突然做左人地老豆，多左個女: 31

今朝一訓醒，就見到喵喵伏左係小貞既肚仔上訓教，兩個都係到呼呼大睡。
 
小貞訓到塊面珠墩紅卜卜咁，至於喵喵，驟眼黎落，佢肥左好多，身上長滿左肉，仲有個細細既肚腩仔添。
 
我哄埋去小貞到，輕輕咁係佢個額頭到錫左一啖，呢個，就係我同小貞之間叫早晨既方式。
 
小貞醒左，搓搓隻眼，見到喵喵訓係自己身上，佢好開心，不過佢唔敢郁，因為怕會整醒喵喵。
 
不過喵喵始終都係聽到我地既動靜，佢張開左佢嗰雙明亮既眼睛，然後好休閒咁離開小貞個肚仔，再係張床到伸左個懶腰。
 


唉，做貓真好。
 
同小貞梳洗過之後，我唔覺意咁望一望我自己個肚，發現自己個肚腩仔都出左黎，睇黎係因為近期做少左運動。
 
為左保持完美既身段，我決定，「小貞，我地落公園跑步囉！」
 
小貞用力咁點點頭，然後拖住我去換衫啦。
 
「叮噹！」
 


換完衫之後，門鐘又響起，我去打開門，今次係老母。
 
老母拎住一大筒既水樽，然後話：「你地尋日去左bbq，好熱氣架，我煲左啲涼茶俾你地，快啲飲啦。」
 
我接過筒涼茶，真係好重下，夠我同小貞日日夜夜咁飲足成個星期，我有啲忟憎咁話：「阿媽呀，就算我地當水咁飲，都要飲足成個星期先飲得哂囉，你下次可唔可以唔好煲咁多呀！」
 
