架？到時我就真係「明天走得比你狠」喇！
「哦，無咩事既。」當然啦禮貌既野佢無姐，我都有既！好男不與惡女鬥，今次就唔同佢計啦唉。
「咁就好……係喇，我叫芷翹，今年中四，就住係對面大廈。」
「喂小姐，你係喊short左個腦呀，竟然同一個陌生男仔講自己住邊？」望住呢個毫無危機意識既陌生女仔，我竟然會因為擔心佢而勞氣。
「下！？係wo……唔好意思啊近排俾警察查身份證查得多，慣左口……」芷翹塊面又再一次紅起黎。
屌……我究竟識左個咩女仔……但明明睇個樣完全唔似mk妹，更加唔似係蒲街既夜青。加上就咁睇落，呢個女仔戇直既性格，更應該岩留係學校做個d不問世事既乖乖女，而唔係好似依家咁坐公園。
「求其啦我唔想知咩原因。總知你依家有番d理性，我就走喇。」
比著係以前既我，縱使唔擅長同人講野，但都一定會樂於開解別人。
不過，由個日開始，我對世界上所有既野都仿佛無晒興趣。每一樣人地好奇既野，都已經引唔起我既注意。
***********************************************************************
「我地分手啦。」
「唔得！明明前幾日都無乜事，就咩好地地講分手！」
「好對唔住，但係我覺得大家係時候面對現實。你……都係搵過第二個女仔啦。」
「你依家算點呀！？一日未分手你一日都仲係我女朋友！我唔準你走！」
「唔好咁啦……阿珞。」
「唔準走！…….唔準走……唔好走……好無？我淨係想要你，唔想要其他女仔！」
「珞……」
「……」
「當初你話過，好想照顧我，令我每一日都笑得最燦爛。 但係我地一齊左之後，好多野都開始變質。」
「唔好再講啦，呢D都唔重要……」
「聽我講啦，珞。
我知道你愛我，我知道架，亦都感受到。但係……有D感覺，唔同左就唔同左。
自從拍拖之後，你成日驚我走左去，成日要我報告行蹤。你知唔知道，咁樣俾左好多壓力我，更加係無形間俾左好多壓力係呢段感情上面 : 雖然你貼心照顧我，令我感受到被人重視既感覺……但係有時真係好痴身，完全無俾過任何私人空間我，令我好辛苦呀。」
「做男朋友就係要體貼入微、愛錫女朋友架啦，唔係咩？」
「珞。你呢D唔係叫貼心，係叫過份擔心。」
「我……我……咁我改囉！我改呀好無呀？俾次機會我改啦，唔好走！」
「你覺得我無試過同你分析我地既問題咩？你覺得你自己有改到咩？機會我俾左你。
我明白拍拖係要互相遷就，唔係單人遊戲。所以我一直以黎都同自己講，叫自己唔好咁高要求。
但係結果話俾我知既係，原來大家相處既方式會影響彼此間既感覺。
我唔中意同你呢種拍拖方式，所以我對你既感覺都開始慢慢減退。
直到今日，我雖然唔可以話對你無感覺，但係呢種程度，再唔足夠維繫一段愛情。」
「但係……我真係好愛好愛你……係咪一定要行分手呢條路？」
「嗯……呢幾日我已經諗得好清楚。」
「……」
「珞，應承我，你係一個好男仔，唔好因為我，而放棄身邊愛你既人。
仲有啊，其實你既性格真係唔錯架，只係唔多適合我姐！加油！你會搵到個比我更好既女仔。」
「如果……你搵到個合適既男朋友既話，幾得話俾我知！我會幫你好好審視一下架喇！哈哈……」
「……遵命！」
『原來，比痛更痛的是，笑著哭、哭著笑。』
***********************************************************************