突然做左人地老豆，多左個女: 50
第二日朝早，我先醒起原來我仲有小貞份通告仲未簽，所以即刻拎返出黎睇，個內容大概係去曹公潭戶外康樂中心嗰到親子一天遊，作為小貞老豆既我，就梗係剔左參加啦。
終於到左旅行嗰日，我同小貞執好哂啲裝備，餵好喵喵，小貞著左套體育服，我地就手拖住手咁出發去幼稚園啦。
「小貞！傑哥哥！」Yan拖住瑜仔，見到我地就揮揮手道。
Yan同Alexis分左手之後，我時不時都會係whatsapp同yan聯絡，今日煮乜餸又會傾一餐、小貞同瑜仔今日要做啲乜功課又會傾一餐，有時我仲會send下小貞啲得意相俾佢睇，盡量希望佢感覺到有人陪住佢，失戀都唔洗咁唔開心，當然如果你問係咪真係有用，咁就要Yan本人先知啦。
「Yan姐姐！瑜仔早晨！」小貞好有禮貌咁講。
瑜仔突然向小貞遞左條繽紛樂，但係又唔出聲，Yan見到正想開口話瑜仔既時候，小貞又接過左支繽紛樂，甜甜咁笑住話：「多謝！」
嗚哇！有無人可以教下我地點樣先可以了解到小貞同瑜仔既世界？
班主任點完名之後，我地就正式上去旅遊巴啦，咦！等等！好似少左個人？
「等埋我呀！！！！！」小海係遠處一邊咆哮，一邊狗衝過黎。
屌！我竟然唔記得左仲有小海！
只見Julia送左小海上旅遊巴之後就走左，但明明呢個係親子旅行，咁小海既老豆老母呢？去左邊？
「小海，你老豆老母呢？」呢句對白我都唔知講左幾多次啦。
小海扁一扁嘴，指住我話：「今日你做埋我老豆！」
吓！？我幾時又多左個女？
「唔好玩啦小海姐，我養唔起你架！」我笑笑道。
「爸爸媽媽返工唔得閒，佢地話由你黎帶住我喎！」
仆街！我都只係帶過小海幾次出去玩啫，佢地就當正我係Julia二號啦！仲要係免費嗰隻添呀！
小海見到小貞，就走埋去拖住小貞，就係咁樣，三個細路腳仔fing fing咁帶住愉快既心情去旅行啦，呀，唔係，係兩個，因為瑜仔又係一上到車就訓著左。
因為車到實在有太多細路同大人啦，個個都七嘴八舌係到傾偈，搞到好嘈咁，班主任唯有開咪控制下個場面。
「好啦，各位大朋友、小朋友，首先好歡迎大家今日一齊黎去旅行，不如大家先答下我問題好無呀？」
「好！」成車既幼稚園學生齊聲道。
「有無人知道今日我地係去邊呀？」班主任問。
「我知我知！」有好幾個坐係前面既細路舉手搶住答。
「好，咁就由簡日才同學答啦！」班主任指住其中一個細路仔講。
「係去……去……」個細路仔頭側側咁，講極都講唔到個地址出黎。
「哈哈！」佢隔離啲同學仔笑佢唔識就係到扮識。
班主任笑笑，再講：「嗱，下次要真係識先好舉手呀！」
「你識唔識呀？」然後啲老豆老母又七嘴八舌咁問自己個細路，好似好期待自己個細路會識，會答中問題咁。
「我識……」係呢個時候，瑜仔竟然醒左，仲緩緩咁舉手。
「哇！好難得李哲瑜同學都會舉手答問題喎！我地俾啲掌聲俾佢啦！」
「哈哈！」班細路一邊恥笑一邊拍手。
喂喂，班主任，你咁樣做好似唔係幾好咁喎。
「好啦，咁就由瑜仔答問題啦！」班主任興奮道。
只見瑜仔緩緩咁企左起身。
「瑜仔你唔洗企起身架，坐低答得架啦。」班主任道。
「哈哈！」班細路又恥笑佢。
「瑜仔乖，坐定定答得架啦。」Yan紅都面哂咁講。
btw我自己都忍笑忍得好辛苦。
然後瑜仔又緩緩咁坐返低，之後頭側側咁，大家都好期待瑜仔既答案。
喂喂！瑜仔你要真係識先好呀！如果唔係答錯又俾班仆街笑柒你呀！
「去曹公……潭。」瑜仔好似未訓醒咁，緩緩咁講左個答案。
個個聽到瑜仔答啱左，個個都目定口呆咁，就連老師同我都係，唯有小貞同Yan係到拍手讚好。
瑜仔，你真係一個深不可測既細路。
「好……好啦，瑜仔答啱左，老師有粒糖獎俾瑜仔食既，麻煩同學幫我轉過去啦。」
瑜仔從其他細路手上接過粒糖，係白兔糖黎，瑜仔無食，遞左俾小貞。
小貞又甜甜咁回應佢：「多謝！」
我其實好想問下小海，瑜仔次次有野食都俾小貞但無小海份，唔知小海嬲唔嬲呢，但見小海好似無乜野咁繼續聽老師講野，可能佢根本都唔稀罕啦。
