突然做左人地老豆，多左個女: 39
「靚妹你同我講毛語錄？我出世嗰時你都未出現呀！你識啲乜呀？我就識啫！我識你地係破壞緊法治！破壞緊雞本法！」阿伯繼續充滿霸氣咁講。
通常老一輩嗰啲，都好鐘意用年紀黎打擊人，認為我食鹽多過你食米，我識既野一定多過你咁。
聽到阿伯既嘈吵聲，啲人都開始走過黎圍住佢地，不過大家一見到原來阿伯挑機既對象係北川景子，大家就好有興趣繼續睇落去。
「好呀，咁我地唔講毛語錄，我地講清末啦，清末我同你都未出世，夠公平啦呱？」Yan無俾阿伯既氣勢嚇到，眼神依然好堅定。
「好呀！講咪講！驚你呀！」
「伯伯，清朝既時候都有大清律例，咁孫中山嗰陣時推翻滿清政府，你覺得佢係唔係破壞緊清朝既法治？」
「屌你老母！清朝嗰時咁撚腐敗，抵佢俾人反架喎！」
「同樣地，你望下香港而家變成點？早幾年又話要搞廿三條，然後又話要搞國民教育，到而家，好地地一個普選，都要搞個假既出黎，仲要我地袋住先，係咁既環境之下，我地只係想要爭取返一個真真正正既普選，而唔係一個由小圈子揀出黎既特首，咁我地反對佢，又有乜野問題？」
「後生女，你地已經好幸福架啦，唔憂食唔憂住，仲要咁貪心要個乜野真普選，你地俾啲鬼佬洗哂腦啦。」
「伯伯，人只會愈黎愈進步，因為人係應該追求更高、更舒服、更自由既環境黎生活，你有無聽過『需求金字塔』？我地而家連自由都無，正正活係金字塔既底部，我地只係擁有左生理既需求，但你係咪甘心成世都只係活係金字塔既底部？做最底下既階層，俾有錢佬、地產商踩住你？你係咪淨係滿足於活係圍牆下既假幸福？而唔去追求一個更高既層次？」
阿伯俾Yan一連串既問題嚇到口啞啞咁，佢唔識點回應，或者佢連需求金字塔都唔知係咩黎。
Yan繼續講：「伯伯，如果我地唔去追求一個更舒適既生活環境，我相信我地仲係活係清朝，甚至一個更舊既年代，或者我地而家都仲係要紮腳，咁我地係呢到反抗，仲係唔係錯？人係應該要有追求進步既精神架！」
「追求乜撚野進步啫？而家又唔係唔俾你揀，你有得投票架喎！」
「伯伯，或者我俾個簡單啲既例子你。嗱，就當我地無破壞過任何朝代既法治，我地仲係活係一個古老既年代，嗰陣時男人仲係可以三妻四妾，你開唔開心呀？」
聽到Yan咁講，阿伯即刻好開心咁點點頭，「開心！梗係開心啦！」
「不過咁喎，父母之命，媒妁之言，你無得揀老婆架喎，你爸爸媽媽幫你揀好哂你啲三妻四妾，你大婆係葉劉、二婆係蔣麗芸，仲有個妾侍係李偲嫣添，你唯一可以揀既，就係揀每晚同邊個訓，你又開唔開心呀？」
阿伯當堂黑哂臉咁，我地就圍住係到偷笑。
「而家大陸俾我地揀，不過係佢揀左成龍、周融同葉劉俾你揀，你覺得我地係咪真係有得揀？呢啲叫普選咩？呢啲叫民主咩？」
「屌！我都費撚時同你講！」
「咁快就走？我未講完架喎！」Yan大聲呼喊。
阿伯無理到Yan，就咁就走左，至於我地，連唱生日歌都慳返，淨係識係到拍手。
Yan見到大家圍住佢拍手，搞到佢紅都面哂，不過大家似乎都對北川景子好有興趣，拍完手都依然圍住係到。
「阿傑！」
點知Yan發現左我，走左過黎我面前，其他人見到，個個都用一副好很葡萄既眼神望住我，最後大家都唯有死死地氣咁散左。
「你唔洗照顧瑜仔咩？」我問。
「我將佢交左俾Alexis，咁你呢？小貞呢？」
「我都將佢交左俾我老母，哈哈。」
「哈哈，你一個人黎？」
「唔係呀，阿南係雅蘭對面，你呢？一個人？」
「係呀！」
「一個女仔黎，你唔驚咩？」
