突然做左人地老豆，多左個女: 46
我約左Yan中午一齊食飯，食完再行商場，所以今朝一早已經同小貞餵左喵喵，然後起行出發啦。
我地約左係銀咖哩等，今日一齊食咖哩。
我同小貞早到左，係銀咖哩拎左位等Yan同瑜仔，我手裡面一直緊握住部手機，一直思索緊應該點同Yan講Alexis既事，真係令人好苦惱。
無幾耐，Yan同瑜仔都到左，Yan著左條深藍色連身裙配一件杏色既外套，最重要既係佢今日著左黑絲配一對啡色有少少踭既英倫鞋，長腿加黑絲，真係j死人。
「Hello! 小貞、阿傑，你地嗌左野食未呀？」Yan一邊安置好瑜仔，一邊問。
「嗌左。」小貞點點頭回應。
「我地嗌左吉列豬扒咖喱飯同埋咖哩豬扒蛋包飯，你地睇下想食啲乜。」我道。
「好呀！」Yan接過份餐單，然後同瑜仔一齊研究食啲乜，只見瑜仔眼甘甘咁望住小貞。
小貞感受到瑜仔熾熱既眼神，搞到佢周身唔聚財咁，用住無辜加無奈既眼神望住我。
「瑜仔，你做乜咁樣望住小貞呀？」Yan發現左，無奈地問瑜仔。
「我想知小貞食啲乜。」瑜仔眼仔碌碌咁答。
Yan笑住咁話：「瑜仔你唔開口問，小貞係唔知架。」然後又同我講：「對唔住呀，希望唔好嚇親小貞，瑜仔佢係有啲怪。」
我未回應，小貞已經搶住講：「瑜仔一啲都唔怪！」
瑜仔同小貞既關係同埋溝通方式，我諗係我地大人唔會明白既。
最後Yan叫左芝士野菌蛋包咖哩飯，而瑜仔就跟小貞嗌左蛋包飯。
無幾耐，食物就送到上黎，Yan拎左張紙巾出黎，然後用兩秒就成功地將張紙巾分成四等份，而且每一份都好平均，佢再將張紙巾遞俾我地。
「Yan姐姐好犀利！」小貞驚嘆道。
「我都係第一次見有人可以撕得咁快咁整齊！」我搭嘴道。
Yan俾大家稱讚，紅都面哂咁笑笑話：「邊係呢……你地太誇張啦！如果小貞想學，Yan姐姐可以教你架！」
「好呀！」小貞興奮地拍手叫好。
「我又要學！」瑜仔跟住小貞舉手嗌。
Yan摸摸瑜仔個頭仔話：「你個傻仔，做乜都要跟住小貞！」
跟住我地終於開餐啦，我將一口咖哩同一啖飯放入口，咖哩既香味同米飯既香味混埋一齊，然後再溶化係口到，食完吞完啲咖哩香味仲徘徊係個喉嚨到，咖哩汁唔辣，但係甜甜地都真係幾開胃，唯一美中不足既，就係咖哩啲料好少，即係薯仔呀、甘筍嗰啲，我搵勻成隻碟都係分別得嗰一、兩舊，好啦，然後到咬一啖炸豬扒，食炸物最令人感受到滿足之處就係在於，一啖咬落去感受到外面嗰層鬆脆爽口，然後就係裡面嗰層柔軟既肉汁，肉汁鮮艷，配埋咖哩，簡直一流。
我享受完之後望下小貞，發現佢食到成嘴都係咖哩汁，於是又幫佢抹下嘴，我抬頭一望，見到Yan同我做緊同一樣既動作，佢幫緊瑜仔抹嘴，我同佢兩個人就相視而笑。
餵飽左個肚，我地就正式去行街啦，我拖住小貞，小貞拖住瑜仔，瑜仔拖住Yan，一行四個人雖然都真係幾霸住條路，不過感覺上真係好似一家人咁，好溫馨。
去到一間賣童裝既舖頭，Yan停低左話：「阿傑，呢間舖頭啲衫幾平架，佢仲有啲二手衫係到寄賣，啲細路大個左唔啱著既衫就係擺係到，等第二啲細路可以再著。」
「咁又幾環保喎。」我回應。
Yan點點頭，我地就一齊入左去間舖頭到啦。
Yan好興奮咁左揀右揀，一時幫下瑜仔襯下衫，一時又幫小貞襯下衫，我呢條麻甩佬真係唔識點幫細路仔襯衫，好彩有Yan係到。
