突然做左人地老豆，多左個女: 51
Yan講完之後，小海都係廁所到眼紅紅咁走左出黎。
「傑哥哥正衰人！」一走到黎，小海又咆哮。
吓？點解我係衰人？關我乜事？
「小海……」我無奈地道。
「傑哥哥做乜要執起張券？傑哥哥正衰人！衰人！衰人！衰人！衰人！衰人！」
小海不斷重覆住「衰人」呢兩個字，小貞同Yan都走過去安慰小海，嗚哇！搞到我好似真係做左衰人咁！
「咁啦小海……」我道：「係傑哥哥衰，唔應該執起你張券，為左補償傑哥哥既錯誤，傑哥哥幫你解決呢個問題。」
「點解決？」小海眼仔碌碌咁問。
「幫你去說服你老豆老母，同你一齊食自助餐！」
小海擺出一個不可置信既模樣，「你可以說服我爸爸媽媽？」
我好有信心咁點點頭，「放心交俾我啦！」
「我都去！」Yan道。
「小貞都去！」小貞舉起手道。
「咁好啦，今晚我地幾個同埋瑜仔一齊去你屋企，今次既任務叫『說服你老豆老母』！」
我講完之後，就換黎陣陣既掌聲。
「咁樣唔夠……」小海突然道。
喂喂，大小姐，做人唔可以咁貪心架喎。
「咁你仲想點？」我問。
「我想南哥哥都去！」小海笑逐顏開咁講。
屌！
我地返到去體育館，班主任都完全無關心過我地，無問過小海到底做咩事，我諗如果係Miss Cheung，一定會好擔心咁跑過黎關心小海，呢個新班主任認真靠唔住。
話咁快又到左下晝三點幾啦，我地上返旅遊車起程返去幼稚園，可能大家都玩到好攰啦，個個細路一上到車都訓著左，比起今朝真係靜左好多，不過細路仔既精力復原得好快，一落到車，佢地個個都又變返甩繩馬蹓咁蹦蹦跳。
「小貞、小海！」無幾耐，阿南就揸左架車過黎。
「南哥哥！」小海即刻哄埋阿南到。
大小姐，你笑成咁，真係完全唔覺得你唔開心囉。
「小海！」呢個時候，Julia都黎左。
「Julia！今晚小貞佢地會黎我地屋企！」小海道。
「吓？佢地黎我地屋企？」
「係呀！爸爸媽媽返左黎未……？」小海垂低頭問。
Julia點點頭，「佢地啱啱返左黎啦。」
後來Yan同Julia解釋成件事既由來，我地以為Julia會反對，點知佢話：「太好啦！其實我一直都好想講架啦，但怕阿mum會鬧我，小海有你地呢班朋友真係好呀！」
最後Julia坐左係前座，我同yan同埋班細路坐左係後座，逼逼地咁出發去小海屋企。
小海屋企係高尚住宅區，一入到去，只見樓底好高，而且係兩層既複式單位黎，有個好大既露台同埋落地玻璃。
「阿mum，小海既朋友黎左。」Julia先後去左主人房同書房同小海既老豆老母講。
「是的！知道啦王主任！我一定能搞定的！」小海個老豆一邊傾電話一邊行出黎，佢老豆係個體型略胖，而且有地中海既男人黎。
「你地好！你地好！」小海既老母都出左黎，佢係一個化左濃妝，衣著端莊既女人黎。
「Julia，快啲準備啲茶點俾客人啦。」小海老母道。
「黎！請坐！請坐！」小海老母笑口噬噬咁對住我地講。
暫時感覺上佢都好客氣，但我唔可以掉以輕心，因為嗰陣時明明Miss Cheung都同佢地傾過，但結果佢地都只係顧住工作而忽略左小海既感受，我忽然諗起林文龍個老母都係咁，明明講好左唔再逼林文龍，但結果都係咁，今次我一定唔可以再俾呢啲事發生。
我地係張梳化到坐低左，小海老豆都傾完電話啦。
「你地係小海係幼稚園既同學？」小海老豆望住兩個細路仔問。
小貞有啲緊張，緊緊咁捉住我件衫尾，而瑜仔就呆下呆下咁唔識俾反應。
「佢叫小貞、佢叫瑜仔。」小海代答。
「我係小貞既老豆，佢係瑜仔既家姐。」我續道。
「你地好，請問你地黎係有咩事呢？」小海老母好有禮貌咁問。
呢一家人俾我既感覺係，佢地好有教養、好有禮貌，但同時亦都好冷淡，無一家人嗰種溫暖既感覺。
「我唔怕開門見山咁講啦，今日小海佢喊過黎。」我道。
小海垂低頭，默默地走去小貞身邊坐低左，而小海既老豆老母就好似見怪不怪咁。
「小朋友成日喊都好正常既。」小海老母話。
「你唔會想了解佢係因咩事而喊？」Yan問。
「我諗都係因為成績架啫。」小海老豆答。
我望住小海，再講：「小海，你自己講。」
