突然做左人地老豆，多左個女: 53

話咁快又到左復活節假期，連埋清明節，小貞可以放好多日假，所以我決定帶小貞去一去旅行，至於去邊到？咁就梗係去比卡超既故鄉──日本啦！
 
因為阿南同家姐都要返工，所以佢地無興趣去，我又擔心我自己一個同小貞外出，如果我病左或者有咩事就會扔低小貞自己一個，所以我就膽粗粗咁問Yan有無性趣帶埋瑜仔同我地一齊去，意想不到地佢都好有興趣，可能係Alexis件事令佢都想離開香港散下心啦。
 
今日係復活節假期既第一日，亦係我地出發去旅行既日子，我地既計劃係去一日京都、兩日大阪，總共三日兩夜，因為Yan識日文，所以我地選擇自由行，有個識日文既人一齊去日本，真係方便好多，當然最重要既係有北川景子陪同，唔知北川景子去到日本會唔會俾人話似北川景子呢？
 
係早一晚，我同小貞已經執好哂行李，至於喵喵我就拜託左家姐每日定時定候咁上黎餵佢同清潔啲屎尿，家姐初頭都唔係咁願意架，不過知道小貞有得去旅行好開心，所以最後都答應左幫忙。
 
「傑哥哥……」
 


可能係第一次出遠行啦，小貞好緊張，氹左佢好耐佢都訓唔著。
 
「小貞呀，你要早啲訓呀，聽日我地早機，南哥哥起唔到身揸車送我地，我地要好早起身搭巴士架。」我道。
 
「但係櫻花好靚，我訓唔到……」小貞對眼已經係半合既狀態，但依然唔肯訓。
 
我諗小貞係ff緊去到日本可以睇啲靚櫻花，所以興奮到訓唔到。
 
「小貞快啲訓，咁聽日先會有精神睇櫻花架嘛。」我溫柔地道。
 


「嗯……」
 
終於，小貞都係抵受唔到周公既呼喚，進入夢鄉啦。
 
「登登登」
 
手機響起，係Yan whatsapp俾我。
 
「小貞訓左未??」
 


似乎佢都同我一樣情況，好難氹得到瑜仔訓教。
 
「啱啱先氹到佢訓?」我覆。
「哈哈, 瑜仔都係呀, 佢一諗到可以同小貞去旅行佢就好開心?」
「咁瑜仔佢而家訓左未??」
「訓左啦終於都?」
「咁你呢? 訓未呀??」
「就訓架啦, 不過有得睇櫻花真係覺得好興奮, 我都擔心我會訓唔著??」
「傻妹, 如果你訓唔著你搵我啦, 我會好似氹小貞咁氹你訓教?」
「好呀哈哈, 咁你都要快d訓啦?」
「嗯, 早抖, 聽日見」
 
可以同Yan同遊日本，話唔興奮就係假既。
 
然後就到左今朝早，雖然小貞夜訓左，但佢俾我想像中精神，可能佢真係覺得太開心啦。


 
「傑哥哥！」小貞左手抱住左個喵喵cool順，右手攬住左個比卡超公仔，走左過黎我身邊道。
 
「做乜事？」我一邊係麵包到查緊啲士多啤梨醬，諗住俾小貞當做早餐，一邊回應小貞。
 
「可唔可以拎埋佢地過去呀？」小貞眼仔碌碌咁問。
 
我諗佢地應該係指小貞手上嗰兩個公仔。
 
「小貞，個喼無位啦，唔洗拎埋過去啦。」
 
小貞有啲失望咁垂低頭。
 
「小貞乖，去到日本，我帶你去小精靈訓練中心，到時你就會見到好多比卡超架啦！」我續道。
 


聽到有好多比卡超，小貞即刻笑眯眯咁用住比卡超聲線講：「比卡超！」
 
「喵喵，小貞會好掛住你架……」臨走之前，小貞依依不捨咁同喵喵講。
 
喵喵好似好有靈性咁，好似知道我地將會出遠行，所以佢圍住小貞轉左幾圈先捨得返去自己張寵物床到。
 
我拖住小貞、拖住個喼去到巴士站等車，天都未光得哂，但清晨既空氣特別好，相信會係好好既一日。
 
我地一直等一直等，都唔見有巴士黎到。
 
「你地去機場呀？」有個阿叔行過，突然同我地講。
 
「係呀。」我回應道。
 
「去機場唔係呢條線架，係對面嗰條！」阿叔好瀟灑咁講。


 
屌！柒左添！唔怪得知等咁耐都未有車黎啦！
 
「多謝叔叔！」小貞好有禮物咁同個阿叔講。
 
阿叔聽到之後即刻冧哂，笑笑口咁講：「小妹妹去旅行呀？」
 
小貞點點頭回應：「係呀！同傑哥哥去日本玩！」
 
「哇！去日本咁開心呀？咁你地要玩得開心啲啦喎！」
 
小貞再用力咁點點頭回應。
 
最後我地過返對面線等車，好快地巴士就黎左。
 


一上到車，可能始終都係太早啦，加上巴士上寧靜既環境，小貞最後都係挨住我訓著左。
 
去到機場，我就已經見到Yan同瑜仔等緊我地。
 
「唔好意思，遲左少少。」我道。
 
「唔緊要，仲有時間。」Yan笑笑回應。
 
小貞見到瑜仔，兩個人又相視而笑。
 
做好哂登機手續之後，我地無幾耐就要上機啦，原來瑜仔同小貞都係第一次搭飛機，佢地兩個見到飛機都表現得好興奮，尤其是係瑜仔，平時呆下呆下咁，但見到飛機又好似雙眼發光咁，昅實啲飛機，個感覺就好似佢昅實啲石頭咁，一樣咁專注。
 
