突然做左人地老豆，多左個女: 33

夏天，就好似一個女人。
 
呢頭同你好好地咁玩緊，陽光明媚，好有活力咁衝過黎錫你一啖，然後火辣辣咁係你面前跳艷舞；但係下一秒，佢又會突然發哂難渣咁，橫風橫雨，好似十四巴港女咁毫不留情地掌摑你，最後一聲不響咁離開你。
 
其實我只係想講，明明上個星期一既天氣仲係好好咁，但今個星期一就打風啦！
 
「天文台預測颱風飛燕將於下午最接近香港，現時已懸掛三號強風信號……」
 
一大清早，當我好興奮咁幫小貞執拾去游泳班既用品，諗住又可以見到北川景子時，點知就聽到新聞咁講，明明出面仲係陽光明媚咁，一啲都唔似打風，不過係好焗咁囉。
 


然後我就收到游泳班既通知，話今日放風假，唔洗上堂啦喎。
 
你知唔知我聽到呢個消息之後有幾撚失落？係好撚失落呀！！！
 
「小貞，今日打風唔洗上堂呀！」
 
「嗯……」只見小貞用支貓棒逗緊喵喵，都唔得閒理我。
 
「叮噹！」
 


門鐘又響起，今次又係邊個？
 
一開門，就見到阿南同家姐，阿南拎住盒大富翁，而家姐就拎住幾袋零食同飲品。
 
「我知今日打風唔洗上游泳班，咁啱我同Katie都day off，所以諗住過黎同你地玩大富翁呀。」阿南道。
 
阿南幾時開始叫家姐做Katie叫得咁親切架？
 
家姐無理會我，就已經拎左啲零食入黎放係枱到，然後又走埋去小貞到係咁吱佢，搞到小貞笑到標哂眼水。
 


「小貞，我地黎玩大富翁啦！」阿南學埋家姐啲衰野，無理過我同唔同意，直接走左去搵小貞。
 
唉，點解我覺得自己愈黎愈似個路人甲？呢到明明係我屋企！
 
「乜野係大富翁？」小貞頭側側咁問。
「等南哥哥教你啦！」阿南答。
 
阿南同家姐合力將副大富翁攤係枱面，我地就埋位啦。
 
「係邊個提議玩埋啲咁低能既野架？」我問。
「你話邊個低能話？」家姐怒啤住我。
望到佢咁兇惡既眼神，我背脊都出哂冷汗，「得，當我無講過。」
 
「好啦，小貞，你揀一個棋黎代表你自己啦。」家姐指住嗰堆銀色既玩具車仔、馬同人等等講。
 


小貞眼仔碌碌咁諗左諗，然後指住左頂帽答：「我要呢個！」
 
最後阿南揀左個馬同騎者，家姐揀左隻靴，我就揀左架車，家姐除左係玩家之外，仲做埋銀行，負責分錢俾我地。
 
「嗱，每人萬五蚊先。」
「家姐，我少左張五十喎。」
「邊有少到呀？」
「咦！係喎！啱數喎！哈哈！」
 
家姐再啤一啤我，我諗如果唔係小貞係到，佢一早爆左粗，哈哈。
 
分好哂錢之後，阿南就開始教小貞啦，「嗱，小貞，呢到咪有兩粒骰既，我地每人擲一次，睇下邊個係最大，嗰個就玩先啦好無？」
 
小貞點點頭回應，似懂非懂咁。
 


