突然做左人地老豆，多左個女: 54
黎到日本既第一件事，就梗係去酒店放個低啲行李先啦，我地係機場買左係京都一日既套票同埋大阪兩日既套票，準備搭鐵路去間酒店，點知係入閘之前，有個 職員係閘口到貼左張告示，寫住「人身意外事件」。
經過Yan同啲職員了解過之後，原來有人跳軌，雖然我都聽過唔少係日本會發生呢啲事，但係點都諗唔到係第一日就遇到，亦由於發生左啲咁既事，鐵路服務有可能要延遲兩個鐘，唉，因為有時差，黎到日本已經少左一個鐘，而家因為發生啲咁既事，又浪費多兩個鐘啦。
「唔緊要啦，我地食住早餐等！」雖然情況不似預期，但Yan仍然保持樂觀既心態。
我地係附近搵左個位坐左，Yan就拖住小貞同瑜仔話：「日本啲便利店有好多好野架，我地不如一齊入去發掘下啲寶藏囉？」
「好呀！」小貞興奮咁舉起隻手回應。
「你地去啦，我留係到看行李。」我道。
「你想食啲咩？我幫你買埋啦。」Yan笑笑道。
「嗯⋯⋯我都唔知有咩好食，你幫我話事啦。」
「好啦，你即管相信我既眼光啦！」
望住Yan懷住興奮既步伐同兩個細路一齊入左去間便利店到，我又有一種好安心既感覺，雖然黎到日本第一件事就唔太順利，但有佢地係我身邊，我又覺得即使發生幾咁唔開心既事，其實都係過眼雲煙啫，嚇唔到我既。
好快地，佢地就一人拎住一袋野食返返黎啦。
我打開個袋，見到有手卷壽司、飯團、兩件蛋卷、兩盒果汁同兩盒鮮奶。
「好啦！大家揀下自己想食啲乜啦！」Yan興奮道。
小貞頭側側咁諗一諗，然後指住左件蛋卷，以瑜仔性格，佢一定會跟住小貞要蛋卷，我好有信心咁拎左兩件蛋卷出黎，一件俾小貞，一件俾瑜仔，小貞好開心咁接過左，講左句多謝，至於瑜仔⋯⋯
佢居然擰擰頭，自己拎左個飯團出黎！
屌！我又柒左啦！瑜仔你真係好難捉摸呀！
最後Yan揀左手卷，我就要埋淨返嗰件蛋卷。
個蛋卷係原味既，中間有啲cream，我諗都係普通嗰啲蛋卷黎啫，我對佢期望不大，點知我一咬落去，啲cream好似自己識溶化咁，係我個口到浪住浪住，甜度適中，陣陣既雲尼拿香味係我嘴角邊慢慢咁滲出黎。
點解！點解人地一間便利店就可以ko我地香港任何一間便利店？我終於明白點解啲人咁鐘意去日本啦！
我望一望小貞，見到佢同我一樣一副好滿足既表情，我就知道，小貞同我一樣享受緊呢件咁唔普通既蛋卷！我再望下Yan，發現原來佢都係望住左我，然後對住我好有自信咁笑一笑，就好似同緊我講：「都話信我眼光啦！」
食完個突如其來而又令人驚喜既早餐之後，鐵路既服務又恢復正常啦，我地又重新出發啦！
搭鐵路既過程好長，不過小貞對於日本都好好奇，佢一直眼仔碌碌咁望住每一個景色，好似唔想錯過任何一個美麗既景色，相反瑜仔又係挨住Yan訓到成隻豬咁，我真係懷疑瑜仔有交通工具渴睡症，一上到車就可以訓著。
我地終於到左酒店，小貞同我一間房，瑜仔就同Yan一間房，擺好哂啲行李之後，我地唔想再浪費任何時間，我地馬上就要出發啦！
我地既第一站，就係去京都既清水寺，去欣賞櫻花啦，不過係去之前，我地係要去租左和服先，小貞著和服既得意樣，大家是咪好期待呢？
Yan係事前做足哂啲資料搜集，所以我地只要跟住佢行就得啦，Yan話租和服既地方好近酒店，所以行過去就得。
果然，話咁快我地就到左間和服店。間和服店既規模幾大，有成三層樓高，但係最驚奇既係，一入到去個店員居然唔係同我地講日文，而係講普通話！
「歡迎光臨，請脱下你的鞋子，然後放進膠袋裡。」店員明明就係一副日本妹既樣，但居然可以操一口流利既普通話，証明大陸遊客係各地既影響力真係好大，令人深感無奈。
因為分開男女和服，所以變左瑜仔跟住我，小貞就跟住Yan，男既就係第二層，女既就係第三層，最後先落返黎地下揀木屐。
「這邊是租的，你們先選擇你們喜歡的和服和腰帶，然後過來另一邊，我們會有專人幫你們穿著的。」操流利普通話既日本妹繼續為我介紹。
「姣的，些些。」我用我最有信心，亦係我唯一識既普通話回應佢，唉，我真係寧願佢講廣東話都好過講普通話。
然後我拖住瑜仔去揀和服，其實男人既和服款式真係唔多，黎黎去去都係嗰幾款，始終和服都係女人既恩物，男人都只係襯托架啫。
我好快咁揀左件黑色外套，上面係灰色上衣、下身係淺灰色既長布既和服，我望一望瑜仔，先發現原來佢未揀好。
「瑜仔，你有啲咩心水呀？」我問。