「瑜仔，我地就上機架啦，你快啲過黎啦。」Yan道。
 
最後瑜仔緩緩咁走返去Yan身邊。
 
上到機，Yan同瑜仔兩個人坐左係我同小貞既後面，而小貞因為想睇風景，所以我俾佢坐左係近窗邊既座位。
 
小貞一坐低左，就眼仔碌碌咁望住出面啲景色。
 
「傑哥哥！佢地好細粒呀！」小貞指住遠處既航空職員同飛機道。
 
我摸摸小貞個頭仔道：「傻妹，因為佢地遠呀嘛！」
 
小貞聽到之後又格格聲咁笑。
 
「歡迎黎到西嘉航空，我係本班航機既……」
 
啲人都差唔多上哂機啦，機倉服務員都開始開咪講啲簡解同求生設備啦。
 
只見小貞好專心咁聽個空姐講野，相對地，同機都有一、兩個細路係到，佢地一上到機係好嘈咁傾偈，直到佢地既老豆老母喝住佢地，佢地先係肯收聲。
 
小貞真係好乖好乖。
 
終於差唔多要起飛啦，我已經幫小貞扣好安全帶，小貞感覺到架飛機慢慢咁郁緊，佢有啲緊張咁捉住我隻手，但又好好奇咁望住出面啲景色。
 
起飛啦，我怕小貞會耳水不平衡，所以幫佢按住左對耳仔，小貞笑眯眯咁望住我，似乎唔係好明點解我要按住佢耳仔。
 
「哇！」架飛機升到上去天空到，小貞眼甘甘咁望住啲藍天白雲，好驚嘆咁。
 
「傑哥哥！你睇！好靚！」小貞並無因為掛住睇風景而忘記我，佢擰轉頭黎同我講。
 
「係喎！真係好靚！」我讚嘆道。
 
「先生，請問想飲咩？」無幾耐，空姐推住餐飲車走左過黎問。
 
「咖啡呀唔該。」我擰轉頭問小貞：「小貞想飲啲乜？」
 
小貞頭側側咁諗一諗，「橙汁。」
 
空姐見到小貞咁可愛既樣就甜甜咁笑一笑。
 
「小姐，請問想飲咩？」我聽到空姐係後面問緊Yan。
 
「茶唔該，瑜仔想飲咩呀？」Yan溫柔地道。
 
「日本……」
 
喂喂，瑜仔，人地係問你想飲啲乜呀，唔係你去邊呀，你係咪未訓醒呀。
 
「瑜仔，姐姐係問你想飲啲咩……」
 
我無擰轉頭睇，不過想像到Yan一定係尷尬到紅都面哂咁，因為我都忍笑忍到成身都震哂。
 
「橙汁‥‥」
 
結果又係同小貞一樣飲橙汁。
 
後來空姐送俾個飛機餐過黎，朝早既飛機餐好簡單，都係得一塊牛角包同埋一個芒果布甸咁，但係小貞係第一次食飛機餐，即使好簡單佢都覺得好期待。
 
佢腳仔fing fing咁，用充滿期待既眼神凝視住個布甸。
 
佢想撕開布甸個包裝但唔夠力，最後我出手幫忙，佢小心翼翼咁畢起一塊布甸，然後慢慢咁一啖咬落去，再係嘴巴到梅下梅下咁，似乎食得滿足。
 
食過飛機餐，我地都差唔多到日本啦，空姐再開咪提示我地即將會落機，要扣好安全帶。
 
「傑哥哥……」只見小貞紅都面哂咁。
 
「嗯？」我回應。
 
「我……我想……我想wee wee呀……」小貞尷尷尬尬咁扭下個身道。
 
吓？落機啦喎！咁點算好？
 
「姐姐……我都想wee wee……」唔知係咪瑜仔聽到小貞咁講，連佢都想去。
 
「瑜仔、小貞，你地忍耐一下，一落機我地就去，好無？」Yan溫柔地道。
 
兩個細路都點點頭回應。
 
可能係急住去廁所啦，小貞對落機無乜感到興趣，只係一味個身扭下扭下咁。
 
終於落到機，Yan幫我拖住小貞，我就抱住瑜仔，兩個人衝左去廁所，所以話，我搵埋Yan一齊去呢個決定真係唔錯，起碼小貞想去廁所時有Yan同佢去女廁。
 
幾經波折，我地終於搞掂哂所有手續，正式到左日本啦！
 
「日本呀！」我忍唔住內心既興奮，一到步就伸左個懶腰，企係原地大聲咁嗌。
 
「日本呀！」我以為Yan會話我嘈，點知佢又戇鳩埋一份。
 
「日本呀！」本來黎到新地方，怕怕羞羞既小貞，見到我咁興奮係到伸懶腰，佢都輕鬆左，一齊黎嗌。
 
「日本呀……」瑜仔見到小貞嗌，佢又緩緩咁跟住小貞細細聲咁嗌。
 
就係咁，我地三日兩夜既日本之旅開始左啦！