「六、六、六……」第一個擲既係阿南。
 
結果係一個二、一個五。
 
小貞見到阿南擲唔到六，又笑到格格聲咁。
 
「咁小貞輪到你擲啦喎。」阿南道。
 
小貞接過阿南手上既骰，一雙小手合埋咁搖，最後兩隻手一齊放開。
 
結果係五同三，大過阿南一個數，阿南好誇張咁打個地下，扮到好沮喪咁，小貞又笑到見牙唔見眼。
 
最後係家姐開始，然後到小貞，之後係阿南，最後先係我。
 
係呀屌，我擲到一個一，一個二。


 
「小貞，跟住姐姐會繼續擲骰，擲到幾多，隻靴就會行幾多。」家姐一邊示範一邊講，最後佢行左五步，買左第一個交通措施。
 
「屌！」我聽唔住講左出聲，家姐怒啤我。
 
「好啦，今日有個新規則，就係唔俾講粗口，每講一個字都要罰五蚊。」家姐道。
 
「屌！唔撚係呱？」我同阿南都好自然咁齊聲道。
 
家姐今次啤埋阿南話：「好啦，你地每人十蚊。」
 
「屌！」唔知點解，愈係唔俾講你就愈想講。
 
「十五蚊。」家姐再講。
 


我同阿南都死死地氣地收左聲，小貞雖然唔係好明我地做緊乜，但都係旁邊笑笑口咁。
 
輪到小貞擲啦，小貞行左六步，可以佔領中環啦。
 
「小貞，你到左中環啦，你可以買左中環佢，你要唔要買呀？」家姐問。
 
小貞點點頭回應，然後家姐就幫佢數錢。
 
交易完成之後，家姐俾左張中環卡俾小貞，小貞接過之後覺得好新奇，凝視住張卡，然後讀出卡上既字：「中……環……」
 
我摸摸小貞個頭仔講：「小貞真係叻！」
 
之後輪到阿南，佢擲到要行去「薪俸稅」到，一黎就要俾錢，佢又忍唔住「屌」左聲。
 
「二十蚊。」家姐無情地講。
 
「哈哈……」我係旁邊不停恥笑阿南，「不如我地今晚賭一鋪，睇下邊個要罰最多錢，罰得最多嗰個要俾埋對方份錢。」
 
「屌你賭咪賭！」當阿南講完之後，佢勁後悔咁禁住左自己個嘴。
 
「哈哈……」真係笑到我仆街。
 
「死傻仔，二十五蚊。」家姐笑笑道。
 
「好啦，我今日唔會再出聲講野，出親聲都係伏黎既。」阿南舉手做左個投降既手勢，但係無人理佢，我照擲骰。
 
阿南自知自己柒左，紅都面哂，佢一定係好想爆粗，不過忍住左。
 
最後我擲左十，直接入左監獄。
 
「屌！」
 
嗱嗱嗱！粗口呢啲野真係好難控制既，尤其係啲咁緊要既關頭。
 
「細佬二十蚊。」家姐無情地道。
「哈哈……我有信心今日會贏你……」阿南道。
「唉……」
 
玩左幾個圈之後，暫時家姐做左最大既財團，擁有最多既土地，有啲仲起埋樓添，之後就係小貞，明明小貞係第一次玩，但佢都玩得好過我地好多，只能夠講佢真係好好運，而我同阿南就包尾，互相鬥窮、互相鬥慘。
 
