突然做左人地老豆，多左個女: 45
年初三，赤口，唔洗拜年，不過如果大家仲記得上次我line俾人盜用既事，就知道中學有個聚會，因為今日個個都唔洗拜年，所以佢地揀左今晚黎搞聚會。
「仆街啦！應該著咩衫好呀？」阿南係電話到咆哮著。
「求其著咪得囉！咁緊張做乜？」家姐唔知點解會係阿南身邊，一齊係電話到咆哮著。
「即係咁，中學聚會啫，唔洗咁緊張既。」我道。
「大佬！咁耐無見，唔緊張就奇啦！」阿南道。
「你幾時變得咁女人架？」家姐係阿南身邊道。
「咩幾時啫？咪同你一齊左之後囉！」阿南好嗲咁講。
屌！乜撚野事呀？
「攜眷出席喎，你諗住攜邊個？」阿南問。
「仲洗問既？梗係小貞啦！」
小貞聽到我嗌佢個名，又甜甜咁笑左笑。
「屌你學人做鬼父！」阿南恥笑道。
「咁你呢？你帶邊個呀？」我問。
「你家姐囉。」阿南細細聲咁回應。
「屌！唔講啦！係咁先！」
最後小貞揀左件粉紅色既連身裙加一件米黃色既外套，而我就揀左件天藍色既襯衣同埋黑色既牛仔褲，於是我地就攜手雙雙出發啦。
佢地揀左聚會既地方係酒樓黎，因為我地中學既傳統係，會考等放榜嗰日既朝頭早，我地會係酒樓到食我地既最後早餐，所以佢地話要懷念一下，同埋攜眷出席會出現好多老公、老婆，甚至連仔仔女女都有埋，所以去酒樓就最方便，啱哂一家大細啦。
我拖住小貞去到接待處，接待處啲人我都係唔識既，我望一望門口個牌，寫住「舊生會聚會」，我先知原來呢個唔單止係中學聚會，仲係成個舊生會聚會，即係乜撚野人都有，真係無諗過會搞到咁大，如果我知道咁大陣仗咁鬼麻煩，我就一定唔會黎。
「喂！仆街傑！」
係接待處啲人仲搵緊我應該坐係邊既時候，一個個頭用髮蠟整到起哂機，而且體型略胖既人迎面而黎。
「喂！飛機師！」
飛機師，就係今次係whatsapp到約我出席呢個聚會既中學同學，佢個花名之所以叫做飛機師，係因為佢返學嗰時都會整到個頭起哂機，即使訓導每一日都係咁鬧佢、每一日都記佢缺點，佢都照整無誤，根據非正式既統計，係全盛時期，佢可以一個月內連續俾人記左成十二個缺點，最後組成四個小過，都係因為個頭，呢一種咁大無畏既精神，想當年係好值得我地全班同學既敬畏同恥笑；至於我，之所以叫做「仆街傑」，係因為有次朗誦節，我俾班上既仆街推薦去參加個中文朗誦比賽，係我行上台既時候，因為緊張而失足仆左係地下，從始一仆成名，個個都識我叫做「仆街傑」。
「你仲係無變喎！」我望住佢嗰把依然整到起哂機既頭講。
「屌你靚仔左好多喎！」飛機師望一望我拖住小貞，然後一臉驚訝咁講：「你有個咁大既女架啦？」
我尷尬咁摸一摸後尾枕，「佢叫小貞，係我收養返黎既。」
「哥哥你好。」小貞有好禮貌咁講。
「小貞你好。」飛機師摸摸小貞個頭仔講：「小貞真係好乖好得意呀。」
「梗係啦，我個女黎架嘛！」我好自豪咁講。
「你幾時變到咁有愛心架？但佢老母呢？你一個人湊呀？」
「係呀，我一個人湊，不過有時我老母、家姐同阿南都會幫手。」
「喂！細佬！小貞！」真係日頭唔好講人，一講人就會出現。
「喂！人地家姐！阿南！Long time no see！」飛機師道。
因為細個嗰時我地通常都一大班人圍埋一齊hea，所以佢地都識得我家姐。
「飛機師！你肥左咁多！我差啲唔認得你。」阿南道。
飛機師見到阿南拖住家姐隻手，又一臉驚訝咁，「咦，你地……？」
