突然做左人地老豆，多左個女: 48
放完個新年假，又到左拖小貞返幼稚園既日子，我仲未將手機上Alexis既罪證講俾Yan知，結果一拖又拖到返學日。
送小貞返到幼稚園，我見到瑜仔，不過湊佢既並唔係Yan，而係Alexis。
我忍住內心既憤怒，走過去問：「唔見Yan既？」
「佢返工呀，你做乜咁關心yan既？」Alexis意有所指。
「我關心yan好過你做啲對唔住yan既事。」我道。
「我做過啲乜對唔住yan？」
「你自己知自己事！」
講完之後我就怒氣沖沖咁拖住小貞入去幼稚園，然後有個普通後生既女幼稚園老師走左過黎。
「請問你係咪小貞家長？」女老師問。
「係呀。」
「你好，我係小貞既新班主任，今日放學之後有份通告要俾家長既，唔知你有無時間留低同我傾傾有關通告既事？」女老師木口木面咁講。
「好呀，無問題。」
見到新班主任，我就諗起Miss Cheung，諗起佢嗰個招牌式露出兩顆虎牙既笑容，諗起佢對住啲細路仔既嗰種熱情，同埋對住家長既嗰一份專業同耐性……
仲有嗰一晚佢流過既淚，同埋上機前落幕既背影……
Miss Cheung，唔知你係澳洲過得好唔好呢？
返到屋企，我又淋下花、餵下喵喵咁，突然屎急要去廁所，今次終於唔洗同小貞爭廁所用啦，點知我去到廁所，一除低條褲，喵喵就跳左上黎我大脾到，陪我一齊痾屎，以前都係fb見過，啲貓係會跟埋你去廁所，諗唔到又係真架喎，諗唔到啲貓既癖好係咁特殊。
「喵！」喵喵好嗲咁叫左聲，然後懶洋洋咁攤係我個大脾到訓，我又掃下佢啲毛，佢條尾又fing下fing下咁，養寵物既好處就係，連去個廁所都可以有咁多節目。
「你老母打黎你老母打黎！」
呢個時候老母打黎做乜呢？
「喂……」
「仔呀，我等陣會返鄉下，過一段日子先會返黎呀！」
吓？咁撚突然？
「你做咩無啦啦返去？」
「鄉下突然有事，我咪返去囉，你記得好好睇住小貞呀！」
「咁你幾時返黎呀？」
「我都未知呀，總之返黎就再通知你地啦，你同你家姐都要好好保重身體呀，天氣凍要著多件衫，唔好病呀，得閒自己要煲啲湯黎飲，照顧好小貞呀，知唔知呀？」
「知道啦老母……」
「唔好要我擔心呀……知唔知呀？」老母突然哽咽道。
老母呀，其實你都只係返一返鄉下啫，唔洗咁感觸架喎。
「得啦，唔洗你擔心。」
「咁好啦，你幫我同小貞講聲啦，拜拜。」
「咁你都小心啲啦，拜拜。」
話咁快，又到左接小貞放學既時間，我去到幼稚園，新班主任無安排我坐係班課到同佢傾小貞既事，只係企係課室到講，我一邊拖住小貞，一邊聽佢講。
「下個禮拜我地學校會搞個親子旅行，如果家長會參加既話，麻煩填返呢張回條交返黎，另外，仲有半年左右k3既課程就會完結，到時小貞就會升小一架啦，所以家長要諗定邊一間小學啦，以小貞既程度，讀一間比較好啲既小學都無問題，不過佢缺少面試訓練，我地學校搞左個小一面試雞精班，如果小貞有興趣既話，都可以參加，同埋小貞既畢業典禮，我地都歡迎家長參加，亦係請你填返份回條返黎。」新班主任又係好機械式，毫無表情咁講呢番說話。
小一面試雞精班，諗唔到而家啲幼稚園都要搞埋啲咁既野黎吸客，香港既教育界仲有啲乜希望？
「得啦，唔該哂你。」我嘆息道。
