突然做左人地老豆，多左個女: 44
翌日，一拖住小貞返到幼稚園，就聽到Yan係校長室同校長理論。
「Miss Cheung係一個好老師，你地唔應該未查清楚就將佢解僱，咁樣好唔合理！」
校長室既隔音設備好似有待改善，即使閂左門，我地係出面都聽到Yan把聲。
「呢個係我地校方一致既決定……」
「你地無證無據，就作出啲咁既決定，你地認為咁樣好合理？」
「只不過Miss Cheung自己都同意左……」
「根本就係你地一開始既決定已經唔合理，關Miss Cheung同唔同意咩事？你地明知道某某然換左個老師，對細路仔既影響係好大，但你地都咁做。」
「因為Miss Cheung件事，對我地學校既聲譽已經造成好大影響……」
「聲譽緊要啲定細路緊要啲？你地都唔知道，瑜仔入黎呢間幼稚園讀既時候，佢有幾咁緊張，好多野佢都跟唔上，好彩有Miss Cheung同小貞係到，佢地好細心好有耐性咁樣教瑜仔，瑜仔先適應到，但你地而家竟然無憑無據就炒左Miss Cheung……」
講到呢到，Yan開始哽咽，其實Yan同瑜仔黎左呢間幼稚園都係半年左右，但佢對Miss Cheung件事已經咁上心，好過出面嗰啲淨係識得食花生既三姑六婆。
「真係好唔意思，我地會作出最妥善既安排，盡量唔會影響到啲細路。」
雖然最後都改變唔到校方既決定，但有一個人肯為Miss Cheung求情、有一個人因為Miss Cheung既離去而流淚，Miss Cheung，其實你已經成功補償到你既過錯，甚至係比所有人做得更出色。
呢件事之後無耐，Miss Cheung再send左個whatsapp俾我，佢話去澳洲既手續已經搞掂哂，佢去到嗰到諗住餵下草泥馬，過下啲牧場生活，放鬆一下，而今日，就係送佢機既日子。
我拖住小貞，Yan拖住瑜仔，我地一行人咁去送機，我有問過小海去唔去，不過因為呢件事，小海既老豆老母對Miss Cheung好無好感，所以唔俾小海去。
「你過到去，要好好照顧自己呀。」我道。
Miss Cheung點點頭，「我好期待可以餵草泥馬。」
「要小心身體。」Yan道。
Miss Cheung笑笑，「話唔定嗰到空氣好，我仲會健康左！」
「Miss Cheung，我地會好掛住你……」小貞同瑜仔緩緩地道。
Miss Cheung摸摸佢地兩個既頭仔答：「我都會好掛住你地……」
我係我個褲袋到遞左一封信俾Miss Cheung，「呢封信，係小海寫俾你。」
Miss Cheung接過左，佢一邊睇、一邊喊。
因為小海命令我要幫佢對下啲字有無錯，所以我知道信既內容：
「Miss Cheung,
我皮膚敏感要去醫院時，你很緊張，很擔心，但是又很冷靜地幫我，你真是很叻，尤其是等到我爸爸媽媽來到時，你為我說話，說出我心裡面的說話，我很感動，謝謝你，你真是一位好老師，我不會忘記你。
小海上」
粗糙既字體，但佈滿小海小小既心意，其中有好多字，小海係擦完又改、改完又擦，特別係「醫」院個「醫」字，佢寫左成四張A4紙先寫得啱，我一路陪住小海寫呢封信，一路教佢要點樣寫，佢就一路寫一路喊，喊到封信都充滿住佢既淚痕。
「多謝……」Miss Cheung緊握封信，喊住咁講。
最後，Yan、小貞同瑜仔都俾左一個離別既擁抱俾Miss Cheung。