「係呀，我地無幾耐之前拍左拖。」阿南答。
即係咁，你連你老死、你細佬面前都未講過呢句說話，今日居然係個好耐無見既中學同學面前講，你地係咪當我無到？
「嗰陣時見你地成日打埋一齊，都覺得你地好襯架啦！」飛機師道。
「係囉，諗唔到大家既轉變都幾大。」阿南笑笑道。
「我地算轉變少架啦，入面啲人轉變仲大，你地快啲登記完就入黎啦！」
話畢，飛機師就入返去酒樓到。
我地做哂登記入到去，只見成個會場都佈置到好似grad din咁，好莊重！
「傑哥哥我想去wee wee。」小貞紅都面哂，個身扭下扭下咁。
「小貞，我帶你去廁所啦。」家姐拖住小貞道。
家姐帶住小貞去廁所，所以得返阿南同我係到啦。
我地搵到我地既座位，於是坐低左。
同枱既仲坐左幾個人，我認得佢地，分別係比較瘦既毒撚強、成日笑既女班長同埋粗聲粗氣既豪哥。
「Hi, 仆街傑！阿南！好耐無見！」豪哥道。
「豪哥！真係好耐無見啦！」我同阿南異口同聲道。
「你地都無咩點變，阿南都係一樣男神樣！」另一邊既女班長道。
「女班長！你都一樣無咩點變啫！」阿南道。
「傻架咩！我做左人地媽媽啦，而家成個師奶咁！」女班長笑笑回應。
「唔係呀！一樣美艷動人！」阿南笑笑道。
「阿南你先無變，一樣口花花！」女班長回應。
「係囉，一樣咁口花花！」
唔知幾時開始，小貞同家姐出現左係我地身後，家姐身上轉黎陣陣既殺氣。
阿南，阿門。
「唔係……講下笑啫。」阿南標哂冷汗咁講。
「咦，人地家姐，嗰個你個女呀？」佢地見到家姐拖住小貞，就好愕然咁問。
家姐俾人咁問，就紅都面哂咁回應：「唔係呀，佢係小貞，係細佬收養既。」
「哥哥、姐姐，你地好、恭喜發財！新年快樂！身體健康！」小貞眼仔碌碌，合埋雙手做左個恭喜手勢講。
「哇！你真係好得意好乖呀！如果我個女有你一半就好啦！」女班長一邊講，一邊俾小貞利是。
「多謝！」小貞接過利是，笑笑回應。
「係囉！阿傑你又會咁好心地既？真係估你唔到喎！」豪哥道。
可能因為有小貞係到，大家都收起哂啲粗口。
我抱起小貞，將佢放左係我隔離坐住，而家姐都走左係阿南旁邊坐低左。
「小貞真係好乖架，我當左佢係我親生女架啦。」我回應道。
小貞聽到我讚佢，佢又紅都面哂咁。
「諗唔到大家既轉變都好大。」毒撚強笑笑道。
「好啦！差唔多人齊啦！我都要埋位準備開餐啦！」飛機師走返過黎講。
結果飛機師坐左係小貞右邊，我就係小貞左邊。
酒樓既侍應開始向我地分配食物，第一碟食物係玉環瑤柱甫，同時台上既司儀亦都開始進行抽獎活動。
「諗唔到你會搞到咁大。」我對飛機師道。
飛機師笑笑回應：「又唔係我一個人搞既，係成個舊生會搞，不過都係多得大家都出席啫！」
話咁快，第二碟燕帶時蔬已經黎到，小貞想夾起舊西蘭花，但夾極都夾唔到，於是我幫手夾起餵佢食。
「小貞而家幾多歲呀？」女班長問。
「六歲。」小貞一邊食，一邊眼仔碌碌咁答。
「六歲就已經咁乖！真係好叻呀！」
「多謝……」小貞又怕怕羞羞咁垂低頭食野。
「下一個幸運兒既號碼係……」台上既司儀大聲叫著。
「你話如果我地第時結婚都咁樣搞，好似都幾好喎。」阿南對家姐道。
「痴線！」家姐紅都面哂咁打左阿南一下。
「哇！你地幾時一齊架？」豪哥道。
「開始左無耐啫。」阿南笑笑答。
「結婚一定會請埋我地呀！」女班長道。