「衰仔！」老母燥燥地咁話：「你唔飲小貞都要飲架！你同你家姐一樣，成日都嫌三嫌四，成日都要人擔心！」
 
老母呀，我個重點唔係唔飲，而係真係太多囉。
 


老母無再理我，走埋去小貞到，小貞就拖住佢隻手，行左過去用黎度高幅牆到，然後笑住咁話：「姨姨！我高咗呀！」
 
老母望一望對上嗰次量度既高度，小貞的確又高左少少，佢一邊用支筆畫低呢一次既高度，一邊笑得好窩心咁同小貞講：「小貞好乖！食多啲野先會高架！」
 
小貞笑瞇瞇咁回應老母，老母又俾小貞氹得好開心。
 
「係呀，阿仔，我有啲野想同你講呀，你過黎啦。」老母揮揮手道。
 
我走左過去，佢塞左一疊紙俾我，我一睇，上面寫住「教育基金儲蓄保險」，我心諗，老母一定又俾啲保險佬慫恿啦。
 
「阿媽呀，唔洗啦，我又唔係無錢！」
 
「咩唔洗姐？你點知將來會發生乜事？當買個保障囉！」
 
呢啲說話肯向左走向右走定係啲仆街保險佬教老母講既。


 
「你咪俾啲保險佬呃啦，佢地想賺你錢架咋。」
 
「仔呀，反正你唔係無錢，咪當係投資囉！」老母好語重心長咁講。
 
總係覺得老母今日怪怪地咁，好似特別囉嗦，但我諗每個老母都係咁囉嗦既，所以我不以為意。
 
「唉！是旦啦！我唔想俾你哦到天光！」我唔忿氣咁拎左支筆，填左份申請表。
 
「咁就乖仔啦。」填好之後，老母就好開心咁樣收返份申請表。
 
「好啦，咁我唔阻你地啦，我幫你地交左份表先，拜拜，小貞拜拜。」老母揮揮手道。
 
「拜拜姨姨！」小貞道。
 


老母走左之後，我地都差唔多出發去公園啦。
 
去到公園，已經有唔少人係到跑緊步，亦都有啲公公婆婆係到晨運。
 
我同小貞就行埋一邊做熱身運動，小貞好笨拙咁拉筋，佢手短腳短，所以好似拉得好困難咁。
 
「早晨呀傑哥哥、小貞！」
 
諗唔到係呢到都會撞到Yan同瑜仔！
 
Yan著住件白色背心同埋黑白相間既運動短褲，睇黎佢真係好鐘意背心同黑白色呢對組合。
 
「你今日唔洗返工？」我問。
 
「要呀。」Yan回答：「不過晏啲先，而家同瑜仔做運動，你地又係？」


 
「係呀。」我笑笑答。
 
Yan望一望小貞，見到佢好吃力咁拉緊筋，就話：「細路仔拉筋最好有爸爸媽媽幫手架，等我黎教你啦。」
 
然後，Yan帶住我地三個去到公園地下有軟墊既地方，之後問我：「你介唔介意小貞訓係軟墊到？」
 
「可以呀。」我點點頭回答。
 
「瑜仔你都跟埋一齊做啦，傑哥哥你可以睇住我同瑜仔點做，然後你幫小貞手。」
 
「好。」
 
瑜仔同小貞分別攤左係軟墊到。
 


「首先要做既係伸展後大腿肌。」Yan道，然後慢慢提高瑜仔隻左腳，直到呈九十度角。
 
「你要扶住小貞大腿既位置，然後小貞要慢慢咁樣伸直個膝頭蓋，腳指指向自己個頭仔，腳板向上，保持十秒。」Yan一邊講，一邊幫瑜仔做緊。
 
我照板煮碗咁幫小貞，小貞覺得好新奇，所以笑笑口咁。
 
「然後到另一隻腳啦。」Yan輕輕咁放低瑜仔隻左腳，轉換瑜仔既右腳。
 
重覆做左呢個動作兩次之後，就輪到下一個動作。
 
「跟住呢，小貞要屈曲自己既膝蓋，腳板仔踩係地下到，兩邊膝頭哥要微微咁分開……」Yan慢慢咁指導我同小貞，「然後身體要慢慢咁升起，做個拱橋既動作，維持住三至五秒，再重複。」
 
