突然做左人地老豆，多左個女: 42

北川景子係我面前緩緩咁脫下身上既雪紡襯衫，露出白滑既肌膚，雪紡襯衫緩緩地滑落，呈現出佢微小既乳溝。
 
「Yan…」
 
正當我想講口說話，係我面前既Yan哄埋我到，用食指輕輕按住我既雙唇，然後嘟起個嘴巴，示意我唔好出聲。
 
我望一望四周，呢張係我屋企張床黎，但點解唔見小貞？點解Yan會係我間房到？
 
Yan無理會我既迷茫，佢輕輕地用佢既小嘴巴親吻我既身軀，慢慢地……慢慢地……
 


「登登登」
「登登登」
「登登登」
「登登登」
「登登登」
 
一連串既whatsapp驚醒左我，屌！原來係發夢！
 
我想轉身拎返部手機既時候，咦，點解個手臂濕濕地既？
 


我一望，有少少尿黃色既液體攤左係我隻手臂同我張床到，我哄埋去一聞，屌！係喵喵啲貓尿味！
 
我望一望遠方既喵喵，只見佢好悠閒咁用佢既粉紅色肉枕清潔佢塊臉。
 
我知，我知我忽略左你係我唔啱，但你都唔洗咁樣發我脾氣架……
 
我再擰轉身望下小貞，見佢仲熟睡緊，而且時間尚早，所以我決定靜靜地處理左啲尿去。
 
「登登登」
「登登登」


「登登登」
「登登登」
 
Whatsapp依然不停響緊，不過我真係無時間去睇，當我清洗完手臂上同床上既尿跡，不經不覺已經到左要叫小貞起身返學既時間啦。
 
「小貞，夠鐘返學啦。」我輕輕咁拍一拍小貞。
 
「嗯……」
 
可能係聖誕假期既後遺症，小貞完全無想起身既跡象。
 
我見小貞仲訓得好冧，所以都係去睇下whatsapp先。
 
「屌!你line俾人偷左喎!??」阿南道。
「細佬, 你line俾人盜用左呀哈哈!?」家姐道。


「小貞爸爸, 你line俾人偷左acc呀??」Miss Cheung道。
「你line a/c係咪俾人hack左??」Yan道。
 
接下來既都係嗰啲「你個line account俾人hack左」既whatsapp，有啲甚至係我好耐無同佢聯絡既中學朋友，我望一望佢地send俾我幅圖，即刻「屌」左聲！
 
「而家得閒嗎？可唔可以幫我個忙」
「唔該你可唔可以幫我去七仔定OK買3張支付寶購物卡呀？」
「人仔1000面額幫我買3張」
 
屌！嗰陣時貪得意裝左個line但一直無用，諗唔到咁都會俾人盜用！
 
真係……騙徒手法層出不窮……
 
我即刻刪左個line再同佢地解釋返，媽呀！真係好麻煩！屌你老母！你呃人咪呃人囉！做咩要搞到人啫！
 


「so funny!」阿南whatsapp道。
 
屌你有幾funny！
 
「細佬, 我覆左佢:”好呀, 不過你找左尋晚條過夜數先啦, 叫雞唔使比錢呀仆街!!」
 
屌！家姐真係好撚無聊！不過我笑左。
 
「佢無再覆我啦?」Miss Cheung覆。
 
「我覆左佢: 講左暗號先, 我要__ __ __?」Yan道。
 
哈哈，大家都好無聊。
 
有啲中學同學甚至覆：


「尋晚咪幫你買左十張mycard囉, 仲唔夠?」
「佢無覆我喎, 好傷心, 無得玩?」
 
真係……笑死我。
 
「阿傑! 好耐無聯絡啦!?」其中一個中學同學覆我。
「係呀, 諗唔到咁耐無聯絡, 一聯絡就搞d咁既野?」我覆。
「哈哈」
佢續道：「我諗住新年搞個中學聚會呀, 你黎唔黎呀??」
「好呀」
「到時可以攜眷出席架?」
 
