突然做左人地老豆，多左個女: 38
之後嗰段日子，藍絲帶同警察都用盡唔同既方法去打擊今次呢一場革命，直到有一日凌晨，警方清除左係旺角大部份既佔領區，十月十八號，我同阿南都決定去重奪旺角。
我將小貞放低俾我家姐同老母照顧之後，我就去旺角同阿南集合。
黎到旺角，本來佔左既十字路位置，而家得返一條馬路。我淨係見到有好撚多警察，同埋守住唯一一條馬路既人，前面既人同班警察對峙緊，當中甚至有啲係著住校服既中學雞，而後面既人就坐係到守住，四周圍都係鐵馬同警察。
我係一個臨時搭建既物資站帳篷附近搵到阿南，佢派緊口罩。
「喂有無野幫到手？」我問。
「無架，而家係等人多。」
係我地隔離既北行線有架巴士駛過，車上有人向我地舉中指，我地又向返佢地舉中指。其後，有個警察開咪講：「你地而家參與緊既係一個非法集會，請大家退返上行人路，否則我地會使用武力。」後面就有個旗手企係到。
「聽唔到！大聲啲！」不過無論個警察講啲乜，我地都只係當佢係鳩up，我地重覆又重覆咁嗌呢句。
無幾耐，前面同緊班警察對峙緊既人雙方開始有衝突，屌你老母班警察又噴胡椒又亂棍揼人，我同阿南即刻戴返口罩上前幫拖，後面既人就係咁遞啲遮同水上黎。
第一輪衝擊之後，有唔少人中左胡椒同受左傷，因為前面人多，我同阿南俾人褪返去後面，無幾耐又開始左第二輪衝擊，本來企係後面既警察都上左前面幫手，所以後面就變左真空狀態，我地即刻去搶左擺係馬路邊既鐵馬。
搞左幾輪之後，人愈黎愈多，阿南收到消息，話有人集結係朗豪坊對出既位置，想攞返嗰邊條馬路同十字位，所以我地就轉移陣地，向住朗豪坊出發。
黎到朗豪坊，就見到有好多人企係馬路邊，而班警察就係到指揮交通。
「過馬路既人請你行快幾步啦。」其中有個警察開住咪講。
每當個交通燈轉綠燈既時候，我地都會慢慢咁行過去，班警察就係後面係咁趕，就好似趕班羊過馬路咁，我覺得我地變到好無尊嚴。
「阿伯行得慢……你地唔好趕我……」其中有個行得好慢既阿伯同班警察講。
然後有個女警走左過黎，同個阿伯講：「得，阿伯你慢慢行，最緊要過到去對面馬路。」
綠公仔閃緊，個警察再一次開咪：「請大家盡快行返上行人路，唔好再係到逗留啦。」
過到去對面，又有另一班人係到等過馬路，大家都好期待下一個綠公仔既到來，大家都好聚精會神咁望住個交通燈。
綠燈。
「過馬路！過馬路！」然後大家又興高采烈地過馬路。
我諗，我成世仔都未試過過馬路過得咁慢同過得咁開心，仲要係同一大班人一齊。
試左幾次之後，終於，有班人行出左馬路，企係條馬路到，我同阿南都當然唔執輸咁企埋一份。
「坐低啦！我地坐低先，如果唔係又俾人趕架啦！」前面有人大嗌。
我同阿南就用半跪形式坐左係到，因為預防萬一發生咩事都可以第一時間逃跑，唔洗硬食警察啲胡椒同棍。
「大家快啲過黎，唔過就無機會架啦！」
「唔好企係行人路到得個望字啦，快啲過黎啦！」
我同阿南都好落力咁叫仲企係行人路上鳩望既人過黎，然後慢慢咁多左人過黎。
前面既人開始傳啲口罩過黎，我地亦幫手一個傳一個，唔需要言語，但大家已經好有默契，清楚知道自己要做啲乜、大家既目標係乜。
後來，我係後面聽得唔係好清楚，好似係話有架救護車會駛過黎，所以班警察要我地讓個空位出黎俾架車過。
「吓？係咪又係呃人架？之前已經俾佢地呃過啦喎。」
「但係如果你唔俾，到時真係有救護車，人地又會話你無人性呀。」
「屌你老母佢地真係好撚陰濕！」
旁邊既人係到不斷討論緊，大家都好疑惑究竟應該點做。
到左最後，大部份人都決定讓出少少位置，俾架救護車駛過，但點知，駛過既係巴士、的士、私家車，再黎巴士、巴士、的士，唔知點解會咁撚多巴士，但係就偏偏唔見有救護車。
「屌你老母救護車呢？」
「邊撚到有救護車呀？」
啲人開始鼓譟，個旗手都未準備好舉旗，班警察就已經凶神惡煞咁向住我地係咁噴胡椒同用棍毆我地。
「哇屌！」
「仆街中左！」
我同阿南都中左胡椒，仲要係兜口兜面中哂嗰隻，屌你老母真係好撚嗱，我已經搵唔到形容詞去形容有幾撚嗱啦，總之我嗱到我只能夠半開隻眼。