然後小海望一望小貞，再垂低頭細細聲咁講：「我想同你地去食自助餐，但你地唔得閒……」
小海老母笑一笑，話：「真係唔好意思！我個女咁任性麻煩到你地！都係我唔識教女，教到佢咁貪心成日想食自助餐。」
「小海並唔係咁既意思！」我道：「小海並唔係貪圖嗰一餐半餐既自助餐而唔開心，小海係想自己既老豆老母多啲陪佢，佢呢個歲數，最需要既係父母既陪伴！」
「你呢句說話之前佢個班主任都同我地講過，不過我地生意咁忙，我地已經好盡力咁抽時間出黎架啦。」小海老豆道。
「一句講哂，賺錢重要啲定小海重要啲？」我問。
「呢兩樣野無得比較……」小海老母道。
「我係自己一個湊住瑜仔既，我自己工作都好忙，但無論點忙，瑜仔幼稚園搞既旅行我都會去，如果無親人係身邊，咁仲算係咩親子旅行？」Yan道。
「無錯，你地知唔知小海今日同我講過咩？佢竟然話今日我係佢老豆！你地係咪想就咁失去自己個女？」我道。
「小朋友講下笑啫……」小海老母道。
「阿mum，小海唔係講笑架，佢真係好唔開心先會咁講……」連企係一邊既Julia都忍唔住講。
「其實我地既請求好簡單，就係希望你地抽多啲時間陪小海，最起碼親子旅行會去，答應左小海既野會做。」我道。
「對小朋友黎講，大人既承諾係好重要，我地應該做個好榜樣俾佢地。」Yan道。
「小海佢真係好唔開心架……」小貞都幫口，而瑜仔就係另一邊點點頭回應。
講到呢到，小海兩行眼淚都忍唔住流出黎。
「每次我同瑜仔一齊做完一件事，我都會同佢影相，希望瑜仔將來大個左之後，揭返開本相簿黎睇，仲會諗返起自己有個快樂既童年，而且身邊仲有我陪伴住佢，佢並唔係一個人。」Yan摸摸瑜仔個頭仔道。
「回憶，對一個人黎講係好重要，尤其係快樂既回憶，証明自己有係呢個世界上快樂地存在過。」Yan續道。
「無錯，小貞同瑜仔都係細細個就無左老豆老母，佢地已經無左自己親生父母既關愛，但係小海唔同，小海有你地，但係你地搞到小海好似無父無母咁，得Julia照顧住佢，第時當小海大個左，佢只係會記得細個既時候有Julia陪住佢，但無你地既存在，咁樣值得咩？你地唔會後悔咩？」我接住Yan道。
小海聽左我地講左咁多，唔知佢聽得明幾多，不過佢就喊住咁講：「爸爸媽媽，每次你地唔係屋企，我都好掛住你地架……」
小貞見到小海喊，佢都忍唔住喊埋一份，瑜仔見到小貞喊，佢又跟住喊。
小海既老豆老母聽完我地講之後，都靜默左一陣。
後來小海個老母眼紅紅咁望住佢老公講：「係呀，老公，嗰陣時我地無咁忙、生意無咁大既時候，仲成日同小海去旅行，但係我地真係好耐都無同過小海去旅行啦……」
「唔止無去旅行，連一齊食飯都係幾個月之前既事啦……」Julia道。
原來係呢個家庭，都曾經有過快樂既時候，但係因為金錢既引誘下，慢慢咁失去左一啲最單純、最簡單既快樂。
「鈴鈴鈴鈴……」小海老豆個手機再次響起。
佢聽左電話，道：「不好意思呀王主任，今晚那頓飯我未有辦法出席啦，因為我想陪陪我的女兒和老婆。」
佢收左線之後，就笑住咁同小海同佢老婆講：「好啦，今晚我地一齊出去食！」
然後小海即刻撲過去佢老豆到，攬住佢老豆盡情咁喊。
不過唔同既係，小海流緊既眼淚，已經唔再係傷心既，而係開心、快樂既。
返到屋企，小貞又係好熱情咁樣撲去喵喵到，又開始同喵喵玩追逐遊戲，我又攬實左小貞，希望佢唔好再跑。
小貞眼仔碌碌咁用自己既小手指指住自己個小腦袋道：「喵喵呢到有無我地？」
我諗係今日佢聽完我同Yan既說話，佢有感而發，想知道喵喵既回憶中有無我地既存在。
我攬住小貞道：「有呀！一定有！而且會見到小貞笑到見牙唔見眼既樣！」
小貞聽到之後，又格格聲咁笑。
我望一望喵喵，突然係到諗，其實係喵喵既世界到，我地係佢既唯一，我既世界有小貞、有家姐、有阿南、有老母、有Yan等等，我地既世界係幾咁多姿多彩，但係對喵喵黎講，我同小貞就係佢唯一既牽絆，如果連我地都唔捉緊佢既肉球，佢就又要過返流浪既生活，三餐不繼咁；同時，對於小貞、小海同瑜仔黎講，即使佢地既世界可以出現好多人物，但佢地最需要既，都係親人既愛同關心，無私既付出，先係養育佢地成材既最佳藥方。