突然做左人地老豆，多左個女: 43
我一直等一直等，連同小貞食飯都心不在焉咁。
「傑哥哥……」小貞拎住左支要擰開蓋既QOO提子汁道。
「做乜事呀小貞？」我摸摸小貞個頭。
「我開唔到……」小貞一臉無奈咁。
係喎，平時我只要見到小貞拎住支野飲遞向我到，我就會自動自覺咁識得去幫佢開蓋，但而家我成個腦都係Miss Cheung既事，我居然連啲咁少既事都忘記左！
「對唔住呀小貞……傑哥哥唔記得左……」我一邊幫小貞擰開個蓋，一邊內疚地道。
「唔緊要啦傑哥哥！」小貞笑笑答。
小貞接過左支qoo之後再講：「傑哥哥係咪好擔心Miss Cheung？」
我點點頭回應。
小貞垂低頭續道：「小貞都好擔心……」
然後我抱起小貞，將佢放係我大脾到，「無事既……Miss Cheung一定無事既……」
「登登登」
去到深夜，小貞熟睡左既時候，我又收到whatsapp，終於係Miss Cheung黎。
「你而家得唔得閒?」Miss Cheung問。
我想打俾佢，但又怕嘈醒小貞，唯有繼續whatsapp佢。
「小貞訓著左, 你ok嗎?無事嗎?」
「我ok, 不過想你過一過黎陪我」
「你而家係邊?」
「我係tst海旁」
係無辦法之下，我唯有硬住頭皮打俾我老母。
「喂……阿仔……咩事呀？」老母半睡半醒咁聽左電話。
「老母！我有啲緊要事要出一出去呀！你可唔可以過黎睇住小貞先呀？」
「唉……好啦……」
好彩有老母係到！好彩老母有聽電話！好彩世上只有媽媽好呀！
等老母過左黎之後，我即刻狗衝去尖沙咀海旁。
終於，見到Miss Cheung一個人落幕既背影坐左係海旁邊。
我走埋去，只見佢旁邊放住幾罐生力啤，佢就一個人係到喊住咁飲悶酒。
我見到佢咁既樣，心好痛。
我除低自己身上既外套，套左落佢個身到，佢望到我，眼紅紅咁強顏歡笑。
「凍呀，做乜係到吹風？」我問。
Miss Cheung似乎已經有少少飲醉左，佢塊臉都紅紅咁。
「舒服囉，可以逃避現實。」Miss Cheung望住對面海，一邊飲一邊講。
我搶走左佢手上支生力啤，「唔好再飲啦。」
「做咩唔俾我飲喎！」佢好似個細路女咁，個身扭下扭下咁發脾氣。
「你醉啦……」
Miss Cheung擰轉身，雙手隊過黎想搶返我手上支生力啤，但我拎開左，佢搶唔到。
然後佢扁一扁嘴，係個膠袋到又拎過支黎飲。
唉，我放棄啦，我直接飲埋一份。
「點解呀……」佢緩緩道。
「咩點解？」我問。
「我明明已經無做，點解仲要炒我……」
我答唔到，因為我同佢一樣，心有不甘。
然後佢兩行淚水又落下，我輕輕咁幫佢擦走啲淚水。
「我明明已經好努力……」佢繼續講，啲淚水又繼續流落黎。
我唯有一直幫佢抹。
「星仔……」
「星仔？」
「係我幫我個仔改既名……我希望佢可以好似星星咁，一直閃閃發亮、閃閃發光。」佢抬頭望住天空講。
我跟住佢望向天空，雖然夜空好大，但只係能夠望到四、五粒星星係到閃閃發光。
「星仔係上面會過得好開心。」我道。
「我只係想補償我既過錯……點解連咁既機會都唔俾我……」
「你已經盡哂力……」
「如果……如果當初我唔係出返黎做既話，我就唔會搞成咁……」
「呢個唔係你既錯……」我已經唔識得可以講咩安慰說話啦。
「如果……如果我可以早啲遇見你，我就一定唔會出返黎做！」Miss Cheung突然眼神好堅定咁望住我，搞到我好不知所措。
「點解咁講？」
「因為我好鐘意你呀蠢材！」講完之後，Miss Cheung就伏係我個膊頭到不停咁喊，成個身震哂咁。
我實在係呆左，唔知俾咩反應好。
佢喊到咁上下，又重新坐返直個身。
「不過我知道你唔鐘意我。」
我繼續係無言，有無人可以打救下我呀？
「咁又係既，我呢種女仔，又邊會有人鐘意。」
「唔係……你一定可以搵到你既Mr. right架……」
「係咩？」佢冷笑道。
「咁你而家打算點……無左份工……」
「我其實都有諗過會發生咁既事……」
「然後？」
「如果係咁，我打算申請working holiday，離開呢到。」
「離開下都係好事……」
佢笑笑回應。
「打算去邊到？」我繼續問。
「澳洲，最易申請。」佢冷冷地答。
「嗯……」
「多謝你陪左我成晚。」佢忽然起身再講。
「唔洗客氣……」
「我走啦，拜拜。」
我捉住佢隻手問：「你醉成咁，去邊？」
「梗係返屋企啦傻仔！」佢笑笑道。
「你醉哂咁點返屋企呀？」
「搭的士咪得囉傻仔！唔通去你屋企咩？」
「不如我送你啦？」
「唔洗啦，我會有咩事？正傻仔！」
然後我都企左身，捉住佢話：「你一個女仔又醉成咁，好危險架，俾我同你一齊搭的士啦。」
最後佢都係點點頭咁答應左。
我地截左架的士，Miss Cheung講左個地址，個的士佬又陰陰濕濕咁望住我地。
今次，係我地第二次一齊坐的士啦。
但係今次好唔同，Miss Cheung無再挨住我訓，只係擰個頭係另一邊望風景。
我望住佢個背影，忽然覺得好空虛，或者從此以後，我都唔會見到佢露出兩顆虎牙既笑容啦。
呢個世道，又摧毀左一個美人胚子。
的士佬終於駛到左Miss Cheung既住址，佢落左車，臨走前再同我講多句多謝。
望住Miss Cheung一個人上樓既身影，我忽然覺得，或者當初，都無人會諗過件事會搞成咁。
「再見啦，澤尻英龍華。」