Yan個腦好靈巧，佢多多主意，嘟下個嘴巴又諗到點樣襯先好睇，最後揀左幾件瑜仔同小貞都好鐘意既，我地大豐收。
諗唔到咁快就買完衫，但係我手上既證據都仲未開口同Yan講……
「傑哥哥！」小貞大聲嗌我。
我狗衝左過去，只見小貞指住堆掛係櫥窗到既他媽哥池，諗唔到小貞咁樣都可以發現到一間仲有他媽哥池賣既士多舖。
Yan聽到小貞大嗌，都拖住瑜仔走左過黎，佢一見到啲他媽哥池，就即刻好興奮咁講：「哇！童年回憶！」
我笑笑問：「你都有玩？」
佢笑得好純真咁答：「梗係有啦！」
我低頭問小貞：「小貞係咪想玩？」
小貞點點頭回應。
「瑜仔又想要……」瑜仔又跟住講。
「好啦，咁我地就入去買他媽哥池啦！」Yan興奮道。
Yan拎住其中一個白色外殼既他媽哥池話：「我細個嗰時玩得好緊張架，成日都會睇住佢有無餓親、有無痾『嗯嗯』！」
「我就玩得好差啦，我成日都唔記得要餵佢食野，搞到佢成日都餓死左，又要重新再玩過。」我道。
「你咁衰架！不過他媽哥池真係同而家啲game無得比，就算佢只係黑白色，而且起哂格，都依然覺得佢好好玩。」
「係呀，諗唔到而家仲有人賣他媽哥池。」我笑笑回應。
最後小貞同瑜仔都一人買左一個他媽哥池。
「傑哥哥你睇！」眼利既小貞又發現左啲新奇既事物。
小貞指住左掛住冒險樂園到啲公仔，然後蹦蹦跳咁話：「好得意呀！」
我一望，小貞指住既係一個黑色貓既cool順，我一睇就覺得佢好似喵喵，咁我明點解小貞會覺得得意啦。
我走左過去，摸摸小貞個頭仔，「小貞係咪想要？」
小貞用力咁點點頭。
「哇，係擲彩虹喎！」Yan拖住瑜仔過左黎。
「係呀，小貞想要嗰個黑色貓既cool順，應該係要擲彩虹先拎到。」我道。
「好呀！一於入去玩啦！我好耐都無玩過啦！」Yan笑得好甜咁講。
忽然覺得眼前既Yan好似一個好得意既細路女咁，對所有新奇既玩意都感到好有興趣，而且會好興奮咁拖住瑜仔一齊去玩，十足一個長唔大既細路，諗唔到Yan都會有咁可愛既一面。
「擲界！擲界！」
我一掟個銀仔，就擲住左係條彩虹綠色同紅色中間既線到，然後個職員好機械式咁講。
「擲界！擲界！」小貞學住個職員咁講。
「擲界！擲界！」瑜仔又學住小貞咁講。
「哈哈……」Yan俾佢兩個氹到笑到見牙唔見眼咁。
「哼！我就唔信我唔得！再黎！」
「出界！出界！」
屌！柒左添！
「哈哈！出界！出界！」小貞同瑜仔又異口同聲咁話。
諗唔到玩個遊戲都會俾班細路笑到面都黃咁。
「加油呀傑哥哥！」Yan忽然學小貞既神情動作同語氣，緊握雙手對我講。
接收到Yan既鼓勵，我忽然充滿力量，我今次一定得架！
「紫色！紫色！大獎！大獎！」
雖然職員都係好機械式咁講呢句說話，但係我地四個都好興奮莫名咁蹦蹦跳，Yan更加係笑得好開懷咁。
「你想要邊份禮物？」個職員問。
「黑色貓cool順！」Yan同我不約而同地道，然後我地兩個又相視而笑。
小貞接過個cool順，好珍而重之咁攬實佢，而且全程都笑眯眯咁。
「不如我地玩射籃囉！」Yan指住個射籃遊戲機，好興奮咁話。
「好呀！」我笑笑道。
然後Yan就拉住我同埋細路一齊過左去射籃機到。
「好啦，由呢一秒開始，你就係姚明，我就係Michael Jordan！我地黎決戰啦！」Yan投入個銀仔落部機到，然後好認真咁同我講。