我望一望小貞，攜眷出席，我已經諗到攜邊個去啦。
 
「ok!」


 
如果到時我帶小貞過去，班仆街肯撚定跌哂眼鏡！哈哈！
 
「好啦, 咁我到時再whatsapp你時間地點!」
 
處理完件事之後，我重新再哄埋小貞到叫醒佢，但佢依然係到賴緊床。
 
好啦，你逼我出絕招架咋！
 
「吱吱吱……」我係咁係小貞既細腰間吱佢，搞到佢即刻醒左，仲哭笑不得咁係咁嗌：「比卡超！！！！！！」
 
「捨得醒未呀小貞？」我停左手問。
 
小貞擦擦眼淚，紅都面哂咁點點頭。
 
去到廁所，小貞拎起左支新既牙刷，係一支印住比卡超樣既黃色牙刷，呢一份，就係聖誕老人送俾小貞既聖誕禮物啦。
 
「哇！好得意！」
 
平安夜翌日，小貞好早就起左身，好期望咁跳下跳下跳到棵聖誕樹到，然後小心翼翼咁拎起掛係樹到既襪仔，佢打開條襪仔一望，就好興奮咁講。
 
「比卡超！」小貞拎住支比卡超牙刷，甜甜咁笑住嗌。
 
其實我真係諗唔到買啲乜俾小貞做聖誕禮物，然後某日行過超市，見到一支咁得意既牙刷，隨即就諗起小貞，所以就買左返黎送俾佢啦，好彩小貞都鐘意，真係好襯小貞。
 
小貞拎住支新牙刷，好滿足咁係到刷刷刷。
 
唔洗LV、唔洗Gucci、唔洗Chanel、唔洗Pandora，就咁一支咁普通既牙刷，就可以氹到細路女咁開心。
 
返到幼稚園，小海、瑜仔、Yan、Julia同Miss Cheung就圍住係到。
 
望到Yan，我唔多唔少都有啲尷尬，畢竟今朝竟然發埋啲咁既夢。
 
「瑜仔，你收到啲乜野聖誕禮物呀？」小海問。
 
「我……我收到一條毛巾。」瑜仔答。
 
「你地估下聖誕老人送左啲乜野俾我？」小海好自豪咁講。
 
小海同瑜仔都頭擰擰咁。
 
「登登！」然後小海舉起左張券，一睇，原來係去半島酒店食自助餐既餐券黎。
 
「係聖誕老人送俾我架！佢一定係知我好想同爸爸媽媽去食自助餐啫！」小海揸實張餐券，好陶醉咁講。
 
唔知點解，聽到小海咁相信係聖誕老人送俾佢既禮物，我就好想串鳩佢，不過仲有小貞同瑜仔係到，我都係無謂咁做啦。
 
「嗯！咁一定係大家都好乖，所以聖誕老人先會送禮物俾大家既！」Miss Cheung道。
 
「咁小貞呢？你收到啲乜野禮物？」小海問。
 
「比卡超！！！！！！！牙刷！」
 
小貞咁樣一嗌，氹到所有人都笑到見牙唔見眼。
 
人群散左之後，Miss Cheung叫停左我道：「點解唔見你戴我織俾你條頸巾既？」
 
「哦……天氣唔係咁凍，所以我收埋左。」
 
「咁好啦，記得天氣凍時要戴啦！拜拜！」
 
望住Miss Cheung走入幼稚園既背影，再諗起今朝早夢到Yan，唔知點解我覺得有啲內疚。
 
話咁快，又到左接小貞放學既時間。
 
「哇！真係估佢唔到！」
「平時笑笑口咁，但估唔到原來佢係做啲咁既野！」
「快啲炒左佢啦！唔好教壞我啲細路呀！」
「哼！真係不知廉恥！」
「哎也！點解仲可以係到做架，佢知唔知醜架？」
「係囉，今朝仲笑笑口咁，諗起都覺得恐怖！」
 
一去到幼稚園，我就見到班三姑六婆又圍住係到講是講非，但佢地究竟講緊邊個呢？
 
我入到去接小貞，再望望周圍，唔見Miss Cheung。
 
無幾耐，就見到Miss Cheung喊哂口咁由校長室衝出黎，再直接跑走左，四周圍既人都一臉無奈咁。
 
到底發生乜事？
 
「登登登」
 
Whatsapp響起，我一望，係阿南黎。
 
「屌!網上爆左個援交女名單同相呀!我見到有個好似Miss Cheung既人!???」
 
吓！！！！！！！！？？？？？？
 
我唔敢相信，竟然發生啲咁既事！
 
我拖實小貞隻手衝左出去，但已經太遲啦，Miss Cheung已經唔知跑左去邊。
 
小海跟住我跑左出黎，佢喘哂氣咁話：「啲老師……我聽到……啲老師話……校長炒左Miss Cheung……」
 
點解……佢明明已經好努力，好努力咁去生活、好努力咁去改變、好努力咁去補償，但係偏偏係佢已經無做既時候，先發生啲咁既事？抹殺佢既努力？
 
「點解要炒Miss Cheung……」小貞眼紅紅咁講。
 
我即刻打俾Miss Cheung，但佢連手機都熄埋，我無辦法，唯有留言俾佢：「如果你聽到我留言，你快啲覆我啦，我好擔心你。」
 
我好擔心，以佢一個咁負面既人，發生啲咁既事，我真係好擔心佢會一時睇唔開，會做傻事，但係我無辦法，我連佢住邊、而家會去邊都唔知道，我對佢既了解實在係太少，而令到我咩都做唔到。
 
「校長，請你唔好炒Miss Cheung！佢係一個好好既老師黎！」
 
我唯一可以做到既，就係返轉頭同校長求情。
 
「校長……我真係好鐘意Miss Cheung架……」小貞哽咽道。
 
「小貞、小貞爸爸，我都知道你地而家心情好難過，其實我都係，如果有得揀，我又點會要佢辭職呢？我好明白如果呢個時候先轉班主任，對細路既影響會好大，但係呢個係校方一致既決定，而且Miss Cheung都同意左……」
 
屌你老母又係呢啲官腔台詞！如果唔係有細路係到，我晨早爆粗屌鳩你！
 
我拖返住小貞，嬲爆爆咁離開幼稚園，而家我唯有可以做到既，就係等Miss Cheung回覆。
 
Miss Cheung，希望你唔好有咩事。