突然做左人地老豆，多左個女: 35

話咁快，悠閒既暑假已經結束，小貞終於升K3啦！
 
同小貞換好校服之後，發現佢條裙短左啲，即係話小貞又高左啦！小貞好開心咁圍住我轉圈，喵喵見到覺得得意，又圍住小貞轉圈，返幼稚園既第一日，就係以一個咁愉快既氣氛下作為開頭啦！
 
返到幼稚園，見到久別重逢既Miss Cheung，忽然諗起自己一直無回覆佢個千字文whatsapp，我就有少少感到內疚。
 
Miss Cheung見到我地，都無好似以前咁咁有熱情地跑過黎，只係慢慢咁行過黎同我地打招呼。
 
「早晨呀小貞、小貞爸爸！」Miss Cheung微笑著，而且佢只係望住小貞，似乎唔多敢望住我。
 


「Miss Cheung好耐無見。」小貞逐隻逐隻字慢慢咁講出黎。
 
Miss Cheung笑笑，摸一摸小貞個頭講：「小貞好耐無見。」
 
「好耐無見。」我輕聲道。
 
終於，佢都望過黎啦，不過只係微微咁笑左笑，真係有啲掛住佢啲虎牙。
 
「Hi, 小貞！阿傑！」迎面而黎既，係Yan。
 


係喎！由今日開始，瑜仔就正式轉過黎呢間幼稚園到讀書啦！即係我可以日日都見住北川景子啦！
 
「你一定係插班生瑜仔啦！你就係佢家姐？我係瑜仔既班主任叫Miss Cheung呀！」Miss Cheung笑笑道。
 
「係呀，我係佢家姐，我叫Yan呀！太好啦瑜仔！你可以同小貞同一班，有小貞睇住你，我就放心得多啦！」
 
又會咁啱瑜仔同小貞係同一班，我見到瑜仔同小貞都互相望住對方甜甜咁笑一笑，嗚哇！今次唔係輪到瑜仔要搶走小貞呀嘛？
 
「係呢？你地係識得既？」Miss Cheung問。
 


「之前係公園撞過，然後咁啱瑜仔同小貞又一齊報左游泳班。」Yan答。
 
「原來係咁。」唔知點解，我覺得Miss Cheung好似有啲失落。
 
「你又帶漏野啦Julia！」一聽到呢把咁尖銳既聲，就知道係小海啦。
 
只見小海又指住個印傭黎鬧，個印傭又頭耷耷、眼濕濕咁。
 
Miss Cheung走左過去話小海：「小海，你要對人有禮貌啲架！」
 
小海見到Miss Cheung過左黎，佢先放輕左語氣同個印傭話：「算啦，你返屋企啦。」
 
印傭唯有點點頭離開左。
 
望住印傭落幕既背影，我都覺得佢好淒涼，遇著啲咁巴渣既僱主。


 
等我搵日都要教導下小海，叫佢對個印傭好啲先得！
 
瑜仔見到小海突然咁有霸氣，佢驚到喱左係小貞身後，我地都俾瑜仔呢個咁滑稽既動作惹到笑左，最後搞到小海紅都面哂，鼓起泡腮，嬲爆爆咁樣走入幼稚園。
 
就係咁，K3新既一頁開始左啦。
 
待小海、瑜仔同小貞都入左課室，Yan走左之後，我捉住左Miss Cheung隻手。
 
Miss Cheung一面驚訝咁望住我。
 
「你好似好唔開心咁？」我問。
 
佢再一次垂低頭，「你都唔想搵我……」
 


「你係話個whatsapp？」
 
佢點點頭。
 
「唔係……我係唔知點覆你……好對唔住……」
 
「唔洗講對唔住既。」佢笑笑道。
 
「咁你點嘛？仲有無做？」
 
佢擰擰頭，「無啦，已經夠還哂啲錢，以後我會錫身，會專心教好啲細路。」
 
「嗯！你係一個好老師黎！你要加油！」
 
聽到我咁讚佢，久違既虎牙笑容終於又出現返。


 
「你……有無掛住我？」佢面紅紅咁問我。
 
一時之間，我唔知點答佢好，佢見我呆左咁，就再話：「sor, 我唔應該咁問。」
 
「唔係……只係你俾啲時間我……」
 
「好啦，我要返入去啦，再傾啦。」然後佢一邊甜甜咁笑住，一邊揮揮手走返入課室。