「保重啦，一路好走。」我道。
Miss Cheung笑笑，「你都係，好好保重。」
然後佢就一個人拖住個喼，靜靜地離開左呢個傷心地。
Miss Cheung過到澳洲之後，佢都有同我用email保持聯絡，有時佢會send啲佢餵草泥馬既相俾我，佢係相到笑得好開朗，曾經我以為永遠都唔會再見既兩顆虎牙再次係相到出現返，或者，呢個對Miss Cheung黎講，先係最美好既結局。
有時候離開，並唔係一件錯事。
話咁快，又到農曆新年既假期，老母叫我帶小貞過去阿叔到同大家拜年。
去到阿叔屋企，諗唔到佢個女廿幾歲已經結左婚仲生埋個仔，結果老母、我、小貞、阿叔、阿叔個女同佢個孫就幾代同堂咁聚埋一齊。
「恭喜發財！」小貞眼仔碌碌咁向住老母同阿叔講。
老母俾小貞氹到好開心，笑到見牙唔見眼咁講：「仲有呢小貞？得一句咋？」
「仲有……」小貞諗一諗再講：「身體健康！心想事成！笑……笑哈哈哈哈！」
「哈哈，乜野係笑哈哈哈哈呀？」老母笑到成身都震哂咁。
「係笑口常開呀小貞。」我道。
小貞紅都面哂，尷尷尬尬咁摸摸自己既後尾枕講：「笑口常開……」
之後老母同阿叔都好開心咁派利是俾小貞，而阿叔個女都抱住個仔咁走過黎，俾左封利士俾小貞。
「多謝！我會放入豬仔錢罌到架！」小貞笑眯眯咁講。
然後我都俾左封利是俾阿叔個女同個孫。
「佢好細個喎，幾多歲？」我問。
「聰仔佢四個月大咋！」阿叔個女抱住自己個仔，笑得好甜咁講。
我笑笑，一邊捉住聰仔肥嘟嘟既手仔，一邊問：「佢老豆呢？」
「佢爸爸今日要返工呀。」
「新年都要返工？」
「係呀，為左養聰仔呀嘛！」
我估，佢地應該係奉子成婚既，所以先咁後生就結左婚仲生埋仔，不過個男仔總算係負責任既。
小貞見我玩bb玩得咁過癮，佢又眼仔碌碌咁走左過黎。
「小貞，想唔想摸下聰仔呀？」聰仔老母問。
小貞怕怕羞羞咁點點頭。
聰仔老母抱住聰仔坐左係梳化到，小貞就坐埋去，佢望住聰仔「依依呀呀」咁唔知講緊啲乜，於是又眼仔碌碌咁望住我，好似問緊我佢係到講緊啲乜咁。
我抱住小貞坐左係我大脾到，再講：「傑哥哥都唔知佢講緊啲乜。」
聰仔老母笑笑道：「小貞係四個月大時都係咁架咋。」
然後小貞又眼仔碌碌咁望住我問：「真係架？」
我笑笑咁答佢：「係呀，每個細路係四個月大時都係咁，傑哥哥都係！」
小貞又笑住咁望住聰仔。
聰仔見到小貞長到膊頭既頭髮，佢覺得好得意，於是就捉住小貞啲頭髮黎玩。
「哈哈！傑哥哥！佢好得意！」小貞笑到格格聲咁。
聰仔老母捉返住聰仔隻手話：「好啦，唔好整痛小貞姐姐。」
「小貞姐姐！」小貞似乎好鐘意「小貞姐姐」呢個稱呼，佢雙手按住自己塊面珠墩不停咁哄埋黎我到講：「小貞姐姐！小貞姐姐！」
我俾佢搞到成身震哂咁笑，「係啦！乖啦！叻啦！小貞姐姐！」
「嗚哇！！！！！！！」講講下，聰仔又無啦啦係到喊。
「聰仔做乜喊？」小貞好擔憂咁望住聰仔問。
聰仔老母笑笑，「佢應該係肚餓，要飲奶啦，小貞姐姐你等一等我，等聰仔食飽飽先再出黎同你玩好無？」
小貞用力咁點點頭，「聰仔要食飽啲！」
之後，小貞同聰仔都影左唔少相。
望住小貞笑到咁開懷既樣，作為老豆既我都覺得好開心，以前我好少參加呢啲新年拜年活動，反正我對利是錢都唔著緊，但有小貞係到，忽然覺得，有時參加下呢啲家庭聚會，都係一件賞心樂透既事。