突然做左人地老豆，多左個女: 57
我地去左心齋橋道頓堀嗰到食大起水產迴轉壽司，諗起壽司，我就不自覺地諗起明將、諗起Miss Cheung⋯⋯返到香港應該要聯絡下佢，睇下佢最近既情況係點啦。
入到去，只見右邊就有個透明既櫥窗，見到啲師傅係到處理緊啲魚生，手起刀落咁，最緊要既係件件魚生都好肥美，真係好吸引。
「哇⋯⋯」連小貞同瑜仔都表示讚嘆。
我地搵左個位坐低後，已經急不及待咁開始拎野食啦，我地拎左鰻魚壽司、三文魚壽司等等，件件都大大塊咁，特別係鰻魚，你可以見到條尾添架！既新鮮，又抵食，你話係香港邊到有得食？
食過正餐，就到甜品時間。
我地嗌左抹茶雪糕，雪糕一送到，小貞已經眼甘甘咁望住，不過佢都係好乖咁等埋我地。最後我地所有人既甜品都到齊啦，小貞先慢慢咁畢起啲雪糕慢慢梅，然後又笑眯眯咁望住我。
然後我地行左陣心齋橋，買左啲刺身、水果同清酒，諗住留返今晚肚餓時食。
返到酒店，我就打左個電話俾家姐，小貞就舉高雙手想要聽。
我將個電話放係小貞既耳邊，「喂……Katie姐姐……」
「嗯……喵喵呢？嗯嗯……」
小貞嗯左幾句之後，又將部電話遞返俾我。
「喵喵好乖呀，係間中係床到賴左少少尿。」家姐道。
「嗯，我打唔到俾老母，你幫我同佢報平安啦。」我道。
「知道啦，你地玩得開心啲。」
聽到喵喵同家姐都好好咁，小貞都安心啦，我同Yan各自各咁氹瑜仔同小貞訓左教先。
「你們去不去泡湯呀？很舒服的耶！」老闆娘見我地氹完細路訓教仲係好早咁，就同我地講。
我望一望Yan，佢就話：「都好呀，今日行左成日都好攰啦！」
老闆娘介紹左間係附近既溫泉浴室，佢會幫我地睇一陣小貞同瑜仔，咁我就可以放心同Yan二人世界啦。
不過講就話係二人世界啫，其實湯池都係分左男女湯，我地無機會一齊沖架啦……唉，這些機會……
入到去，我就同成班阿伯一齊浸溫泉，成班阿伯望住我一個後生仔入黎，佢都覺得好新奇，個個都眼甘甘咁望住我，我係腦海到不停提醒自己，就算有番皂跌左落地下，都記得記得千其千其唔好多手執呀。
一條麻甩佬浸溫泉好快啫，我浸完之後就一邊飲牛奶一邊等Yan。
無幾耐Yan都出左黎，雖然佢已經著返哂啲衫褲，不過佢身上嗰陣啱啱沖完涼既香味真係好誘人。
然後我地兩個就靜靜地咁一邊飲牛奶一邊坐係到休息。
「瑜仔份人怪怪地，又成日麻煩到小貞，真係好多謝你地咁照顧佢。」Yan突然笑笑道。
「傻啦，瑜仔咁得意，點會係麻煩！」
「好多謝你，除左阿姨同我之外，你就係第三個唔會嫌棄瑜仔既大人黎啦。」Yan忽然有感而發。
「之前Alexis唔係都有幫手照顧瑜仔？」雖然我知我唔應該提Alexis，但係我真係好好奇。
「佢係有幫手照顧瑜仔，但唔多唔少都有啲微言，好似之前暑假我突然換更數，佢要幫我湊住瑜仔去游泳班，佢成日都話佢好忙，要去見客，所以每一次都搞到瑜仔趕頭趕命咁。」
「我知道，我都有見到。」
「其實諗返起，佢離開我呢個決定話唔定係啱既，我地既價值觀都實在太唔同啦。」
「但係你地當初又一齊到？」
「初時佢都唔係咁架，係出左黎社會做野之後，我人工高過佢，佢唔多唔少都會自卑，可能係為左補償嗰一種自卑感啦，所以佢就變到好物質，成日都諗住賺好多好多錢，但佢根本無諗過，我根本唔介意。」
Yan，你唔知道既事，其實仲有好多。
「點都好啦，變左就係變左，我只能夠講，Alexis唔係一個好人，分手係好正確既事。」我道。
Yan點點頭，「我諗通左亦放低左架啦，兩個人步伐不一，即使點樣忍讓，都唔會有好結果。」
Yan突如其來既心事告白，真係聽到我心癢癢咁，不過快樂既時間總係過得好快咁，我地係時候要返去湊返小貞同瑜仔。
返到去，佢地依然熟睡中，Yan醒起我地仲有啲三文魚、水果同清酒未消滅，所以決定我地一齊解決佢啦。
我地坐左係花園到，抬頭望到一片星空，此情此景，又真係幾浪漫既。
「你們買了清酒嗎？」
屌！原來老闆娘都係到！破壞哂成個氣氛！
「對啊！你有興趣嗎？」Yan問。
「有啊！當然有！」
然後老闆娘就同我地坐埋一齊啦。
「對了老闆娘，當初你為什麼會嫁來日本的？日本人不是很大男人的嗎？」Yan問。
老闆娘飲左啖清酒再講：「當初我在一家日資公司工作，然後就遇到來到台灣工幹的他，也就是我的老公……」
老闆娘一邊飲，一邊回憶起往事。