「屌！擲到三次孖骰啦！要坐監啦！好撚慘呀！」阿南係咁搖住我隻手講。
「屌！踩到你塊地呀！你塊乜地黎架？咁撚貴既？」
「仆街！又坐監！」
 
「六十蚊。」家姐冷冷地道。
 
唔經唔覺，阿南已經俾人罰左六十蚊，而我就三十五蚊。
 
嗚哇真係好擔心小貞會學壞。
 
「南哥哥……」小貞手上揸住左張免費出獄卡，同阿南講：「你要唔要呢張卡呀？」
 
「嗚哇小貞你送俾我呀？」阿南興奮到撲去小貞到。
 
我即刻禁住左小貞手上張卡，講：「小貞，你唔可以就咁送俾佢架，你叫佢俾錢你啦。」
 
小貞露出天使般既笑容道：「唔緊要啦，唔洗錢。」
 
「嗚……小貞你真係好似天使咁善良呀……」阿南捉住小貞雙手講。
 
屌你咩，玩個遊戲姐，洗唔洗咁認真。
 
「呼呼呼……」玩玩下，出面啲風愈吹愈大，好彩我一早就做好防風措施。
 
「小貞，出面咁大風，你驚唔驚呀？」我問。
 
小貞頭擰擰咁答我：「唔驚，因為有傑哥哥係到！」
 
我笑笑回應。
 
「哇屌，好撚sweet呀傑哥哥。」阿南應該係輸向左走向右走到high大左，又不受控地講粗口。
 
「唉！七十蚊啦你！」家姐輕輕咁拍一拍阿南個頭。
 
阿南就好似個細路仔咁發難渣，係地下到碌。
 
小貞覺得好意，又學阿南咁係地下到碌。
 
家姐又走埋去踢阿南一下，話：「你唔好又教壞小貞！」
 
阿南死死地氣地坐返直個身，繼續玩。
 
最後阿南同我都破左產，最有錢嗰個係家姐，之後係小貞，小貞笑到格格聲咁，玩得好開心。
 
呢個時候出面已經開始橫風橫雨，家姐收拾副大富翁，小貞亦走左去幫手。
 
「喂！今晚食乜呀？出面橫風橫雨喎，你屋企有無野食呀？」阿南問。
「無呀，咪你地啱先買嗰啲零食。」我攤係梳化到答。
「點可以淨係食零食架？」家姐搭嘴。
「咁一係嗌pizza囉。」阿南提議道。
「但係出面橫風橫雨喎，叫人送過黎會唔會唔係太好呀？」家姐擔憂問。
「唔緊要啦，都唔係話好大風大雨，佢地都會送既。」阿南道。
「咁好啦。」
 
咦喂！家姐幾時變得咁聽阿南講既說話架？
 
最後我地嗌左個四人套餐，即係一個大批、寬條麵、雞肉飯、雞翼、焗蔬菜同可樂。
 
好快地，個外賣哥哥就送左pizza過黎啦，雖然佢著住雨褸，但係都係成身濕哂。
 
「喂邊個俾錢呀？」阿南問。
「屌你輸咁多又俾人罰錢，梗係你俾錢當交左罰款啦。」我道。
「喂！遊戲未完架！你要罰多五蚊！」家姐指住我講。
「吓？乜唔係玩完大富翁就完架啦咩？」我問。
「梗係唔係啦！小貞仲係到架！」家姐打左我個頭一下道。
「咁一人一半啦，當交罰錢！」阿南對住我講。
「好啦好啦。」
 
「哥哥，毛巾呀！」小貞唔知幾時拎左條毛巾過黎遞俾個外賣哥哥。
 
外賣哥哥好似好感動咁，眼紅紅咁話：「好多謝你呀小妹妹……」
 
小貞甜甜咁笑左笑。
 
家姐摸摸小貞個頭仔道：「小貞真係好乖！」
 
俾左錢洗左手之後，我地就正式開餐啦。
 
小貞俾pizza既芝士味吸引住，哄個鼻埋去pizza到，大力咁索一索，然後好滿足咁笑左笑。
 
家姐分左一塊pizza俾小貞，小貞凝視住塊pizza，佢個樣話我俾聽佢好想食，但佢都好乖咁忍住等埋我地先食。
 
最後我地一齊開餐啦，小貞小心翼翼咁咬左一細啖pizza，啲芝士拉到好長，小貞食唔切，就用個可憐兮兮既眼神望住我。
 
我哄埋去小貞到，幫佢咬斷左啲芝士，小貞甜甜咁笑住講：「好好味！」
 
食飽啦，出面既天氣都好返好多，無再橫風橫雨，小貞走過去窗前，望住暴風雨過後既街景，只見街道上垃圾廢紙橫飛，凌亂不堪，可以話係滿目瘡痍。
 
「好啦，咁我地走啦。」家姐道。
 
小貞依舊望住街道，似乎佢好想出去睇下。
 
「小貞，我地送南哥哥佢地走，順便出去散下步好無呀？」我問。
 
小貞笑住咁點點頭。
 
「拜拜喵喵。」出門口前，小貞都不忘同喵喵講拜拜。
 
落到樓下，送走左阿南同家姐之後，親身望到咁凌亂既街景，都咪話唔震撼，雖然呢個颱風既威力唔算太大，但都破壞左好多樹木，有好多樹枝跌左係地下。
 
「傑哥哥！過黎呀！」小貞見到地下有灘水，就叫我走過去。
 
我一走到過去，佢就係咁係灘水到踩，踩到啲水潑哂出黎，我同佢都成身濕哂，好在出黎之前我叫小貞著左對黃色鴨仔水靴姐。
 
小貞玩得好開心，格格聲咁笑，然後繼續踩。
 
原來小貞出黎既目的竟然係玩水！
 
「小貞！夠啦！唔好再玩啦！」我笑笑道。
 
「唔制！」小貞用住比卡超聲線講。
 
「唔制？」我哄埋佢到，吱住佢話：「係咪咁曳曳呀你？」
 
「哈哈……唔係……唔敢啦……比卡超……」小貞又笑到紅都面哂。
 
然後我輕輕係小貞額頭錫左啖，「好啦，玩夠啦，返去啦。」
 
小貞用力咁點點頭，就拖住我返去啦。