「點解我要係姚明，你係Michael Jordan？我輸硬喎！」我笑笑道。
「你無得揀！嘿嘿！」Yan話畢，啲波就係咁碌落黎。
Yan同我都手忙腳亂咁拎啲波黎掟，老老豆豆，真係太耐無玩啦，咩手感都無哂，而且仲要同Michael Yan Jordan比賽，姚明本身已經輸硬，更何況係姚明傑！
瑜仔同小貞見我地玩得咁激烈，本來只係打氣既佢地都玩埋一份，瑜仔幫Yan，小貞就幫我。
最後姚明傑以幾分之差輸左俾Michael Yan Jordan。
「你好弱雞呀！哈哈！」Yan笑得好開懷。
「老啦我！」我笑笑道。
「哈哈！」最後連小貞同瑜仔都笑埋一份。
「不如我地繼續玩下其他遊戲囉？」Yan好似成個細路女咁，用好期待既眼神望住我問。
「好呀！梗係無問題！」我笑笑回答。
「傑哥哥你睇下！係夾公仔呀！」Yan自從學左小貞對我既叫法之後，就好似改唔到口咁。
「傑哥哥你睇下！係夾公仔呀！」小貞同瑜仔又跟住Yan道。
忽然間，我好似又多左個女同個仔咁，不過呢種感覺真係好撚爽。
我走左過去，見到原來係夾比卡超既公仔機黎，我好有信心咁話：「放心交俾我啦！」
「左啲左啲！右啲右啲！」佢地三個不停係我身邊叫喊。
「喂！左定右呀？」我忍笑忍得好辛苦。
「得啦！得啦！」
我夾到個比卡超既左邊耳仔啦，然後望住佢慢慢咁移到去出口，慢慢地……慢慢地……屌！未到出口已經跌撚左！
「呀……」佢地三個都異口同聲地嘆氣。
「好！再黎！」我已經下定決心要夾到隻比卡超送俾小貞！
「傑哥哥加油呀！」佢地三個又異口同聲地為我打氣。
今次我夾起左比卡超成個屎忽，我仲唔得米……
屌！又跌左！
「哈哈……」唔知幾時開始，身邊多左啲細路圍觀，佢地係到恥笑我。
「傑哥哥加油呀！」Yan再次向我作出鼓勵。
好啦，今次我一定會成功既！
試左幾次之後，我終於成功左！
小貞好開心咁又攬住左隻比卡超公仔，左手係喵喵，右手係比卡超，小貞相當滿足。
「傑哥哥好叻！」佢地三個同時對住我豎起手指公，我忽然覺得自己成個人都飄飄然咁。
最後我地玩埋扑傻瓜、堆銀機等等既遊戲，大家都玩得好開心，而且拎左唔少禮品票，不過我地見點票站嗰到有好多人排緊隊，而且換票啲禮品都唔多吸引，我地都只係志在玩啫，所以都一致決定送左啲票俾係我地前面排緊隊嗰個人。
嗰個人好開心咁接過啲票，小貞又甜甜咁笑住回應佢。
入夜啦，大家都已經玩得好攰，所以我地都決定返屋企休息啦。
小貞同我送瑜仔同Yan到樓下，Yan同瑜仔都笑得好開懷咁向我地揮手道別。
我依依不捨咁，依然緊握住部手機，Alexis既罪證。
今日，本來出黎既目的係要同Yan講呢件事，但出到黎，見到佢玩到好似成個細路女咁，而且笑到見牙唔見眼既樣，我就好唔捨得，好唔忍心將呢件事話俾佢知，令佢傷心，Alexis係傷害Yan既仆街，但我唔想成為揭穿呢個仆街既仆街。
呢件事真係令我好矛盾，只要我想像到Yan痛心疾首既樣、失去笑容既樣，我就無勇氣同佢講呢件事，最後，我都係將部手機收返入袋，目送佢地上樓。
「傑哥哥你有心事？」
拖住小貞返屋企途中，神探貞又出現，一眼睇穿我既矛盾。
我唯有點點頭回應。
然後小貞又甜甜咁笑住講：「小貞今日玩得好開心，所以唔俾傑哥哥唔開心！」
我緊抱住小貞，「多謝你呀小貞……」