其實佢地既故事好平凡、好簡單，但又好幸福，就係當兩個人相遇、相識、相知再相愛，然後接納哂對方所有既優缺點，同時又互相尊重大家，日本仔雖然唔係識好多中文，當時老闆娘都一樣唔係識好多日文，但兩個人為左令對方溝通得更加舒服，所以兩個都好努力咁去學習對方既語言，有時你教下我，我又教下你咁，就算日本仔工幹完要返日本，佢地都依然保持聯絡，終於到左老闆娘要嫁去日本既時候。
「其實我的媽媽一直反對我們，她很擔心我一個人嫁過去日本，什麼都不懂，又找不到工作，如果只是依靠老公的話，那就更加危險啦，而且她總是覺得日本男人很霸道，又大男人，怕我嫁過去會不幸福。」
「那你如何說服你媽媽？」Yan問。
「不是我說服我媽的，是我老公，他為了讓我嫁過來，他特地來到台灣住了幾個月，跟我媽相處，那時候，其實我媽身體也出現了問題，不過我老公無微不至地照顧我媽，終於我媽也感動了，接受了他。」
「這樣看起來他真的是很愛你喔！」
「對呀！我也覺得很幸福！」
「之後呢？你一個人來到日本之後呢？」
「來到日本之後，我才發現日本的競爭真是很大，你完全沒有辦法找到工作，因為國內的人本身已經很難找到工作了，更何況是一個來自台灣的女人。」老闆娘食左舊三文魚再講：「就在這個時候，我有了孩子，我老公好高興，我也沒有再找工作啦，只是專心養孩子，幸好奶奶對我都很好，知道我懷孕了，就送了這間屋子給我，讓我收租又可以安胎。」
「真的是很好耶！但為什麼不見你的老公？」
「他去台灣工幹了，所以這幾天都不在。」老闆娘笑笑道。
「那你的孩子呢？都長大了嗎？」
「我的兒子現在在東京讀大學，所以不在這邊。」
「原來如此！真是一個很幸福的故事！」Yan笑眯眯咁，好似完全可以感受到老闆娘平凡既幸福感。
「其實，如果不是我老公當初的堅持，我現在就不能那麼幸福啦，所以年輕人啊，你們一定要好好珍惜對方，如果真係是愛對方的話，就不用怕任何難關，只要撐過了，就一定會雨過天晴的！」
老闆娘講完之後就走左，佢都食左我地好多件魚生同飲左好多清酒。
聽完呢個故事之後，我諗起Alexis，有人可以無條件咁為對方付出，然後換黎對方幸福既下半生，但係有人亦都可以仆街到一腳踏兩腳，只為自己下半生既安穩。
「其實係復活節假之前，Alexis有打電話搵過我。」老闆娘走左無耐，Yan就開口講。
我一臉驚訝咁望住佢。
Yan笑笑，「其實都無咩特別，只係佢話佢漏左係我屋企啲野，問我可唔可以寄返俾佢。」
呢條仆街真係死性不改！
「我諗佢應該展開左新生活啦……」Yan飲左啖清酒再講。
「你……未放得低？」我擔憂地問。
Yan輕輕咁擰擰頭，「唔係，我反而有種被釋放既感覺，覺得件事終於都要結束啦。」
我笑笑回應。
Yan續道：「其實我一直想要既，係好似日本仔對老闆娘嗰種既愛，無微不至，而且不計較付出，我明知道Alexis唔係，但我仲痴心妄想希望佢會改變，當佢咁絕情咁粒聲唔出就走左，仲要叫我寄返啲野俾佢，我就知我錯啦，我應該放生我自己，我係時候要醒啦。」
我靜靜咁飲左啖清酒。
Yan再垂低頭，輕聲道：「我應該要珍惜眼前人，一個真係肯無條件照顧瑜仔既人……」
「肯照顧瑜仔既人？」我問。
「無野啦！我地繼續飲啦！嘿嘿！」Yan紅都面哂咁講。
我輕輕咁摸Yan個頭仔道：「唔飲啦，快啲訓，聽日仲要早起！」
然後Yan又好聽話咁收拾好哂啲野，同我一齊返入房訓。
這夜，我輾轉反側、徹夜難眠，因為訓係我身旁既，除左係小貞，仲隔住左Yan。
去到半夜，唔知兩個細路點樣碌下碌下咁，令到Yan訓左係我側邊。
我同Yan面對面咁訓著，第一次咁近距離咁望住Yan，我就好似感受到佢既呼吸咁，每一呼一吸既空氣，就好似我地共同擁有咁。
望住佢，我諗起小貞，每次呢個時候，我都會輕輕咁錫小貞個額頭一啖，然後我好自然咁輕輕錫左Yan個額頭一啖。
屌！我好撚緊張！心跳加速咁！
唔同架！同錫小貞個額頭係唔同架！點解會咁架！
然後我輕輕咁移開，點知……點知我見到Yan慢慢咁張開眼呀！
仆街啦今次！佢一定覺得我係抽佢水啦！
Yan見我慌慌張張咁，佢就甜甜咁笑一笑，「肯照顧瑜仔既人，就係你呀傻佬。」
吓？即係點？我唔明呀！
Yan見我都係無咩反應咁，佢就輕輕咁錫左我一啖，係嘴唇呀，係蜻蜓點水嗰種！
Yan個嘴唇好柔軟，但佢移開得太快啦，我未完全感受到嗰種細膩佢就移開左啦！
「我地……咁樣係……一齊？」我緊張地問。
然後佢再甜甜咁笑一笑，「咁樣都唔算係一齊咩？男朋友仔！」
嗚哇！男朋友呀！！！！！！係男朋友仔呀！！！！！！！！