突然做左人地老豆，多左個女: 34
過完一個暴風雨既星期一，終於等到一個天氣晴朗既星期一啦。
成個星期無見北川景子，我決定今日要整靚啲個頭去見佢，同佢繼續傾下籃球。
同小貞去到游泳池，我望勻成個游泳室，都唔見Yan同瑜仔，我唯有同小貞做住熱身先。
無幾耐，瑜仔黎啦，不過拖住佢既，並唔係Yan，而係一個男人，一個著住襯衣同黑色長褲，戴住副黑框眼鏡既男人，目測應該廿五歲，同Yan差唔多年紀，睇落去斯斯文文咁。
小貞見到瑜仔，就好開心咁走過去打招呼，我亦跟埋去。
「Hi, 你地梗係Yan口中成日講既新鄰居，小貞同小貞老豆啦？」男人笑笑道。
個男人望落都幾有禮服同幾親切。
「係呀，我叫阿傑，佢係我個女小貞，咁請問你係？」
「我叫Alexis，我係Yan既男朋友。」
屌！男朋友！我聽到呢三個字即刻火都黎埋！點解會咁架？Yan原來有男朋友架？係既，以Yan既條件，點會無男朋友？但係我見佢都係自力更生，我先以為佢無男朋友架！望住佢男朋友，就算佢幾咁斯文，幾咁有禮貌都好，我忽然覺得呢啲只係佢外表黎，其實內裡係禽獸！係斯文敗類！你話我有偏見我都係咁話架啦！我真係接受唔到Yan有男朋友呢個事實呀！
我崩潰左幾秒之後再問：「咦，點解唔見Yan既？」
「佢調左更，以後星期一要返工，放星期二，所以由我黎湊瑜仔。」
咁即係話，黎緊最後一堂星期一，我都唔會見到Yan啦屌！
「你又會咁得閒可以湊瑜仔既？」我勉強擠出笑容道。
「哦，我做保險既，湊完瑜仔上游泳班我就會去見客。」
原來係保險佬。
「好啦，各位小朋友過黎上堂啦！」教練返到黎大嗌。
小貞同瑜仔走左去上堂，而我就同Alexis坐係看台，唉，明明上幾次都係同Yan坐，今日竟然要同個男人一齊坐，仲要係佢男朋友，我整到個頭咁靚黎做乜勁？
坐左無耐，Alexis就拎左一大堆文件出黎同我講：「我等陣會去見客，同個客傾既內容係關於醫療保險架，唔知你有無買到醫療保險呢？」
屌！一見面就sell你，呢個就係我咁唔鐘意保險佬既原因！
「我有架啦……唔該哂你。」但為左保持個良好印象俾Yan，費事Alexis係Yan面前講我壞話，我就算幾咁唔滿意，我都要忍住。
「哦，其實我唔係想sell你既，只係想同你傾下計，睇下你有無呢方面既計劃姐。」佢笑笑道。
一望你個假惺惺既笑容就知你擺到明係sell緊野啦，仲係到扮哂野！
「我而家仲係好滿意我個醫療保險，所以真係無咩好傾。」
「咁好啦，真係唔好意思。」
佢終於肯收聲啦，但佢一收聲，我地就變得好靜，好尷尬咁。
「嗚嗚……」突然泳池嗰邊傳黎喊聲，唔洗望，都一定知道係瑜仔。
原來瑜仔學緊用浮板做自由泳打腿既動作，但係佢學極都唔識，結果又喊左出黎，小貞係瑜仔旁邊安慰住佢。
我望下Alexis，諗住佢會走過去氹下瑜仔，點知佢無，一味係到擢部手機，擢擢下又聽個電話，好似好忙咁，完全都唔知瑜仔係到喊緊，我諗就算瑜仔遇溺，佢都唔會理，淨係顧住佢啲客。
我走過去瑜仔到，全部細路同家長都望住佢，但係佢喊得好勁，連教練都無哂乎。
小貞摸摸瑜仔個頭仔講：「瑜仔乖，唔好喊，做多幾次就會識架啦。」
「嗚……你就梗係咁講啦……嗚……」瑜仔喊住講。
咁又係既，小貞你咁叻，對瑜仔黎講係一個壓力黎。
不過我怕瑜仔再係咁喊落去，會變到呼吸唔暢順，會好容易出事，我望過去Alexis到，佢都仲係擢緊手機，好似瑜仔唔係佢帶過黎咁。
我踎低凝視住瑜仔，同佢講：「嗱瑜仔，我地而家唔洗游水住，我地黎玩個遊戲先。」
瑜仔一聽到話唔洗游水，佢其實都定左少少。
「我地黎玩慢慢呼吸，首先第一下，慢慢吸，嗱，你要跟住我架喎。」
然後瑜仔好乖咁跟住我慢慢咁吸氣。
「再黎一下，慢慢呼。」
佢又好乖咁跟住我呼氣。
「好啦，我地連續慢慢咁做十下啦喎。」
瑜仔跟住我做左十下之後已經無再喊，在場既教練同師奶都為我鼓掌，連小貞都豎起手指公讚我叻，搞到我紅都面哂。
然後佢地繼續上堂，我就拉埋瑜仔去另一邊傾下計咁。
「瑜仔，你係咪唔鐘意游水？」我問。
瑜仔擰擰頭回應。
「咁你又喊成咁？」
瑜仔垂低頭講：「我學得好差……小貞好叻……」
