突然做左人地老豆，多左個女: 55
我地簡單咁參觀左清水寺之後，就去觀賞櫻花啦，但眼見已經有好多人係到影緊相，但好好彩咁，我地都搵到一啲櫻花黎影。
其實我對櫻花無咩興趣，不過女仔本身就好鐘意花，更何況係粉紅色既花，小貞著住件和服走到櫻花樹下，粉紅色既和服同埋小貞既蘋果肌臉頰，同櫻花互相輝映，我忽然又覺得，櫻花又真係幾有觀賞既價值。
我不停幫小貞影相，小貞面對鏡頭笑得好開懷，真係好想永遠留住呢一個時光。影影下小貞，瑜仔同Yan都一齊走埋過黎影，瑜仔拖住小貞，Yan就拖住兩個細路，每個人都表露住非常幸福既表情。
突然有個女人走左過黎，同我講左一大堆日文，我完全聽唔明。
Yan見到我一臉迷茫咁，就走過黎幫我手。
Yan同個女人溝通左之後，就擰轉身同我講：「佢地話想同我地影相。」
點知當Yan講完呢句之後，個女人轉個身又用廣東話同佢班朋友講：「佢地話ok喎。」
屌！原來係香港人黎！
Yan聽到都笑左，佢過返去同佢地講：「其實我地係香港人。」
個女人聽到之後都一臉愕然，「你地好似日本人！」之後再指住小貞，「尤其係佢，真係好可愛！」
諗唔到係日本會俾人當成係日本人！Yan同小貞聽到之後都笑得好甜咁同人講左句多謝。
「你地兩母女都好靚呀！」個女人笑笑道。
我尷尬咁摸一摸自己個後尾枕再講：「唔係呀，我地只係朋友。」
然後瑜仔捉一捉住我衫尾講：「傑哥哥……佢係話小貞同姐姐，唔係話你同姐姐呀……」
嗚哇好混亂呀，我覺得我同瑜仔都柒左呀！
我幫佢地影完相之後，個女人就提議幫我地影相，最後我地齊齊企係櫻花樹下影相，睇返張相，都真係好有一家人既感覺。
我地影完相之後，Yan又幫我同小貞影，我抱起左小貞，「咔嚓」一聲，呢一張係我地係日本既第一張合照，小貞係相到笑眯眯咁，希望呢一張相，會為小貞帶黎一個美好既童年回憶。
「呀！傑哥哥！」影影下相，小貞指住遠方道。
我望住小貞指住既方向，只見有堆大陸人為左影相，不惜用手拉扯住啲櫻花，搞到啲櫻花一片一片咁落下，乜野係棘手摧花？睇下我前面呢埋大陸人就知啦。
我放低左小貞，然後小貞就跑左去班大陸人面前，眼紅紅咁講：「啲櫻花……好慘……」
我以為啲大陸人會鬧小貞多管閒事，所以好急忙咁衝左過去，點知啲大陸人都好似俾小貞可憐兮兮既樣電到，個個都心軟咁走開左，係既，佢地係走開左，不過就留低一地既既殘花敗柳囉。
小貞望住地下啲櫻花，就皺住眉一臉惋惜咁，之後Yan同埋瑜仔都走左過黎。
「佢地真係好過份……去人地地方，但專搞破壞……」Yan氣憤道。
瑜仔就默默地執起幾片櫻花，然後遞俾小貞，「我地拎返去做書籤。」
小貞接過片櫻花，終於都破涕為笑。
不知不覺間，原來已經入夜啦，我地出返去市區，還左件和服，然後搵左間日式鐵板燒既舖頭，準備享用我地黎到日本既第一個晚餐。
係出發之前，Yan同我都講好左，為左有返啲探險精神，我地有時唔會好刻意咁搵啲出名既餐廳黎食，而係隨意咁係街邊搵，搵到合眼緣既餐廳就會入去食。
而呢一間鐵板燒既人煙比較稀疏，我地就係貪佢人比較少，坐得會舒服啲，而且我諗係日本食野，差極都有個譜吧。
間野都幾大下，有成三層樓高，不過外型就好古舊，我地入到去，就有個後生仔帶我地上二樓，至於第三層，我見到梯口間擺左啲拖鞋係到，我估係老闆既屋企黎，最上嗰層做屋企，樓下兩層做生意，開到幾夜都唔怕，招呼既都係附近大家熟口熟臉既鄰居，呢種生活真係好寫意。
去到第二層門口，Yan話嗰個後生仔叫我地除鞋，因為裡面係榻榻米黎。
我地除左鞋，搵左個位坐低，我地旁邊有班阿叔就係到飲緊酒。
「呢張係Menu黎，你地睇下想食啲咩。」Yan代替個侍應招呼我地。
但係只見大家都靜哂咁，即係咁，你成個menu都係日文黎，我最多睇得明啲圖同埋玉子呢個詞語，其他我都完全都唔知係乜撚野黎。
我無奈咁望住Yan講：「你玩野呀Yan姐。」
Yan呢一刻先發現到底出左啲咩問題，佢笑到紅都面哂咁，「Sorry, 我傻左……哈哈……」
最後由Yan發版，嗌左份蛋包飯同蛋包麵、煎蛋等等，蛋包飯我食得多，蛋包麵我就真係未試過，不過最重要既係茄汁同美奶滋竟然係任點呀！你鐘意食幾多就倒幾多，點解日本可以咁好架？
無幾耐啲野食都到齊左，不過因為係平價野，所以個後生仔唔會幫你燒埋，你要自己將啲野食放係鐵板到燒。
