突然做左人地老豆，多左個女: 32

話咁快，我最期待既星期一終於出現了，因為終於可以係泳池到見到北川景子啦。
 
當我帶住小貞黎到游泳班既時候，已經見到Yan同瑜仔做緊熱身運動，今日佢地都無遲到。
 
Yan見到小貞同我，就帶住瑜仔同我地打招呼，然後我地一齊做熱身。
 
無幾耐，人齊啦，教練都黎左。
 
「好啦，今日我地教係水到前進，各位小朋友留心聽住要點做啦喎。」
 


小貞同瑜仔都好專心上堂，而我同Yan就繼續坐係看台到望住佢地。
 
「其實有一個問題我一直都好想問你。」Yan笑笑道。
 
「係咩呢？」
 
「希望你唔好介意我咁講，點解你好似咁得閒咁既？」Yan自己講完自己都忍唔住笑左。
 
唔通我中左六合彩又會同你講咩？
 


如果係平時，我心裡面一定係咁諗，但唔知點解，對住Yan，我就有一種唔想講大話既魔力，我好誠實、好認真咁答左佢。
 
「我中左六合彩。」
 
點知Yan聽到我咁講，笑得仲犀利，成個身都震哂咁。
 
「哈哈……你唔會係講真既……」
 
諗唔到講真話都會俾人笑，我紅都面哂咁答：「係真架……」
 


佢有啲錯愕，又有少少為自己剛才既失態感到內疚，神色凝重咁對住我講：「你講真架？」
 
「係呀，所以我先有時間同有錢照顧小貞。」我尷尬咁摸一摸自己後尾枕。
 
「嗚哇真係好葡萄你。」
 
我笑左笑，諗唔到Yan都識得講呢啲詞語。
 
「其實……我有一個夢想架……」Yan突然若有所思咁垂低個頭講。
 
從側面睇，佢垂低個頭既時候，佢紮住條馬尾，又有幾根髮絲緩緩咁瀡左落去，不過今次佢無伸手撓一撓啲髮絲，就由得佢好自然咁跌落黎，成個感覺好溫文婉雅。
 
「咩夢想？」我問。
「我想做一個小提琴家。」
「小提琴家同會計師，差好遠喎。」


「係呀。」Yan笑笑續道：「其實我鐘意拉小提琴多過禁計數機囉。」
「咁點解你又去左做會計？」
「阿爸嗰陣時話做會計可以賺好多錢，要我讀會計。」
 
我望一望小貞，佢好努力咁用自己既腳仔fing水，學緊點樣可以係水到前進。我諗，如果小貞將來搵到自己既興趣，我一定唔會要佢為五斗米折腰，逼佢學一樣佢根本都唔鐘意既野。
 
「不過我係唔會放棄架。」Yan抖擻精神講。
「唔會放棄？」
「係呀，等到瑜仔大個仔，可以照顧自己既時候，我就會重新出發，拎返起我支小提琴。」
「到嗰陣時你已經好老架啦喎！。」我笑笑道。
「係架，不過Jordan都有講啦：『I can accept failure. but I can't accept not trying.』」
「咦喂！你都有睇籃球？」我表現興奮咁講。
 
實在難得有女仔會鐘意睇籃球。
 


「係呀，永遠既飛人喎！點會唔識！」
「There is only one person who can define success in your life and that's you.」
「I'm back.」
 