「有咩好驚？我只係喺到追夢，人係要有追夢既精神，有乜需要驚？」
似乎Yan意猶未盡。
Yan望一望我隻腫左既手，再講：「哇！你傷左喎！」
「係呀。」我尷尬咁摸摸後尾枕，「好少事啫。」
「我個背囊有啲急救用品架，你帶我去你地到啦，我幫你包紮。」
「好啦，唔該你。」
最後我帶住Yan一齊返去雅蘭嗰邊。
阿南一見到Yan，又一臉驚訝咁，「咦！北……唔係，Yan，你又會係到既？」
Yan笑笑道：「我都係香港人，點解我唔可以係到？」
「但係你唔洗返工咩？」阿南又問。
「你都唔洗返工啦。」
「我請假呀嘛！」
「我都可以請假！」
講完之後，Yan就係佢個背囊到拎左啲藥膏同繃帶，幫我簡單咁包紮左，涼浸浸既藥膏敷住係隻手到，感覺好左好多，已經無咁痛。
幫我包紮完之後，Yan見到匯豐銀行嗰到有人摺緊黃色雨傘同埋掛緊啲雨傘，佢就好有興趣咁走過去影相同幫手摺。
最後，我地三個一齊望住個太陽係旺角啲高樓大廈間緩緩咁升起，感受陽光既到來，感受陽光既溫暖。
夜晚，我返到屋企，老母同小貞都已經訓著左，我見廳到放左張紙條，所以拎左黎睇：
「仔,
雪櫃到有湯，你返黎叫醒我，我幫你整返熱佢飲。
我知道你大個仔架啦，我阻止到你家姐去，但我阻止唔到你去，我唔係要反對你啲咩，只係媽年紀大啦，好擔心你地會有事，總之你平安返黎就好啦，記得要飲湯，你辛苦了。
母上」
我走左入房，見到老母攬住小貞熟睡個樣，我唔忍心叫醒佢，最後我自己靜靜雞咁整熱左碗湯黎飲。
係青紅蘿蔔湯黎，老母明知我唔鐘意食蘿蔔都要煲蘿蔔湯，但唔知點解，我覺得今次既蘿蔔湯好好飲，好甘甜，多謝你，老母。
無幾耐，法庭宣布左禁制令，啲警察帶住執達吏去到金鐘、銅鑼灣同旺角三個佔領區，一個一個咁被清拆，連儂牆無左、高舉雨傘既人像無左、出黎啦689無左，連細小既雨傘摺紙都無埋。
望住呢一切一切既失去，我覺得好悲傷，我好需要人安慰我，而我竟然選擇左Yan。
「三個佔領區都無哂...??」我whatsapp俾佢。
「覺得唔開心??」Yan覆。
「係呀, 覺得好灰心, 一諗起就想喊?」
「你想喊係一件好事黎, 証明你重視呢件事、重視呢段回憶, 永遠都唔會忘記佢. btw我地並無失敗到, 佢清得個場, 清唔到人既心, 我地人唔係到, 但我地無處不在, 如果用一個大圈圈黎形容佢地, 我地就係一個又一個被大圈圈包圍住既細圈圈, 只要我地唔放棄, 總有一日細圈圈會愈黎愈多, 仲會多到合成一個大圈圈, 超越圍住我地既佢地?」
「其實你可以搬去外國住, 香港搞成咁, 點解你仲要留係到??」呢個係我一直都好想問既問題。
「對你黎講, 家既定義係乜?」
「一個住既地方」
「除左係住既地方, 仲係一個充滿回憶既地方, 你去旅行, 去到間酒店, 你將你啲行李放底, 嗰到成為你暫住既家, 因為嗰到有你啲行李, 有屬於你既野係到, 令你有安全感, 同樣地, 我係香港出世、係香港長大, 呢到有好多屬於我既回憶, 呢到永遠都會係我屋企, 即使將來我會為我做小提琴家既夢而暫時離開香港, 但係我都會返黎, 呢到先係我既根☺」
「如果每個人都好似你咁諗就好?」
「唔洗灰心架, 其實經過今次, 自由民主既小豆苗已經種左係每個人心裡面, 大家唔多唔少都會關注左香港既情況, 所以唔好放棄?
毋忘初衷
共勉之」
最後，我地每一個人都返去所謂既正常生活到，我又重新拖住小貞返幼稚園啦。