突然做左人地老豆，多左個女: 56

間房肆肆正正咁，入到去都係榻榻米黎，今晚我地就四個人逼逼地咁訓係到啦。我地放低左啲行李，老闆娘就繼續為我地介紹廚房、中廳、偏廳同花園等等，如果呢到唔係放出黎做民宿，呢到都真係好大下，同香港嗰啲豆腐潤咁細既豪宅真係無得比。
 
佢為我地介紹完之後，我地就急不及待咁起程啦，第二日既目的地係奈良。
 
日本既鐵路好複雜，一條線並唔止行一種車，仲有分特急、急行等等，一個唔小心就會撘錯車，不過好彩有Yan係到。
 
「好彩你肯一齊黎咋，如果唔係我一定跟團，到時就無咁自由啦。」我道。
 
「呢句說話你講左好多次啦，傻瓜。」Yan笑笑道。
 


「咁係呀嘛！」
 
「我都想同瑜仔去行下既，所以係好彩你地邀請我。」
 
「咁我地就打和啦，哈哈。」
 
我地終於去到奈良啦，我地係客顧服務中心拎左啲簡介同地圖之後就正式入去公園到睇鹿。
 
不過未入到去，已經有幾隻鹿係條馬路邊到散步，小貞拎住份地圖蹦蹦跳咁，似乎有得睇鹿令佢覺得好興奮。
 


有隻鹿行過我地身邊，佢聞一聞小貞手上既地圖，然後佢竟然一啖咬落去！佢食左份地圖呀！
 
「鹿仔！唔食得架！」小貞好緊張咁大聲嗌，但係隻鹿咬完之後已經逃跑左，叫都叫唔住。
 
哇屌！原來呢到啲鹿有啲咁既癖好！咁我地張地圖點算呀？
 
我一臉無奈咁望住Yan，Yan笑到成身震哂咁話：「我都無諗過佢地會咁狼死架……」
 
望住張爛哂既地圖，屌！算鳩數啦！自由自在咁鳩行好過啦！
 


行過左條馬路之後，就見到有個檔口係到賣鹿食既餅，好多人係到排緊隊想買黎餵鹿，其中有個日本阿姨買完之後，佢一開個包裝，啲鹿就好似餓鬼投胎咁，個個都湧哂過去搶食。
 
「呀！！！！」另一邊，又有個遊客俾隻鹿搶左張地圖啦，個日本阿姨即刻走過去，從隻鹿口中搶返張地圖，然後同個遊客講左幾句說話。
 
「佢話佢地唔識分邊啲係食得邊啲係唔食得，所以我地要收好啲地圖。」Yan翻譯。
 
睇黎呢個阿姨好熟悉鹿既世界呢！
 
經過左個同鹿爭執既戰場，我地終於入到去公園裡面，眼前係綿延不盡既青青草原，有啲鹿攤左係草原到休息緊、有啲就好悠閒咁食緊草、有啲細隻啲既，就同同伴玩緊追逐遊戲，我仲以為自己係到睇緊國家地理雜誌既紀錄片，因為個情景真係太自然、太靚啦！
 
我地走埋去不停影相，啲鹿既屎忽好肥，彈下彈下咁真係好撚正，期間有個日本BB仔追住啲鹿黎玩，小貞又跟住黎追，小貞玩得好開心，塊面珠墩紅卜卜咁。
 
咦？瑜仔呢？望一望另一邊，原來佢係到研究緊啲花花草草。
 
「哈哈！傑哥哥！佢地好得意呀！」小貞笑到見牙唔見眼咁撲去我到。


 
我幫小貞抹下汗，「小貞係咪玩得好開心呢？」
 
小貞又好用力咁點點頭回應，之後又跑左去同個BB仔一齊追鹿啦。
 
玩到咁上下，我地又繼續行，個公園真係好大，好似行極都行唔完咁，中途我地去左間甜品舖到憩息，我地叫左碗紅豆湯黎飲，紅豆湯啲料好足，唔似香港嗰啲用水溝稀左既，一粒粒既紅豆清晰可見，小貞都食到好滿足。
 
醫好左個肚之後，我地繼續出發，行到去比較入啲既地方，啲遊客愈黎愈少，我地行過左間士多舖，裡面又有啲鹿餅賣，我地買左啲鹿餅俾小貞同瑜仔，等佢地可以試下餵下啲鹿。
 
小貞小心翼翼咁接過啲餅，然後撕開細細塊咁，啲廘聞到陣香味，就慢慢咁走左過黎，不過呢邊啲鹿純良好多，唔似門口到嗰啲禁住黎搶，佢地用鼻哥輕輕咁聞一聞塊餅，但又安靜咁徘徊係小貞既身邊，無走左過去搶。
 
小貞向啲鹿遞左一細塊既餅，啲鹿哄埋去聞一聞，然後好斯文咁食左，啲鹿個口係到郁下郁下咁，小貞覺得好得意，就笑到格格聲咁，最後瑜仔都幫手一齊餵。
 
「唔知喵喵點呢？」小貞餵餵下，忽然就諗起喵喵道。
 


「小貞掛住喵喵？」我問。
 
小貞點點頭，「仲好掛住姨姨同小海。」
 
小貞口中既姨姨，應該係我老母，講起老母，我都真係好耐無同佢聯絡啦。
 
「好啦，我地今晚打電話去搵一搵佢地。」我道。
 
小貞又笑眯眯咁點點頭。
 
兩個細路餵完鹿之後，Yan再去間士多舖到買埋啲手信，然後我地出返去，黎到日本，點可以唔食壽司同刺身架？