突然做左人地老豆，多左個女: 49
「先生，你無事呀嘛？」Yan樓下個看更見我係到坐得太耐，於是走過黎問我。
「無……無事。」
好在佢叫一叫我，我差啲都唔記得我今次過黎係做乜。
「我到左你樓下啦」我whatsapp Yan道。
無幾耐，Yan就著左件白色T襯一件深藍色薄薄地既外套，下身著左條運動短褲。
「你唔凍咩？」我問。
Yan擰擰頭，「行喔！」
只見佢雙眼腫腫地，依然係好紅咁，我諗佢啱先都喊左唔少，可能佢唔想俾瑜仔見到佢呢個樣，所以先將瑜仔交俾佢姨睇住先吧！
沿路我地都好靜，Yan默默咁行，間中垂低頭好似諗緊野咁，然後又會重新抬起個頭，佢到底係到諗緊乜野，企係佢隔離既我完全唔知道，亦唔知道可以點樣可慰佢好。
我無打算將頭先件事講俾佢知，我想保護佢，唔想佢聽到之後更加傷心。
然後我地終於行到佢糖水舗。
「幾多位呀？」待應問。
「兩位。」我道。
我帶Yan揀左個比較偏僻既位置坐底，方便佢喊或者講心事。
「要啲咩？」待應遞左本餐單俾我地。
「我地睇睇先。」我道。
Yan望左陣，我問：「想食啲乜？」
「紫米湯圓……」Yan有啲氣虛力弱咁講。
我都係第一次見Yan咁無精神。
「唔該，要兩份紫米湯圓。」我道。
「收到！」
係等待期間，Yan再一次垂低頭，佢話：「多謝你陪我……」
「傻……」我答。
「我一唔開心就會想食甜野，我唔想咁既樣對住瑜仔，我怕會嚇親佢，所以我想食啲甜野，等自己開心返啲。」
「唔好逼得自己太緊。」
Yan點點頭回應。
好快地，兩碗紫米湯圓送到，老闆係湯底落左薑，所以轉黎陣陣既薑香味，未入口已經開始有啲醒神，唔怪得Yan會揀呢樣甜品。
Yan慢慢咁用匙羹畢起啲湯，然後又慢慢咁放入口，紫米湯圓冒出黎既蒸氣緩緩上升，為Yan增添矇矓美。
然後我自己都開始畢起啲湯黎飲啦，薑味同甜味配合得恰到好處，有醒腦提神，又有暖胃既效果，係冬天飲的確一流，之後再食一啖湯圓，紫米既咬韌度適中，可以食得出老闆娘好花心機咁去搓啲湯圓，想為係呢個冬天感覺寒冷既人增添點點既溫暖。
食食下，我抬頭望一望Yan，只見佢雙眼通紅咁流緊淚。
我默默咁向佢遞左張紙巾。
「Sorry呀……我又唔爭氣……」Yan哽咽道。
「唔緊要架，瑜仔唔係到，你可以盡情喊。」
「原來失戀真係咁痛……咁痛架……」
「曾經我地都分過手，但係我知道，呢一次，我地真係分手啦……」Yan續道。
「等時間沖淡，過耐啲會好……」我心痛道。
「係屋企，做咩都會諗起佢，諗起佢係屋企幫我洗碗，諗起佢幫我照顧瑜仔，諗起佢豎起手指公讚我煮既野好好食，每一個位置、每一樣物件，都好似有佢既倒影係到，真係好難忘記呀……」
係呢個時候，糖水店播左首歌──辛曉琪既味道。
https://youtu.be/EuO3xI0KfZA
「今天晚上的 星星很少 不知道它們 跑那去了
赤裸裸的天空 星星多寂寥」
「我以為傷心可以很少 我以為我能 過得很好
誰知道一想你 思念苦無藥 無處可逃」
真係好應景。
Yan兩行淚水繼續係佢既瓜子臉頰到流緊，「我無怪佢，甚至無嬲既感覺，我只係擔心佢……點解連電話都唔開……」
「洗乜擔心佢，佢只係一個不負責任既賤人，佢唔值得你為佢咁傷心。」我道。
「唔係架……係我爸爸過左身，後母又走左既時候，係佢陪住我同瑜仔……」