等個班主任同第二個家長講既時候，我問小貞：「你想唔想參加雞精班？」
小貞擰擰頭。
「點解唔想？」
「咁咪會無得陪傑哥哥同喵喵囉！」小貞眼仔碌碌咁回應。
我即時心都甜哂，摸摸小貞個頭仔講：「小貞咁乖咁叻，唔洗上雞精班都得啦！」
我都係鐘意小貞順其自然咁發長，唔受社會既約束。
「瑜仔。」呢把聲係yan。
乜Yan唔係返工咩？又黎到接瑜仔？
「Yan。」我走過去打招呼，Yan一抬頭，我就見到佢眼紅紅既樣。
「到底發生乜事？」我驚訝問。
Yan拖住瑜仔，擰轉臉唔俾我望，「無事……」
我捉住佢隻手，「你咁仲話無事？」
然後佢咩都無講，就咁塞左張紙俾我，我打開張紙，上面寫住：
「Yan，我要走啦，多謝你帶左咁多快樂既回憶俾我，即使你會難過，我都要同你講聲，對唔住呀，我地分手啦。」
仆街Alexis！！！！！連分手都要搞到咁仆街！！！仲要係我拎你既罪證出黎之前你就自爆左！！！！
唔通係我今朝嗰番說話，令佢怕會出事，所以自己先出手？
我睇完張紙，再望下Yan，只見佢兩行眼淚已經不停咁流，瑜仔見到yan喊緊，佢又眼濕濕咁準備喊，呢到人多，瑜仔喊起上黎會太引人注意，所以我拖住yan一齊走出幼稚園。
我送yan返到屋企，沿途都係默默地守候住佢，去到yan屋企，地方整齊乾淨，好有簡約既風格，但而家呢啲已經唔係重點。
Yan叫瑜仔同小貞入房玩陣先，我就同佢坐左係廳到。
「你一返黎就見到呢張紙？」我問。
Yan點點頭，「我本來返緊工，但佢突然whatsapp我，話佢有事，接唔到瑜仔放學啦，我唯有請左半日假，因為時間仲早，我返左黎換件衫先，就見到呢張紙放左係我張書枱到……」
本來都冷靜左少少既yan，又再次哽咽。
「你有無打過電話搵佢？」
「有……但係打極都唔通……」
呢條仆街仔，分手都做得咁絕……
我猶疑緊好唔好將手機既罪證俾yan睇，但我見佢喊到淚不成人既樣，我就唔忍心，或者當佢知道真相之後會更加傷心，而家呢個結局，我唔洗做衰人，yan又唔洗知道原來Alexis一腳踏兩腳，咁樣會唔會更好呢？
「我同佢係中學時候識架，我地一齊努力讀書、一齊考會考、一齊考高考，明明一齊經歷左咁多野……點解佢要就咁走左去……」Yan喊住講。
「你同佢既價值觀咁唔同，或者分開下都好呢……」我道。
「係咪我做錯左啲乜野……令佢要離開我……」
「唔關你事架！真係唔關你事架！唔係你既錯！」
「點解你可以咁肯定？」
「因為……因為……」仆街啦，唔通真係要講出黎？
「因為乜野呀？我真係唔明呀……」
「因為感情既野真係無得勉強架……係兩個人既問題，唔係一個人既錯……」我安慰道。
Yan點點頭，但依然喊到淚不成人咁，我唯有默默地陪係佢身邊，間中遞下張紙巾俾佢。
好彩小貞同瑜仔係房到好專心咁做功課，無留意到出面既情況。
望住Yan咁傷心既樣，我都覺得好心痛，縱然佢地分手係一件好事，但條仆街Alexis咁樣對待yan，我真係怒火中燒，但係佢出到玩失蹤呢一招，即使我想搵佢出氣都搵唔到啦，呢個人真係好撚仆街好撚賤格！
Yan，佢真係唔值得你為佢咁傷心架……你係一個好女仔黎，你值得搵一個更加好既、更加關心你既、更加愛錫你既……
望到yan呢個情況，我忽然諗起，想當年我都一樣係個仆街。