「十一號枱既五號！」台上既司儀又大嗌。
「咦！我係五號呀！」女班長興奮大叫。
女班長走左出去拎獎之後，飛機師突然問我：「阿傑，你仲記唔記得彩琳？」
彩琳，呢個名，我永遠都會記得。
佢係我既初戀黎，我地係中六時候認識，佢係插班生黎。
佢身材唔係話好玲瓏浮凸，亦無一雙長腿，不過佢擁有一副童顏而且好清純，望落去就好似有村架純咁，令人有種好想保護佢既感覺，但係更重要既係，佢有一顆好善良既心。
有一次，係學校既PE房到發現左一隻貓仔，PE老師諗住call愛協或者漁農黎搞掂佢，但係彩琳阻止左，佢自己抱走左隻貓，但佢屋企唔俾養，結果佢偷偷地放係我地班房到養住先，直到佢幫貓仔搵到戶好家人收養左。
其後，高考完之後，我地班多左聚會，我同佢都開始熟絡，後來我地好順利咁拍左拖，仲一齊同居過三年，不過同居之後，有好多問題出現左，始終相見好同住難，花心既我亦開始搵第二個，最後佢知道左，我地分左手，再之後我就中左六合彩，失去左佢加上中左六合彩，我既生活更加係頹廢到不堪入目。
所以，我永遠都會記得佢，我真正愛過既女人。
「記得，不過我同佢好耐無聯絡啦。」我道。
「我上fb，見到佢最近生活都幾好，好似會嫁俾個有錢人。」
事過景遷，諗唔到幾年之後，大家既轉變都咁大。
「咁咪幾好，但點解今日唔見佢既？」我問。
「我有係fb inbox問過佢架，但佢無應到我。」
「嗯……」
或者佢係唔想見到我呢個負心漢，所以選擇同我地呢班人斷絕來往吧。
成個聚會都完哂之後，我地嘻嘻哈哈咁踏出酒樓，係成個聚會到，我地傾得最多既都係而家做緊份咩工、幾時結婚、幾時生仔咁，諗唔到轉眼間，大家都由中學懵懵懂懂既年齡，成長到而家要傾工作同婚姻既年齡啦。
我凝視住小貞，佢飽到係咁禁住自己漲左出黎既肚仔，好鬼得意。
或者最諗唔到既係，我自己會做左人地老豆，多左個女吧。
「係既！伯母！你放心啦！我會好好照顧嘉嘉架！」
呢把聲，咁熟悉既……
我擰轉身一望，只見Alexis同時步出酒樓，但係企係佢身邊既，並唔係Yan，而係一個身形比較細粒，但感覺好小鳥依人既女仔。
「得啦！我地好放心將嘉嘉交俾你！」有個阿伯笑口噬噬咁對住Alexis講。
然後Alexis又攬一攬佢身邊嗰個女仔，兩個相視而笑。
呢條仆街仔竟然食兩家茶飯！！！！！！！！
我好想衝過去教訓下條仆街仔，但係我拖住小貞，又唔方便做啲咁既事，所以我最後決定影底佢既罪證。
好彩條仆街仔無發現到我，就咁攬住個女仔離開左酒樓。
我手握住罪證，我好想send俾Yan，但係我無咁做到，一來怕Yan唔知會點諗我，可能會覺得我生安白造，有心拆散佢地；二來怕Yan見到會好傷心，到時我都唔知點安慰佢好，所以最後呢一張罪證，一直保持係我部手機到。
「喵喵！」
不知不覺間，已經返到屋企，阿南同家姐都無理到我，自己返左去，而小貞一返黎，就見到喵喵係門口等緊我地，仲「喵喵」咁叫。
「知道啦喵喵！而家即刻餵你食野！」
係小貞餵緊喵喵食野既時候，我腦內仍然諗緊張罪證應該點處理好，最後我決定send個whatsapp俾Yan。
「聽日得唔得閒呀? 我想同小貞去買衫, 但我唔識揀, 可唔可以陪我地??」我道。
「得呀! 我都想同瑜仔買衫!???」Yan覆。
我決定聽日當面問清楚佢會比較好。