就係咁，Yan同我就你一句我一句好興奮咁樣講哂Jordan啲至理名言出黎。
 
「Sorry呀，我掛住講自己，咁你呢？有無啲乜係想做架？」
 
我望住遠處既小貞，再講：「我而家最想做既事，就係好照顧小貞，等佢可以好健康、好開心咁成長。」
 
Yan笑笑答：「你真係一個好爸爸。」
 
「你都係一個好姐姐啫。」我笑笑回應。
 
一個鐘頭又過去啦，小貞上完堂就即刻撲過黎話：「傑哥哥！小貞好叻！學識游水啦！」


 
我摸摸小貞個頭仔講：「傻妹，你仲有好多野未學架。」
 
瑜仔見到小貞咁樣，又學小貞咁撲過去Yan到，「姐姐！我學識游水啦！」
 
Yan笑笑道：「係喎！瑜仔好叻喎！」
 
最後Yan同我相視而笑，揮揮手互相道別啦。
 
「小貞，今晚想食乜？」小貞換好衫之後，我拖住小貞行出運動場問。
 
小貞頭側側、眼仔碌碌咁諗緊。
 
行都咁上下，只見有個印度仔係到揮旗大叫：「咖哩咖哩！好好味既印度咖哩！」
 


我諗如果唔係成日聽，都真係會聽唔到個印度仔係到講緊乜。
 
小貞眼甘甘咁望住個印度仔係到嗌咖哩，似乎好好奇咖哩到底係乜野黎。
 
「小貞，我地今晚煮咖哩食囉？」我踎低問小貞。
 
「好呀！」小貞用住比卡超聲線，笑眯眯咁答我。
 
我地去街市同759買左啲材料之後就返屋企啦，我俾左袋放住兩盒咖哩磚、比較輕既袋俾小貞拎住，小貞就好開心咁一邊拖住我一邊fing下個袋，學個印度仔講：「咖哩咖哩！好好味既咖哩！」
 
返到屋企，一開門就見到喵喵坐左係門口等我地，喵喵見到小貞返黎，就即刻圍住小貞喵喵咁叫。
 
小貞放低左袋咖哩磚，小心翼翼咁抱起喵喵，喵喵就哄個鼻埋去小貞到聞下，差啲錫埋小貞個嘴。
 
我覺得好得意，所以我都擺低左啲食物，接過小貞手上既喵喵，當我準備哄個頭埋去喵喵個鼻哥到既時候，點知喵喵用手擋住左我，一個粉紅色肉球禁住我塊臉，喵喵個頭就擰埋另一面。
 
嗚哇連隻貓都恰勁我！
 
小貞同我都洗左手之後，我就係廚房到刨薯仔皮，小貞話我幫手，我就叫佢擺啲碗碗碟碟係張枱到。
 
小貞小心翼翼咁接過啲碗碟，點知一轉個身，「咔嗱」一聲，小貞跌爛左啲碗碟係地下到。
 
我即刻放低啲薯仔，衝過去好緊張咁望下小貞啲手手腳腳，睇下有無整傷。
 
小貞眼紅紅、好內疚咁捉住自己隻手指仔話：「對唔住……」
 
好在無整傷，我摸摸小貞個頭仔輕聲道：「無事無事！最緊要無整親！」
 
最後我叫小貞坐係梳化同喵喵玩，我打掃過後就繼續煮野食啦。
 
無幾耐，香噴噴既咖哩完成啦，小貞即刻走過黎眼仔碌碌咁話：「哇！好香呀！」
 
我畢左啲咖哩落啲飯到，小貞食到好滋味，成口都係咖哩漬。
 
我一邊笑住一邊幫小貞抹嘴，小貞就豎起手指公同我講：「傑哥哥頂呱呱！」
 
我笑一笑，唔知小貞又係邊到學左「頂呱呱」呢個新詞呢？
 
然後我又學小貞，豎起手指公同佢講：「小貞頂呱呱！」
 
小貞笑到格格聲咁。
 
食食下，我突然諗到，就問小貞：「小貞，你既夢想係乜？」
 
小貞頭側側咁諗，好迷茫咁話：「乜野係夢想？」
 
我笑笑答：「即係你想做既事，你而家或者將來想做既事。」
 
小貞甜甜咁笑一笑，「我想做傑哥哥！」
 
我俾小貞氹到笑到見牙唔見眼，「傑哥哥得一個，你做唔到傑哥哥架。」
 
小貞依然好迷茫咁話：「但係傑哥哥好叻叻……」
 
「咁樣呀……」我諗左諗，再話：「除左傑哥哥之外呢，有無啲乜野係小貞想做架？例如醫生呀、護士嗰啲呢。」
 
小貞望住喵喵諗一諗，再答：「我想做醫好喵喵既醫生！」
 
我諗，係上次帶喵喵去獸醫診所時，小貞俾獸醫純熟既動作吸引左。
 
「小貞，佢地叫獸醫。」我解釋道。
 
小貞好開心咁舉起支匙羹仔道：「我大個女要做獸醫！」
 
 
 
「我大個女要做獸醫！」
 
望住小貞用一副好堅定而又天真既眼神講呢句說話，我忽爾感觸，咁你呢？徘徊係生活亂流既你，曾經發過既夢係乜野？曾經遺忘左既夢係乜野？
 
你既夢想係乜野？