「麻煩大家讓個位出黎做救護呀！」混亂途中，有個學生妹捉住左我隻手，將我帶到去7仔前面，7仔裡面啲人一見到咁撚混亂，就雞咁腳咁閂埋個門，好似驚死下一秒我地就會影響到佢咁，好撚仆街。
我係7仔門前坐低左，阿南跟係我後面，阿南勝在夠高，所以中既範圍唔大，係我旁邊坐低既，仲有個西裝友同個學生妹。
話咁快，就有人遞左支水俾我地，旁邊既人係咁幫我地清洗隻眼。
我終於可以張開眼，張開左眼先發現，原來多左好多人係到，有西裝友、有阿叔、有後生既，甚至有唔少女人，佢地手拉住手咁圍住我地，做成一個臨時救護區，希望後面既混亂唔好影響到休息緊既我地，望到呢個畫面，我真係覺得好撚感動，我已經分唔清楚我臉上既究竟係啲清水定係我既淚水啦。
「我地而家一齊慢慢移動去後面，呢到實在太混亂啦，我地唔頂得幾耐。」其中有個圍住我地既學生妹講。
然後其他既人都點點頭，我地都好有默契咁走左去後少少既位置。
休息左陣，我同阿南企返起身，望到出面條馬路仲未成功攞返。
「哇屌！雅蘭嗰邊馬路好撚多人喎！」阿南擢住部手機話。
「多人機會大啲，我地去幫拖啦！」我道。
去到雅蘭對出條馬路，只見人群都挨住擺係馬路邊既鐵馬，個個圍哂係到虎視耽耽咁，而班警察就企係馬路到監視住我地，有警棍、有旗手，個個都凶神惡煞咁，唔講以為我地殺左佢老母。
我望到呢個情景，就好似見到一堆禽畜俾人困住係啲欄到，我地都好想走出黎，但一出去就會俾班人湯咁，明明我地都係人，但而家就同禽畜無乜分別，真係好撚可悲。
阿南同我都擠左上去前面，對面就有個好撚大隻既警察啤住我地兩個。
「嘭！！！」
一聲巨響，對面馬路有人推跌左啲鐵馬！
班警察好撚緊張咁衝左過去對面，呢一邊有鬆懈，我地都即刻衝左上前，千鈞一髮之間，啱啱啤實我地個大隻佬警察即刻擰轉身衝埋黎我地到，仆街我走都走切，佢一棍毆落黎，我神經反射地用手一擋，屌你老母好撚痛！大佬你打份工啫，唔撚洗咁撚大力架喎？
當佢想揮棍毆第二下既時候，好彩阿南及時拉走左我，如果唔係我差啲命仔都無埋。
「屌你老母腫撚左！」我大嗌。
「屌你戇鳩仔！洗唔洗去急救站呀？」條仆街阿南居然笑鳩我。
「屌！真係好撚仆街！佢一早就啤住我想打我啦！」
阿南恥笑左陣，突然我地又聽到歡呼聲，我心諗做乜鳩？
原來係班警察走啦，讓返條馬條俾我地。
然後成班人好歡天喜地咁走出馬路，又好歡天喜地咁拍手，之後再好歡天喜地咁鳩行，行行下我又見到黃洋達係到同啲人握手講多謝。
係既，重奪返旺角係開心既，但我諗不至於要咁撚開心吧？你而家又唔係爭取到真普選，成班人咁撚開心做乜鳩？
人潮散左之後，留守既人並唔多，今晚阿南同我都決定左留守，我地坐左係雅蘭對出條馬路到。
「你老母打黎你老母打黎！」
「喂！傑哥哥！」一聽就聽到係小貞既比卡超聲線。
「小貞！咁夜你仲未訓？」
「傑哥哥……」
「做乜野呀小貞？」
「我……我好掛住你呀……」
哇屌！即使隻手有幾撚痛都好，聽到呢句我即刻心都甜哂！
「對唔住呀小貞，今晚陪唔到你訓啦，你要乖乖地聽姨姨話呀，知唔知呀？」
「無傑哥哥係到，我訓唔著……」
「最多傑哥哥返黎時，買杯朱古力新地俾你啦，好唔好？」
「嗯！」我係腦海到已經幻想到小貞用力點頭個得意樣。
「好啦，咁你快啲去訓教啦。」
「傑哥哥都要小心！」
「Goodnight!」
「啜啜！」最後小貞俾左個Goodnight kiss俾我，真係甜過食沙糖！
我收左線之後，聽到阿南同家姐都傾緊電話。
「知道啦Katie，你都要早啲訓呀！」
聽到阿南對住家姐都可以咁撚溫柔，我就覺得真普選無乜可能會唔成功。
「我覺得香港人應該每人手上都要拎住本雞本法，個個熟讀佢，你地都唔撚知雞本法係乜，個個都淨係識聽外國嗰套！」突然，我聽到有個阿伯係到大聲咁講。
阿伯，你連基本法「基」字個音都未讀得正，仲好意思叫人隨身帶住本基本法？
「你咁樣講，同當初人人都袋住本毛語錄有乜分別？」
我認得呢把聲，係Yan黎！