可惜人地最後係嫌棄你地……覺得你地麻煩呢……
「嗰陣時，全靠佢係我地身邊，支持住我地……」
如果我早啲遇見你，陪住你渡過難關嗰個，就會係我。
「想念你的笑 想念你的外套
想念你白色襪子 和你身上的味道
我想念你的吻 和手指淡淡煙草味道 記憶中曾被愛的味道」
「今天晚上的 心事很少 不知道這樣 算好不好
赤裸裸的寂寞 朝著心頭繞」
糖水店內既音樂繼續無情地播緊。
「我係到收拾佢留左係我屋企既野，發現原來佢有好多野都未拎走，然後係到幻想，佢會唔會走返黎拎返佢啲野，又或者佢只係做野壓力大，發下脾氣咁，當我一打開門，就會見到佢企係門口等緊我……」
「但係我一直等一直等，都等唔到佢既回音，我甚至神經質到，聽到走廊有人行過，或者係隔離屋開門，都以為係佢返黎，即刻走去開門，但一開門先發現並唔係佢……」講到呢到，Yan喊得更加犀利。
「傻女……佢真係唔值得你為佢咁做……」望住一個自己鐘意、自己欣賞既人為其他人傷心落淚，呢一種銳心的痛，你地明白幾多？
「到底點樣可以撐過今晚……今晚真係好難撐呀……」Yan道。
呢個問題，就連我都唔識答啦……
大人既世界好複雜，感情既世界就更加係複雜。
你鐘意既人唔鐘意你，鐘意你既人你又唔鐘意，好啦，好難得咁樣你地兩情相悅啦，你又偏偏唔識去珍惜，去傷害佢。
人類總是犯著重覆的錯誤……
食完糖水之後，Yan冷靜返少少，佢擦擦淚水，抖擻精神道：「食左碗糖水，感覺好好多。」
「你鐘意既話，可以食多幾碗架！」我道。
「傻架咩你，食多幾碗咪變大肥婆囉！無人要架啦！」Yan終於笑返。
無人要咪我要你囉……
「好啦，我去賣單啦。」我道。
「我未俾錢你……」
「唔洗啦，當係安慰一個寂寞的人。」
Yan輕輕咁拍一拍我手臂，然後又好窩心咁笑左笑。
送Yan返到樓下，我道：「返去搵啲暖水敷下隻眼，如果今晚仲係覺得寂寞想喊既話，就打俾我啦，我係24小時寂寞一窩phone熱線……」
「哈哈傻仔……」Yan甜甜咁笑住話：「放心啦，等陣姨姨就會送瑜仔返黎陪住我。」
我點點頭，「咁你好好休息啦，唔好諗咁多。」
「多謝你。」
望住Yan上左樓，我先依依不捨咁離開。
返到屋企，家姐就衝出黎同我講：「你快啲入去氹小貞訓教啦，佢明明已經好眼訓，但死都要話等埋你返黎先。」
我衝左入去房到，只見小貞左手攬住個喵喵cool順，右手攬住隻比卡超公仔，佢係床到恰下恰下咁，明明想訓，但係又勉強張開雙眼。
「小貞！」
「傑哥哥！」小貞一聽到我把聲，就即刻張開眼睛，用住比卡超既聲線叫我。
我坐左係床邊，「好啦，傑哥哥返黎氹你訓教啦，小貞要快啲訓。」
小貞用力咁點點頭。
五秒之後，小貞就係我懷到訓到呼呼聲咁，個傻妹明明就好眼訓，但點都要等埋我返黎先……有人係屋企等緊你既感覺真係好……
大人既世界係好複雜，相對地細路仔既世界就單純得多，鐘意就會係個表情到展現出黎，唔鐘意就會出聲，珍惜你、在乎你既就會等埋你一齊，唔會扔棄你一個人，曾經都係細路仔既我地，點解連啲咁簡單、咁基本既道理都忘記左？
曾經真誠既我地，到底去左邊？
我輕輕咁放返小貞落床，送走埋家姐之後，我見Yan都無再send whatsapp黎，我諗佢都等到瑜仔返黎陪佢啦。
最後，我係手機既照片到，搵返Alexis張罪證，然後禁左「刪除照片」，再安心咁去訓教。