《妳做咩將成碗譚仔倒落我個頭上面！？》: 第六章
「雖知你地青少年正值行事衝動、熱血方剛既時期。 但係咁樣，並唔代表大家可以任意莽為。 近呢幾個月黎校方收到關於學生係校外行為唔檢點既投訴越黎越多，比如係衣衫不整、攬攬錫錫等。 要知道，你地著住學校既校服，就代表緊……」校長係早會上唸唸有詞咁朗讀出佢琴晚精心炮製既講稿。]
「……」我聽住校長既說話，腦海中忽然略過琴晚既事，仲有個個神經質既芷翹。
炎炎夏日，所有學生一大清早就企左係操場上，不停咁受到太陽既煎熬。
不知不覺間，我再無留意校長講緊咩，只係靜心聽住旁邊唧唧叫響既蟬鳴。
***********************************************************************
「好熱啊珞珞~~」滿頭大汗既蛋撻一入到班房，就衝埋黎攬住我。
「屌！成日痴粒粒就咪鬼搭住我條頸啦！」我極力反抗。
但係我又點會夠蛋撻大力先得架，結果咪又係俾佢搞到濕撚晒。
唉，唔撚驚肥冬。
「死人蛋撻，做咩搞阿珞！快‧D‧同‧我‧放‧手！」阿娜唔知幾時衝左入黎課室，對住蛋撻擺出一臉「你係咪想死得好慘？」既表情。
「唔搞咪唔搞囉！依家兩公婆同一陣線喇唉！我呢D做兄弟既，都係去……洗臉先哈哈！唔阻你地喇！」蛋撻一路講，一路將我扯起身，然後推落阿娜到。
「喂你個蛋撚撻精精地就唔好番黎，如果咪我實打7你！」我扶住阿娜向門口大叫。
「好啊！你地兩個咁曬我先唔想番黎！」蛋撻經過走廊既窗口時叫番入黎班房。
「點啊無撞親你啊麻傻妹？」我望住阿娜，雙手由佢腰邊既位置伸左去佢背後，然後一野拉左佢埋黎。
阿娜向前傾一傾，然後雙手亦都打開攬番住我。
佢將頭抬高仰望，眼睛同我雙眼連繫著 : 「有你抱住我，又點會撞親WO，傻‧仔！」
眼前的阿娜，比從前更可愛------嗲聲嗲氣既說話同嬌縱既眼神，令我多左一份想寵愛佢既感覺。
「嘩，有人一做左人地女朋友，就嗲到連聲都變埋WO！」我輕輕用右手既食指同中指捏住阿娜個鼻。
「哼哼哼！咁你係咪唔想聽先？咁我唔講囉！」阿娜被我捏住左個鼻，所以講呢番說話既時候勁重鼻音，完全唔覺得佢嬲緊，仲要好好笑。
「喂喂喂你笑咩呀！！我嬲緊你仲……」
阿娜擁有一雙迷人既眼睛，同佢對望既時間，周遭既野就好似時間停止咁慢鏡移動甚至停頓。
加上佢依家因為透唔到氣而谷到少少紅既臉蛋，更令到我無法自制。
我未等佢講完，就放開左隻右手。阿娜掛住透氣，一時間無留意我既動作。
我襯佢分心既同時，頭向前一伸並且側重去右邊，將自己既嘴唇緊緊咁同佢既櫻桃小嘴接上。
我將頭慢慢移開，就見到阿娜塊面比頭先更紅。
「嗯……你……你做咩WO！」阿娜一臉尷尬既樣子望住我，但係嘴角上就流露出難以掩飾既喜悅。
「……屌你地啦！個班房裡面仲有我地呢班花生友架！唔好咁肉麻咁痴纏得唔得呀男神女神！」呢個時候，班房裡面其他人終於忍唔住出聲，係咁屌我地。
「哈哈哈，咁咪好囉，凍到你地打冷震咪唔洗開冷氣！」我一臉搏打既樣向班上既花生友講笑道。
「娜！拯救世界，阻止全球暖化既責任就要交俾我地喇！我地一於咀多幾鑊！」我拎番轉面對住阿娜講，然後抱得佢更實。