「咁老師再重覆多次啦，我地今日係去曹公潭戶外康樂中心既，咁嗰到有好多野玩架喎，咁大家最緊要係守秩序，大家要排隊輪住黎玩，唔可以爭先恐後，同埋要勤洗手呀！」
「知道！」
老師講完一輪簡介之後，然後又話：「好啦，咁不如我地而家唱下歌先啦，小朋友你地想唱咩歌呀？」
「字母歌！」有個細路衝口而出。
「好啦，有同學提議唱字母歌喎，仲有無其他同學提議呀？」
只見大家唔係喺到吹緊水，就係啲家長餵緊自己啲細路食緊野。
「好啦！咁我地就一於唱字母歌啦！」
「A、B、C、D、E、F、G……」小貞同小海都腳仔fing fing咁跟住唱，好鬼得意，而瑜仔又繼續訓，就算四周圍好嘈佢都照訓得著。
伴隨住細路仔可愛既歌聲，我地終於到左目的地啦。
「好啦，咁首先我地去左個遊樂場玩先，玩到咁上下我地就去食午餐啦！」老師道。
一去到遊樂場，班細路就好似發左癲咁，衝既衝、跑既跑、跳既跳、仆低既仆低，場面完全不受控。
好彩有啲老豆老母係到控制住，如果唔係一定七國咁亂。
我左手拖住小貞，右手拖住小海，而Yan都拖住瑜仔走左過黎。
「小貞、小海、瑜仔，你地想玩咩呀？」我問。
「單車！」小海指住個四個轆既單車嗌。
最後佢地三個就好活潑咁走左去踩單車，對班細路黎講，四個轆既單車簡直係容易應付啦！
我同Yan坐埋左一邊望住佢地玩。
「多謝你。」Yan突然道。
「多謝我啲乜？」我問。
「多謝你呢幾日陪住我，等我無成日亂諗野。」Yan笑笑道。
「傻啦，算得上係啲咩。」
「雖然有時臨訓前都會諗起佢，會眼濕濕咁，但比起第一日，已經好好多啦。」
「俾啲時間沖淡佢啦，呢啲野急唔黎。」
Yan點點頭回應。
玩都咁上下，佢地都紅都面哂，氣喘喘咁，好在終於到左中午食飯時間啦。
我地係曹公潭個中心到食完野之後，又去左體育館到集合，老師話要玩集體遊戲。
「好啦，咁我地而家玩集體遊戲！咁頭先我地係旅遊巴到唱左字母歌啦，而家我地就玩砌字母！你地三人一組，老師手上有張卡，你地拎左張卡之後，就三個人合力用身體砌出卡上既字母，睇下邊個扮得最似，好唔好？」
「好！」
三人一組，咁好自然就係小海、小貞同瑜仔一組啦。
小海出左去抽卡，返到黎打開一望，係個「Cat」字。
「好啦，咁我地順序一組一組咁出黎扮啦喎！」
「好！」
玩左幾組之後，就輪到我地呢組啦，我同Yan都好努力咁教佢地點扮，希望出到黎會成功啦！
最後瑜仔好呆咁彎低隻手，整左個「C」字，而有啲複雜既「A」字就交左俾小貞，小貞雙手舉起，係頭頂到做左個屋頂既動作，而最簡單既「T」字就俾小海霸住左，佢就咁放平舉起雙手就收得工啦。
「啪啪啪啪……」大家都拍手加許佢地。
小海好開心咁彈下彈下咁彈左過黎，一個唔小心，有張紙從佢運動褲袋到飄左出黎。
我執起一望，好熟面口，再諗一諗，係上次小海拎出黎，話係聖誕老人送俾佢既聖誕禮品──半島酒店既自助餐餐券。
我望一望個到期日，原來係喺新年嗰時已經到左期，但小海當時唔係仲係好自豪咁講，會同佢老豆老母去食架咩？點解過哂期都唔用？
正當我想開口問小海既時候，小海發現左，然後即刻從我手上搶走張券，再衝左去廁所。
Yan、小貞同我都追住小海，我停左係女廁門口，Yan同小貞就入左去，無幾耐，佢地兩個出返黎。
「小海佢喊緊。」Yan皺住眉道。
我見小貞都眼紅紅咁，就拖返住小貞。
「我驚小貞都會喊，所以帶左小貞出黎先，我再入去問下小海咩事。」
我點點頭回應yan。
無幾耐yan又出返黎，「原來係因為小海父母一直唔得閒，所以小海一直將張餐券袋係自己啲衫袋到，希望總有一日佢既父母會記得，會同佢一齊去食……」
我聽到之後好嬲，仲以為經過上次小海食物敏感件事，小海老豆老母會注意多啲小海，但結果都仲係咁，而家香港啲家長係咪真係覺得搵錢重要過自己個細路？連少少時間都抽唔到出黎，咁點解仲要生佢地出黎？要佢地細細個就一個人承受寂寞？