「傻仔。」我摸摸瑜仔個頭講：「唔識咪慢慢學，你最初都係乜都唔識，後來你連係水到前進你都識喎，已經好叻架啦，傑哥哥係五歲既時候，連係水到吹氣都唔識呀！所以瑜仔你已經叻過哥哥好多！」
瑜仔一臉驚訝咁望住我，可能係諗唔到一山還有一山低。
我笑笑續道：「最緊要係瑜仔你鐘意游水呀！」
瑜仔聽到之後用力咁點點頭，話：「我真係鐘意架！所以先叫姐姐帶我黎呢到！」
都係既，Yan鐘意小提琴，但佢老豆唔俾佢繼續學，要佢讀會計，呢種感受佢應該最清楚，佢係唔會逼瑜仔做啲自己唔鐘意做既野。
「咁你快啲返去上堂啦！」
瑜仔終於破涕為笑，跳下跳下咁去返泳池到啦。
我返到去看台，只見Alexis仲係同個客傾緊電話，我開始唔明白，亦都開始唔甘心，呢個人到底有乜好？又做保險又無同情心，係既，係外表好斯文咁囉，不過我已經肯撚定佢係個斯文敗類黎！
一個鐘頭過去，Alexis同我地道別之後，就急急腳咁拖住瑜仔走，洗唔洗咁趕去見客呀？
「傑哥哥今日好叻！氹返瑜仔笑！」小貞笑眯眯咁同我講。
我學住小貞啲比卡超聲線同返佢講：「小貞都好叻！學識左游水！」
然後小貞又笑到格格聲咁。
翌日，小貞拎左本手冊俾我睇，我一望，原來有暑期功課！上面粗糙咁寫住：「圖書報告」。
「小貞，係咪要借書黎睇？」我問。
小貞點點頭答：「Miss Cheung話，要睇圖書然後寫報告。」
哇屌！細細個就要寫報告！不過我屋企並無細路啱睇既書，今次我諗都要帶小貞去一趟圖書館啦。
我地去左區內既公共圖書館，已經見到好多細路係兒童圖書閣到睇緊書。
「哇……」小貞見到七彩繽紛既圖書，都不禁讚嘆。
「瑜仔……」突然，小貞指住圖書閣既一角講。
我一望，的確見到瑜仔坐左係到睇緊書，而係佢身旁既，正是Yan！
諗唔到尋日無見，今日居然可以係到巧遇！
我拖住小貞，懷住興奮既心情走過去，Yan同瑜仔都好驚訝咁望住我地。
「又撞到你啦！」Yan笑笑道。
「係呀，真係好橋！」我笑笑答。
「小貞，你睇唔睇呢本？」瑜仔遞左本封面寫住《湯馬士不要壞脾氣》既書俾小貞。
小貞望左望，似乎不感興趣，於是就放低本書，拎左瑜仔身旁一本寫住《安徒生童話》既書黎睇。
我同小貞都坐低左，小貞坐係瑜仔隔離一齊靜靜咁睇書，而我就坐左係Yan身旁，我見佢都睇緊本書，書名係《是時候讀一點哲學》，諗唔到佢又對哲學有興趣。
Yan見我望住佢睇書，可能怕我悶啦，佢主動打開話匣子：「尋日我男朋友話你氹返瑜仔開心，真係好多謝你。」
一提到「男朋友」三個字，我個心又痛左一痛，但原來尋日瑜仔發生既所有事Alexis都知既，不過佢就扮到咩都睇唔到咁，真係好仆街！
「唔洗多謝，好少事啫。」
「不過諗唔到你有男朋友。」我續道。
「點解咁講？」佢笑笑講：「我唔似係有男朋友？」
「唔係。」我又笑笑答佢：「你咁好條件點會無，不過係無聽你提起過啫，感覺你係一個好獨立既人。」
「係架，我係一個好獨立既人，所以都唔係咁依賴Alexis，而且大家做野都各有各忙，其實都好少見面。」
一諗起Alexis個仆街仔係做保險，我就覺得好唔襯Yan。
「咁你地又一齊既？」
「我地中學時候識架啦，一齊到而家。」
中學到而家？咁咪好多年囉？死啦，一諗到Yan由清純學生妹時候就同Alexis一齊啪啪啪，Alexis一邊索住Yan嗰雙白皙既長腿，Yan下面一邊出緊水，然後Alexis一啖咀落去Yan嘟住嘟住既嘴巴到，之後佢地開始除衫……開始啪啪啪……唉也，點解我要咁自虐，要ff咁多呀？
「能夠維持到咁耐真係好。」即使個心係幾撚葡萄，我都要扮到無野咁。
Yan擰擰頭講：「唔係呀，我地而家既關係已經變到好似家人咁樣。」
唉家人呀家人呀，你輸左啦阿傑！你已經慢過人地一大步啦！
「咁你地幾時結婚呀？結婚記住請我喎。」我苦笑著。
Yan笑笑答：「有排都未結啦！不過如果真係結既話，到時一定請埋你同小貞，小貞一定要做我花童！」
「哈哈……好呀好呀！」
最後我都揀左本書黎睇，然後靜靜地坐左係Yan一邊一齊睇書。
呢個咁悠閒既氣氛真係令人覺得好舒服，無諗過睇書都會睇得咁舒服，不過一諗到佢有男朋友，我就覺得呢啲時間係偷返黎既，仲要係因為有小貞同瑜仔係到。