我同Yan夾手燒，瑜仔同小貞都間中幫下手咁炒兩野，啲飯同蛋係個鐵板到「吱吱」聲咁燒緊，然後陣陣既蛋香同飯香味撲鼻而來，最後就加埋啲番茄醬同美奶滋，我試左啲番茄醬，唔知點解我覺得味道怪怪地，但又唔似係過期，只係講唔出到底邊到怪，都係美奶滋先最好味。
我望下小貞同Yan，佢地都係揀左美奶滋，我再望下瑜仔，佢竟然係成支番茄醬倒哂落去自己個碟到。
呢個時候俾Yan發現左，「瑜仔！你點可以吱咁多架！」
只見瑜仔呆下呆下咁答：「點解唔可以？」
最後搞到Yan要教訓瑜仔幾句先得。
我地食食下，本身坐係隔離枱既阿叔都飲完酒，個個企哂起身準備走，臨走前，佢地走左過黎我地枱講左幾句，我就梗係扮聽得明，外交大使就梗係交俾Yan啦。
Yan笑笑口咁同啲阿叔講拜拜之後，再同我地解釋道：「佢地話小貞同瑜仔都好可愛，佢地係呢到既街坊黎，好少見到有遊客黎呢到食，話多謝我地欣賞呢啲平民食店，佢仲請左我地食多碟燒牛肉添。」
嗚哇佢地真係好有人情味呀！
食飽之後我地就齊齊返酒店訓教啦，因為第日要早起，而且啲細路都玩得好攰啦，我以爲小貞會訓唔慣生寶床，但點知佢又好快咁訓著左，應該都真係太攰啦。
我輕輕咁錫一啖小貞個額頭仔道：「晚安啦，小貞。」
翌日一早，我地就執好行李，準備過去大阪啦，今次去到大阪，我地係喺間民宿到住，但係因為復活節檔期都好飽和，所以得返一間大既套房，Yan話唔介意，所以今次我地係四個人一間房，同Yan共處一室，真係令人好緊張。
可能間民宿比較偏僻，就連係識得日文既Yan都搵唔到路，我地拖住個喼行左好耐，小貞同瑜仔都覺得攰啦，我地索性坐係個喼到休息下，而Yan就繼續去問人路。
「哈哈，你地睇下，佢地仲未搵到酒店。」其實行過既香港人見到我地拖住個喼，就係到恥笑我地。
屌你老母又係啲花生友！
等下等下，我地聞到陣陣既燒魚餅香味，係啲咁狼狽既環境竟然傳黎啲令人有飽足感既味道，你唔想幫襯都唔得啦。
我同小貞、瑜仔三個行到過去，賣燒魚餅既原來係個小販檔黎，類似我地係香港街到賣番薯同炒栗子既小販，今次係我地第一次係無人識日文既情況下同日本人溝通，真係好緊張。
「I want to buy⋯⋯」我嘗試下用英文同佢溝通，點知我都未講完，個小販阿姨已經係咁擰哂頭。
小貞就指一指住個魚餅既樣，個阿姨又講左啲我地聽唔明既日文，我望下瑜仔，話哂佢都有個識日文既家姐，應該唔多唔少都識啲日文呱，可惜瑜仔都係一臉迷惘咁，屌！我又唔小心咁高估左瑜仔啦。
只見小貞依然眼甘甘咁望左啲燒魚餅，睇黎佢真係好想食，差左未流口水啫。
「你地係到做乜？」係我地咁迷惘既時候，Yan又好合時咁出現左。
不過佢身邊都多左個西裝佬。
「佢話識得路，肯帶我地去。」Yan見到我望住個西裝佬，佢就解釋道。
屌！無啦啦又出現個西裝日本人，到底信唔信得過架？不過我諗佢見到仲有一個大人同兩個細路，應該唔會點既。
「小貞想食燒魚餅？」Yan終於留意到小貞一副很想要既樣。
小貞用力咁點點頭。
Yan同個小販溝通之後再講：「佢問你地要幾多件。」
最後，我地買左兩件紅豆味既一齊食。
我撕開左件魚餅，個頭係我食，個尾因為有少少吉士醬，所以我俾左小貞，小貞小心翼翼咁接過，然後細啖細啖咁慢慢食，感覺好珍而重之咁。
我都咬左一啖，外面魚餅塊皮真係好鬆軟，啲紅豆涵料又好足咁，陣陣既紅豆香味慢慢係嘴邊滲出，甜甜地又唔會太甜，我又裝下小貞，只見佢甜甜咁笑一笑講：「好味！」
我諗小貞已經完全愛上左日本呢個地方啦。
我地一邊食，一邊跟住個西裝佬行，終於行到去我地間民宿啦，個西裝佬就好客氣咁向我地道別，Yan就教小貞同瑜仔用日文同人地講多謝。
「跟我讀一次，晏啲吉多！」Yan道。
「呀⋯⋯呀李吉多⋯⋯」小貞口窒窒咁跟住講。
「呀⋯⋯呀啲卡多」瑜仔又跟住講。
講多幾次，瑜仔同小貞終於都識啦，然後笑眯眯咁對住個西裝佬講：「晏啲吉多！」
個西裝佬就笑笑口咁走左。
入到去民宿，只見係一間古色古既民宿黎，就好似日劇螢之光嗰間屋仔咁，好有純樸既風味。
我地入到屋又要除鞋，然後有個阿姨笑笑口咁走左出黎。
「你們好！你就是Yan小姐吧？這裡難找嗎？」個阿姨又係講普通話，不過佢啲口音同大陸人有啲分別。
「你好！是的，真的比較難找。」Yan道。
然後再係我耳邊細細聲咁講：「佢係台灣人黎，嫁左黎日本。」
原來係咁！唔怪得口音都唔似大陸人啦！
之後個阿姨就帶我地去我地間房到啦。