如是者，我地分別做左五個拉筋動作，可能天氣熱啦，小貞同我做完之後已經滿頭大汗，好彩嗰到有樹蔭遮住先無咁曬，不過Yan同瑜仔好似無乜事咁，應該係已經做慣做熟。
 
我幫小貞抹汗，小貞紅都面哂咁，Yan就好唔好意思咁話：「Sorry呀，我唔應該一黎就教你地咁多。」
 
我笑笑回應：「唔緊要啦，我地學左好多，乜你識咁多野既？」
 
Yan都邊幫瑜仔抹汗邊回答我：「係呀，因為要照顧瑜仔，所以我自己都搵左好多書睇。」
 
明明瑜仔只係佢同父異母既細佬，但佢都可以對瑜仔照顧有加，真係好佩服呢個女仔。
 
Yan望一望錶，發現時候都唔早啦，就話：「我差唔多要返工啦，你地慢慢啦！」
 
「洗唔洗我幫你湊住瑜仔？」我問。
 
「唔洗啦。」Yan笑笑答：「我已經通知左托兒所今日會過黎，多謝你！」
 
Yan走左之後，我再拎左支水樽出黎，俾小貞飲多幾啖水。
 
「小貞，仲想唔想跑步呀？」我問。
 
小貞擰擰頭回答：「好熱……」
 
係既，呢種天氣又真係太熱啦，最後我同小貞都放棄左跑步，行左去附近既餐廳到食午餐。
 
係街上，我地遇到一個推緊紙皮車既婆婆，咁啱佢推推下車，跌左幾塊紙皮係地下。
 
婆婆既動作好慢，佢停左架車，好慢好慢咁行上去車前想執返啲紙皮，係婆婆後面行緊既人對於婆婆突然煞制覺得好鼓譟，仲要停左架車係到咁耐，個個都對住婆婆目露兇光。
 
本來我打算食下花生就走人架啦，點知小貞衝左過去，好笨拙咁幫婆婆執返起啲紙皮，但係小貞一對小手又點會夠力執紙皮，最後我都走埋去幫小貞一把。
 
我地一齊將紙皮擺上去架車到，婆婆就帶住好感激既眼神連聲同我地講多謝，婆婆話：「小妹妹你真係乖啦，真係好多謝你！」
 
「唔洗客氣！」小貞笑住講，然後走去架推車既扶手位，似乎係想幫婆婆推埋架車。
 
「小貞呀，你唔夠力架，唔好掂啦。」我大嗌。
 
小貞扁一扁嘴。
 
婆婆就走過黎講：「唔洗啦小妹妹，我自己推得架啦。」
 
講完之後，婆婆就繼續推架車走左，路上既行人又恢復返平日木口木面既樣。
 
「小貞，你唔可以就咁走埋去執啲紙皮架，好污糟架。」我踎低一邊幫小貞抹手一邊同佢講。
 
「佢地唔係垃圾！」小貞講完之後就拖住我繼續行。
 
佢地唔係垃圾？咩意思？嗚哇我唔明細路女講緊乜呀！
 
去到餐廳門口，我見到係自動門黎，就突發奇想咁想同小貞玩個遊戲。
 
「小貞你睇住啦喎，等傑哥哥表演個魔術俾你睇！」
 
然後我走埋去自動門前面，一邊伸自己隻腳出黎，一邊雙手凌空做左個推門既手勢出黎，「芝……麻……開……門……」
 
然後道自動門就順住我個手勢慢慢咁褪開左。
 
雖然好低能，但小貞笑到格格聲咁，好彩餐廳到啲人個個掛住食野無望到我有幾咁傻的嗎啫。
 
一入到去，餐廳啲冷氣就迎面吹黎，真係好撚爽。
 
「幾多位呀？」餐廳個侍應大叔粗聲粗氣咁問。
 
「一大一細。」我答。
 
然後佢帶左我地埋位坐，望左份餐牌一陣，最後小貞同我都決定要份常餐，火腿通粉、煎雙蛋同烘多士，再加杯凍檸茶。
 
「細路女食唔食得哂架？」個侍應大叔問。
 
「食唔哂咪打包！」我答。
 
侍應大叔頭也不回地走左去落單。
 
小貞好似好期待份常餐咁，坐係張凳到腳仔fing fing。
 
話咁快，份常餐同野飲已經送到枱上，然後個侍應大叔向小貞拋個媚眼道：「慢慢食啦！」
 
屌！阿叔你咩料呀？
 
小貞小心翼翼咁用哂所有手指拎起個匙羹，畢左啲通粉黎食，然後好幸福、好滿足咁望住左，甜甜咁眯埋眼笑左笑。
 
對面有個咁可愛既女，就算普普通通一份常餐都即刻好食過啲山珍海味！
 
小貞最後都係食唔哂，然後我食埋佢嗰份，個肚即刻又漲左，唉，明明今日係想減肥架……
 
俾完錢之後，我地行出餐廳，忽然又見到啱先推紙皮車嗰個婆婆。
 
不過紙皮車就無左啦，淨係見到佢係餐廳後巷啲垃圾袋到摷垃圾。小貞應該認得個婆婆，所以佢捉住我隻手企係到望住。
 
只見婆婆係垃圾袋到搵到個油桶，然後佢一滴、兩滴咁將油涌到啲油滴乾，倒入個膠樽到。
 
我拖住小貞走埋去問：「婆婆，你要呢啲油黎做乜？」
 
婆婆望一望我同小貞，然後好慈祥咁笑住答：「拎啲油返去可以煮餸食呀！」
 
「呢啲油唔用得架啦！」我道。
 
「食得既食得既！點會唔食得呢？」婆婆好開朗咁笑左笑。
 
「呢啲油好污糟……」我續道。
 
「食唔死我就得啦後生仔，呵呵呵。」
 
「婆婆，不如我買個麵包俾你啦？」忽然間，我鼻子酸酸，我對婆婆起左惻隱之心。
 
「唔洗啦後生仔，我想靠自己，唔洗人地施捨。」
 
「唔係施捨……」我未講完，婆婆就已經轉身想走。
 
小貞衝去婆婆前面，攔住婆婆講：「會肚痛！會病架！」
 
婆婆見到小貞咁樣，笑得更加開懷，「小妹妹有心啦！我都幾廿歲人囉，仲有乜好驚呢？」之後佢無理到小貞，就繼續向前走左。
 
小貞呆呆咁望住婆婆好辛酸既背影，似乎唔係好明白點解婆婆要咁做。
 
我走過去拖返住小貞隻手，然後默默地行返出去，有啲事、有啲人，或者我地係點樣都幫唔到佢。
 
行出左後巷，咁啱抬頭就見到啱先食野間餐廳門口到貼住左張單張：
「此處有待用券
愛心待用券，買一份餐送一份溫暖！
今日待用券數量：5張」
 
望住呢張單張，我決定做一件我平生都無諗過會做既事，就係入去同個侍應大叔講：「唔該，我想買三張待用券。」
 
本來諗住只係出黎跑步，所以身上無咁多錢，只係夠買三張。
 
個侍應大叔有啲錯愕，佢個表情應該係講緊，望落我個樣都唔似係會做啲咁有愛心既事既人，不過最後佢都係笑笑口、好爽快咁樣賣左三張待用券俾我。
 
「你想放係餐廳到等啲人過黎用，定係你自己拎走俾啲有需要既人？」侍應大叔忽然好好禮貌咁講。
 
正當我諗緊既時候，小貞就眼仔碌碌咁問：「乜野黎架？」
 
我踎低同小貞解釋道：「係待用券黎，好似婆婆咁既人有待用券既話，佢地就可以係到食野，唔洗用污糟油煮飯食啦。」
 
小貞聽到之後好開心咁舉起雙手，圍住我氹氹轉嗌：「好耶！好耶！婆婆有飯食啦！」
 
最後，我決定留兩張係餐廳，俾一張俾婆婆。
 
不過當我走返去後巷既時候，婆婆已經不見蹤影。
 
「咁點算呀……」小貞失落地道。
 
我摸摸小貞個頭仔，再話：「唔緊要啦，我地俾返餐廳，等啲有需要既人過黎用。」
 
小貞用力咁點點頭，再講：「嗯！婆婆一定會返黎用既！」