「屌！你地係加速地球死亡呀！咁撚大個太陽！曬死咩！！！」花生友異口同聲咁講。
阿娜無回應到我，只係深情咁望住我，展出一個我從未見過既甜蜜笑容。
***********************************************************************
校長終於都UP完廢話，係操場上既學生急不及待背起書包準備番上課室嘆冷氣。
我係回憶裡面抽離番出黎，徐徐背起書包。
突然間，一個黑裡透啡色、紮起左馬尾，背住一個黃色書包既女生側面係我眼角處出現！
「咦！？唔通……」我即刻將目光四周環掃，但係女孩既身影已經消失左係操場上混亂既人群之中。
「唔通我睇錯？咦，唔係WO……我咁在意黎做乜，反正都唔關我事架啦。」我一路思考著，一路行番入中五C班班房，然後坐係窗邊最後既座位到。
「喂搞咩呀你，又思春呀！？」蛋撻放低左書包之後，行左過黎我身邊。
「你就思春！我呢D型男洗思架咩？有女自然埋身架麻！」我重新帶上一副笑臉迎人既面具，去掩飾自己呢半年黎既傷痛。
「阿珞。」蛋撻突然收起左臉上的調皮，換上一臉正經。
佢深吸左一大啖氣之後，語重心長咁同我講 : 「阿珞。其實都過左咁耐啦，要痛既痛過、要喊既喊過。 係咪應該搵個時間，好好咁放低呢？」
「喂，你當我係邊個先？識我咁耐都知我夠硬淨架啦！無野WO」我搭住蛋撻既膊頭。
「而且你唔記得咩，我依家仲有阿魚架麻！」我用手指引領住蛋撻既視線，指向班房裡面坐我對角，一位外表清秀、笑容親切既女孩身上。
「我記得，早兩個星期就係Mandy，早一個月就係Sammi，之前仲一次過同阿貓阿狗呢兩姊妹拍拖添。」蛋撻推開左我隻手，好認真、好認真咁望住我。
「阿珞……你呢半年黎係愛情上一反常態，我真係好擔心。」今次輪到佢雙手搭住我膊頭 : 「我一開始仲以為你放低左，先無去理你。 但係結果反映出黎係，你‧只‧係‧搵‧緊‧水‧泡。」
蛋撻既說話，狠狠咁鞭落係我既身、我既心上。
「我……我邊係d咁既人！」我故作輕鬆咁回答，但雙眼已經唔可以再直視蛋撻。
我好驚，埋葬係心裡面好深處、好深處既個段感情，會再一次被人看穿、再一次被人掘起。
「面對現實啦。」蛋撻捏一捏我的膊頭。
「好對唔住，但係我覺得大家係時候面對現實。你……都係搵過第二個女仔啦。」
阿娜講呢一句既時候，雙眼同我對望住。
咁耐以黎，佢既眼睛一直俾我好親切、溫暖既感覺。
但係個一次，係我第一次對佢既雙眼感到如此既陌生。
但係眼神之中，依稀見到佢內心有一種說不出既矛盾。
個一種感覺，就好似係……有苦衷。
所以自分手以黎，我都一直相信阿娜係有難言之隱。
或者係因為佢有不為人知既隱病，唔想連累我？
又或者係因為佢屋企出左事，所以粒聲唔出就係中四學期中既時候轉校？
又或者，無任何或者。
但係我一直都相信著。
一直都，相信著。
「面對現實啦。」蛋撻捏一捏我的膊頭。
「我……」就係我想繼續為自己辯護既時候，上堂既鐘響起左。
於是乎我求其講左d野去打發蛋撻，而佢都好清楚我暫時唔想提起呢年事，所以點點頭就走左。
我攞起左一本畫簿同埋一個畫筆袋，然後離開班房，前往4樓既藝術室。
『要治療傷痛，最方便的方法就是欺騙自己沒痛過。』