只見瑜仔一臉迷茫咁望住我，似乎真係揸唔定主意。
「不如等傑哥哥幫你揀，再睇下你鐘唔鐘意啦？」
瑜仔點點頭回應。
最後，我幫瑜仔揀左套深藍色直間條既和服，瑜仔又係點點頭咁回應我，我都唔知佢係真係鐘意定係真係無主意啦。
我地揀哂所有野之後，我懷住興奮既心情拖住瑜仔去俾人幫我地換衫，我好期待會係日本妹幫我地，點知一過到去，得啲阿叔同阿嬸係到，真係令人大失所望。
好快咁，瑜仔同我都換好哂和服，甚至落埋樓下揀埋木屐，不過我地都未見小貞同Yan，無計啦，男人對於呢方面係比較快手，我就唯有同瑜仔一齊坐係間舖頭既門口鳩等。
「這個還不錯，不過我還是喜歡那個。」
「哇，你真係好靚呀！」
一邊等，一邊都見到唔少大陸人同香港人著住件和服落到黎，畢竟都係旅遊旺季，我真係擔心去到清水寺會有勁多遊客，個感覺就好似返左香港咁。
等左一陣，我抬頭一望，眼前居然出現左個著住和服既北川景子！
佢將前陰分成三七分界，後面既頭髮就盤旋成為個髻，佢化左少少淡妝，然後襯住一套金黃色既和服，衫尾到係一個個小波點，雖然係金黃色，但係顏色比較淺，所以感覺一啲都唔俗氣，然後腰封都係金黃色既，不過腰帶就係紫色，令人眼前一亮。
「你真的好像北川景子啊！」
聽到個日本妹咁講，我先回過神來，知道眼前呢個係Yan而唔係北川景子。
Yan望住我紅都面哂咁笑一笑，笑容中帶點含蓄而又害羞。
然後輪到小貞啦，小貞著左套淺粉紅色既和服，件和服到仲有啲粉紅色既櫻花做襯托，小貞並無紮到髻，不過就係長到膊頭既頭髮偏左邊到紮左條小小既辮仔，而且係用一條有紅色車厘子樣既橡筋紮住，配襯住佢圓圓既面珠 ，望住呢個咁可愛既女，我真係好有衝動走埋去錫佢一啖。
「瑜仔，唔好咁望住小貞啦，你搞到小貞好怕羞。」Yan笑笑道。
自從小貞著左套和服之後，瑜仔就一直眼甘甘咁望住小貞，搞到小貞紅都面哂。
你個瑜仔，如果唔係你仲細，而且係Yan既細佬，我一定唔會咁樣俾你��我個女！
「哇！好靚仔喎你！」Yan走過黎笑笑道。
「點夠你靚女呀北川景子！」我又笑笑回應。
Yan紅都面哂咁輕輕推一推我，甜甜咁笑住話：「咦！講呢啲！」
然後我重新拖返住小貞，Yan帶頭搭鐵路去清水寺啦，沿路啲人都望住Yan同小貞，我又再一次享受住俾人葡萄既目光啦。
去到清水寺，只見已經有好多人係到，係清水寺門前，有個類似鄉村啲人打水既地方，即係中間程井字型，有啲水係啲竹到流動住咁，望落去就覺得啲水應該係天然水黎既，應該好清甜。
我地走埋去，其實都有好多人圍住係到，我抬頭望到有啲牌畫左啲公仔同寫左啲日文係到，看圖識字，我諗我大約都做到要係到做啲乜，不過當然有個識日文既人翻譯就最好不過啦。
「首先呢我地要拎起放係水旁邊既兜仔，將佢放係啲竹既出水位。」所謂既兜仔其實係一枝木造，有條長長既柄既木兜，「當兜仔裝滿左啲竹流落黎既水之後，我地就用黎沖一沖我地既左右手，之後再用少少水掂一掂我地既嘴巴。」
Yan一邊介紹一邊做，我地又跟住佢一齊做，我膽粗粗咁飲左啖竹水，感覺真係幾清甜，天然既野真係寧捨唔同。
「然後再將個兜打直向下擺，等淨返啲水可以流到去個兜柄到，當係一個清洗儀式，完成之後就將個兜放返係原位啦。」Yan續道。
可能係Yan示範得好好啦，小貞同瑜仔都跟得到，而且都好乖咁將個兜放返原位。
不過當我抬頭一望既時候，竟然俾我見到有個阿叔拎住成個水樽，將啲竹水係咁放入個水樽到。
「真爽啊！居然有免費水喝！」個阿叔操流利普通話道。
屌你老母人地啲水唔係俾你當成係免費水咁用囉，一啲都唔識得入鄉隨俗！
只見小貞想走過去個阿叔到，但我怕危險所以拉住左小貞，點知Yan係呢個時候已經走左過去。
「先生，你係唔可以咁樣裝啲水架，你咁樣好唔尊重間寺廟。」面對住大陸人，Yan居然唔係講普通話。
個阿叔愣住左，再粗聲粗氣咁講：「幹你什麼事？」
諗唔到阿叔又聽得明廣東話，不過屌你老母竟然咁對Yan！但當我想走過去時，Yan又開口話：「你地好窮咩？窮到連水都要飲免費既？」
阿叔聽到Yan咁講，即刻嬲到紅都面哂咁，然後一邊走一邊話：「他媽的香港人真是很麻煩！」
Yan返返黎我地身邊，我問佢：「你故意玩佢，所以同佢講廣東話？」
「傻既，我係香港人，我黎到外地，點解要同佢地講普通話？」
Yan果然係有性格。