當年同彩琳同居，結果我又係一腳踏兩船，而令到彩琳好傷心，最後都係分左手，唔知道彩琳當時係咪又係喊成咁？當時有無人陪住佢、安慰佢呢？
到頭來，其實我都無資格話人仆街，係咪真係每個男人都會犯呢啲錯？每個男人都要咁樣傷心自己心愛既女人？
見到yan，我就好似見到彩琳既倒影咁，我對佢產生左憐憫既感覺，然後我走過去yan身邊，輕輕咁攬住佢，希望佢感受到人既溫暖，明白到佢並唔係一個人。
最後yan伏左係我身到喊左一陣，然後佢擦乾眼淚，抖擻精神話：「好啦，瑜仔都差唔多肚餓架啦，我要煮野食俾佢啦。」
「你真係ok？」
「連爸爸過左身，後母扔低左我同瑜仔既事我都撐住左，更何況係呢件事。」
「Yan，我知道你好堅強，但如果真係撐唔到，我可以陪住你。」
「我想一個人靜下，多謝你。」
「咁好啦，我帶小貞走啦，你有咩打俾我啦。」
最後我拖住小貞返到屋企，一直都好擔心Yan，直到夜晚，Yan少有地突然whatsapp俾我。
「我想食糖水, 你可唔可以陪我?」
「咁瑜仔呢? 你唔洗照顧瑜仔?」
「我同我個姨姨食飯, 我將瑜仔交左俾佢睇住先」
「咁好啦, 我轉頭過黎你到搵你, 你等我」
「嗯, 多謝你」
最後，我將小貞交左俾我家姐，我再一次過去Yan到。
去到Yan屋企樓下，你估下我見到邊個？我竟然見到個仆街Alexis！佢徘徊係Yan屋企樓下又唔上去，佢究竟想做乜撚野？
我衝左過去，捉住Alexis既衫領，憤怒地道：「你條仆街仲好意思黎呢到？」
「你等等先，你冷靜啲先……」Alexis好驚慌咁講：「其實呢……我發現自己漏左啲野係yan既屋企，我想返黎攞返……」
「你條仆街仔做埋啲咁既事，你仲敢返黎攞野！」
「我唔敢架，既然你一場黎到，不如你幫我攞啦！」
條仆街仔仲笑口噬噬咁講，我忍唔住啦，我一拳打左過去Alexis，或者佢無諗過我真係會打佢，又或者係佢真係太弱啦，佢竟然就咁就跌左係地下。
「屌你咩！你做乜撚野打我呀？」
「問我做乜撚野打你？你問下你做過啲乜黎啦！」
「仆街！你知道啲乜呀？」
「嗰日我係酒樓到見到，你拖住第二個女人呀，嗰個女人叫嘉嘉呀！仆街仔食兩家茶飯！」
「係呀，我係一腳踏兩船呀！但係你又知啲咩呀？」
「我乜撚野唔知？」
「我同yan係中學既時候分過一次手，嗰陣時我同左嘉嘉一齊，到後來先同返yan一齊，yan先係第三者呀！」
我捉返住Alexis既衫領，拖佢起返身，「Yan算係咩第三者，你同人地一齊緊，你就唔應該同返yan拍拖！」
「喂大佬，你都係男人，你應該都明架，愛情就好似買保險咁，買一份唔夠架，唔會保障到你其他野，穩陣啲就緊係買多份架啦！你都識得yan架，你都知佢份人係幾咁硬淨，大佬我身為佢男朋友，我仲要幫佢湊埋佢個細佬，我都好辛苦架，嘉嘉就唔同啦，佢幾咁小鳥依人，最緊要既係佢老豆老母都有錢，同埋最最最緊要既係……」
「係乜野？」
「係佢有左我個涵呀……」
「你條仆街仔！」講完，我再次係佢臉上打左一拳。
「屌你都蠻不講理既！我唔夠你打！我唔拎返啲野啦！我趕住走呀！唔好俾我見到你呀！我實報警拉你架！」
目送條仆街仔走左，我一個人無力地坐左係地下，當年，其實我自己都係一個咁樣既仆街。